Avyakt murli du mardi 30 novembre 2004

>

30-11-04 om shanti avyakt baapdaadaamdhuban

“abhi apne chalan aur chehre dvaara brahma baap samaan avyakt roop dikhaao, saakshaatkaar moorta bano”

aaj bhaagya vidhaata baap apne chaaron or ke shreshtha bhaagyavaan bachchon ko dekh harshit ho rahe hain। saare kalpa mein aisa shreshtha bhaagya kisi ka bhi ho nahin sakta। kalpa-kalpa ke aap bachche hi is bhaagya ka adhikaar praapta karte ho। yaad hai - apna kalpa-kalpa ke adhikaar ka bhaagya? yeh bhaagya sarva shreshtha bhaagya kyon hai? kyonki svay bhaagyavidhaata ne is shreshtha bhaagya ka divya janma aap bachchon ko diya hai। jiska janma hi bhaagya vidhaata dvaara hai, usse shreshtha bhaagya aur ho hi nahin sakta। apne bhaagya ka nasha smriti mein rehta hai?apne bhaagya ki list nikaalo to kitni badi list hai? apraapta koi vastu nahin aap braahmanon ke bhaagyavaan jeevan mein। sabke man mein apne bhaagya ki list smriti mein aa gai! smriti mein laao, aa gai smriti mein?dil kya geet gaati? vaah bhaagya vidhaata! aur vaah mera bhaagya। is shreshtha bhaagya ki visheshta yahi hai - ek bhagwan dvaara teen sambandh ki praapti hai। ek dvaara ek mein teen sambandh, jo jeevan mein vishesh sambandh gaaye hue hain - baap,shikshak, satguru,kisi ko bhi ek dvaara teen vishesh sambandh aur praapti nahin hai। aap phalak se kehte ho hamaara baap bhi hai, shikshak bhi hai to satguru bhi hai। baap dvaara sarva khazaanon ki khaan praapta hai। khazaanon ki list bhi smriti mein aai! smriti mein laao kya-kya khazaana baap dvaara mil gaya! mil gaya hai ya milna hai? kya kahenge? baalak so maalik hai hi। shikshak dvaara shiksha se shreshtha pad ki praapti ho gai। vaise bhi dekha jaae duniya mein bhi sabse shreshtha pad raajya pad gaaya jaata hai,to aap to double raaje ban gaye ho। vartamaan svaraajya adhikaari aur bhavishya mein anek janma raajya pad adhikaari। padhaai ek janma ki, woh bhi chhota sa janma aur pad ki praapti anek janma, aur raajya bhi akhanda, atal,nirvighna raajya। abhi bhi svaraajya adhikaari bephikar baadshaah ho, hai? bephikar baadshaah bane ho?jo bephikar hai woh haath uthaao। bephikar,thoda bhi phikar nahin hai?dekhna,jab koi puppet show saamne aata hai phir phikar hota hai? maaya ka puppet show saamne aata hai ya nahin? phir thoda-thoda phikar hota hai?nahin hota?thoda chinta,chintan chalta hai ya nahin chalta hai? vaise shreshtha bhaagya abhi se bephikar baadshaah banaata hai। yeh thodi bahut jo baate aati hai woh aur hi aage ke liye anubhvi, paripakva banaane vaali hain।

abhi to sabhi in bhinna-bhinna baaton ke anubhvi ho gaye ho na। ghabraate to nahin hain na? aaraam se saakshi ki seat par baith yeh puppet show dekho,cartoon show dekho। hai kuchh bhi nahin, cartoon hai। abhi to majboot ho gaye ho na! abhi majboot hain ? ya kabhi-kabhi ghabraate ho? yeh kaagaj ka sher bankar aate hain। hai kaagaj ka lekin sher banke aate hain। abhi samay pramaan anubhveemoorta ban samay ko, prakriti ko, maaya ko challenge karo - aao, ham vijayi hain। vijayi ki challenge karo। (beech-beech mein khaasi aa rahi hai) aaj baaja thoda kharaab hai, milna to hai na!

baapdaada ke paas do group baar-baar aate hain, kislie aate hain? donon group baapdaada ko kehte hain - ham taiyaar hain। ek yeh samay, prakriti aur maaya। maaya samajh gai hai ab hamaara raajya jaane vaala hai। aur doosra group hai - advance party। donon group date poochh rahe hain। foreign mein to ek saal pahle date fix karte ho na? aur yahaan 6 maas pahle? bhaarat mein fast jaate hain, 15 din mein bhi koi programme ki date ho jaati hai। to samaapti, sampannata, baap ke samaan banne ki date kaun si hai? woh baapdaada se poochhte hain। yeh date abhi aap braahmanon ko fix karni hai। ho sakti hai? date fix ho sakti hai? paandav bolo, teenon hi bolo। (baapdaada nirver bhaai,ramesh bhaai,brijmohan bhaai se poochh rahe hain) date fix ho sakti hai? bolo - ho sakti hai?ki achaanak honi hai? drama mein fix hai lekin usko practical mein laana hai ya nahin? woh kya? bataao। honi hai? achaanak hoga? date fix nahin hogi ? pahli line vaale bataao hogi? jo kehte hain drama ko practical mein laane ke liye man mein date ka sankalp karna padega,woh haath uthaao। karna padega?yeh nahin utha rahe hai? achaanak hogi? date fix kar sakte hain? peechhe vaalon ne samajh liya achaanak hona hai yeh right hai lekin apne ko taiyaar karne ke liye lakshya zaroor rakhna padega। bina lakshya ke sampanna banne mein albelaapan aa jaata hai। aap dekho jab date fix karte ho tabhi saphalta milti hai। koi bhi programme ki date fix karte ho na?banna hi hai,yeh sankalp to karna padega na! ya nahin,drama mein aapehi ho jaayega? kya samajhte ho? pahli line vaale bataao। prem (dehraadoon) sunaao। karna padega, karna padega? jayanti bolo, karna padega। woh kab hogi? ant mein hogi jab samay aa jaayega! samay sampanna banaayega ya aap samay ko sameep laayege?

