Avyakt murli du vendredi 9 octobre 1981

>

09-10-81om shanti avyakt baapdaada madhuban

"antarmukhi hi sada bandhanmukta aur yogayukta"

aaj baapdaada apne sada sahayogi, sada shakti-swaroop,sada mukta aur yogayukta aise vishesh bachchon ko amritvele se vishesh roop se dekh rahe hain। baapdaada ne har ek bachche ki do baaton ki visheshta dekhi। ek baat - mukta kahaan tak hue hain, doosri baat - jeevanmukta kahaan tak hue hain?jeevanmukta arthaat yogayukta। baapdaada ke paas bhi bachchon ke man ke sankalp ki har second ki rekhaayen spashta dikhaai deti hain, rekhaaon ko dekh baapdaada ne muskaraate hue vishesh ek baat ka chitra dekha, jis chitra mein do prakaar ke lakshan dekhe।

ek -’’sada antarmukhi''। jis kaaran svayan bhi sada sukh ke saagar mein samaaye hue aur anya aatmaon ko bhi sada sukh ke sankalp aur vibration dvaara, vritti aur bol dvaara,sambandh aur samparka dvaara, sukh ki anubhooti karaate hain।

doosre - ‘‘baahyamukhi''। jo sada baahyamukhta ke kaaran, baahya arthaat vyakta bhaav,vyakti ke bhaav-svabhaav aur vyakta bhaav ke vibration,sankalp, bol aur sambandh,samparka dvaara ek do ko vyartha ki taraph uksaane vaale, sada alpakaal ke mukh ke laddu khaane aur oron ko bhi yahi khilaane vaale, sada kisi na kisi prakaar ke chintan mein rahne vaale, aantarik sukh,shanti aur shakti se sada door rahne vaale, kabhi-kabhi thodi si jhalak anubhav karne vaale, aise baahyamukhi bhi dekhe।

deepaavli aa rahi hai na! to businessman to apne chaupde dekhenge। puraane khaate, naye khaate dekhenge,baap kya dekhenge? baap bhi har bachche ke puraane khaate kahaan tak samaapta hue hain, naye khaate mein kya-kya jama kiya hai, yahi chaupde dekhte hain। to aaj yeh antar dekh rahe the kyonki kal bhi sunaaya ki brahma baap ko ab kis baat ka intajaar hai? (udghaatan ka) isi udghaatan ke liye kya taiyaari kar rahe ho, kisi se bhi udghaatan karaate ho to kya karte ho?kya cheejen rakhte ho? udghaatan ke pahle jo bhi ribbon baandhate ho ya phoolon ko baandhate ho,use pahle kainchi se kaatte ho phir udghaatan hota hai। aur kainchi ko rakhte kahaan ho?phoolon se saji hui thaali ke andar। isse kya siddha hota hai? bandhanmukta hone ke pahle svayan ko gunon ke phoolon se sampanna karna hai to svatah hi bandhanmukta ho hi jaayenge। udghaatan ki taiyaari kya hui? ek taraph svayan ko sampanna banaana, lekin sampanna banne ke pahle baahyamukhta ke bandhanon se mukta hona। aise taiyaar hue ho? baahyamukhta ke ras baahar se bade aakarshit karte hain, isliye isko kainchi lagaao। yeh ras hi sookshm bandhan ban saphalta ki manzil se door kar dete hain। prashansa ho jaati lekin pratyakshata aur saphalta nahin ho sakti, isliye ab udghaatan ki taiyaari karo। udghaatan ki taiyaari karne vaale sada phoolon ke bageeche mein baapdaada dvaara lagi hui phulvaadi,phoolon ke visheshta ki khushbu lene mein aur usi khushbu ko soonghane mein sada tatpar honge arthaat unki jeevan roopi thaali mein sada phool hi phool honge। aise taiyaar ho?ismen number one kaun jaayega? madhuban vaale ya dilli vaale?bahut marttaba milega। baapdaada ke saath-saath udghaatan karne vaale, isse bada bhaagya aur kya hai? samaan vaali aatmaayen hi saath mein udghaatan karengi। aise to nahin samajhte ho ki udghaatan karna maana sada ke liye sookshmavtanvaasi banna va mool vatanvaasi banna। brahma baap ke saath mool vatan nivaasi kya sabhi banenge ya thode banenge?kya samajhte ho? sab service sthaan chhodkar ke saath jaayenge? saath jaayenge va rookenge? (saath jaayenge) achha sookshm vatan mein brahma baap gaya phir aap yahaan kyon baith gaye? to kya karenge? (daadi se) (saath chalenge) achha, deedi-daadi donon hi saath jaayenge? kya hoga? yeh bhi vichitra rahasya hai। to vishesh baat thi - udghaatan ke liye taiyaar ho?dilli vaale taiyaar hain? nimitta sevaadhaari kya samajhte ho?koi aashaayen to nahin raheen hui hain? (sangam achha lagta hai) baapdaada hi chale jaayenge phir bhi rahenge?kab tak rehna hai? saath mein jaane vaale to dharmaraaj ko taata karenge,dharmaraaj ke paas jaayenge hi nahin। achha - baap to chaupde saaph dekhne chaahte hain। thoda bhi puraana khaata arthaat baahyamukhta ka khaata, sankalp va sanskaar roop mein na rah jaae। sada sarva bandhanmukta aur yogayukta,isi baahyamukhta ke vaayumandal ko samaapta karne ke liye is varsha vishesh ishaara de rahe hain। seva karo,khoob karo lekin baahyamukhta se antarmukhi bankar karo। woh hoga antarmukhta ki soorat dvaara। seva mein baahyamukhta mein jyaada aa jaate ho isliye - seva achhi hai, seva bahut karte hain - sirf yeh naam baala hota hai। baap inhon ka bada achha hai,baap oonche te ooncha hai - yeh pratyakshata ki saphalta kam hoti hai। isliye sunaaya baahyamukhta ki result - prashansa karenge lekin prasanni chatta nahin banenge।‘‘baap ke ban jaayen'', yeh hai prasannachitta banna।

