Avyakt murli du dimanche 15 avril 1984

>

15-04-84om shanti avyakt baapdaadaamdhuban

snehi, sahayogi,shaktishaali - bachchon ki teen avasthaaen

avyakt baapdaada, apne snehi, sahayogi shaktishaali bachchon ke prati bole:-

baapdaada sabhi snehi, sahayogi aur shaktishaali bachchon ko dekh rahe hain। snehi bachchon mein bhi bhinna-bhinna prakaar ke sneh vaale hain। ek hain - doosron ki shreshtha jeevan ko dekh, doosron ka parivartan dekh usse prabhaavit ho snehi banna। doosren hain - kisi na kisi gun ki, chaahe sukh va shanti ki thodi-si anubhav ki jhalak dekh snehi banna। teesre hain - sang arthaat sangathan ka, shuddh aatmaon ka sahaara anubhav karne vaali snehi aatmaayen। chauthe hain - parmaatma snehi aatmaayen। snehi sab hain lekin sneh mein bhi number hain। yathaartha snehi arthaat baap ko yathaartha reeti se jaan snehi banna।

aise hi sahayogi aatmaon mein bhi bhinna-bhinna prakaar ke sahayogi hain। ek hain - bhakti ke sanskaar pramaan sahayogi। achhi baaten hain, achha sthaan hai, achhi jeevan vaale hain,achhe sthaan par karne se achha phal milta hai, isi aadhaar par, isi aakarshan se sahayogi banna arthaat apna thoda-bahut tan-man-dhan lagaana। doosre hain - gyaan va yog ki dhaarna ke dvaara kuchh praapti karne ke aadhaar par sahayogi banna। teesre hain - ek baap doosra na koi। ek hi baap hai,ek hi sarva praapti ka sthaan hai। baap ka kaarya so mera kaarya hai। aise apna baap, apna ghar, apna kaarya, shreshtha eeshvareey kaarya samajh sahayogi sada ke liye banna। to antar ho gaya na!

aise hi shaktishaali aatmaayen, ismen bhi bhinna-bhinna stage vaale hain - sirf gyaan ke aadhaar par jaanne vaale ki main aatma shakti swaroop hoon,sarvashaktivaan baap ka bachcha hoon - yeh jaankar prayatna karte hain shaktishaali sthiti mein sthit hone ka। lekin sirf jaanne tak hone kaaran jab yeh gyaan ki point smriti mein aati hai, us samay shaktishaali point ke kaaran woh thoda-sa samay shakti- shaali bante phir point bhooli,shakti gai। jara bhi maaya ka prabhaav, gyaan bhulaae nirbal bana deta hai। doosre hain - gyaan ka chintan bhi karte, varnan bhi karte, doosron ko shaktishaali baaten sunaate,us samay seva ka phal milne ke kaaran apne ko utna samay shaktishaali anubhav karte hain lekin chintan ke samay tak va varnan ke samay tak, sada nahin। pahli chintan ki sthiti, doosri varnan ki sthiti।

teesre hain - sada shaktishaali aatmaayen। sirf chintan aur varnan nahin karte lekin master sarvashaktivaan swaroop ban jaate। swaroop banna arthaat samartha banna। unke har kadam, har karma svatah hi shaktishaali hote hain। smriti swaroop hain isliye sada shaktishaali sthiti hai। shaktishaali aatma sada apne ko sarvashaktivaan baap ke saath,combined anubhav karegi। aur sada shreemat ka haath chhatrachhaaya ke roop mein anubhav hoga। shaktishaali aatma,sada dridhta ki chaabi ke adhikaari hone kaaran saphalta ke khazaane ke maalik anubhav karte hain। sada sarva praaptiyon ke jhoolon mein jhoolte rehte hain। sada apne shreshtha bhaagya ke man mein geet gaate rehte hain। sada roohaani nashe mein hone kaaran puraani duniya ke aakarshan se sahaj pare rehte hain। mehnat nahin karni padti hai। shaktishaali aatma ka har karma, bol svatah aur sahaj seva karaata rehta hai। sva parivartan va vishwa-parivartan shaktishaali hone ke kaaran saphalta hui padi hai,yeh anubhav sada hi rehta hai। kisi bhi kaarya mein kya karen,kya hoga yeh sankalp maatra bhi nahin hoga। saphalta ki maala sada jeevan mein padi hui hai। vijayi hoon,vijay maala ka hoon। vijay janma siddha adhikaar hai, yeh atal nishchay svatah aur sada rehta hi hai। samjha। ab apne aap se poochho - main kaun?shaktishaali aatmaayen maainoriti hain। snehi,sahayogi usmein bhi bhinna-bhinna variety vaale majority hain। to ab kya karenge? shakti- shaali bano। sangamayug ka shreshtha sukh anubhav karo। samjha! sirf jaanne vaale nahin,paane vaale bano। achha-

