Avyakt murli du lundi 7 mars 1988

>

07 - 03 - 88 om shanti avyakt baapdaadaamdhuban

bhaagyavaan bachchon ke shreshtha bhaagya ki list

amritvele bhaagyavaan baap se milan manaane vaale, paramshikshak gyaansaagar baap se padhaai padhne vaale, karma karte bhi karaavanhaar baap ki smriti mein rahne vaale, bhaagyavaan khila raha hai - is smriti mein rah brahmaabhojan khaane vaale, baap ke yaad ki godi mein sone vaale -aise shreshtha bhaagyavaan bachchon ko shreshtha bhaagya ki smriti dilaate hue bhaagyavidhaata baapdaada bole

aaj bhaagyavidhaata baapdaada apne bhaagyavaan bachchon ko dekh rahe hain। har ek brahman bachchen ka bhaagya duniya ke saadhaaran aatmaon mein se ati shreshtha hai kyonki har ek brahman aatma koton mein se koi aur koi mein bhi koi hai। kahaan saadhe paanch sau karod aatmaayen aur kahaan aap braahmanon ka chhota - sa sansaar hai! unhon ke antar mein kitne thode ho! isliye agyaani,anjaan aatmaon ke antar mein aap sabhi brahman shreshtha bhaagyavaan ho। baapdaada dekh rahe hain ki har ek brahman ke mastak par bhaagya ki rekha bahut spashta tilak ke samaan chamak rahi hai। had ke jyotishi haathon se rekha dekhte hain lekin yeh divya eeshvareey bhaagya ki rekha har ek ke mastak par dikhaai deti hai। jitna shreshtha bhaagya utna bhaagyavaan bachchon ka mastak sada alaukik light mein chamakta rehta hai। bhaagyavaan bachchon ki aur nishaaniyaan kya dikhaai dengi? sada mukh par eeshvareey roohaani muskaraahat anubhav hogi। bhaagyavaan ke nayan arthaat divya drishti kisi ko bhi sada khushi ki lahar utpanna karaane ke nimitta banti hai। jisko bhi drishti milegi woh roohaaniyat ka,roohaani baap ka, parmaatma - yaad ka anubhav karega। bhaagyavaan aatma ke samparka mein har ek aatma ko halkaapan arthaat light ki anubhooti hogi। brahman aatmaon mein bhi nambarvaar to ant tak hi rahenge lekin nishaaniyaan nambarvaar sabhi bhaagyavaan bachchon ki hai। aage aur bhi pratyaksha hoti jaayengi।

abhi thoda samay ko aage badhne do। thode samay mein jab ati aur ant - donon hi anubhav hoga to chaaron or anjaan aatmaayen had ke vairaag vritti mein aayengi aur aap bhaagyavaan aatmaayen behad ke vairaag vritti ke anubhav mein hogi। abhi to duniya vaalon mein bhi vairaag nahin hai। agar thodi - bahut rehearsal hoti bhi hai to aur hi albelepan ki neend mein so jaate hain ki yeh to hota hi rehta hai। lekin jab ‘ati' aur ‘ant' ke najaare saamne aayenge to svatah hi had ki vairaag vritti utpanna hogi aur ati tension (tanaav) hone ke kaaran sabhi ka attention (dhyaan) ek baap taraph jaayega। us samay sarva aatmaon ki dil se aavaaj niklegi ki sab ka rachayita, sabhi ka baap ek hai aur buddhi anek taraph se nikal ek taraph svatah hi jaayegi। aise samay par aap bhaagyavaan aatmaon ke behad ke vairaag vritti ki sthiti svatah aur nirantar ho jaayegi aur har ek ke mastak se bhaagya ki rekhaayen spashta dikhaai dengi। abhi bhi shreshtha bhaagyavaan bachchon ki buddhi mein sada kya rehta? ‘bhagwan' aur‘bhaagya'।

