Avyakt murli du lundi 20 octobre 1975 - 2

>

20-10-75 om shanti avyakt baapdaadaamdhuban

sarva-praaptiyon ko sahejne ka sahaj saadhan - parhez

sarva praaptiyon aur shaktiyon ka sahaj anubhav karaane vaale roohaani pita shiv bole:-

apne ko master almighty-athoreti samajhte ho? baap dvaara jo sarva-shaktiyon ki, sarva knowledge ki, sva par raajya karne ki aur vishwa par raajya karne ki athoreti mili hai us athoreti ko kahaan tak swaroop mein laaya hai? yeh roohaani nasha nirantar buddhi mein rehta hai? saare din ke andar sva par raajya karne ki athoreti kahaan tak practical mein rehti hai,yeh chaiking karte ho? knowledge ki athoreti se powerful swaroop kahaan tak rehta hai?sarva praapta hui shaktiyon ki athoreti maaya-jeet va prakriti-jeet banne mein kahaan tak practical mein anubhav hoti hai? jab jis shakti dvaara jo kaarya karaana chaaho vahi kaarya saphalta roop mein dikhaai de - aisi athoreti anubhav karte ho?behad ka baap sabhi bachchon ko aap samaan almighty athoreti banaate hain - to baap samaan bane ho?kahaan tak bane hain, yeh chaiking karna aata hai?

kai bachche baapdaada se rooh-roohaan karte hue yeh ek baat baar-baar kehte hain ki check karte hain, lekin apne ko change nahin kar paate। jaante hain, maante hain,aur sochte hain lekin kar nahin paate hain। yukti chalaate hain lekin mukti nahin paate hain, uske liye kya karen?iska kaaran ek chhoti-si galti va bhool hai jo ki is bhool-bhulaiya ke chakkar mein laati hai-woh kya hai? jaise davaai chaahe kitni bhi badhiya ho aur apna dose (Dose) bhi le rahe hon lekin ek baar bhi parhez mein se koi ek vastu sveekaar kar li va jo sveekaar karni thi woh nahin ki to davaai dvaara vyaadhi se mukti nahin pa sakte hain। isi prakaar yahaan bhi knowledge roopi davaai lete hain arthaat knowledge ko buddhi mein daudaate hain-yeh yathaartha hai ya yeh aythaartha hai,yeh karna chaahiye ya nahin karna chaahiye,yeh wrong hai ya yeh right hai aur yeh haar hai ya jeet hai - yeh samajh buddhi mein hai? arthaat samay pramaan davaai ka dose le rahe hain,rooh-roohaan kar rahe hain,class kar rahe hain, seva kar rahe hain aur yeh sab dose le rahe hain lekin jo pahli-pahli parhez va maryaada hai –

pahli parhez - ‘ek baap doosra na koi’ - isi smriti mein aur samarthi mein rehna-yeh mool parhez nirantar nahin karte hain aur hi kahin na kahin apne ko yeh kah kar dhokhe mein rakhte hain ki main to hoon hi shiv baba ka, aur mera hai hi kaun?lekin practical mein aisa smriti-swaroop ho jo sankalp mein bhi ek baap ke sivaay doosra koi vyakti va vaibhav, sambandh-samparka va koi saadhan smriti mein na aaye। yeh hai kadi arthaat mukhya parhej। is parhez mein,albele hone ke kaaran,man-mat ke kaaran, vaataavran ke prabhaav ke kaaran ya sangadosh ke kaaran nirantar nahin rah sakte। jitna attention dena chaahiye utna nahin dete hain। alpakaal ke liye full attention rakhte hain phir dheere-dheere‘full’ khatma ho, attention ho jaata hai। uske baad attention anek prakaar ke tension mein chala jaata hai। paristhitiyon va pareekshaaon-vash attention badal tension ka roop ho jaata hai। isi kaaran jaise smriti badalti jaati hai to samarthi bhi badalti jaati hai। almighty athoreti ke badle maaya ke vasheebhoot hone ke kaaran vasheekran mantra kaam nahin karta arthaat yukti-mukti nahin dilaati hai। aur phir chillaate hain ki chaahte bhi hain phir kyon nahin hota? to mool parhez chaahiye-is ek baat par nirantar attention rakho।

doosri parhez - baap ne to adhikaar diya hai apne aap ka maalik banne ka va rachayita-pan ka lekin rachayita banne ke bajaay svayan ko rachna arthaat deh samajh lete hain। jab rachayita-pan bhoolte ho tab maaya arthaat deh-abhimaan tum rachayita ke oopar rachayita banti hai arthaat apna adhikaar rakhti hai। rachayita par koi adhikaar nahin kar sakta, vishwa ke maalik ke oopar koi maalik nahin ban sakta। maaya ke aage rachna ban jaate ho aur adheen ban jaate ho। to is maalikpan ki va adhikaareepan ki smriti swaroop rahne ki parhez nirantar nahin karte ho?

