Avyakt murli du samedi 14 mai 1977

>

14-05-77om shanti avyakt baapdaadaamdhuban

svamaan aur pharmaan

sada pharmaan par chalne vaale pharmaanvardaar, sada svamaan mein rahne vaale, sada bhaagya ka sumiran karne vaale harshit mukh bachchon prati baba bole-

sada bhaagyavidhaata baap dvaara praapta hue apne bhaagya ko sumiran karte hue, harshit rehte ho? kyonki saare kalpa ke andar sarva shreshtha bhaagya is samay hi praapta karte ho। is samay hi sada bhaagyashaali sthiti ka anubhav kar sakte ho। bhavishya nai duniya mein bhi aisa bhaagya praapta nahin hoga। to jitna baap bachchon ko shreshtha bhaagyashaali samajhte hain, utna hi harek svayan ko samajhte hue chalte ho? isi ko hi kaha jaata hai - ‘svamaan mein sthit hona।’ man-vachan-karma teenon mein dhyaan rakho। ek to sada svamaan mein rehna; doosra,har kadam baap ke pharmaan par chalna hai। svamaan aur pharmaan in do baaton ka dhyaan rakhna hai। saath-saath sarva ke samparka mein aane mein sammaan dena hai।

svamaan mein sthit hone se sada vighna vinaashak sthiti mein honge। svamaan kya hai, usko to achhi tarah se jaante ho? jo baap ki mahima hai, vahi aapka svamaan hai। sirpa ek mahima bhi smriti mein rakho, to svamaan mein svatah hi sthit ho jaayenge। svamaan mein sthit hone se, kisi bhi prakaar ka abhimaan, chaahe deh ka va buddhi ka abhimaan, naam ka abhimaan, seva ka abhimaan,va vishesh gunon ka abhimaan, svatah samaapta ho jaata hain, isliye sada vighna-vinaashak hote hain। aise svamaan mein sthit hone vaala sada nirmaan rehta hai। abhimaan nahin lekin nirmaan। isse sarva dvaara sada svatah hi sada maan milta hai। maan lene ki ichchha se pare hone ke kaaran sarva dvaara shreshtha maan milne ka paatra ban jaata hai - yeh anaadi niyam hai। sarva dvaara maan maangane se nahin milta,lekin sammaan dene se, svamaan mein sthit hone se, prakriti daasi ke samaan,svamaan ke adhikaar ke roop mein maan praapta hota hai। maan ke tyaag mein sarva ke maanneey banne ka bhaagya praapta hota hai। jaise svamaan mein rahne vaalon ka sirf is ek janma mein maan nahin hota, lekin saare kalpa mein - aadha kalpa apne royal raajaai family (parivaar) dvaara aur praja dvaara maan praapta hota hai, aur aadha kalpa bhakton dvaara maan praapta hota hai। itne tak jo last janma mein chaitanya roop mein apne praapta hue maan ki praalabdha ko svayan hi dekhte ho। chaitanya apne jad chitron ko dekhte ho na। to saare kalpa mein praapta hue maan ka aadhaar kya hua?alpa kaal ke vinaashi maan ka tyaag। arthaat svamaan mein sthit ho,nirmaan ban,sammaan dena hai। yeh dena hi lena ban jaata hai। sammaan dena arthaat us aatma ko umang ullaas mein laakar aage karna hai। alpa kaal ka punya,alpa kaal ki vastu dene se hota hai, va alpa kaal ke sahayog dene se hota hai। lekin yeh sada kaal ka umang utsaah arthaat khushi ka khazaana va svayan ke sahayog ka, aatma ko sada ke liye punyaatma bana deta hai। isliye yeh bade te bada punya ho jaata hai। ek janma mein kie hue is punya ka phal saara kalpa milta hai। is kaaran kaha ki ‘sammaan dena, dena nahin lekin lena hai।’ laukik roop mein bhi koi punya ka kaam karta hai to sabke aage maanneey hota hai। lekin is shreshtha punya ka phal - poojneey aur maanneey donon bante ho। to apne aap se poochho, aise punyaatma ban, sadaiv punya ka kaarya karte ho?sammaan do va sammaan milna chaahiye,va mera sammaan kyon nahin rakha jaata,iska kyon rakha jaata? lene vaale ho ya dene vaale ho?yeh bhi lene ki bhaavna royal begarpan (ROYAL Beggar)arthaat bhikhaareepan hai। to svamaan aur sammaan। svamaan mein rehna hai sammaan dena hai।