amritvele se apne bhaagya ki list nikaalo। bhaagyavaan bachchon ko amritvele svayan baap uthaate bhi hain aur aahvaan bhi karte hain। jo ati snehi bachche hain,unhon ka anubhav hai ki sone bhi chaahe to koi sone nahin de raha hai, koi utha raha hai,bula raha hai। aise anubhav hota hai na। amritvele se apna bhaagya dekha। bhakti mein devtaaon ko bhagwan samajh bhakta ghanti bajaakar uthaate hain aur aapko bhagwan khud uthaate hain,kitna bhaagya hai! amritvele se lekar baap bachchon ke sevaadhaari ban seva karte hain aur phir aahvaan karte hain - ‘aao,baap samaan sthiti ka anubhav karo,mere saath baith jaao।' baap kahaan baitha hai?oonche sthaan par aur oonchi sthiti mein। jab baap ke saath baith jaayenge to sthiti kya hogi! mehnat kyon karte ho?saath mein baith jaao to sang ka rang svatah hi lagega। sthaan ke pramaan sthiti svatah hi hogi। jaise madhuban ke sthaan par aate ho to sthiti kya ho jaati hai? yog lagaana padta hai ya yog laga hua hi rehta hai? tabhi to yahaan jyaada rahne ki ichchha rakhte ho na। abhi sabko kahen - aur 15 din rah jaao to khushi mein naachenge na। to jaise sthaan ka sthiti par prabhaav padta hai,aise amritvele ya to paramdham mein ya sookshm vatan mein chale jaao,baap ke saath baith jaao। amritvela shaktishaali hoga to saara din svatah hi madad milegi। to apne bhaagya ko smriti mein rakho - ‘‘vaah,mera bhaagya!''dincharya hi bhagwan se shuru hoti।

phir apna bhaagya dekho - baap svayan shikshak ban kitna door desh se aapko padhaane aata hai! log to bhagwan ke paas jaane ke liye prayatna karte aur bhagwan svayan aapke paas shikshak ban padhaane aate hain,kitna bhaagya hai! aur kitne samay se seva ki duty baja rahe hain! kabhi susti karta hai? kabhi bahaana lagaata hai - aaj sir darda hai, aaj raatri ko soye nahin hai?to jaise baap athak sevaadhaari ban seva karte hain, to baap samaan bachche bhi athak sevaadhaari। apni dincharya dekho, kitna bada bhaagya hai?baap sada snehi, sikeeldhe bachchen ko kehte hain - koi bhi seva karte ho,chaahe laukik,chaahe alaukik, chaahe parivaar mein,chaahe sevaakendron par - koi bhi karma karo, koi bhi duty bajaao lekin sada yeh anubhav karo ki karaavanhaar kara raha hai mujh nimitta karanhaar dvaara, main seva karne ke liye nimitta bana hua hoon,karaavanhaar kara raha hai। yahaan bhi akele nahin ho, karaavanhaar ke roop mein baap karma karne samay bhi saath hai। aap to sirf nimitta ho। bhagwan vishesh karaavanhaar hai। akele karte hi kyon ho? akela main karta hoon - yeh bhaan rehta hai to yeh ‘main - pan' maaya ka darvaaja hai। phir kehte ho - maaya aa gai। jab darvaaja khola to maaya to intajaar mein hain aur aapne intajaam achha kar liya to kyon nahin aayegi?

yeh bhi apna bhaagya smriti mein rakho ki baap karaavanhaar har karma mein kara raha hai। to bojh nahin hoga। bojh maalik par hota hai, saathi jo hote un par bojh nahin hota। maalik ban jaate ho to bojh aa jaata hai। main baalak aur maalik baap hai,maalik baalak se kara raha hai। bade ban jaate ho to bade duhkh aa jaate hain। baalak bankar, maalik ke direction par karo। kitna bada bhaagya hai yeh! har karma mein baap jimmevaar ban halka banaae uda rahe hain। hota kya hai,jab koi samasya aati hai to kehte ho - baba,abhi baap jaano। aur jab samasya samaapta ho jaati hai to masta ho jaate ho। lekin aise karo hi kyon jo samasya aave। karaavanhaar baap ke direction pramaan har karma karte chalo to karma bhi shreshtha aur shreshtha karma ka phal - sada khushi, sada halkaapan, pharishta jeevan ka anubhav karte rahenge।‘pharishta karma ke sambandh mein aayega lekin karma ke bandhan mein nahin bandhega।'aur baap ka sambandh karaavanhaar ka juta hua hai,isliye nimitta bhaav mein kabhi ‘main - pan' ka abhimaan nahin aata hai। sada nirmaan ban nirmaan ka kaarya karenge। to kitna bhaagya hai aapka!

