Avyakt murli du samedi 9 janvier 1993

>

09-01-93 om shanti avyakt baapdaadaamdhuban

avyakt varsha manaana arthaat sapoot ban saboot dena

brahma baap samaan avyakt pharishta banne ke umang-utsaah mein rahne vaale bachchon prati avyakt baapdaada bole -

aaj avyakt baap apne avyaktamoorta bachchon se milan mana rahe hain। avyakt arthaat vyakta bhaav se nyaare aur avyakt baap samaan pyaare। sabhi bachche vishesh is varsha aise baap samaan banne ka lakshya rakhte hue yatha shakti bahut achha purooshaartha kar rahe hain। lakshya ke saath lakshan bhi dhaaran karte chal rahe hain। baapdaada sabhi bachchon ka purooshaartha dekh harshit hote hain। har ek samajhte hain ki yahi samaan banna sneh ka saboot hai। isliye aise saboot dene vaale bachchon ko hi sapoot bachche kaha jaata hai। to sapoot bachchon ko dekh baapdaada khush bhi hote hain aur vishesh extra madad bhi dete hain।

jitna himmatvaan bante hain utna padmaguna baap ki madad ke svatah hi paatra ban jaate hain। aise paatra bachchon ki nishaani kya hoti hai?jaise baap ke liye gaayan hai ki baap ke bhandaare sada bharpoor hain, aise sapoot bachchon ke sada sarva ke dil ke sneh ki duaaon se, sarva ke sahayog ki anubhootiyon se,sarva khazaanon se bhandaare bharpoor rehte hain। kisi bhi khazaane se apne ko khaali nahin anubhav karenge। sada unhon ke dil se yeh geet svatah bajta hai-apraapta nahin koi vastu baap ke ham bachchon ke bhandaare mein। unki drishti se, vritti se, vibrations se, mukh se,samparka se sada bharpoor aatmaon ka anubhav hota hai। aise bachche sada baap ke saath bhi hain aur saathi bhi hain। yeh double anubhav ho। sva ki lagan mein sada saath ka anubhav karte aur seva mein sada saathi sthiti ka anubhav karte। yeh donon anubhav ‘saathi’ aur ‘saath’ ka svatah hi baap samaan saakshi arthaat nyaara aur pyaara bana deta hai। jaise brahma baap ko dekha ki baap aur aap combined-roop mein sada anubhav kiya aur karaaya। combined swaroop ko koi alag kar nahin sakta। aise sapoot bachche sada apne ko combined-roop anubhav karte hain। koi taakat nahin jo alag kar sake।

jaise satayug mein devtaaon ki prakriti daasi rehti hai arthaat sada samay pramaan sahayogi rehti hai, aise sapoot bachchon ki shreshtha sthiti kaaran sarva shaktiyaan aur sarva gun samay pramaan sada sahayogi rehte hain arthaat sarva shaktiyon ke,gunon ke raajya-adhikaari rehte hain। saath-saath aise sapoot bachchon ka seva ka vishesh swaroop kya rehta? jaise sabhi vaani dvaara va mansa-seva dvaara seva karte rehte hain,aise seva ve bhi karte hain lekin unhon ki vishesh seva yahi hai ki sada anya aatmaon ko praapta hue baap ke gunon aur shaktiyon ka daan nahin lekin sahayog va praapti ka anubhav karaana। agyaaniyon ko daan denge aur brahman aatmaon ko sahayog va praapti karaayenge। kyonki sabse bade te bada daan gun daan va shaktiyon ka daan hai। nirbal ko shaktivaan banaana-yahi shreshtha daan hai va sahayog hai। to aisa sahayog dena aata hai? ki abhi lene ke liye sochte ho?abhi tak lene vaale ho ya daata ke bachche dene vaale bane ho? va kabhi lete ho, kabhi dete ho-aise?dene lag jaao to lena svatah hi sampanna ho jaayega। kyonki baap ne sabhi ko sabkuchh de diya hai। kuchh apne paas rakha nahin hai, sab de diya hai। sirf lene vaalon ko sambhaalna aur kaarya mein lagaana nahin aata hai। to jitna dete jaayenge utna hi sampannata ka anubhav karte jaayenge। aise sapoot ho na! ‘sapoot’ ki line mein ho ki sapoot banne ki line mein ho? jaise laukik mein bhi maa-baap bachchon ko apne haathon par nachaate rehte hain arthaat sada khush rakhte,umang-utsaah mein rakhte। aise sapoot bachche sada sarva ko umang-utsaah mein nachaate rahenge, udti kala mein udaate rahenge। to yeh varsha avyakt varsha mana rahe ho। avyakt varsha arthaat baap ke sapoot ban saboot dene vaala banna। aisa saboot dena arthaat manaana। avyakt ka arth hi hai vyakta bhaav aur vyakta bhaavna se pare।

