Avyakt murli du samedi 31 décembre 1983

>

31-12-83 om shanti avyakt baapdaada madhuban

navvarsha ke avsar par avyakt baapdaada ke mahaavaakya

roohaani maashook shivbaaba apne aashik roohaani bachchon ke prati bole:-

aaj saagar ke kanthe par arthaat madhuban ke kanthe par madhur milan manaane ke liye maashook apne roohaani aashikon se milne aaye hain। kitna door-door se milan manaane ke liye aaye hain, kyon?aisa wonderful maashook saare kalpa mein mil nahin sakta। ek maashook aur aashik kitne hain? anek aashik ek maashook ke। to aaj vishesh aashikon ki mahiphal mein aaye hain। mahiphal mein manaana hota hai, sunaana nahin hota hai। to aaj sunaane nahin aaye hain,milne aur manaane aaye hain। vishesh double videshi bachche aaj ka din manaane ke liye aaye hain। naya varsha manaane ka sankalp lekar aaye hain। baapdaada bhi naye varsha mein sneh aur sahayog sampanna badhaai de rahe hain। sangamayug naya yug hai। bhavishya satayug is vartamaan naye yug ke naye jeevan ki praalabdha hai। braahmanon ke liye navayug, shreshtha yug abhi hai। jab se brahman bane naya yug, naya sansaar, naya dil, nayi raaten shuru ho gai। isi naye yug ke naye jeevan ki har ghadi padmon tulya hai। heere tulya hai। satayug mein yeh geet nahin gaayenge - ‘naya din laage, nayi raat laage’। yeh ab ki baat hai। baapdaada ne shuru se kis geet se bachchon ko jagaaya hai! woh geet yaad hai? -jaag sajniyaan jaag… kyon jaago? navayug aaya! bachpan ka yahi geet hai na! abhi to naye-naye geet bana diye hain। aadi geet baap ne yahi sunaaya na। to navayug kab hua? ab! puraane ke aage naya lagta hai na। puraani duniya, puraani jeevan badal gai। nayi jeevan mein aa gaye na। behosh the। apna hosh tha ki main kaun hoon? to behosh hue na। behosh se hosh mein aaye। naya jeevan anubhav kiya na। aankh khulte naya sambandh, naya sansaar dekha na। to naye yug ki, naye yug mein, naye varsha ki badhaai!

