Avyakt murli du lundi 26 novembre 1979

>

26-11-79om shanti avyakt baapdaadaamdhuban

preet ki reeti

baap daada sarva bachchon ki yaad aur pyaar ka return dene ke liye bachchon ke samaan saakaar roop mein aate hain। kyonki samaan banna hi sneh ka return hai। baap bachchon ke sada snehi aur sada ke aagyaakaari hain। bachche bulaate hain aur baap aa jaate hain, samaan ban jaate hain। baap parkaaya pravesh hokar bhi preet ki reeti nibhaane aa jaate hain। ab bachchon ko kya karna hai?vaise to sab bachche snehi hain, madhuban nivaasi banna hi sneh ka return hai। doordoor se bhaag aana,yeh bhi sneh hai। sampoorn sneh ka return kya hai? snehi to ho। saathsaath baap ka bhi sneh hai। sada ek sankalp hai ki sarva bachche baap samaan ban jaaen। jaise baap aap sabke samaan,sneh ke kaaran, saakaar vatan nivaasi,saakaar roopdhaari ban jaate hain vaise aap sab baap-samaan aakaari avyakt vatan nivaasi bano ya nirkaari baap ke gunon samaan sarva gunon mein bhi master ban jaao। isko kaha jaata hai sampoorn sneh ka return। aise sampoorn sneh ka return dene vaale bane ho ya banna hai? bane zaroor ho lekin nambarvaar।

aaj baap-daada sarva snehi bachchon ka khel dekh rahe the। kya khel hoga? khel dekhna to aapko bhi achha lagta hai। kya dekha?amritbele ka samay tha। harek aatma,jo pakshi samaan udne vaali hai athva rocket ki gati se bhi tez udne vaali hai,aavaaz ki gati se bhi tez jaane vaali hai,sab apne-apne saakaar sthaanon par,jaise plen erodrom par aa jaate hain vaise sab apne roohaani erodrom par pahunch gaye। lakshya aur direction sabka ek hi tha। lakshya tha udkar baap samaan banne ka aur direction tha ek second mein udne ka। kya hua? jaise science ke saadhan aeroplane jab udte hain to pahle checking hoti hai phir maal bharna hota hai। jo bhi usmein chaahiye - jaise petrol chaahiye, hava chaahiye, khaana chaahiye, jo bhi chaahiye, uske baad dharti ko chhodna hota hai phir udna hota hai। brahman aatma roopi vimaan bhi apne sthaan par to aa hi gaye। lekin jo direction tha athva hai ek second mein udne ka, usmein koi checking karne mein rah gaye। main aatma hoon,shareer nahin hoon - isi checking mein rah gaye aur koi gyaan ke manan dvaara svayan ko shaktiyon se sampanna banaane mein rah gaye। main master gyaanasvaroop hoon, main master sarvashaktivaan hoon - is shuddh sankalp tak rahe,lekin swaroop nahin ban paaye। to doosri stage bharne tak rah gaye aur koi phir bharne mein busy hone ke kaaran udne se rah gaye। kyonki shuddh sankalp mein to raman kar rahe the lekin yeh deh roopi dharti ko chhod nahin sakte the। ashareeri stage par sthit nahin ho paate the। bahut chune hue thode se baap ke direction pramaan second mein udkar sookshm vatan ya mool vatan mein pahunche। jaise baap pravesh hote hain aur chale jaate hain,to jaise paramatma pravesh hone yogya hain vaise marjeeva janmadhaari brahman aatmaayen arthaat mahaan aatmaayen bhi pravesh hone yogya hain। jab chaaho karmayogi bano, jab chaaho paramdham nivaasi yogi bano, jab chaaho sookshm vatan vaasi yogi bano। svatantra ho। teenon lokon ke maalik ho। is samay trilokeenaath ho। to naath apne sthaan par jab chaahen tab ja sakte hain।

