Avyakt murli du jeudi 16 juin 1977

>

16-06-77om shanti avyakt baapdaadaamdhuban

ek hi padhaai dvaara nambarvaar poojya pad paane ka guhya rahasya

srishti ke aadhaarmoortta, vishwa parivartak aatmaon prati baap-daada ke uchchaare hue mahaavaakya:-

aaj baap-daada har aatma ke purooshaartha karne ke karma ki gati aur purooshaartha anusaar raajya pad va poojya pad ki gati jo ki ati ramneek aur guhya hai woh dekh rahe hain। jaise purooshaartha mein nambarvaar hain, vaise hi pad aur poojya pad mein nambarvaar hain। jo number one shreshtha purushaarthi hain unheen ka raajya pad aur poojya pad ati shreshtha aur guhya rahasya bhara hai। poojya to sab bante hain। srishti ke liye sab purushaarthi aatmaaen param poojya hain। ashta ratna hain va 108 ki maala hai va 16 hajaar ki maala hai va 9 laakh praja pad vaale hain,lekin sabhi koi na koi roop mein poojya avashya bante hain। ab tak bhi anek anginat saaligraam bana kar pooja karte hain। lekin anek saaligraam roop ki pooja aur vishesh ishta-dev ke mandir roop ki pooja, usme antar kitna hota hai, unko jaante ho na?saaligraam roop mein anekon ki pooja hoti hai aur ashta dev ke roop mein naameegraami koi- koi aatma ki pooja hoti hai। 16hajaar ki maala bhi kabhi-kabhi sumiran karte।108ki maala anek baar sumiran karte hain, aur ashta ratnon ko va ashta devon ko va deviyon ko baap ke samaan sada apne dil mein yaad rakhte hain। itna antar kyon hua? baap-daada to sarva bachchon ko ek hi padhaai,ek hi lakshya - manushya se devta va vijayi ratna banne ko dete hain,phir bhi poojan mein itna antar kyon?koi ki double pooja arthaat saaligraam roop mein bhi aur devi ya devtaaon ke roop mein bhi,koi ki sirf saaligraam roop mein maala ke manke ke roop mein pooja hoti hai। iska bhi kya rahasya hai?mukhya kaaran hai aatmaabhimaani banne ka lakshya va aatmik swaroop mein sthit rahne ka purooshaartha,har brahman aatma janma se hi karte hain। aisa koi bhi brahman nahin hoga jo aatmaabhimaani banne ka purushaarthi na ho। lekin nirantar aatmaabhimaani,jisse karmaindriyon ke oopar vijay ho jaae, harek karmaindriy satopradhaan svachchha ho jaae - is subject mein arthaat deh ke puraane sanskaar aur sambandh se sampoorn marjeeva ho jaae, is purooshaartha mein number bante hain। koi purushaarthi ki karma indriyon par vijay ho jaati hai arthaat karmenndriy jeet ban jaate hain aur koi-koi aankh ke dhokhe mein, mukh dvaara anek ras lene ke dhokhe, isi prakaar koi na koi karmaindriy ke dhokhe mein aa jaate hain। arthaat sampoorn nirvikaari,sarva indriy jeet nahin ban paate hain। isi kaaran aise karma indriy par haar khaane vaale kamzor purushaartheeyon ki, oonch te oonch baap ke bachche banne ke kaaran, oonch baap ke sang ke kaaran, padhaai aur paalna ke kaaran vishwa ke andar shreshtha aatmaaen hone ke kaaran, aatma arthaat saaligraam roop mein pooje jaate hain। lekin sarva karmaindriy jeet na hone ke kaaran saakaar roop mein devi aur devta ke roop mein pooja nahin hoti hai। sampoorn pavitra na banne ke kaaran sampoorn nirvikaari,mahima yogya devi va devta roop ki pooja nahin hoti hai। sada baapdaada ke diltakhta nasheen na banne ke kaaran va sada dil mein ek dil lene vaale baap ki yaad va sada dil par dilvaala ki yaad nahin rehti। isliye bhakta aatmaaen bhi ashta dev ke roop mein dil mein nahin samaati hain। nirantar yaad nahin to sada kaal ka mandir roop mein yaadgaar bhi nahin। to pharka pad gaya na?single pooja aur double pooja mein kitna antar raha! woh praja ka poojan roop aur woh raajya pad praapta karne vaale pooja ka roop। ismen bhi antar hai।

vishesh devtaaon ka har karma ka poojan hota hai aur koi-koi devtaaon ka roj poojan hota hai, parantu har karma mein nahin। koi-koi ka poojan kabhi vishesh nishchit dinon par hota hai iska bhi rahasya hai। apne aap se poochho ki - ham kaun se poojya bante hain? agar koi bhi subject mein vijayi nahin bane, to jaise khandit moortti ka poojan nahin hota, poojya se saadhaaran patthar ban jaata,koi moolya nahin rehta, aise agar koi bhi subject mein sampoorn vijayi nahin bante to ‘param poojya’ nahin ban sakte। poojya banenge aur gaayan yogya banenge। gaayan yogya kyon bante? kyonki baap ke bachche banne ke kaaran,baap ke saath-saath part bajaane ke kaaran, baap ki mahima ke gungaan karne ke kaaran, yatha shakti tyaag karne ke kaaran,va yatha shakti yaad mein rahne ke kaaran banti hain।