laukik duniya mein bhi‘happy new year’ kehte hain। vaise ever happy hote nahin hain lekin kahenge happy new year। ab aap sabhi real roop mein kahenge ‘happy new year’to kya lekin - ‘happy new yug’। saara hi yug khushi ka yug hai। happy new year kehte ho to badhaai dene ke samay kya karte ho? pahle to foreign ka rivaaj hai haath se haath zaroor milaayenge। baapdaada haath se haath kaise milaate? sthool haath to ek second ke liye milaate hain,lekin baapdaada saara hi yug haath milaate arthaat ek hi ‘shreshtha mat’roopi haath de,haath mein haath milaae ant mein bhi saath mein le jaate hain। shreemat ka haath sada aap sabke saath hai। isliye saara hi yug haath mein haath dekar chal rahe ho। haath chhoda to kya ho jaayega? kinaara ho jaayega na। isliye sachche aashik sada har kadam haath mein haath dekar chalte hain। haath mein haath dekar chalna yeh sneh ki bhi nishaani hai aur sahayog ki bhi nishaani hai। kabhi bhi koi chalte-chalte thak jaate hain to doosra uska haath pakadkar le jaate hain na। roohaani maashook aashikon ka haath kabhi nahin chhodte। ant tak vaayda hai,haath aur saath sada hi rahega। sabhi aashikon ne haath to pakka pakad liya hai na! dheela to nahin hai! chhodne vaale to nahin ho na! jo chhodte aur lete rehte hain, woh haath uthaao। kabhi chhodte, kabhi pakadte aisa koi hai? yeh visheshta hai inhon ki, chhipaane vaale nahin hai। saaph bolne vaale hain isliye bhi aadha vighna, saaph sunaane se khatma ho jaata hai। lekin kachcha sauda kab tak? puraane varsha mein puraani reeti rasam samaapta karni hai na! yeh naye varsha mein bhi yahi reeti rasam chalegi?ab tak jo hua usko fullstop ki bindi lagaae,sada saath aur haath rahne ke smriti ki bindi ab se lagaao। bade din va khushi ke din par vishesh suhaag, bhaagya aur badhaai ki bindi arthaat tilak lagaate hain। aap log bhi vishesh yaad ki bhatthi ke din smriti ki bindi lagaate ho na! kyon lagaate ho? bhatti ke din bindi khaas kyon lagaate ho? dridh sankalp ki nishaani bindi lagaate ho ki aaj ka din saara hi ‘sahaj yogi aur shreshtha yogi’ke swaroop mein rahenge। to aaj bhi jo thoda sa kachcha ho to dridh sankalp dvaara fullstop ki bindi lagaao,doosri samartha swaroop ki bindi lagaao। bindi lagaane aati hai? paandavon ko bindi lagaane aati hai?achha,shaktiyon ko bindi laagaane aati hai?avinaashi bindi। aaj subah bhi sabhi ne kya vaayda kiya? samaaroh manaana hai na? (marriage samaaroh manaana hai) abhi marriage ki nahin hai kya?baal bachche paida nahin kiye hain? marriage to ho gai hai lekin marriage ka din manaane aaye ho। jiski marriage nahin hui hai - woh haath uthaao। kitna bhi naaj nakhre karo lekin maashook chhodne vaala nahin hai kyonki jaante hain ki chhodkar jaayenge kahaan jaayenge! jaise aajkal ka videsh ka rivaaj hai na ki chhodkar hippi ban jaate hain to hippi banna hai kya! ever happy banna hai ya hippi banna hai! kya haalat hoti hai jo dekh bhi nahin sakte। aap sab to raajya adhikaari ho। isliye baapdaada jaante hain ki kabhi-kabhi natkhat ban jaate hain। lekin baapdaada ne jo vaayda kiya hai ki saath le jaayenge to baap vaayda nahin chhod sakta। isliye saath chalna hi hai। achha।

naye varsha mein naveenta kya karenge? koi nai baat to karenge na। koi plan banaaya hai? nimitta teacher ne koi naya plan banaaya hai? geeta ka bhagwan to desh mein pratyaksha karenge। videsh mein kya karenge?jo rahi hui baaten hain un baaton ko practical mein laana, yeh to bahut achhi baat hai। samay pramaan sab baaten practical hoti ja rahi hai। is baat se bhaarat mein to nagaada bajaayenge hi। dharma netaaon ko jagaayenge,halchal bhi machaayenge। jo thoda-sa jaagkar bahut achha kah phir so jaate hain unhon ke liye jaise koi neend se nahin uthta hai to us par thanda-thanda paani daalte hain। to bhaarat vaalon par bhi vishesh thanda paani daalne se jaagenge। achha to is varsha kya naveenta karenge?