ek second mein udne ka sahaj tareeka

kai bachchon ka ek sankalp pahunchta hai ki baap to nirbandhan hain aur humein to deh ka bandhan hai, karma ka bandhan hai। lekin baap-daada yeh question poochhte hain ab tak kya deh sahit tyaag nahin kiya hain? pahla-pahla vaayda hai sab bachchon ka ki tan-man-dhan tera na ki mera। jab tera hai, mera hai hi nahin to phir bandhan kaahe ka? yeh to loan par baapdaada ne diya hai। aap trustee ho,na ki maalik। jab marjeeva ban gaye to 83janmon ka hisaab samaapta ho gaya। ab yeh naya 84vaan janma hai। is janma ki tulna aur janmon se kar hi nahin sakte ho। is divya janma ka bandhan nahin,sambandh hai। karma bandhani janma nahin, yeh karmayogi janma hain। is alaukik divya janma mein brahman aatma svatantra hai na ki partantra। tere ko mere mein laate ho,tab partantra hote ho। mera pahla hisaab,mera pahla sanskaar aaya kahaan se? agar aise svatantra hokar raho ki yeh loan mili hui deh hai to second mein ud sakte ho। jo vaayde karte ho ki jahaan bithaayenge vahaan baithenge,jo kahenge woh karenge। to baap ki bandhani aatma ho ya karma bandhani aatma ho? yeh bhi baap ne direction diya hai ki karma karo। aap svatantra ho,chalaane vaala chala raha hai,aap chal rahe ho। aapki sarasvati maa ki yeh vishesh dhaarna thi ‘hookmi hukm chalaaye raha’ tab number aage le liya। follow father aur mother।

maaya ka royal roop aur us par vijay praapta karne ki vidhi

‘karmabhog hai’, ‘karmabandhan hai’,’sanskaaron ka bandhan hai’, ‘sangathan ka bandhan hai’ - is vyartha sankalp roopi jaal ko apne aap hi emerge karte ho aur apne hi jaal mein svayan phans jaate ho, phir kehte hai ki abhi chhudvaao। baap kehte hain ki tum ho hi chhoote hue। chhodo to chhooto। ab nirbandhani ho ya bandhani ho। pahle hi shareer chhod chuke ho, marjeeva ban chuke ho। yeh to sirf vishwa ki seva ke liye shareer raha hua hai,puraane shareeron mein baap shakti bhar kar chala rahe hain। zimmevaari baap ki hai, phir aap kyon le lete ho। zimmevaari sambhaal bhi nahin sakte ho lekin chhodte bhi nahin ho। zimmevaari chhod do arthaat mera-pan chhod do। mera purooshaartha,mera invention,meri service,meri touching,mere gun bahut achhe hain, meri handling-power bahut achhi hai। meri nirnay shakti bahut achhi hai। meri samajh hi yathaartha hai। baaki sab misaandarastainding mein hain। yeh mera-mera aaya kahaan se? yahi royal maaya hai,isse maayaajeet ban jaao to second mein prakriti jeet ban jaavenge। prakriti ka aadhaar lenge lekin adheen nahin banenge। prakritijeet hi vishwa jeet va jagatjeet hai। phir ek second ka direction ashareeri bhav ka sahaj aur svatah ho jaavega। khel kya dekha। tere ko mere banaane mein bade hoshiyaar hain। jaise jaadu mantra se jo koi kaarya karte hain to pata nahin padta ki ham kya kar rahe hain। yeh royal maaya bhi jaadu-mantra kar deti hain jo pata hi nahin padta ki ham kya kah rahe hain। ab kya karenge? ab karma bandhani se karma yogi samjho। anek bandhanon se mukta ek baap ke sambandh mein samjho to sada ever-ready rahenge। sankalp kiya aur ashareeri bana,yeh practice karo। kitna bhi seva mein busy hon, kaarya ki chaaron or ki kheenchataan ho,buddhi seva ke kaarya mein ati busy ho - aise time par ashareeri banne ka abhyaas karke dekho। yathaartha seva ka kabhi bandhan hota hi nahi। kyonki yog yukta, yuktiyukta sevaadhaari sada seva karte bhi upraam rehte hain। aise nahin ki seva jyaada hai isliye ashareeri nahin ban sakte। yaad rakho meri seva nahin baap ne di hai to nirbandhan rahenge। ‘trustee hoon, bandhan mukta hoon’ aisi practice karo। ati ke samay ant ki stage, karmaateet avastha ka abhyaas karo tab kahenge tere ko mere mein nahin laaya hai। amaanat mein khyaanaat nahin ki hai samjha,abhi ka abhyaas kya karna hai? jaise beech-beech mein sankalpon ki traffic ka control karte ho vaise ati ke samay ant ki stage ka anubhav karo tab ant ke samay paas with honour ban sakenge।

