Avyakt murli du lundi 10 décembre 1984

>

10-12-84om shanti avyakt baapdaadaamdhuban

puraane khaate ki samaapti ki nishaani

kamal pushpa sam banaane vaale baap daada bole –

aaj baapdaada saakaar tan ka aadhaar le saakaar duniya mein, saakaar roopdhaari bachchon se milne ke liye aaye hain। vartamaan samay ki halchal ki duniya arthaat duhkh ke vaataavran vaali duniya mein baapdaada apne achal adol bachchon ko dekh rahe hain। halchal mein rehte nyaare aur baap ke pyaare kamal pushpon ko dekh rahe hain। bhay ke vaataavran mein rehte nirbhay, shakti swaroop bachchon ko dekh rahe hain। is vishwa ke parivartak bephikar baadshaahon ko dekh rahe hain। aise bephikar baadshaah ho jo chaaron or ke phikraat ke vaayumandal ka prabhaav ansh maatra bhi nahin pad sakta hai। vartamaan samay vishwa mein majority aatmaon mein bhay aur chinta yeh donon hi vishesh sabhi mein pravesh hain। lekin jitne hi woh phikar mein hain,chinta mein hain utne hi aap shubh chintak ho। chinta badal shubh chintak ke bhaavna swaroop ban gaye ho। bhaybheet ke bajaae sukh ke geet ga rahe ho। itna parivartan anubhav karte ho na! sada shubh chintak ban shubh bhaavna, shubh kaamna ki maansik seva se bhi sabhi ko sukh-shanti ki anchali dene vaale ho na! akaale mrityu vaali aatmaon ko, akaal moorta ban shanti aur shakti ka sahayog dene vaale ho na! kyonki vartamaan samay season hi akaale mrityu ki hai। jaise vaayu ka,samudra ka toofaan achaanak lagta hai,aise yeh akaal mrityu ka bhi toofaan achaanak aur teji se ek saath anekon ko le jaata hai। yeh akaale mrityu ka toofaan abhi to shuru hua hai। vishesh bhaarat mein civil vaar aur praakritik aapdaayen ye hi har kalpa parivartan ke nimitta bante hain। videsh ki roop rekha alag prakaar ki hai। lekin bhaarat mein yahi donon baaten vishesh nimitta banti hain। aur donon ki rehearsal dekh rahe ho। donon hi saath-saath apna part baja rahe hain।

bachchon ne poochha ki ek hi samay ikattha mrityu kaise aur kyon hota? iska kaaran hai। yeh to jaante ho aur anubhav karte ho ki ab sampanna hone ka samay sameep aa raha hai। sabhi aatmaon ka,dvaaprayug va kaliyug se kie hue vikarmon va paapon ka khaata jo bhi raha hua hai woh abhi poora hi samaapta hona hai। kyonki sabhi ko ab vaapas ghar jaana hai। dvaapar se kiye hue karma va vikarma donon ka phal agar ek janma mein samaapta nahin hota to doosre janmon mein bhi chuktu ka va praapti ka hisaab chalta aata hai। lekin abhi last samay hai aur paapon ka hisaab jyaada hai। isliye ab jaldi-jaldi janma aur jaldi-jaldi mrityu - is saja dvaara anek aatmaon ka puraana khaata khatma ho raha hai। to vartamaan samay mrityu bhi dardanaak aur janma bhi majority ka bahut duhkh se ho raha hai। na sahaj mrityu na sahaj janma hai। to dardanaak mrityu aur duhkhamay janma yeh jaldi hisaab-kitaab chuktu karne ka saadhan hai। jaise is puraani duniya mein cheetiyaan, cheeten,machchhar aadi ko maarne ke liye saadhan apnaaye hue hain। un saadhnon dvaara ek hi saath cheetiyaan va machchhar va anek prakaar ke keetaanu ikatthe ho vinaash ho jaate hain na। aise aaj ke samay maanav bhi machchharon, cheetiyon sadrishya akaale mrityu ke vash ho rahe hain। maanav aur cheentiyon mein antar hi nahin raha hai। yeh sab hisaabkitaab aur sada ke liye samaapta hone ke kaaran ikattha akaale mrityu ka toofaan samay prati samay aa raha hai।

vaise dharmaraajpuri mein bhi sajaaon ka part ant mein noondha hua hai। lekin woh sajaayen sirf aatma apne aap bhogti aur hisaab-kitaab chuktu karti hai। lekin karmon ke hisaab anek prakaar mein bhi vishesh teen prakaar ke hain - ek hain aatma ko apne aap bhogne vaale hisaab। jaise - beemaariyaan। apne aap hi aatma tan ke rog dvaara hisaab chuktu karti hai। aise aur bhi dimaag kamzor hona va kisi bhi prakaar ki bhoot praveshta। aise aise prakaar ki sajaaon dvaara aatma svayan hisaab-kitaab bhogti hai। doosra hisaab hai - sambandh samparka dvaara duhkh ki praapti। yeh to samajh sakte ho na ki kaise hai! aur teesra hai - praakritik aapdaaon dvaara hisaab-kitaab chuktu hona। teenon prakaar ke aadhaar se hisaab-kitaab chuktu ho rahe hain। to dharmaraajpuri mein sambandh aur samparka dvaara hisaab va praakritik aapdaaon dvaara hisaab-kitaab chuktu nahin hoga। woh yahaan saakaar srishti mein hoga। saare puraane khaate sabhi ke khatma hone hi hain। isliye yeh hisaab-kitaab chuktu ki machinery ab teevragti se chalni hi hai। vishwa mein yeh sab hona hi hai। samjha! yeh hai karmon ki gati ka hisaab-kitaab। ab apne aap ko check karo - ki mujh brahman aatma ka teevragti ke teevra purooshaartha dvaara sab puraane hisaab-kitaab chuktu hue hain va abhi bhi kuchh bojh raha hua hai?