jeevan mein udti kala va girti kala ka aadhaar do baaten hi hain-(1) bhaavna aur (2) bhaav। agar kisi bhi kaarya mein kaarya prati ya kaarya karne vaale vyakti ke prati bhaavna shreshtha hai, to bhaavna ka phal bhi shreshtha svatah hi praapta hota hai। ek-hai sarva prati kalyaan ki bhaavna; doosri hai-koi kaisa bhi ho lekin sada sneh aur sahayog dene ki bhaavna; teesri hai-sada himmat-ullaas badhaane ki bhaavna; chauthi hai-koi kaisa bhi ho lekin sada apnepan ki bhaavna aur paanchavi hai-in sabka foundation aatmik-swaroop ki bhaavna। inko kaha jaata hai sadbhaavnaayen va positive bhaavnaayen। to avyakt banna arthaat ye sarva sadbhaavnaayen rakhna। agar in sadbhaavnaaon ke vipreet hain tab hi vyakta bhaav apni taraph aakarshit karta hai। vyakta bhaav ka arth hi hai in paanchon baaton ke naigetiv arthaat vipreet sthiti mein rehna। iske vipreet ko to svayan hi jaante ho, varnan karne ki aavashyakta nahin। jab bhaavna vipreet hoti hai to avyakt sthiti mein sthit nahin ho sakte।

maaya ke aane ke vishesh yahi darvaaje hain। kisi bhi vighna ko check karo-uska mool preet ke bajaae vipreet bhaavnaayen hi hoti hain। bhaavna pahle sankalp roop mein hoti hai,phir bol mein aati hai aur uske baad phir karma mein aati hai। jaisi bhaavna hogi vaise vyaktiyon ke har ek chalan va bol ko usi bhaav se dekhenge,sunenge va sambandh mein aayenge। bhaavna se bhaav bhi badalta hai। agar kisi aatma ke prati kisi bhi samay eershya ki bhaavna hai arthaat apnepan ki bhaavna nahin hai to us vyakti ke har chalan, har bol se miss-andarastainda (Misunderstand-galatphahmi) ka bhaav anubhav hoga। woh achha bhi karega lekin aapki bhaavna achhi na hone ke kaaran har chalan aur bol se aapko bura bhaav dikhaai dega। to bhaavna bhaav ko badalne vaali hai। to check karo ki har aatma ke prati shubh bhaavna, shubh bhaav rehta hai?bhaav ko samajhne mein antar padne se‘miss-andarastainding’ maaya ka darvaaja ban jaati hai। avyakt sthiti banaane ke liye vishesh apni bhaavna aur bhaav ko check karo to sahaj avyakt sthiti mein vishesh anubhav karte rahenge।

kai bachche ashuddha bhaavna va ashubh bhaav se alag bhi rehte hain। lekin ek hai-shubh bhaav aur bhaavna; doosri hai-vyartha bhaav aur bhaavna, teesri hai saadhaaran bhaavna va bhaav। kyonki brahman arthaat seva-bhaav। to saadhaaran bhaavna va saadhaaran bhaav nuksaan nahin karta lekin jo brahman jeevan ka kartavya hai shubh bhaavna se seva-bhaav, woh nahin kar sakte hain। isliye brahman jeevan mein jo seva ka phal jama hone ka vishesh vardaan hai uska anubhav nahin kar sakenge। to saadhaaran bhaavna aur bhaav ko bhi shreshtha bhaavna, shreshtha bhaav mein parivartan karo। check karenge to change karenge aur avyakt pharishta baap samaan sahaj ban jaayenge। to samjha, avyakt varsha kaise manaana hai?