aise sada bandhan mukta, baap-samaan jab chaahen prakritijeet,sankalp aur sanskaar mein bhi trustee sada deh ki smriti se bhi upraam,aise vishwa-upkaari vishwa-kalyaankaari bachchon ko baap-daada ka yaad, pyaar aur namaste।

party ke saath

avyakt baap-daada ki mulaakaat (baambe aur poona zone)

svayan dvaara baap ka saakshaatkaar karaane ke liye mastak par bhaagya ka sitaara sada chamakta rahe

sada apne mastak par bhaagya ka sitaara chamakta hua dikhaai deta hai? ya sitaare ki chamak ke aage kabhi-kabhi maaya ke baadal bhi aa jaate hain? agar baadal hote hain to sitaare chhip jaate hain aur baadal nahin hote to bahut sundar chamakte rehte hain। aise aapke bhaagya ka sitaara sada chamakta hai ya baadal aa jaate hain? brahman bane aur sitaara chamka, lekin sitaare ke aage baadal na aaen। sitaare ki chamak chhipne na den,yeh hai attention। jaise photo nikaalte hain,agar baadal aage aa jaaen to photo theek niklega?features hi nahin dikhaai denge, aise hi agar chamakte hue sitaare ke aage baadal aa jaaen to saakshaatkaar kaise karaaenge। aap to baap ko pratyaksha karaane vaale arthaat svayan dvaara baap ka saakshaatkaar karaane vaale ho। baadlon ke beech se kaise saakshaatkaar hoga? to saakshaatkaar kab karaayenge?kya jab vinaash hoga tab,abhi hi aisa banna padenga agar bahut samay ka baadlon ko door karne ka abhyaas nahin hoga to baadal bhi usi samay last ghadi aayenge। saakshaatkaar ke liye khade hon aur baadal aa jaaen to saara programme hi upset ho jaayega। ab aise abhyaasi bano jo door se hi baadal bhaag jaaen। jaise science ke saadhan toofaan ko,pahaadon ke raaste ko change kar sakte hain na। woh science to apoorna hai। science kabhi sampoorn ho nahin sakti kyonki manushya-mat hai। kabhi neeche kabhi oopar hoti rehti hai। to unlawful ho gai na। baap ki shri mat par chalne vaale to jo chaahen woh kar sakte hain। to vighnon ko door karne ka bahut samay ka abhyaas chaahiye। purooshaartha to sab kar rahe ho lekin purooshaartha ki speed kaun-si hai? purushaarthi hoon, ismen khush nahin hona lekin kis speed ka purooshaartha hai? kaam ho ek second ka aap karo do ghante mein, to time to poora ho jaayega na। prashnon ka uttar theek de lekin time par na de to paas honge ya fail?chal rahe hain,kar rahe hain isse abhi kaam nahin chalega। ismen bhi khush ho jaana ki roz class to karte hain, regular pankchual hain, seva bhi karte hain lekin jo baap ka direction hai - nirantar yogi, sahajyogi - usmein regular aur pankchual bano। baap ke paas woh present mark padegi na। uski bhi marks milti hain lekin number aage to isi present mark se banenge। kaun-si maala mein aane vaale ho? agar kabhi-kabhi isi sthiti mein sthit rehte ho to kabhi-kabhi poojne vaali maala mein aayenge,peechhe ka manka banenge। maataaen kaun-si seva karengi?sab number ban jaayengi? number one bhi group banega। jitna service karo utna hi laakh guna,padam guna hokar milega। isliye yeh sangamayug hai karne aur paane ka। abhi-abhi karna, abhi-abhi paana। pravritti mein rehte bhi double seva karo,haindas bhi ban jaayenge aur centre bhi khul jaayenge। surrender haindas to kam hi hain, woh chakkar lagaate rahen lekin sambhaalne vaale pravritti vaale hon, aise bhi centre khul sakte hain। agar bachchon ka, grihasthi ka jhanjhat hai to kamra alag lekar sambhaalo। agar bachchon aadi ki khit-khit nahin hai, koi vighna-roop nahin hain to ghar mein bhi centre sambhaalo।