aur poojan ka rahasya hai - ek pavitrata ke kaaran pooja hai, doosra shreshtha aatmaon ke sarva shaktivaan baap dvaara jo shaktiyon ki dhaarna ki hai, un shaktiyon ke bhi bhinna roop se yaadgaar roop mein pooja hoti hai, jaise jin aatmaon ne vidya arthaat gyaan dhaaran karne ki shakti sampoorn roop mein dhaaran ki hai to gyaan arthaat knowledge ki shakti ka yaadgaar‘sarasvati’ke roop mein hain। sanhaar karne ki shakti ka yaadgaar durga ke roop mein hain। gyaan dhan ko dene vaali mahaadaani ka,sarva khajaanon ke dhan ko dene vaali lakshmi ke shreshtha roop mein pooje jaate hain। har vighna par vijay praapta karne ka yaadgaar - vighna vinaashak roop mein pooja jaata hai। maayaajeet arthaat maaya ke vikraal roop ko bhi sahaj aur saral banaane ki shakti ka poojan, mahaaveer ke roop mein hai। to shreshtha aatmaon ki har shakti aur shreshtha karma ka bhi poojan hota hai। shaktiyon ka poojan har devi devta ki pooja ke roop mein dikhaaya hua hai to aise poojya, jinhon ke har shreshtha karma aur shaktiyon ka poojan hai usko kaha jaata hai - param poojya। to sada apne ko sampoorn banaao। check karo ki khandit moortti hoon va poojya moortti hoon?gaayan hai sampoorn nirvikaari va16 kala sampanna। sirf nirvikaari bane ho ya sampoorn nirvikaari bane ho? akhand yog hai va khandan hota hai?achal hai va halchal hai? baap kya chaahte hain? har aatma baap samaan sampoorn banen। aur bachche bhi chaahte sab hain,lekin karte koi-koi hain,isliye number ban jaate hain। achha,sunte to bahut ho। sunna aur karna - inko samaan banaao। samjha kya karna hai?

aise param poojya, sada ek baap ko saath rakhne vaale, har kadam shreshtha man ke aadhaar par chalne vaale, aise srishti ke aadhaar moortta,vishwa parivartak aatmaon ko baap-daada ka yaad-pyaar aur namaste। achha।

party se:-

sada svayan ko chalte-phirte pharishte anubhav karte ho? pharishta arthaat jiska deh ke va deh ke duniya se va deh ke padaarthon ke aakarshan se koi rishta nahin। sada baap ki yaad aur seva - isi mein rahne vaale। sada baap aur seva - yahi lagan rehti hai। sivaae baap aur seva ke aur kya hai jahaan buddhi jaae?trustee sada nyaara rehta hai। trustee ke liye sirf ek kaam hai - yaad aur seva। agar karmana bhi karte to bhi seva ke nimitta। grihasthi svaartha ke nimitta karta aur trustee seva arth।

sarva subject mein sampanna karne ka svatah purooshaartha chalta hai? jaise-jaise samay aur sampoornata ke sameep aate jaate hain, to purooshaartha karne ka swaroop bhi badalta jaata hai। jo shuru ka purooshaartha aur madhya kaal ka purooshaartha hai ya ant kaal ka hai, teenon ka pharka hai na?ab sampoorn stage ke sameep ka purooshaartha kya hai? jaise koi bhi automatic chalne vaali vastu ko ek baari start kar diya to chalti rehti; baar-baar chalaana nahin padta। isi prakaar se ek baar lakshya mila aur phir automatic har kadam, har sankalp,samay ke chadhti kala pramaan chalte rahe - aise anubhav hota hai?purooshaartha ke samartha swaroop ki nishaani kya hogi? (samay ke pahle pahunchenge) samay se pahle pahunchne ka anubhav sarva subject mein hota hain va koi vishesh subject mein?sab sabjek mein samaan marks hain। advance jaana to achha hai, lekin sab sabjait se advantage lena - yeh bhi zaroori hai। lakshya achha hai aur lakshya mein parivartan bhi hai।

