Avyakt murli du mercredi 1 octobre 1975 - 1

> 01-10-75 om shanti avyakt baapdaadaamdhuban

ekaanta, ekaagrata aur dridh-sankalp se siddhi ki praapti

siddhi swaroop banaane vaale, bhavishya phal ke saath-saath vartamaan pratyaksha phal dene vaale, praaneshvar shiv baba bole -

aaj baapdaada koi-koi vishesh aatmaon ko kisi kaarya-arth is sangathan se chun raha hai। kis kaarya-arth chun raha hai woh samajhte ho? aaj baapdaada srishti ki sair par nikle, ek to khaas videshi bachchon dvaara videsh seva aur bhinna-bhinna prakaar ke convert (doosre dharma mein badle hue) hue bachchon ko dekhne ke liye। seva-kendra aur sevaadhaari bachche, jinhon ke man mein dinraat pratyakshata ka bol baala karne ka ek hi sankalp hai। aise sevaadhaari athak lagan se din-raat mehnat mein lage huye hain। bachchon ko dekh baapdaada harshit hote the। nae-nae bachchon ki fast lagan ki umang ki,milne arth tadapne ki, patange samaan baap par high-jump lagaane ki soorat aur seerat dekhi। guldasta achha tha - variety phoolon ki shobha sundar lag rahi thi - kaliyaan aur patte variety dekhe kai aatmaayen meethe ulhaane vaali bhi dekhi। kai aatmaayen milan ki khushi mein ansuvan moti ki maalaayen baapdaada ke prati pahnaate hue bhi dekhi। aisi pahchaanti hui moorta jo baar-baar milan ke geet gaane vaali bhi thi aur phir videsh ka sair kiya।

doosra tha chaaron or ki agyaani va bhakta aatmaon ka sair। usmein kya dekha? ek taraph anek aatmaaen apne shareer nirvaah-arth jeevan ke saadhnon arth kisi-na-kisi yantron dvaara svayan mein vyasta thi। saath-saath kuchh aatmaayen vinaash- arth yantra refine karne mein vyasta thi। doosri taraph kai grihasthi aur bhakta aatmaayen apne jantra-mantra se apni bhaavna ka phal paane ke liye va alpakaal ki pratyaksha praapti karne ke liye apne-apne kaarya mein vyasta thi। in sabmen vishesh bhaarat aur kuchh videsh mein bhi siddhi praapta karne ki kaamna se deviyon ka vishesh aahvaan kar rahi thi। majority siddhi ke peechhe jyaada vyasta thi। siddhi praapta karne ke liye svayan ko samarpan karne ko bhi taiyaar ho jaate। siddhi ki vidhi mein mukhya do baaten karte hain। koi bhi siddhi ke liye ek to ekaanta doosri ekaagrata, donon ki vidhi dvaara siddhi ko paate hain।

to aaj baapdaada siddhi swaroop bachchon ko chun rahe the। jinhon ke yaadgaar chitron dvaara bhi ab tak anekon ko anek siddhiyaan praapta ho rahi hain। us samay siddhi ki praapti ka drishya dekhne vaala hota hai। jaise aap logon ko yaad dvaara atiindriy sukh ka anubhav hota hai vaise hi bhakton ko bhi siddhi praapta karne ke samay ke alpakaal ka sukh us samay ke liye kam anubhav nahin hota। aisa sair karne ke baad saakaar swaroop-dhaari bachchon ko dekha। bhakta jin deviyon dvaara siddhi praapta kar rahe hain, vahi deviyaan kab svayan bhi siddhi praapta karne ka sankalp rakh rahi hain। yeh kyon? chalte-chalte yeh sankalp zaroor utpanna hota hai, ki mehnat karte hue bhi siddhi kyon nahin? samay pramaan sampoorn stage ki pratyakshata kam kyon? to baap bhi prashn karte hain - kyon? siddhi swaroop ki mukhya baat kaun-si apnaani pade?jaise kalpa pahle paandavon ka gaayan hai ki second mein jahaan teer lagaaya vahaan ganga pragat hui arthaat second mein asambhav bhi sambhav pratyaksha phal ke roop mein dikhaai diya। isko hi siddhi kaha jaata hai। yeh nahin hota,kyonki pratyaksha-phal ki praapti ke liye har second apni sampoorn sarva shakti sampanna swaroop ki smriti pratyaksha sankalp roop mein nahin rehti। main purushaarthi hoon, sampanna ho hi jaaoonga,hona to zaroor hai-nambarvaar hona hi hai। hamaara kaam hai mehnat karna,woh to yathaashakti kar hi rahe hain - yeh har second ka sankalp roopi beej sarva shakti sampanna nahin hota hai। us samay ke sankalp mein ho hi jaayega arthaat bhavishya ka sankalp bhara hua hota hai। dridh nishchay va pratyaksha phal ke ras ka bal bhara hua na hone ke kaaran siddhi bhi pratyaksha nahin। lekin do ghadi baad,ghante baad ya kuchh dinon baad bhavishya praapti ho jaati hai - to iska kaaran samjha? aapke sankalp roopi beej ke kaaran hi pratyaksha siddhi nahin hoti। anek prakaar ke saadhaaran sankalp hote hain। jaise ki samay pramaan hona hi hai,abhi saare taiyaar kahaan huye hai? abhi to aage ke number hi taiyaar nahin hue hain। final to aath hi hone hain। aise-aise bhavishya knowledge ke saadhaaran sankalp aapke beej ko kamzor kar dete hain aur yahi bhavishya sankalp jo us samay use nahin karna chaahiye,lekin us samay na sochte hue bhi use kar lete ho - jis kaaran pratyaksha phal bhi bhavishya phal ke swaroop mein parivartan ho jaata hai।

to pratyaksha-phal paane ke liye hi sankalp roopi beej ko dridh nishchay roopi jal se ki yeh to hua hi pada hai - hona hi hai - is jal se power full banaao। tab hi pratyaksha siddhi-swaroop ho jaayenge। jaise aapke yaadgaar chitron dvaara siddhi praapta karne vaalon ki vishesh do baaton ki vidhi sunaai। ekaantavaasi aur ekaagrata। yahi vidhi kalpa pahle muaaphik saakaar mein apnaao। ekaagrata kam hone ke kaaran hi dridh nishchay ki kami hoti hai। ekaantavaasi kam hone ke kaaran hi saadhaaran sankalp beej ko kamzor bana deta hai। isliye is vidhi dvaara siddhi-swaroop bano, jo sair par dekhe vahi aap ho na? to yaadgaar roop ko ab yaad roop banaao। paandavon ki yaadgaar se bhi bhakta log siddhi maangate hain। achha।

aise anek aatmaon ko siddhi praapta karaane vaale sarva siddhi swaroop master vidhaata aur vardaata, apne har sankalp dvaara anekon ki anek kaamnaayen poorn karne vaale sarva praapti swaroop aise sarva-mahaan aatmaon ko,videshi aatmaon sahit sarva ko baapdaada ka yaad-pyaar aur namaste।

is murli ke vishesh tathya

1. kisi bhi siddhi ke liye ek to ekaanta aur doosre ekaagrata donon ki vidhi dvaara siddhi ki praapti hoti hai। 2. dridh nishchay ki kami va har second apni sampoorn sarvashakti sampanna swaroop ki smriti pratyaksha sankalp roop mein nahin rehti hai, isi kaaran siddhi bhi pratyaksha nahin hoti।

3. pratyaksha phal paane ke liye sankalp roopi beej ko dridh nishchay roopi jal se powerful banaao to pratyaksha siddhi swaroop ho hi jaayenge।