‘shubh bhaavna’ mansa-seva ka bahut shreshtha saadhan hai aur ‘shreshtha bhaav’ sambandh-samparka mein sarva ke pyaare banne ka sahaj saadhan hai। jo sada har ek prati shreshtha bhaav dhaaran karta vahi maala ka sameep manka ban sakta hai। kyonki maala sambandh-samparka mein sameep aur shreshthata ki nishaani hai। koi kisi bhi bhaav se bole va chale lekin aap sada har ek prati shubh bhaav,shreshtha bhaav dhaaran karo। jo ismen vijayi hote hain vahi maala mein pirone ke adhikaari hain। chaahe seva ke kshetra mein bhaashan nahin kar sakte, plan nahin bana sakte lekin jo har ek se sambandh-samparka mein shubh bhaav rakh sakte hain,to yeh ‘shubh bhaav’ sookshm seva-bhaav mein jama ho jaayega। aise shubh bhaav vaala sada sabhi ko sukh dega, sukh lega। to yeh bhi seva hai aur yeh seva-bhaav aage number lene ka adhikaari bana dega। isliye maala ka manka ban jaayenge। samjha? kabhi bhi aise nahin sochna ki hamko to bhaashan karne ka chance hi nahin milta hai, badi-badi seva ka chance nahin milta। lekin yeh seva-bhaav ka golden chance lene vaala chancellor ki line mein aa jaayega arthaat vishesh aatma ban jaayega। isliye is varsha mein vishesh yeh ‘shubh bhaavna’aur ‘shreshtha bhaav’ dhaaran karne ka vishesh attention rakhna।

ashubh bhaav aur ashubh bhaavna ko bhi apne shubh bhaav aur shubh bhaavna se parivartan kar sakte ho। sunaaya tha na ki gulaab ka pushpa badbu ki khaad se khushbu dhaaran kar khushboodaar gulaab ban sakta hai। to aap shreshtha aatmaayen ashubh, vyartha,saadhaaran bhaavna aur bhaav ko shreshthata mein nahin badal sakte! va kahenge-kya karen, iski hai hi ashubh bhaavna, inka bhaav hi mere prati bahut kharaab hai, main kya karoon? aise to nahin bolenge na! aapka to title hi hai vishwa-parivartak। jab prakriti ko tamoguni se satoguni bana sakte ho;to kya aatmaon ke bhaav aur bhaavna ke parivartak nahin ban sakte?to yahi lakshya baap samaan avyakt pharishta banne ke lakshan sahaj aur svatah laayega। samjha,kaise avyakt varsha manaana hai? manaana arthaat banna-yeh braahmanon ki bhaasha ka siddhaanta hai। banna hai na। ki sirf manaana hai? to braahmanon mein vartamaan samay isi purooshaartha ki vishesh aavashyakta hai aur yahi seva maala ke mankon ko sameep laae maala prasiddha karegi। maala ke manke alag-alag taiyaar ho rahe hain। lekin maala arthaat daane,daane ki sameepta। to yeh do baaten daane ki daane se sameepta ka saadhan hain। isko hi kaha jaata hai sapoot arthaat saboot dene vaale। achha!

chaaron or ke sarva sneh ka saboot dene vaale sapoot bachchon ko,sada baap samaan pharishta banne ke umang-utsaah mein rahne vaali aatmaon ko,sada sarva prati shreshtha bhaavna aur shreshtha bhaav rakhne vaali vijayi aatmaon ko,sada har aatma ko shreshtha bhaavna se parivartan karne vaale vishwa-parivartak aatmaon ko,sada vijayi ban vijay maala mein sameep aane vaale vijayi ratnon ko baapdaada ka avyakt varsha ki mubaarak ke saath-saath yaad,pyaar aur namaste।