aur phir brahma - bhojan khilaata kaun hai? naam hi hai - ‘brahma - bhojan'। brahmabhojan nahin, brahma bhojan। to brahma yagya ka sada rakshak hai। har ek yagya - vatsa va brahma - vatsa ke liye brahma baap dvaara brahma - bhojan milna hi hai। log to vaise hi kehte ki hamko bhagwan khila raha hai। maaloom hai nahin bhagwan kya,lekin khilaata bhagwan hai। lekin brahman bachchon ko to baap hi khilaata hai। chaahe laukik kamaai bhi karke paise jama karte,usi se bhojan mangaate bhi ho lekin pahle apni kamaai bhi baap ki bhandaari mein daalte ho। baap ki bhandaari bholaanaath ka bhandaara ban jaata hai। kabhi bhi is vidhi ko bhoolna nahin। nahin to, sochenge - ham khud kamaate,khud khaate hain। vaise to trustee ho,trustee ka kuchh nahin hota hai। ham apni kamaai se khaate hain - yeh sankalp bhi nahin uth sakta। jab trustee hain to sab baap ke havaale kar diya। tera ho gaya, mera nahin। trustee arthaat tera aur grihasthi arthaat mera। aap kaun ho? grihasthi to nahin ho na?bhagwan khila raha hai, brahma - bhojan mil raha hai - brahman aatmaon ko yeh nasha svatah hi rehta hai aur baap ki guarantee hai - 21 janma brahman aatma kabhi bhookhi nahin rah sakti, bade pyaar se daal - roti, sabji khilaayenge। yeh janma bhi daal - roti pyaar ki khaayenge,mehnat ki nahin। isliye sada yeh smriti rakho ki amritvele se lekar kya - kya bhaagya praapta hain! saari dincharya socho।

sulaate bhi baap hain lori dekar ke। baap ki godi mein so jaao to thakaavat beemaari sab bhool jaayengi aur aaraam karenge! sirf aahvaan karo - ‘aa raam' to aaraam aa jaayega। akele sote ho to aur - aur sankalp chalte hain। baap ke saath ‘yaad ki godi'mein so jaao।‘meethe bachche', ‘pyaare bachche' ki lori sunte - sunte so jaao। dekho kitna alaukik anubhav hota hai! to amritvele se lekar raat tak sab bhagwan kara raha hai, chalaane vaala chala raha hai, karaane vaala kara raha hai - sada is bhaagya ko smriti mein rakho, emerge karo। koi had ka nasha bhi jab tak peete nahin tab tak nasha nahin chadhta। aise hi sirf bottle mein rakha ho to nasha chadhega? yeh bhi buddhi mein samaaya hua to hai lekin isko use karo। smriti mein laana arthaat peena, emerge karna। isko kehte hain - smriti swaroop bano। aise nahin kaha hai ki buddhi mein samaaya hua rakho। smritisvaroop bano। kitne bhaagyavaan ho! roj apne bhaagya ko smriti mein rakh samartha bano aur udte chalo। samjha, kya karna hai? double videshi had ke nashe ke to anubhvi hain,abhi ye behad ka nasha smriti mein rakho to sada bhaagya ki shreshtha lakeer mastak par chamakti rahegi, spashta dikhaai degi। abhi kinhon ki merge dikhaai deti, kinhon ki spashta dikhaai deti hai। lekin sada smriti mein rahegi to mastak par chamakti rahegi, auron ko bhi anubhav karaate rahenge। achha!

sada bhagwan aur bhaagya - aise smritisvaroop samartha aatmaon ko,sada har karma mein karanhaar ban karma karne vaali shreshtha aatmaon ko,sada amritvele baap ke saath oonche sthaan, oonchi sthiti par sthiti rahne vaale bhaagyavaan bachchon ko, sada apne mastak dvaara shreshtha bhaagya ki rekhaayen auron ko anubhav karaane vaale vishesh braahmanon ko baapdaada ka yaadapyaar aur namaste।''

vidaai ke samay daadi jaanki bambai tatha kurookshetra seva par jaane ki chhutti le rahi hain।

mahaarthiyon ke paanv mein seva ka chakra to hai hi। jahaan jaate hain,vahaan seva ke bina to kuchh hota nahin। chaahe kis kaaran se bhi jaayen lekin seva samaai hui hai। har kadam mein seva ke sivaae kuchh hai hi nahin। agar chalte bhi hain to chalte hue bhi seva hai। agar khaana bhi khaate hain, kisko bulaake khila dete hain, sneh se sveekaar karte hain - to yeh bhi seva ho gai। uthte - baithte, chalte seva - hi - seva hai। aise sevaadhaari ho। seva ka chance milna bhi bhaagya ki nishaani hai। bade chakravarti banna hai to seva ka chakra bhi bada hai। achha!