aise sada antarmukhi, sada prasannachitta,anya aatmaon ko bhi sada prasannachitta banaane vaale,sada svayan ko gun sampanna, baap samaan, sada sukh ke saagar mein samaaye hue,sada ek baap doosra na koi,isi lagan mein magan rahne vaale - aisi shreshtha aatmaon ko baapdaada ka yaad pyaar aur namaste

dilli zone :- baapdaada ko sabhi bachche ati priy hain kyonki baapdaada ne visheshtaaon ke aadhaar par drama anusaar chunkar is brahman parivaar ke guldaste mein laaya hai। yeh chaitanya phoolon ka guldasta hai na! harek phool ki visheshta, rang-roop apna-apna hota hai। kismen khushbu jyaada hogi,kiska rang roop guldaste ko sajaane vaala hoga lekin hai to donon hi aavashyak। sirf gulaab ke phoolon ka guldasta banaao aur variety ka banaao, to sundar kya lagega? variety bhi chaahiye। lekin gulaab ke phoolon ko to sada beech mein daalenge aur variety phoolon ko kinaare par daalenge। to main kaun hoon? - woh harek apne aapko jaanta hai। baapdaada ke behad ke guldaste ke andar mera sthaan kahaan hai,woh bhi jaante ho kyonki guldaste ke andar to ho na! yeh to pakka hai, tab madhuban ke andar aaye ho।

paandav bhavan (dilli) ke paandav kya karte hain? yaadgaar mein bhi yahi samaachaar poochha na! paandav kya kar rahe hain? paandav bhavan hai next madhuban। to paandav bhavan nivaasi kya service ka plan bana rahe ho? aisi seva karo jo sabki najar seva ke kaaran paandav bhavan ki taraph jaaye, yeh hai nai baat। aisa kuchh plan banaaya hai? paandav bhavan hai hi vishwa ke andar vishesh bhavan। to vishesh mein vi.aai.pi. sthaan ho gaya to jaise vi.aai.pi. sthaan hai, vaise vi.aai.pi.ki seva ho na! dilli hai vi.aai.pi.ki nagri aur sthaan bhi vi.aai.pi. aur karne vaale bhi achhe mahaaveer vi.aai.pi. ho। to abhi kya karenge? apni dincharya ko set karo। abhi dekho yahaan (madhuban mein) itna bada kaarya hai, dincharya set hone ke kaaran chaaron or ke kaarya mein saphalta to pa rahe hain। kaarya badh raha hai lekin dincharya set hone ke kaaran kaarya theek ho jaata hai, sirf yeh attention। subah se raat tak apna fix programme daily diary banaao kyonki jimmevaar aatmaayen ho,rivaaji aatmaayen nahin। vishwa-kalyaankaari aatmaayen ho। to jitna bada aadmi hota hai,uski dincharya set hoti hai। bade aadmi ki nishaani hai - accurate। accurate ka saadhan hai dincharya ki setting। ek vyakti10 vyakti ka kaarya kar sakta hai। setting se samay,enarja bach jaati hai। iske kaaran ek ke bajaae 10kaarya ho jaate hain। achha,sada santushta aatmaayen ho na? sada baap ke saath arthaat sada santushta। baap aur aap sada combined ho to combined ki shakti kitni badi hai,ek kaarya ke bajaae hajaar kaarya kar sakte ho kyonki hajaar bhujaaon vaala baap aapke saath hai।

2. sabhi sahajyogi ho na?baap ka banna arthaat sahajyogi banna kyoki bachcha arthaat bhaagyashaali। bachche ko sivaae baap ke aur hai hi kya?maa hote hue bhi praapti ka aadhaar baap hai। pyaar ke sambandh mein maa yaad aayegi, praapti ke sambandh mein baap yaad aayega। yog lagaana na pade lekin na chaahte hue bhi ek baap ke sivaae aur koi najar na aaye। baap ka banna arthaat sahajyogi banna। achha - om shanti।