jitna laukik duniya mein jis sthaan par halchal ho, usi halchal ke sthaan par sada khushi ki achal sthiti ka jhanda lahraana। government halchal mein ho aur gupta prabhu ratna sada sampanna sada achal ka vishesh jhanda lahraayen। government ka bhi attention ho jaae ki yeh is desh mein gupta veshdhaari kaun-si vichitra aatmaayen hain jo saare desh mein nyaari aur pyaari hain। jo apne ko dhan se kamzor samajhte hain unhon ko avinaashi dhan se sampanna kar,ham sabse bharpoor hain, ham sada padmaapadmapti hain, yeh anubhav karaao। dhan ki gareebi ka duhkh unhon ko bhool jaae। aisi lahar phailaao। jo bhi aave woh samjhe ki akhut khazaanon se bharpoor ho gaye,aur bhi koi dhan hota hai,woh anubhav karen। aur isi dhan dvaara yeh sthool dhan bhi svatah hi sameep aata hai। duhkh nahin dega। achhaõ to videsh mein naye varsha ki naveenta kya karenge?centres to khulte ja rahe hain aur khulte rahenge। abhi is varsha videsh mein bhi vishesh quality ki service, vishesh roop se honi chaahiye। aap sabki vishesh quality to rahi lekin aap sabhi quality vaale aur bhi vishesh quality vaali aatmaayen jo sthaapna ke kaarya mein sahayogi ban jaaen, aisa videsh mein chaaron or se ek gurap taiyaar karo jo gurap milkar bhaaratvaasiyon ki seva ke arth vishesh nimitta bane। naameegraami aavaaz phailaane vaale alag group hain lekin yeh hai sambandh vaale,woh hain samparka vaale। aur yeh group chaahiye quality vaala jo sameep sambandh mein ho। vishesh jeevan ke parivartan ke anubhvi hon। jiske anubhvon dvaara aur bhi vishesh quality vaali aatmaayen,vaaris quality nikalti rahe। woh hai seva ke nimitta group aur yeh hai vaaris quality sevaadhaari group। naageegraami bhi ho aur vaaris bhi ho। aisa group videsh mein taiyaar hone se, desh mein seva ka chakkar lagaayen। raaj neta, dharma neta, sarva prakaar ki aatmaon ko apne anubhav ki shakti dvaara anubhav karne ki ichchha utpanna kara saken। to aisa chakkar lagaane vaale vaaris sevaadhaari quality ka group taiyaar karo। samjha!

videsh mein chaaron or aavaaz phailaane ke saadhan sahaj hain isliye videsh mein aavaaz phail bhi raha hai aur phailta bhi rahega। lekin bhaarat mein aavaaz phailaane ke saadhan itne sahaj nahin। bhaaratvaasiyon ko jagaane ke liye personal seva chaahiye। aur woh bhi bahut simple anubhav ke aavaaz ki seva ho। bhaaratvaasi vishesh parivartan ke anubhav se parivartan honge। aise vishesh anubhvi, jinhon ke anubhav mein aisi shaktishaali parivartan ki baaten ho - aisi kahaaniyaan sun karke bhaaratvaasi jyaada aakarshit honge। bhaarat mein katha kahaaniyaan sunne ka rivaaj hai। samjha–

videshiyon ko kya karna hai। itni sab teachers aai hain to aisa group taiyaar karke laana। achha-

naye varsha ki vishesh saugaat

baapdaada‘vardaan maala’de rahe hain। ceremony banaate hain to varmaala daalte hain। baapdaada sabhi aashikon ko vardaan maala ki saugaat de rahe hain। sada santushtata se santushta raho aur santushta karo। har sankalp mein visheshta ho, har bol aur karma mein visheshta ho। aise visheshta sampanna sada raho। sada saral svabhaav,saral bol, saralta sampanna karma hon। aise saral swaroop rahe। sada ek ki mat par,ek se sarva sambandh, ek se sarva praapti aise ek dvaara sada ek ras rahne ke sahaj abhyaasi raho। sada khush raho, khushi ka khazaana baanto। khushi ki lahar sarva mein phailaao। ais sada khushi ki muskaraahat chehre par chamakti rahe। aise harshit mukh raho। sada yaad mein raho। vriddhi ko paao। aise vardaan maala sada saath rahe। samjha। yeh hai naye varsha ki saugaat!

achha–

aise sada ke vardaani, sada haath aur saath ke amar shreshtha aatmaayen, har sankalp mein naveenta ki visheshta ko jeevan mein laane vaale, aisi vishesh aatmaon ko,nav yug ke,naye varsha ki amar yaad-pyaar। udti kala ka yaad-pyaar aur namaste।’’