daadiyon se mulaakaat

(jaanki daadi se)apni himmat aur sarva ke sahayog ki duaayen shareer ko chala rahi hain। samay par shareer bhi sahayog de deta hai। isko kehte hain extra duaaon ki madad। to vishesh aatmaon ko yeh extra madad milti hi hai। thoda shareer ko rest bhi dena padta hai। agar nahin dete hain to vo khitkhit karta hai। jaise auron ko jo chaahta hai vo de dete ho na! kisko shanti chaahiye,kisko sukh chaahiye, kisko himmat chaahiye-to dete ho na! to shareer ko jo chaahiye vo bhi de diya karo। isko bhi to kuchh chaahiye na! kyonki yeh shareer bhi amaanat hai na! isko bhi sambhaalna to padta hai na! achhi himmat se chala rahi ho aur chalna hi hai। samay par aavashyaktaanusaar jaise shareer aapko sahayog de deta hai, to aap bhi thoda-thoda sahayog de do। knowledgeful to ho hi। achha hai। kyonki is shareer dvaara hi anek aatmaon ka kalyaan hona hai। aap logon ke sirf saath ke anubhav se hi sab bahut badi madad ka anubhav karte hain। haajir hona bhi seva ki haajiri ho jaati hai। chaahe sthool seva na bhi karen lekin haajir hone se haajiri pad jaati hai। second bhi seva ke bina na rah sakte ho,na rehte ho। isliye seva ka jama ka khaata jama ho hi raha hai।

bahut achha part baja rahi ho,bajaati rahengi। achha part mila hai na! itna badhiya part drama anusaar duaaon ke kaaran mila hai! ye brahman janma ke aadi ke sanskaar ‘merciful’ aur‘sahayog ki bhaavna’ ka phal hai। chaahe tan se, chaahe man se-merciful aur sahayog ki bhaavna ka part aadi se mila hua hai। isliye uska phal sahaj praapta ho raha hai। shaareerik sahayog ki bhi seva dil se ki hai। isliye shareer ki aayu in duaaon se badh rahi hai। achha!

(daadi ji se) achha,service karke aai ho! yeh drama bhi sahayogi banta hai aur ye shubh bhaavna ka phal aur bal milta hai। sangathit roop mein shubh bhaavna ye phal deti hai। to achha raha aur achhe te achha rehna hi hai। abhi to aur bhi avyakt sthiti dvaara vishwa ki aatmaon ko aur seva mein aage badhne ka bal milega। sirf braahmanon ke dridh parivartan ke liye vishwa-parivartan rooka hua hai। braahmanon ka parivartan kabhi powerful hota hai, kabhi halka hota hai। to ye halchal bhi kabhi jor pakadti hai,kabhi dheeli hoti hai। sampanna banne to yahi brahman hain। achha!

(chandramni daadi se)behad ki chakravarti ban gai-aaj yahaan,kal vahaan! to isko hi kaha jaata hai vishwa ki aatmaon se svatah aur sahaj sambandh badhna। vishwa ka raajya karna hai, vishwa-kalyaankaari hain, to kone-kone mein paanv to rakhne chaahiye na। isliye desh-videsh mein chance mil jaata hai। programme na bhi banaao lekin yeh draamaanusaar sangam ki seva bhavishya ko pratyaksha kar rahi hai। isliye behad ki seva aur behad ke sambandh-samparka badh rahe hain aur badhte rahenge। state ka raaja to nahin banna hai, vishwa ka banna hai! panjaab ka raaja to nahin banna hai! vo to nimitta dayuti hai, dayuti samajhkar nibhaate ho। baaki order karen ki madhuban nivaasi banna hai, to sochenge kya ki panjaab ka kya hoga? nahin। jab tak jahaan ki jo dayuti hai, bahut achhi tarah se nibhaana hi hai।