puraana khaata abhi kuchh raha hua hai va samaapta ho gaya hai? iski vishesh nishaani jaante ho? shreshtha parivartan mein va shreshtha karma karne mein koi bhi apna svabhaav-sanskaar vighna daalta hai va jitna chaahte hain, jitna sochte hain utna nahin kar paate hain,aur yahi bol nikalte va sankalp man mein chalte ki na chaahte bhi pata nahin kyon ho jaata hai। pata nahin kya ho jaata hai? va svayan ki chaahna shreshtha hote, himmat hullaas hote bhi parvash anubhav karte hain, kehte hain aisa karna to nahin tha, socha nahin tha lekin ho gaya। isko kaha jaata hai svayan ke puraane svabhaav-sanskaar ke parvash। va kisi sangadosh ke parvash va kisi vaayumandal vibration ke parvash। yeh teenon prakaar ke parvash sthitiyaan hoti hain to na chaahte hue hona, sochte hue na hona va parvash ban saphalta ko praapta na karna - yeh nishaani hai pichhle puraane khaate ke bojh ki। in nishaaniyon dvaara apne aapko check karo - kisi bhi prakaar ka bojh udti kala ke anubhav se neeche to nahin le aata। hisaab chuktu arthaat har praapti ke anubhvon mein udti kala। kab-kab praapti hai। kab hai to ab raha hua hai। to isi vidhi se apne aapko check karo। duhkhamay duniya mein to duhkh ki ghatnaaon ke pahaad phatne hi hain। aise samay par safety ka saadhan hai hi -‘baap ki chhatrachhaaya’। chhatrachhaaya to hai hi na! achha –

milan mela manaane sab aaye hain। yahi milan mela kitni bhi dardanaak scene ho lekin mela hai to yeh khel lagega। bhaybheet nahin honge। milan ke geet gaate rahenge। khushi mein naachenge। auron ko bhi saahas ka sahayog denge। sthool naachna nahin, yeh khushi ka naachna hai। mela sada manaate rehte ho na! rehte hi milan mele mein ho। phir bhi madhuban ke mele mein aaye ho,baapdaada bhi aise mela manaane vaale bachchon ko dekh harshit hote hain। madhuban ke shringaar madhuban mein pahunch gaye hain।

achha- aise sada svayan ke sarva hisaab-vitaab chuktu kar auron ke bhi hisaab-kitaab chuktu karaane ki shakti swaroop aatmaon ko, sada duhkh dardanaak vaayumandal mein rehte hue nyaare aur baap ke pyaare rahne vaale roohaani kamal pushpon ko,sarva aatmaon prati shubh-chintak rahne vaali shreshtha aatmaon ko baapdaada ka yaadapyaar aur namaste।’’

teachers bahnon se :-sevaadhaari hain, teachers nahin। seva mein tyaag, tapasya samaai hui hai। sevaadhaari banna maana khaan ke adhikaari banna। seva aisi cheez hai jisse har second mein bharpoor hi bharpoor। itne bharpoor ho jaate jo aadha kalpa khaate hi rahenge। mehnat ki jaroorat nahin - aise sevaadhaari। woh bhi roohaani sevaadhaari - rooh ki sthiti mein sthit ho rooh ki seva karne vaale isko kehte hain roohaani sevaadhaari। aise roohaani sevaadhaariyon ko baapdaada sada ‘roohaani gulaab’ ka title dete hain। to sabhi roohaani gulaab ho jo kabhi bhi murjhaane vaale nahin! sada apni roohaaniyat ki khushbu se sabhi ko refresh karne vaale।

2. sevaadhaari banna bhi bahut shreshtha bhaagya hai। sevaadhaari arthaat baap samaan। jaise baap sevaadhaari hai vaise aap bhi nimitta sevaadhaari hain। baap behad ka shikshak hai aap bhi nimitta shikshak ho। to baap samaan banne ka bhaagya praapta hai। sada isi shreshtha bhaagya dvaara auron ko bhi avinaashi bhaagya ka vardaan dilaate raho। saare vishwa mein aisa shreshtha bhaagya bahut thodi aatmaon ka hai। is vishesh bhaagya ko smriti mein rakhte samartha ban samartha banaate raho। udaate raho। sada sva ko aage badhaate auron ko bhi aage badhaao। achha –