baaki kya karna hai? har kadam pharmaan par chalna hai। har kadam pharmaan par chalne vaale ke aage saari vishwa sada kurbaan jaati hai। saath-saath maaya bhi apne vansh sahit kurbaan ho jaati hai। arthaat surrender (samarpan) ho jaati hai। maaya baarbaar vaar karti hai, isse siddha hai ki har kadam pharmaan par nahin hai। sada pharmaan par na chalne kaaran, maaya bhi jhaatku roop mein kurbaan nahin hoti hai। isliye baar-baar vaar karti hai। aur baar-baar aap logon ko chillaane ke nimitta ban jaati hai। chillaana hua na - maaya aa gayi। aaj is roop mein aa gai। ab kya kare! maaya ko arthaat vighna ko kaise mitaaven? to jhaatku na hone ke kaaran, maaya bhi chillaati - aap bhi chillaate ho। isliye pharmaan par chalo, to woh kurbaan ho jaae। aap baap par kurbaan jaao, maaya aap par kurbaan jaayegi। kitna sahaj saadhan hai pharmaan par chalna। svamaan aur pharmaan sahaj hai na। is se janma-janmaantar ki mushkil se chhoot jaayenge। abhi sahaj yogi aur bhavishya mein sahaj jeevan hogi। aisi sahaj jeevan banaao। samjha? achha,

aise sada pharmaan par chalne vaale pharmaanvardaar, sada svamaan mein rahne vaale, alpa kaal ke vinaashi maan ko tyaag karne vaale, sada maanneey, poojneey ka part praapta karne vaale, aise baap par sada kurbaan hone vaali aatmaaen,sada sarva ke prati sammaan de, sneh lene vaali snehi aatmaon ko baap-daada ka yaad-pyaar aur namaste।

paandav sena yuddha ke maidaan par hai। paandavon ko mahaaveer kaha jaata hai। mahaaveer arthaat sada maayaajeet। mahaaveer kabhi maaya se ghabraate nahin, challenge karte hain। kisi bhi roop mein maaya aave,lekin parakhne ki shakti se maaya ko parakhte hue vijayi honge। to parakhne ki shakti aai hai?maaya ko door se aate hue parakh lete ho va jab maaya vaar karne shuru karti tab parakhte ho? jitni-jitni parakhne ki shakti tej hoti jaaegi to door se hi maaya ko bhaga denge। agar aa gai, phir bhagaaya, to usmein bhi time vesta (Time Waste;samay vyartha) ho jaata। phir aate-aate kabhi baith bhi jaaegi isliye aane hi nahin dena hai। aajkal ke jamaane mein doorandeshi banne ka abhyaas karna hoga। science ke saadhan bhi door se parakhne ka prayatna karte hain। pahle ya,tuphaan aana aur usse bachaav karna lekin abhi aise nahin hai। abhi to tuphaan aa raha hai, usko jaan karke bhagaane ka prayatna karte hain। jab science (vigyaan) bhi aage badh rahi hai to silence (Silence;shanti) ki shakti kitni aage chaahiye? door se bhagaane ke liye sadaiv ‘trikaaldarsheepan ki sthiti mein sthit raho।’har baat ko teenon kaalon se dekho - kya baat hai? vartamaan roop kya hai?aur pahle bhi is roop se aai thi aur ab jo aai hai usko samaapta kaise karen? to teenon ko dekhne se kabhi bhi maaya ka vaar aapke oopar haar khilaane ke nimitta nahin banega। lekin trikaaldarshi hokar nahin dekhte, vartamaan ko dekhte। isliye kabhi haar,kabhi jeet hoti, sada vijayi nahin hote। trikaaldarshi sthiti mein sthit rahne vaale se kabhi bhi maaya bach nahin sakti। agar baarbaar maaya ka vaar hota rahega to ati indriy sukh ka anubhav chaahte hue bhi kar nahin paayenge। jo gaayan hai, ‘ati indriy sukh sangamayug ka vardaan hai’ - yeh aur kisi yug mein nahin hota। yeh ab ka anubhav hai। to agar ati indriy sukh ka anubhav nahin kiya to brahman bankar kya kiya? jo braahmanpan ki visheshta hai - ati indriy sukh,woh nahin kiya to kuchh bhi nahin। isi kaaran sadaiv yeh dekho ki sada ati indriy sukh mein rehte hain।

baap-daada se prashn uttar

prashn:-ati indriy sukh mein rahne vaalon ki nishaani kya hogi?