(jaanki daadi se)abhi kahen ki aap foreign se yahaan aa jaao to baith jaayengi na! baap bhejte hain, khud nahin jaati ho। aakhir to sabhi ko yahaan aana hi padega na! isliye baar-baar aate-aate phir rah jaayenge। chakkar lagaakar aa jaate ho na! isliye nyaare bhi ho aur seva ke pyaare bhi। desh aur vyaktiyon ke pyaare nahin, seva ke pyaare। achha! sabko yaad dena, avyakt varsha ki mubaarak dena।

avyakt baapdaada ki personal mulaakaat

group nan.1

bachne ke liye buddhi ko shuddh sankalpon mein busy rakho

sada khush rehte ho! ya kabhi khush rehte aur kabhi khushi ke bajaae koi vyartha sang va sankalp mein aa jaate ho? agar koi bhi vyartha sankalp va vyartha sang milta hai va chalta hai to khushi samaapta ho jaati hai। kyonki vyartha sang va vyartha sankalp bojh hai aur khushi halki cheez hai! isliye dekho, jab khush hote hain to naachte hain। jo halka hoga woh khushi mein naachta hai! shareer kitna bhi bhaari ho lekin man halka hoga to bhi naachega। man bhaari hoga to halka bhi naachega nahin। to khushi hai halkaapan aur vyartha sankalp va vyartha sang hai bhaari,bojh। bojh sada neeche le aata hai aur halki cheez sada oonchi jaati hai। to khush rahne ka sahaj saadhan hai-sada halke raho। shuddh sankalp halke hain aur vyartha sankalp bhaari hain। jab bhi kiske vyartha sankalp chalte hain to kya anubhav karte ho?maatha bhaari ho jaata hai। bojh hai tabhi to maatha bhaari karta hai na! to sada baap ke sang mein rehna aur sada baap ke diye hue shuddh sankalpon mein rehna! yeh roz ki murli roj ke liye shuddh sankalp hain। to kitne shuddh sankalp baap dvaara mile hain! jab koi achhi cheez va badhiya cheez mil jaati hai to halki (ghatiya) cheez ko kya karenge?khatma karenge na!

saara din buddhi ko busy rakhne ke liye roz savere-savere baap shuddh sankalp dete hain। jahaan shuddh honge vahaan vyartha nahin honge। buddhi ko khaali rakhte ho, isliye vyartha aate hain। yahi sahaj upaay hai, saadhan hai ki sada shuddh sankalpon se buddhi ko busy rakho। sirf ‘khush’ rehna hai-yahi yaad nahin rakhna lekin ‘sada khush’ rehna hai! yeh socho ki brahman khush nahin rahenge to kaun rahega! brahman hi shreshtha hain na। devtaaon se bhi brahman shreshtha hain। braahmanon ki khuraak hi khushi hai। isliye gaate hain-khushi jaisi koi khuraak nahin। agar koi sada khush rehta hai to poochhte hain-aapko kya mila hai! aap laukik jeevan se alaukik jeevan vaale ho gaye। to yeh alaukikta ki jhalak chehre par dikhaai deni chaahiye। aise nahin-main andar se to khush rehti hoon,baahar se dikhaai nahin deta। andar ka baahar avashya aata hai। to sada check karo ki hamaara chehra aur chalan alaukikta ki jhalak dikhaata hai?achha!

group nan.2

achal-adol banne ke liye roz teen bindiyon ka tilak lagaao

apne ko trikaaldarshi anubhav karte ho?sangamayug par baap sabhi aatmaon ko trikaaldarshi banaate hain। kyonki sangamayug hai shreshtha, ooncha। to jo ooncha sthaan hota hai vahaan khada hone se sab kuchh dikhaai deta hai। to sangamayug par khade hone se teenon hi kaal dikhaai dete hain। ek taraph duhkhadhaam ka gyaan hai,doosre taraph sukhdhaam ka gyaan hai aur vartamaan kaal sangamayug ka bhi gyaan hai। to trikaaldarshi ban gaye na! teenon hi kaal ka gyaan emerge hai? teenon hi kaal smriti mein rakho-kal duhkhadhaam mein the,aaj sangamayug mein hain aur kal sukhdhaam mein jaayenge। jo bhi karma karo woh trikaaldarshi bankar ke karo to har karma shreshtha hoga। vyartha nahin hoga, samartha hoga! samartha karma ka phal samartha milta hai। trikaaldarshi banne se-yeh kyon hua, yeh kya hua, ‘aisa nahin vaisa hona chaahiye’…-yeh sab question-mark khatma ho jaate hain। nahin to bahut question uthte hain। ‘kyon’ ka question uthne se vyartha sankalpon ki queue lag jaati hai aur trikaaldarshi banne se fullstop lag jaata hai। nothing new,to full stop lag gaya na! fullstop arthaat bindi lagaane se bindu roop sahaj yaad aa jaata hai।