apne ghare mein aaye va baap ke ghar mein aaye। pahunch gaye, yeh dekh baapdaada khush hote hain। aap bhi bahut khush ho rahe hain na! yeh khushi sada kaayam rahe। sirf madhuban tak nahin - sangamayug hi saath rahe। bachchon ki khushi mein baap bhi khush hai। kahaan-kahaan se chalkar, sahan kar pahunch to gaye na। garmi-sardi,khaan-paan sabko sahankar pahunche ho। dhool mitti ki varsha bhi hui। yeh sab puraani duniya mein to hota hi hai। phir bhi aaraam mil gaya na। aaraam kiya? teen foot nahin to do foot jagah to mili। phir bhi apna ghar, daata ka ghar meetha lagta hai na। bhakti maarga ki yaatraaon se to achha sthaan hai। chhatrachhaaya ke andar aa gaye। pyaar ki paalna mein aa gaye। yagya ki shreshtha dharni par pahunchna,yagya ke prasaad ka adhikaari banna,kitna mahatva hai। ek kana, anek moolyon ke samaan hai। yeh to sab jaante ho na! woh to prasaad ka ek kana milne ke pyaase hain aur aapko to brahma bhojan pet bharkar milega। to kitne bhaagyavaan ho! is mahatva se brahma bhojan khaana to sada ke liye man bhi mahaan ban jaayega। achha- sabse jyaada panjaab aaya hai। is baari jyaada kyon bhaage ho? itni sankhya kabhi nahin aai hai। hosh mein aa gaye! phir bhi baapdaada ye hi shreshtha visheshta dekhte - panjaab mein satsang aur amritvele ka mahatva hai। nange paav bhi amritvele pahunch jaate hain। baapdaada bhi panjaab nivaasi bachchen ko isi mahatva ko jaanne vaalon ki mahaanta se dekhte hain। panjaab nivaasi arthaat sada sang ke roohaani rang mein range hue। sada sat ke sang mein rahne vaale। aise ho na? panjaab vaale sabhi amritvele samartha ho milan manaate ho? panjaab vaalon mein amritvele ka aalasya to nahin hai na? jhutke to nahin khaate ho? to panjaab ki visheshta sada yaad rakhna। achha-

eastern zone bhi aaya hai, east ki visheshta kya hoti hai? (sanraaij) soorya sada uday hota hai। soorya arthaat roshni ka punj। to sabhi eastern zone vaale master gyaan soorya hain। sada andhakaar ko mitaane vaale,roshni dene vaale hain na! yeh visheshta hai na। kabhi maaya ke andhakaar mein nahin aane vaale। andhakaar mitaane vaale master daata ho gaye na! soorya daata hai na। to sabhi master soorya arthaat master daata ban vishwa ko roshni dene ke kaarya mein busy rehte ho na। jo svayan busy rehte hain, phursat mein nahin rehte,maaya ko bhi unhon ke liye phursat nahin hoti। to eastern zone vaale kya samajhte ho? eastern zone mein maaya aati hai? aati bhi hai to namaskaar karne aati ya Mickey mouse bana deti hai?kya Mickey mouse ka khel achha lagta hai?eastern zone ki gaddi hai - baap ki gaddi। to raajgaddi ho gai na! raajgaddi vaale raaje honge ya Mickey mouse honge? to sabhi master gyaan soorya ho? gyaan soorya uday bhi wahin se hua hai na। east se hi uday hua। samjha apni visheshta। praveshta ki shreshtha gaddi ke arthaat vardaani sthaan ki shreshtha aatmaayen ho। yeh visheshta kisi aur zone mein nahin hai। to sada apne visheshta ko vishwa ki seva mein lagaao। kya visheshta karenge? sada master gyaan soorya। sada roshni dene vaale master daata। achha - sabhi milne aaye hain,sada shreshtha milan manaate rehna। mela arthaat milna। ek second bhi milan mele se vanchit nahin hona। nirantar yogi ka anubhav pakka karke jaana। achha-

sada ek baap ke sneh mein rahne vaale, snehi aatmaon ko har kadam eeshvareey kaarya ke sahayogi aatmaon ko,sada shaktishaali swaroop shreshtha aatmaon ko,sada vijay ke adhikaar ko anubhav karne vaale vijayi bachchon ko baapdaada ka yaadapyaar aur namaste।’’

party se

ek bal aur ek bharose se sada unnati ko paate raho। sada ek baap ke hain, ek baap ki shreemat par chalna hai। isi purooshaartha se aage badhte chalo। anubhav karo shreshtha gyaan swaroop banne ka। mahaan yogi banne ka। gahraai mein jaao। jitna gyaan ki gahraai mein jaayenge utna amoolya anubhav ke ratna praapta karenge। ekaagra buddhi bano। jahaan ekaagrata hai vahaan sarva praaptiyon ka anubhav hai। alpakaal ki praapti ke peechhe nahin jaao। avinaashi praapti karo। vinaashi baaton mein aakarshit nahin ho। sada apne ko avinaashi khazaane ke maalik samajh behad mein aao। had mein nahin aao। behad ka maja aur had ke aakarshan ka maja - ismen raat-din ka pharka hai। isliye samajhdaar ban samajh se kaam lo। aur vartamaan tatha bhavishya shreshtha banaao।achha - omshaanti।