sada svayan ko baap ke kaarya mein va apne kaarya mein sahayogi banne vaale sahayogi, sameep aatma samajhte ho? baap ke kaarya mein jo jitna sahayogi hoga to sahayogi hi yogi ban sakta hai। sahayogi nahin to yogi nahin। sahayog dena arthaat baap aur baap ke kaarya ki yaad mein rehna। laukik mein bhi kisi ko sahayog dete to uski yaad rehti hai। to ‘yogi arthaat sahayogi।’ sahayogi banne se svatah yogi ban jaate aur doosra sahayogi banne se padmaguna jama kar lete। sahayog kya dete? puraane tan ya tamoguni man! uski yaad se satopradhaan banaakar man ko seva mein lagaate ya chaaval chapti dhan lagaate। aur kya lagaate? ‘tan-man-dhan teenon se sahayogi banna arthaat yogi banaana।’ geet gaate ho na - jahaan tan jaaega,dhan bhi vahaan hi lagaaenge। to yeh nirantar yogi banne ka sahaj saadhan hai। kyonki sahayogi banne se sahayog ke return milne se yog sahaj ho jaata। to har sankalp mein baap ke va apne karma ke sahayogi bano। har karma, seva mein, kaarya mein sahayogi banne se vyartha khatma ho jaaega, kyonki baap ka kaarya samartha hai। aisa sahayogi teevra purushaarthi automatic ho jaata hai।

sada apne ko nishchay buddhi, nishchint aatma anubhav karte ho? jo nishchay buddhi hoga woh nishchint hoga। kisi prakaar ka chintan va chinta nahin hogi। kya hua? kyon hua? aise nahin hota - yeh vyartha chintan hai। nishchay buddhi nishchint aur vyartha chintan nahin karega। sada svachintan mein rahne vaale,svasthiti mein rahne se paristhiti par vijay praapta karte hain। doosre taraph se aai hui pareesthiti ko sveekaar kyon karte?paristhiti ko kinaara karo to svachintan mein rahenge। aur jo svachintan mein sthit rehta woh sada sukh ke saagar mein samaaya hua rehta। sukh ke saagar mein samaae hue ho? jab baap sukh ka saagar hai to bachche master sukh ke saagar hue। sankalp mein bhi duhkh ki lahar aati hai, ki sada sukhi rehte ho? sukh ke saagar ke master usmein duhkh ho hi nahin sakta। agar duhkh aata to master duhkh ke saagar arthaat raavan,aankh se bhi aata, kaan se bhi aata, mukh se bhi aata। sarva shaktivaan ke aage raavan aa nahin sakta। baap ki yaad sabse badi te badi safety hai।

jo maaya va vighnon se kabhi dhokha nahi khaata woh sada aise dikhaai dega jaise is duniya se ‘nyaara aur pyaara’ hai। to kamal pushpa samaan rehte ho ki keechad ke chheente pad jaate? agar shreemat par har kadam uthaaen to sada kamal pushpa samaan rahenge। manmat mix hone se sada kamal samaan nahin rah sakte। sansaar saagar ki koi lahar ka prabhaav padna arthaat paani ke chheente padna।

sadaiv sangam yug ka shreshtha khajaana ‘atiindriy sukh’ hai aise khazaane ki praapti ka anubhav karte ho? ati indriy sukh ka khajaana praapta hua hai? khajaana mila hua kho kyon jaata?pahra kaun sa?attention। attention kam karna arthaat apne praapta kie hue khazaane ko kho dena। saare kalpa mein phir yeh khajaana praapta hoga?to aisi amoolya cheez kitni sambhaal kar rakhni hoti hai? sthool mein bhi badhiya cheez sambhaal kar rakhte hain। jaise vahaan bhi pahredaar albele hote to nuksaan kar dete, yahaan bhi albelaapan aata to khajaana kho jaata। baar-baar attention chaahiye। aise nahin - amritvele yaad mein baithe,attention diya phir chalte-phirte kho diya। amritvele attention dete aur samajhte sab kuchh kar liya, lekin chalte-phirte bhi attention dena hai। atiindriy sukh ka anubhav abhi nahin kiya, to kabhi nahin karenge। paanch hajaar varsha ke hisaab se yeh kitna shreshtha samay hai! itni shreshtha praapti ke liye thoda samay bhi attention na rakhenge to kya karenge?karma aur yog donon saath chaahiye। yog maana hi yaad ka attention, jaise karma nahin chhodte vaise yaad bhi na chhoote। isko kaha jaata hai ‘karmayogi।’

paandavon ki jo visheshta gaai hui hai woh jaante ho? paandavon ke vijay ka mukhya aadhaar - ‘ek baap doosra na koi।’paandavon ka sansaar baap tha। yeh kiska yaadgaar hai? aapka yaadgaar har kalpa gaaya jaata hai। to aise anubhav hota hai? sansaar hi baap hai। jahaan dekho vahaan baap hi nazar aata hai। sansaar mein sambandh aur sampatti hoti, to sambandh bhi baap mein hai aur sampatti bhi baap mein hai। aur baaki kuchh rah gaya hai?paandav arthaat jiska sansaar hi baap hai। aise paandav har kaarya mein vijayi honge hi। honge ya nahin yeh savaal nahin uth sakta। karma karne ke pahle sankalp uthta hai, hoga ya nahin hoga,ki hua hi pada hai yeh nishchay hai? paandavon ko pahle hi nishchay hota,hamaari jeet hai, kyonki sarvashaktivaan saath hai। ‘paandav arthaat sada vijayi ratna। vijayi ratna hi baap ko priy lagte hain।’