baapdaada sada kehte hain ki amritvele sada teen bindiyon ka tilak lagaao। aap bhi bindi,baap bhi bindi aur jo ho gaya,jo ho raha hai,nothing new,to fullstop bhi bindi। yeh teen bindi ka tilak arthaat smriti ka tilak। mastak smriti ka sthaan hai, isliye tilak mastak par hi lagaate hain। teen bindiyon ka tilak lagaana arthaat smriti mein rakhna। phir saara din achal-adol rahenge। yeh ‘kyoon’ aur‘kya’hi halchal hai। to achal rahne ka saadhan hai-amritvele teen bindiyon ka tilak lagaao। yeh bhoolo nahin। jis samay koi baat hoti hai us samay fullstop lagaao। aise nahin ki yaad tha lekin us samay bhool gaya। gaadi mein yadi samay par brake na lage to phaayda hoga ya nuksaan? to samay par fullstop lagaao। nothing new-hona tha,ho raha hai। aur saakshi hokar ke dekhkar aage badhte chalo। to trikaaldarshi arthaat aadi,madhya, ant-teenon ko jaan jaisa samay, vaisa apne ko sada safe rakh sako। aise nahin kaho ki-yeh samasya bahut badi thi na, chhoti hoti to main paas ho jaati lekin samasya bahut badi thi! kitni bhi badi samasya ho lekin aap to master sarvashaktivaan ho na! to bade hue na! bade ke aage samasya nahin hai lekin khel hai! isko kaha jaata hai trikaaldarshi। trikaaldarshi aatma sada hi nishchint rehti hai kyonki use nishchay hai ki hamaari vijay hui hi padi hai।

jab apne ko jimmevaar samajhte ho tab chinta hoti hai aur baap ko jimmevaar samajhte ho to nishchint ho jaate ho। kai baar kehte hain na-kya karen,jimmevaari hai na, nibhaana padta hai। lekin trustee ban nibhaao। grihasthi bankar nibha nahin sakenge। trustee bankar ke nibhaane se sahaj bhi hoga aur saphal bhi honge। to sab chinta chhodkar jaana। jinke paas thodi-bahut ho,to chhodkar jaana, saath nahin le jaana। vaise teertha par kuchh chhodkar aate hain na। to yeh bhi mahaan teertha hai na! to sada ke liye nishchint, nishchaybuddhi। samjha? kichda saath mein nahin rakha jaata hai। maataaon ko aadat hoti hai-puraani cheez bhi hogi to gaanth baandhakar rakh dengi! to yeh bhi gaanth baandhakar nahin jaana। maataayen gathri baandhati hain, paandav jeb mein rakhte hain। to ise chhodkar nishchint arthaat sada achal-adol sthiti mein rehna। achha!