teesri parhez - baap dvaara sabke ‘trustee’bane ho?is tan ke bhi trustee ho,man arthaat sankalp ke bhi trustee, laukik va alaukik jo pravritti mili hai usmein bhi trustee ho,lekin trustee ke bajaay grihasthi ban jaate ho। grihasthi ki durdasha ka model aap banaate ho। kaun-sa model banaate ho jo sabhi taraph se khincha rehta hai, doosra grihasthi ko gadhe ke roop mein dikhaaya hai। anek prakaar ke bojh dikhaaye gae hain - aisa model banaate ho na?jab grihasthi ban jaate ho to merepan ke anek prakaar ke bojh ho jaate hain। sabse royal roop ka bojh hai - woh ‘meri zimmevaari hai isko to nibhaana hi padega’ aur koi grihasthi heen to apni karma-indriyon ke vash ho anek ras mein samay ganvaane ke grihasthi to bahut hain। aaj kan-ras vash samay ganvaaya,kal jeebh-ras vash samay ganvaaya। aise grihasthi mein phansane ke kaaran trasteepan bhool jaate ho। yeh tan bhi mera nahin, tan ka bhi trustee hoon। to trustee, maalik ke bigar kisi bhi vastu ko apne prati use nahin kar sakte hain। to karma-indriyon ke ras mein masta ho jaana usko bhi grihasthi kahenge,na ki trustee, kyonki shreshtha se shreshtha maalik jiske aap trustee ho unki shreemat ek ke ras mein sada ek-ras sthiti mein rahne ki hai। in karma-indriyon dvaara ek ka hi ras lena hai। to phir anek karma-indriyon dvaara bhinna-bhinna ras kyon lete ho? to laukik va alaukik pravritti mein grihasthi ban jaate ho। isliye anek prakaar ke bojh-jiske liye baap direction dete hain ki sab mere ko de do - woh bojh kaarya hi apne oopar uthaaye, bojh dhaaran karte hue udna chaahte ho। lekin kar nahin paate hain। to is parhez ki kami ke kaaran yukti chalaate ho lekin mukti nahin paate ho।

baapdaada ko bhi aise bachchon par taras padta hai। master saagar aur ek anchali ke pyaase hain। arthaat yog aur gyaan dvaara jo anubhav ki praapti hoti hai us anubhav ki anchali ke pyaase hain। isliye ab parhez ko apnaao to sarva- praaptiyaan sada anubhav hon। sarva-praaptiyon ki property ke maalik aise, baalak so maalik, praapti se vanchit hon?yeh to baap se bhi nahin dekha jaata। to ab 63 janmon ke grihasthi-pan ke sanskaar chhodo। tan ke aur man ke trustee bano। sab baap ki jimmevaari hai, meri jimmevaari nahin, is smriti se halke ban jaao to phir jo sochenge vahi hoga arthaat high jump lagaayenge। to yeh rona chillaana rooh- roohaan mein parivartan ho jaayega। rooh-roohaan dvaara roohon mein raahat bhar sakenge। nahin to kabhi apni shikaayten aur kabhi paristhitiyon ki shikaayten ismen hi rooh- roohaan ka samay samaapta kar deti hain। to ab shikaayton ko roohaaniyat mein badli karo,tab sangamayug ke sukhon ko anubhav karenge। samjha?

aise sada roohaaniyat mein rahne vaale, kadam-kadam par shreemat par chalne vaale, aise aagyaakaari,pharmaanvardaar,aur har pharmaan ko swaroop mein laane vaale, aise baap ke priy gyaani tu aatmaayen aur yogi tu aatmaayen bachchon ko baapdaada ka yaad-pyaar aur namaste। achha। om shanti।

is murli ka saar

1. kai bachchon ki baapdaada se yeh shikaayat hai ki kuchh jaante maante aur sochte hue bhi kar kyon nahin paate hain?sarva praaptiyon ko apne jeevan mein anubhav kyon nahin kar paate hain? iska kaaran yeh hai ki gyaan-aushdhi ka sevan karne ke saath-saath dhaarnaaon roopi parhez nahin rakhte hain arthaat eeshvareey maryaada mein nahin rehte hain।

2. pahli parhez ek baap doosra na koi ko bhool doosra koi vyakti,vaibhav, sambandh,samparka ya saadhan apna lete hain, doosri parhez svayan ko rachayita arthaat aatma samajhne ke bajaay rachna arthaat deh samajh lete hain,teesri parhez trustee ke bajaay grihasthi ban jaate hain।

3. to ab parhez ko apnaao, shikaayton ko roohaaniyat mein badli karo to hi sangam yug ke sukhon ka anubhav kar sakenge।