uttar:-ati indriy sukh mein rahne vaala kabhi alpakaal ke indriy ke sukh ki taraph aakarshit nahin hoga। jaise koi saahookaar raaste chalte hue koi cheez par aakarshit nahin hoga - kyonki woh sampanna hai, bharpoor hai। isi reeti se ati indriy sukh mein rahne vaala indriyon ke sukh ko aise maanega jaise zahar ke samaan hai। to zahar ki taraph aakarshit hote hain kya?aise indriyo ke sukh se sada pare rahenge। mehnat nahin karni padegi,lekin knowledgeful hone ke kaaran uske saamne woh tuchchha dikhaai dega। agar chalte-chalte indriyon ke sukh ke taraph aakarshit hote, isse siddha hai ki ati indriy sukh ki anubhooti mein koi kami hai। ichchha hai lekin praapti nahin। jigyaasu hai,bachcha nahin। bachcha arthaat adhikaari, jigyaasu arthaat ichchha rakhne vaale। praapta ho - yeh ichchha nahin, lekin praapta hai - is adhikaar ki khushi mein rahne vaale। sada is ati indriy sukh mein raho। indriyon ke sukh ka anubhav kitne janma se kar rahe ho?usse praapti ka bhi gyaan hai na? kya praapta hua?kamaaya aur ganvaaya। jab ganvaana hi hai to phir abhi bhi us taraph aakarshit kyon hote?ati indriy sukh ki praapti ka samay abhi bhi thoda hai। yeh abhi nahin to kabhi nahin milega। iska sauda abhi nahin kiya to kabhi nahin kar sakenge। phir bhi sochte rehte - chhode,nahin chhode?baap kehte hain to chhodo to chhoote। kehte hain chhootta nahin hai। pakda khud hai aur kehte hain chhootta nahin hai। rachta to aap ho na। baar-baar thokar mat khaao।

prashn:-sada achal, adol rahne ke liye vishesh kis gun ko dhaaran karna hai?

uttar:-sada gun graahak bano। ab har baat mein gunagraahi honge to halchal mein nahin aayenge। gunagraahi arthaat kalyaankaari bhaavna। avgun dekhne se akalyaan ki bhaavna aur halchal mein rahenge। avgun mein gun dekhna, isko kehte hain-’gunagraahi।’avgun dekhte bhi apne ko gun uthaana chaahiye। avgun vaale se gun uthaao ki jaise yeh avgun mein dridh hai vaise ham gun mein dridh rahen। gun ka graahak bano avgun ka nahin।

prashn:-kaun sa bhojan aatma ko sada shaktishaali bana dega?

uttar:-khushi ka। kehte hain na khushi jaisi khuraak nahin। khushi mein rahne vaala shaktishaali hoga। drama ki dhaal ko achhi tarah se kaarya mein laane se sada khush rahenge, murjhaayenge nahin। agar sada drama hi smriti rahe to kabhi bhi murjha nahin sakte। sada khushi buddhi tak, knowledge ke roop mein nahin। koi bhi drishya ho apna kalyaan nikaal lena chaahiye। to sada khush rahenge।

aisi shreshtha bhoomi par aana arthaat bhaagyashaali banna। isi bhaagya ko sada kaayam rakhne ke liye sada attention - sthiti sada ekras rahe। ekras sthiti arthaat ek ke hi ras mein rehna aur koi bhi ras apni taraph kheenche nahin। agar kisi anya ras mein buddhi jaati hai to ekras nahin rah sakte।

baap ke samaan svayan ko knowledgeful arthaat gyaan ka saagar anubhav karte ho? knowledgeful arthaat sada satya karma karne vaale, vyartha nahin karenge। jab satya baap ke bachche hain, satayug sthaapan karte hain to karma bhi satya hone chaahiye। bol,karma, sankalp sab satya hone chaahiye। isko kehte ‘baap ke samaan master knowledgeful arthaat gyaan-swaroop।’