Avyakt murli du jeudi 11 juin 1970

>

11-06-70 om shanti avyakt baapdaada madhuban

“vishvapti banne ki saamagri”

aaj satguruvaar ke divas kis liye vishesh bulaaya hai? aaj kumaariyon ka kaun-sa divas hai? (samaapti samaaroh)samaapti samaaroh nahin hai lekin aaj ka satguroovaar ka din vishvapti banne ki shubh avinaashi dasha baithne ka divas hai। samjha। to aaj baapdaada vishvapti banaane ki kya saamagri laaye honge?jab koi samaaroh hota hai to usmein saamagri bhi hoti hai। to aaj vishvapti banaane ke samaaroh mein vishesh kya saamagri laaye hain?taaj, takhta aur tilak। phir in teenon ko dhaaran karne ki himmat hai? taaj ko dhaaran karne liye takhta par viraazmaan hone ke liye aur tilak ko dhaaran karne ke liye kya karna padega? agar yeh dhaaran karne ki himmat hai to uske liye kya karna padega? ek to tyaag, doosra tapasya aur seva। tilak ko dhaaran karne ke liye tapasya aur taaj ko dhaaran karne ke liye tyaag aur takhta par viraazmaan hone ke liye jitni seva karenge utna ab bhi takhta nasheen aur bhavishya mein bhi takhta nasheen banenge। in teenon baaton se hi teenon cheezen dhaaran kar sakenge। agar ek bhi dhaarna kam hai to phir vishvapti nahin ban sakenge। samjha। to in teenon gunon ki apne mein sampoorn dhaarna ki hai? teenon mein se ek bhi chhoote nahin tab shoorveer ka jo naam diya hai woh kaarya kar sakengi? teenon ki pratigya ki hai? tyaag kiska karenge? sabhi se bade se bada tyaag kya hai? ab service par upasthit ho rahi ho to uske liye mukhya yahi dhaarna rakhna hai ki main pan ka tyaag। mainne kiya,main yeh jaanti hoon, main yeh kar sakti hoon,yeh main pan ka jo abhimaan hai uska tyaag karna hai। main ke bajaay baapdaada ki sunaai hui gyaan ki baaton ko varnan karo। main yeh jaanti hoon। nahin। baapdaada dvaara yeh jaana hai। gyaan mein chalne ke baad jo sva abhimaan aa jaata hain, uska bhi tyaag। jab itni tyaag ki vritti aur drishti hogi tab sadaiv smriti mein baap aur daada rahega aur mukh par bhi yahi bol rahenge। samjha। tab vishvapti ban sakengi। vishwa ki service kar sakengi।

apni dhaarna ko avinaashi banaane ke liye va sada kaayam rakhne ke liye do baaten yaad rakhni hai। kaun si? vishesh kanyaaon ke liye hain। ek to sabhi baaton mein simple rehna aur apne ko sample samajhna। jaise aap sample ban dikhaayenge vaise hi anek aatmaaen bhi yeh sauda karne ke liye paatra banengi। isliye yeh do baaten sadaiv yaad rakho। apne ko aisa shreshtha sample banaaya hai?jo achha sample nikalta hai unko phir chhaap bhi lagaai jaati hai। aap kaun si chhaap lagaakar jaaengi,jo kabhi mite nahin? shivshaktiyaan aur brahmaakumaariyaan। saakaar mein do nimitta bani hui badi authority yeh chhaap laga rahi hain। isliye yeh yaad rakhna ki mitenge lekin kab hatenge nahin। sanskaaron mein, chaahe service mein, chaahe sambandh mein sarva baaton mein apne ko mitaayenge lekin hatenge nahin। hatna kamjori ka kaam hai। shivshaktiyaan apne ko mitaati hain na ki hatti hain। to yeh baaten yaad rakhni hain। phir is group ka practical paper kab hoga?abhi ka result final ka nahin hain। abhi to paper dene ke liye ja rahe ho। phir uski result dekhenge। yeh group aage kadam badha sakta hai। baapdaada aisi ummeed rakhte hain। isliye ab aisa samjho ki jo bhi karmabandhan hain usko bahut jaldi kaatkar phir madhuban mein sampoorn samarpan ka samaaroh manaane aana hai। is lakshya se jaana hai। phir is group se kitnon ka sampoorn samarpan ka samaaroh hota hai। aaj to mahaabli banne ki baaten sunaai hain। phir mahaabli chadhne ke liye aayenge to baap-daada khoob sajaayenge।sajaakar phir svaaha karna hota hai। jitna baap-daada ke snehi utna phir sahayogi bhi banna hai। sahayogi tab banenge jab apne mein sarvashaktiyon ko dhaaran karenge। phir svaaha hona sahaj hoga। jo bhi koi shakti ki kami ho to woh aaj ke din hi apne mein bharkar jaana। koi bhi kami saath le na jaana। abhi sirf hisaab-kitaab chuktu karne jaate ho। sarvashaktiyaan apne mein bharkar jaayenge tab chuktu kar sakenge na। to ab final paper ke numbers to jab practical kar dikhaayenge tab niklenge।

achha !!!