Avyakt murli du mercredi 10 septembre 1975

>

10-09-75 om shanti avyakt baapdaadaamdhuban

knowledgeful aur powerful aatma hi successful

gyaan ke saagar, shakti ke saagar, sada jaagti-jyoti athak sevaadhaari vatson ko nidra-jeet banaane vaale shiv baba bole-

sada har sthiti mein master knowledgeful (gyaanmoorta) powerful (shakti ya yogmoorta) aur successful (saphalta-moorta) svayan ko anubhav karte ho? kyonki knowledgeful aur powerful aatma ki result (parinaam) hai successful। vartamaan samay in donon subjects yaad arthaat powerful aur gyaan arthaat knowledgeful। in donon subjects (vishay) ka object (udeshya) hai successful। isi ko hi pratyaksha phal kaha jaata hai। is samay ka pratyaksha phal aapke bhavishya phal ko prakhyaat karega। aise nahin ki bhavishya phal ke aadhaar par ab ke pratyaksha phal ko anubhav karne se vanchit rah jaao। aise kabhi bhi sankalp nahin karna ki vartamaan mein kuchh dikhaai nahin deta hai va anubhav nahin hota hai va praapti nahin hoti hai,yeh padhaai to hai hi bhavishya ki। bhavishya mera bahut ujjaval hai। abhi main gupta hoon ant mein prakhyaat ho jaaoonga-lekin bhavishya ki jhalak,bhavishya ki praalabdha va antim samay par prasiddha hone vaali aatma ki chamak ab se sarva ko anubhav honi chaahiye। isliye pahle pratyaksha phal aur saath mein bhavishya phal। pratyaksha phal nahin to bhavishya phal bhi nahin। svayan ko svayan pratyaksha bhale hi nahin kare, lekin unka samparka,sneh aur sahayog aisi aatma ko svatah hi prasiddha kar dete hain।

yeh eeshvareey law (niyam) hai ki svayan ko kisi bhi prakaar se siddha karne vaala kabhi bhi prasiddha nahin ho sakta। isliye yeh sankalp ki main svayan ko jaanta hoon ki main theek hoon doosre nahin jaante va doosre nahin pahchaante, aakhir pahchaan hi lenge va aage chalkar dekhna kya hota hai?yeh bhi gyaan swaroop, yaad swaroop aatma ke svayan ko dhokhe dene vaali albelepan ki meethi nidra hai। aise alpakaal ke aaraam dene vaale va alpakaal ke liye apne dil ko dilaasa dene vaali maaya ki nidra ke anek prakaar hain। jis bhi baaton mein apni praalabdha ko va pratyaksha phal ki praapti ko khote ho to avashya anek prakaar ki nidra mein sote ho। isliye kahaavat hai - ‘jin soya tin khoya।’ to khona hi sona hai। aise kabhi bhi samay par saphalta pa nahin sakte arthaat successful nahin ban sakte।

saare kalpa ke andar sirf is sangam yug ko drama plen anusaar vardaan hai - kaun-sa? sangamayug ko kaun-sa vardaan hai? ‘pratyaksha phal ka vardaan’sirf sangamayug ko hai। abhi-abhi dena,abhi-abhi milna। pahle dekhte ho - phir karte ho-pakke saudaagar ho। sangamayug ki visheshta hai ki is yug mein hi baap bhi pratyaksha hote hain, oonch te oonch brahman bhi pratyaksha hote hain। aap sabke 84janmon ki kahaani bhi pratyaksha hoti hai। shreshtha knowledge bhi pratyaksha hoti hai। is kaaran hi pratyaksha phal milta hai। pratyaksha phal ka anubhav kar rahe ho? pratyaksha phal praapta hote samay bhavishya phal ko sochta rahe aisi aatma ko kaun-si aatma kahenge?aisi aatma ko master knowledgeful kahenge ya yeh bhi ek agyaan hai? kisi bhi prakaar ka agyaan usko, agyaan ki neend kehte hain। apne aap ko check karo ki kisi bhi prakaar ke agyaan neend mein soye hue to nahin ho?

sada jaagti-jyoti bane ho? jaagne ki nishaani hai jaagna arthaat paana। to sarva praapti karne vaale sada jaagti-jyoti ho? sada jaagti-jyoti banne ke liye mukhya kaunsi dhaarna hai, jaante ho? jo saakaar baap mein vishesh thi - woh bataao?saakaar baap ki vishesh dhaarna kya thi?jaagti-jyoti banne ke liye mukhya dhaarna chaahiye ‘athak’ banne ki। jab thakaavat hoti hai to neend aati hai -saakaar baap mein athak-pan ki visheshta sada anubhav ki। aise follow father karne vaale sada jaagti-jyoti bante hain। yeh bhi check karo ki chalte-chalte koi bhi prakaar ki thakaavat agyaan ki neend mein sula to nahin deti? iseeliye kalpa pahle ki yaadgaar mein bhi nidraajeet banne ka vishesh gun gaaya hua hai। anek prakaar ki nidra se nidraajeet bano। yeh bhi list nikaalna ki kis-kis prakaar ki nidra nidraajeet banne nahin deti jaise nidra mein jaane se pahle nidra ki nishaaniyaan dikhaai deti hai us neend ki nishaani hai ubaasi aur agyaan neend ki nishaani hai udaasi। isi prakaar nishaaniyaan bhi nikaalna - iski do mukhya baaten hain। ek aalasya, doosra albelaapan। pahle yeh nishaaniyaan aati hain - phir neend ka nasha chadh jaata hai। isliye is par achhi tarah se chaiking (jaanch) karna। chaiking ke saath change (parivartan) karna। sirf chaiking nahin karna - chaiking aur change donon hi karna,samjha? achha!

aise svayan ke parivartan dvaara vishwa ko parivartan karne vaale, baap samaan sada athak,har sankalp,bol aur karma ka pratyaksha phal anubhav karne vaale, sarva praapti swaroop vishesh aatmaon ko baapdaada ka yaad-pyaar aur namaste। om shanti।