raatri12 baje ke baad sabhi bachchon ko badhaai

chaaron or ke snehi sikeeldhe, sada sevaadhaari bachchon ko sada naye umang, naye utsaah bhare jeevan ki, naye varsha ki badhaai ho। sangamayug navayug, jismen har ghadi nai ho,har sankalp naye te naya umang utsaah dilaata hai। aise yug mein naye varsha ki mubaarak to sada baapdaada dete hi hain phir bhi vishesh din par vishesh yaad de rahe hain ki sadaiv svayan bhi naye te naye seva mein svayan ke prati plan banaate hue practical mein laate raho aur doosron ko bhi apne naveen jeevan se prerna dete raho। london nivaasi va jo bhi videsh mein hain, sabhi ke yaad pyaar aur happy new year ke card bhi paaye, bahut-bahut patra bhi paaye,chhoti badi saugaaten bhi paaeen। baapdaada aise naye yug mein shreshtha karma karne vaale aur naya yug rachne vaale bachchon ko vishesh vardaanon sahit naye varsha ki badhaai de rahe hain। sabhi bahut achhe muhabbat aur mehnat se seva kar rahe hain aur sada hi seva mein busy rah auron ko bhi seva dvaara baap ke varse ke adhikaari banaate hai। achha - desh-videsh ke sabhi bachchon ko phir bhi baar-baar shubh badhaaeeyon se yaad-pyaar। achha –

party ke saath avyakt baapdaada ki mulaakaat

(1) sada apne ko punya aatma samajhte ho? sabse bade te bada punya hai - baap ka sandesh de baap ka banaana। aisa shreshtha karma karne vaali punya aatma ho kyonki ab ki punya aatma sadaakaal ke liye poojya ban jaati hai। punya aatma hi poojya aatma banti hai। alpakaal ka punya bhi phal ki praapti karaata hai lekin woh hai alpakaal ka,yeh hai avinaashi punya। kyonki avinaashi baap ka banaate ho। iska phal bhi avinaashi milta hai। janma-janma ke liye poojya aatma ban jaayenge। to sada punya aatma samajhte hue har karma punya ka karte raho। paap ka khaata khatma। pichhla paap ka khaata bhi khatma। kyonki punya kartekarte punya ka taraph ooncha ho jaayenga to paap neeche dab jaayega। punya karte raho to punya ka balance badh jaayega aur paap neeche ho jaayega arthaat khatma ho jaayega। sirf check karo - har sankalp punya ka sankalp hua, har bol punya ke bol hue? vyartha bol bhi nahin। vyartha se paap nahin katega। aur punya ka phal bhi nahin milega isliye har karma, har bol, har sankalp punya ka ho। aise sada shreshtha punya ka karma karne vaali punya aatma hain, yahi sada yaad rakho। sangamayugi braahmanon ka kaam hi kya hai? punya karna। aur jitna punya ka kaam karte ho utna khushi bhi hoti hai। chalte-phirte kisko sandesh dete ho to uski khushi kitna samay rehti hai! to punya karma sada khushi ka khazaana badhaata hai। aur paap karma khushi ganvaata hai। agar kabhi khushi gum hoti hai to samjho koi na koi bada paap nahin to chhota ansh maatra bhi zaroor kiya hoga। deh-abhimaan mein aana yeh bhi paap hai na kyonki baap yaad nahin raha to paap hi hoga na। isliye ‘sada punya aatma bhav’।

(2) sada apne ko nishchay buddhi vijayi ratna samajhte ho?sada ke nishchay buddhi arthaat sada ke vijayi। jahaan nishchay hai vahaan vijay svatah hai। agar vijay nahin to nishchay mein kahaan na kahaan kami hai। chaahe svayan ke nishchay mein,chaahe baap ke nishchay mein,chaahe knowledge ke nishchay mein,kisi bhi nishchay mein kami maana vijay nahin। nishchay ki nishaani hai -‘‘vijay’’। anubhvi ho na। nishchay buddhi ko maaya kabhi bhi hila nahin sakti। woh maaya ko hilaane vaale honge,svayan hilne vaale nahin। nishchay ka foundation achal hai to svayan bhi achal honge। jaisa foundation vaisi majboot building banti hai। nishchay ka foundation achal hai to karma roopi building bhi achal hogi। maaya ko achhi tarah se jaan gaye ho na। maaya kyon aur kab aati hai, yeh gyaan hai na। jisko pata hai ki is reeti se maaya aati hai। to woh sada safe rahenge na। agar maaloom hai ki yahaan se is reeti se dushman aayega to safety karenge na। aap bhi samajhdaar ho to maaya vaar kyon kare। maaya ki haar honi chaahiye। sada vijayi ratna hain, kalpa-kalpa ke vijayi hain,is smriti se samartha ban aage badhte chalo। kachche patton ko chidiyaayen kha jaati hai isliye pakke bano। pakke ban jaayenge to maaya roopi chidiya khaayegi nahin। safe rahenge। achha –