group nan.3

saphaltaamoorta banne ka saadhan hai-jeevanmukta sthiti

brahman jeevan arthaat sada jeevan-mukta sthiti vaale,sarva bandhanon se mukta। pahla bandhan hai apne dehbhaan ka bandhan। brahman jeevan mein deh ka bandhan, sambandh ka bandhan, saadhnon ka bandhan-sab khatma ho gaya na! mota dhaaga khatma ho gaya। maheen dhaaga rah to nahin gaya?abhi sambandh hai lekin bandhan nahin। bandhan apne vash mein karta hai aur sambandh sneh ka sahayog deta hai। lekin shuddh sambandh। deh ke sambandhiyon ka deh ke naate se sambandh nahin lekin aatmik sambandh। to bandhan mein ho ya sambandh mein? agar vash hote ho,parvash ho jaate ho to bandhan hai aur mukta rehte ho to sambandh hai! kaise rehte ho?thoda-thoda aakarshit hote ho? brahman arthaat jeevan-mukta। to check karo-koi bhi karma mukta hokar ke karte hain? kyonki karma ke bina to rah nahin sakte hain, jab karmendriyon ka aadhaar hai to karma to karna hi hai, lekin karma-bandhan nahin, karma-sambandh। jeevan-mukta avastha arthaat saphalta bhi jyaada aur karma ka bojh bhi nahin। jo mukta hain vo sada hi saphaltaamoorta hain। jeevan-mukta aatma sada phalak se kahegi ki saphalta janmasiddha adhikaar hai। jo bandhan mein hoga vo sada sochta rahega ki saphalta hogi ya nahin, yeh karen ya nahin karen, theek hoga ya nahin hoga?lekin brahman aatmaon ki saphalta nishchit hai,vijay nishchit hai। aise nahin samajhna ki bhavishya mein jeevan-mukta honge! abhi jeevan-mukta hona hai। is samay hi jeevanbandh aur jeevan-mukta ka gyaan hai! satayug mein yeh gyaan nahin hoga! maja hai to is samay ka hai! jeevanbandh ka bhi anubhav kiya aur jeevan-mukta ka bhi anubhav kar rahe ho! sada jeevan-mukta rahne ka sahaj saadhan hai-’main’aur ‘mera baba’! kyonki mere-mere ka hi bandhan hai। mera baba ho gaya to sab mera khatma। jab‘ek mera’mein ‘sab mera-mera’ samaapta ho gaya, to bandhan-mukta ho gaye। to yeh sahaj saadhan aata hai na! karma ke pahle check karo ki bandhan mein phans ke to karma nahin kar rahe hain? duniya vaale to bahut kathin tap karte hain mukti praapta karne ko। aur aapko sahaj mila na! ‘mera baba’ kaha aur bandhan khatma। to jo sahaj hota hai, usko sada apnaaya jaata hai। jo mushkil hota hai use sada nahin kar sakte hain। to sada sahaj hai ya kabhi-kabhi thoda mushkil lagta hai? to yahi yaad rakhna ki ham brahman jeevan-mukta aatma hain। sahajyogi arthaat saphaltaamoorta। achha!

group nan.4

svamaan mein raho to sarva had ki ichchhaayen sama jaayengi

svayan ko shreshtha svamaandhaari aatma anubhav karte ho? jitna svamaan mein sthit hote ho,to svamaan,dehbhaan ko bhula deta hai। aadha kalpa dehbhaan mein rahe aur deh-bhaan ke kaaran alpakaal ke maan praapta karne ke bhikhaar rahe। abhi baap ne aakar svamaandhaari bana diya। svamaan mein sthit rehte ho ya kabhi had ke maan ki ichchha rakhte ho? jo svamaan mein rehta use had ke maan praapta karne ki kabhi ichchha nahin hoti, ichchha maatram avidya ho jaate। ek svamaan mein sarva had ki ichchhaayen sama jaati hain, maangane ki aavashyakta nahin rehti। kyonki yeh had ki ichchhaayen kabhi bhi poorn nahin hoti hain। ek had ki ichchha anek ichchhaaon ko utpanna karti hai, sampanna nahin karti lekin paida karti hai। svamaan sarva ichchhaaon ko sahaj hi sampanna kar deta hai। to jab baap sada ke liye svamaan deta hai, to kabhi-kabhi kyon leven! svamaandhaari sada bephikra baadshaah hota hai, sarva praapti swaroop hota hai। use apraapti ki avidya hoti hai। to sada svamaandhaari aatma hoon-yeh yaad rakho। svamaandhaari sada baap ke diltakhtansheen hota hai kyonki bephikra baadshaah hai! baadshaah ka jeevan kitna shreshtha hai! duniya vaalon ke jeevan mein kitni phikra rehti hain-uthenge to bhi phikra, soyenge to bhi phikra। aur aap sada bephikra ho।