(paristhitiyaan aana bhi good-luck hai kyonki isse foundation mazboot hota hai) :-

sada achal-adol rehte ho? kalpa pahle bhi raavan sena ne hilaane ki koshish ki lekin angad achal rahe। paristhitiyaan aayengi aur chali jaayengi, svasthiti sada aage badhaayegi। paristhiti ke peechhe bhaagne se svasthiti chali jaayegi। koi bhi paristhiti aaye to aap high jump do, isse paar ho jaayenge। paristhiti aana bhi good-luck hai। yeh paper foundation ko mazboot karne ka saadhan hai। yeh nishchay ko hilaakar dekhne ke liye aate hai। ek baari angad samaan mazboot ho jaayenge to yeh namaskaar karenge। pahle vikraal roop se aayenge aur phir daasi roop se aayenge। challenge karo ham mahaaveer hain। paani ke oopar lakeer thaharti hai kya?aap master gyaan saagar ke upar koi paristhiti vaar kar nahin sakti। lakeer daal nahin sakti।

3 - ek ras sthiti banaane ka saadhan - ek bal ek bharosa:- sada‘ek bal ek bharosa’ isi lagan mein rehte ho! jo sada ek bharose mein rahe hain vahi sada ekras rehte hain। aur koi bhi ras aisi aatmaon ko aakarshit nahin kar sakta। aisi aatmaayen sada svayan bhi light haaoos ban nirvidhna hokar chalti hain aur anekon ke nimitta raasta dikhaane vaali banti hain। to roz kitni aatmaon ko light house bankar raasta dikhaate ho? yahi braahmanon ka kartavya hai,yahi dhandha athva vyavhaar hai।

4 - anubhvi moorta ke dvaara baap ki soorat ki pratyakshata - sada baap ke gunon mein anubhav moortta ho?jo baap ke gun gaate ho un sabke anubhvi ho na?aananda ka saagar baap hai to usi aananda ke saagar ki lahron mein lahraane vaale anubhvi moortta। jo sada sarva gunon ke anubhvi hain aise anubhvi moorta dvaara baap ki soorat pratyaksha hoti hai। aap sab baap ko pratyaksha karne vaale ho। itne mahaan ho jo param aatma ko bhi pratyaksha karne vaale ho। harek ki soorat se baap ke gun dikhaai den। jo bhi samparka mein aaye use aananda, prem,sukh sab gunon ki anubhooti ho।

5 - peechhe aane vaalon ka bhaagya bhi kam nahin, bahut shreshtha hai - kaise? peechhe aane vaale bani banaai par aaye hain। jaise daade pardaade beej daalte hain aur pautre dhautre khaate hain। to peechhe aane vaale phal khaane vaale hain। abhi kitne achhe saadhan, kitne achhe sthaan bane banaaye mile hain। manthan karne vaale doosre hain aap makkhan khaane vaale ho। isliye sada khush ho। sada apne bhaagya ko aur dene vaale daata ko yaad rakho। baapdaada sada kehte hain chhote subhaanaalla hote hain arthaat samaan allaah।