(3) sada shanti ke saagar ki santaan shant swaroop aatma ban gaye? ham vishwa mein shanti sthaapan karne vaali aatma hain,yeh nasha rehta hai? sva dharma bhi shant aur karttavya bhi vishwa shanti sthaapan karne ka। jo svayan shant swaroop hain vahi vishwa mein shanti sthaapan kar sakte hain। shanti ke saagar baap ki vishesh sahayogi aatmaayen hain। baap ka bhi yahi kaam hai to bachchon ka bhi yahi kaam hai। to svayan sada shant swaroop, ashaanti ka naam-nishaan bhi na ho। ashaanti ki duniya chhoot gai। abhi shanti ki devi, shanti ke dev ban gaye। ‘shanti deva’ kehte hain na। shanti dene vaale shanti deva aur shanti devi ban gaye। isi kaarya mein sada busy rahne se maayaajeet svatah ho jaayenge। jahaan shanti hai vahaan maaya kaise aayegi?shanti arthaat roshni ke aage andhakaar thahar nahin sakta। ashaanti bhaag gai, aadha kalpa ke liye vidaai de di। aise vidaai dene vaale ho na!

(4) sada apne ko baap ke saath rahne vaale sada ke sahayog lene vaali aatmaayen samajhte ho? sada saath ka anubhav karte ho? jahaan sada baap ka saath hai vahaan sahaj sarva praapti hain। agar baap ka saath nahin to sarva praapti bhi nahin kyonki baap hai sarva praaptiyon ka daata। jahaan daata saath hai vahaan praaptiyaan bhi saath hongi। sada baap ka saath arthaat sarva praaptiyon ke adhikaari। sarva praapti swaroop aatmaayen arthaat bharpoor aatmaayen sada achal rahengi। bharpoor nahin to hilte rahenge। sampanna arthaat achal। jab baap saath de raha hai to lene vaalon ko lena chaahiye na। daata de raha hai to poora lena chaahiye,thoda nahin। bhakta thoda lekar khush ho jaate lekin gyaani arthaat poora lene vaale।

jarman group se

sada apne ko baap ke sameep ratna samajhte ho? jitna door rehte, desh se door bhale ho lekin dil se nazdeek ho। aise anubhav hota hai na। jo sada yaad mein rehte hain, yaad sameep anubhav karaati hai। sahaj yogi ho na। jab baba kaha to ‘baba’shabd hi sahaj yogi bana deta hai । ‘baba’shabd jaadu ka shabd hai। jaadu ki cheez bina mehnat ke praapti karaati hai। aap sabhi ko jo bhi chaahiye - sukh chaahiye,shanti chaahiye, shakti chaahiye jo bhi chaahiye ‘baba’shabd kahenge to sab mil jaayega। aisa anubhav hai! baapdaada bhi, bichhude hue bachche jo phir se aakar mile hain, aise bachchon ko dekh khush hote hain। jyaada khushi kisko?aapko hai ya baap ko? baapdaada sada har bachche ki visheshta simran karte hain। kitne lucky ho। anubhav karte ho ki baap hamko yaad karte hain? sabhi apni-apni visheshta mein vishesh aatma ho। yeh visheshta to sabhi ki hai - jo door desh mein hote, doosre dharma mein jaakar phir bhi baap ko pahchaan liya। to is vishesh sanskaar se vishesh aatma ho gaye।

achha - om shanti।