paandavon ko phikra rehta hai? kal vyaapaar theek hoga ya nahin,kal desh mein shanti hogi ya ashaanti…-yeh phikra rehta hai?kal bachche achhi tarah se sambhaal sakenge ya nahin-yeh phikra maataaon ko rehta hai? duniya mein kuchh bhi ho levin ashaanti ke vaayumandal mein aap to shaantasvaroop aatmaayen ho,auron ko bhi shanti dene vaale। ya ashaanti hogi to aap bhi ghabra jaayenge? aapke ghar ke baahar bahut hangaama ho raha ho, to aap us samay kya karte ho?yaad mein baith jaate ho na! baap ko yaad karke shanti lekar auron ko dena-yeh seva karo। kyonki jo achhi cheej apne paas hai aur doosron ko uski aavashyakta hai,to deni chaahiye na! to ashaanti ke samay par master shanti-daata ban auron ko bhi shanti do, ghabraao nahin। kyonki jaante ho ki-jo ho raha hai vo bhi achha aur jo hona hai woh aur achha! vikaaron ke vasheebhoot manushya to ladte hi rahenge। unka kaam hi yeh hai। lekin aapka kaam hai-aisi aatmaon ko shanti dena। kyonki vishwa kalyaankaari ho na! vishwa-kalyaankaari aatmaayen sada master daata ban deti rehti hain। to sabhi shakti-roop ho na! maataayen chaar deevaari mein rahne vaali ablaayen heen ho, shaktiyaan ho। to shakti sada vardaani hogi aur paandav bhi sada mahaaveer। mahaaveer ki sada vijay hai। kabhi haar nahin kha sakte। achha!

group nan.5

sampanna banne ka sahaj saadhan - sada baap ke saath raho

(double videshi bachchon se)sada apne ko is srishti-drama ki behad stage par part bajaane vaale hero actor samajhte ho?oonche te oonche baap ke saath part bajaane vaale oonche te oonche actor ho gaye na। baap ke saath part baja rahe ho, isliye vishesh paartadhaari ban gaye। hero actor ke oopar sabhi ki nazar hoti hai। to saare vishwa ke aatmaon ki najar abhi aap sabke taraph hai! to ek nasha yeh hai ki ham baap ke saath part bajaane vaale hain aur doosra nasha hai ki saare vishwa ki najar ham shreshtha aatmaon ke oopar hai! to double nasha hai। double khushi hai-ek shreshtha aatma banne ki khushi, doosri baap se milne ki! double hero ho-ek heere tulya jeevan banaai hai aur doosra vishesh paartadhaari ho! aisa kabhi socha tha ki itna vishesh part bajaane vaali aatma hoon? socha nahin tha lekin second mein ban gaye। second ka sauda hai na! sahaj praapta kiya ya mehnat lagi? foreign culture se brahman culture badalne mein mehnat nahin lagi? kitni baar brahman culture mein rahe ho? anek baar ke sanskaar yaad aate hain? ya emerge karne mein mehnat lagti hai? yeh sometime (Sometime;kabhi-kabhi) kab tak rahega? agar abhi vinaash ho jaae to ever ready hue?achha!

bhaarat vaale taiyaar ho?kal vinaash ho jaae-itne sampanna bane ho? ever ready banna hi safety ka saadhan hai। agar samay milta hai to sangamayug ki mauj manaao lekin raho ever ready। kyonki final vinaash ki date kabhi bhi pahle maaloom nahin padegi,achaanak hona hai। ever ready nahin honge to dhokha ho jaayega। isliye ever ready bano। sada ye yaad rakho ki ham aur baap sada saath hain। to jaise baap sampanna hai vaise saath rahne vaale bhi sampanna ho jaayenge। jab saath ka anubhav karenge to nirantar yogi sahaj ban jaayenge। sada saath hain, saath rahenge aur sweet hom mein saath chalenge। jo companion honge ve saath chalenge aur baraati honge,dekhne vaale honge to peechhe-peechhe chalenge। samaan banne vaale hi saath chalenge। to yeh plan banaao ki samaan banna hi hai aur saath chalna hi hai। achha! (double videshi bachchon prati)sabko baapdaada ki taraph se naye varsha ki mubaarak aur yaad,pyaar dena। baapdaada dekh rahe hain-sabhi apne ko baap samaan banaane ke umang-utsaah mein ud rahe hain। to ud rahe hain aur sada udte rahenge।