baapdaada ne dekha hai ki smriti mein gyaan bhi rehta hai, nasha bhi rehta hai, nishchay bhi rehta hai,lekin abhi addition chaahiye - chalan aur chehre se dikhaai de। buddhi mein yaad sab rehta hai, mati mein bhi aata hai lekin ab swaroop mein aave। jab saadhaaran roop mein bhi agar koi bade occupation vaala hai ya koi saahookaar ka bachcha edyooketed hai to uski chalan se dikhaai padta hai ki yeh kuchh hai। unka kuchh na kuchh nyaaraapan dikhaai deta hai। to itna bada bhaagya, varsa bhi hai,padhaai aur pad bhi hai। svaraajya to abhi bhi hai na! praaptiya bhi sab hain, lekin chalan aur chehre se bhaagya ka sitaara mastak mein chamakta hua dikhaai de, woh abhi addition chaahiye। abhi logon ko aap shreshtha bhaagyavaan aatmaon dvaara yeh anubhav hona hai,chaahiye nahin,hona hai ki yeh hamaare ishtadev hai,ishtadeviyaan hain। yeh hamaare hain। jaise brahma baap mein dekha - saadhaaran tan mein hote bhi aadi ke samay bhi brahma baap mein kya dikhaai deta tha,krishna dikhaai deta tha na। aadi vaalon ko anubhav hai na! to jaise aadi mein brahma baap dvaara krishna dikhaai deta tha aise hi last mein kya dikhaai deta tha?avyakt roop dikhaai deta tha na! chalan mein, chehre mein dikhaai diya na! abhi baapdaada vishesh nimitta bachchon ko yeh homework de raha hai ki abhi brahma baap samaan avyakt roop dikhaai de। chalan aur chehre se kam se kam 108 maala ke daane to dikhaai deve। baapdaada naam nahin chaahte hain, naam nahin bataate hain - 108 kaun hain lekin unki chalan aur chehra svatah hi pratyaksha ho। yeh homework baapdaada nimitta bachchon ko vishesh de raha hai। ho sakta hai? achha kitna samay chaahiye? aise nahin samajhna ki jo peechhe aaye hain, time ki baat nahin hai, koi samjhe hamko to thoda varsha hi hua hai। koi bhi last so fast aur fast so first ja sakta hai,yeh bhi baapdaada ki challenge hai,kar sakte ho। koi bhi kar sakte ho। last vaala bhi ho sakta hai। sirf lakshya pakka rakho - karna hi hai,hona hi hai।

double foreigners haath uthaao। to double foreigners kya karenge? double chance lenge na। baapdaada naam nahin announce karega lekin unka chehra bataayega - yeh hai। himmat hai?pahli line ko baapdaada dekh raha hai। hai, himmat hai? agar himmat hai to haath uthaao। himmat hai to?peechhe vaale bhi utha sakte hain। jo ote so arjun। achha - baapdaada result dekhne ke liye, kya-kya purushaartha kar rahe hain, kaun-kaun kar raha hai woh result dekhne ke liye 6maas de rahe hain। 6 maas result dekhenge phir final karenge। theek hai?kyonki dekha jaata hai ki abhi samay ki raphtaar tej ja rahi hai, rachna ko tej nahin jaana chaahiye,rachta ko tej hona chaahiye। abhi thoda fast karo, udo abhi। chal rahe hain nahin, ud rahe hain। javaab mein bahut achhe javaab dete hain ki ham hi to hain na! aur kaun hoga! baapdaada khush hote hain। lekin ab log (aatmaaye) jo hain na, woh kuchh dekhne chaahte hain। baapdaada ko yaad hai jab aadi mein aap bachche seva mein nikle the to bachchon se bhi saakshaatkaar hote the, abhi seva aur swaroop dono taraph attention chaahiye। to kya suna! ab saakshaatkaar moorta bano। saakshaat brahma baap bano। achha।

aaj naye-naye bachche bhi bahut aaye hain। apne sneh ki shakti se sabhi pahunch gae ho isliye baapdaada vishesh jo naye-naye bachche aage hain,unhon ko har ek ko naam sahit padamguna mubaarak de rahe hain, saath mein vardaata vardaan de rahe hain - sada brahman jeevan mein jeete raho, udte raho। achha।

seva ka tarna – panjaab:- panjaab vaale utho। bahut achha। yeh bhi vidhi achhi banaai hai,har zone ko chance mil jaata hai। ek to yagya seva dvaara ek-ek kadam mein padamguna kamaai jama ho jaati hai kyoki majority koi bhi karma karte yagya seva yaad rehti aur yagya seva yaad aane se yagya rachta baap to yaad aata hi hai। to seva mein bhi jyaada se jyaada punya ka khaata jama kar lete hain aur jo sachche purushaarthi bachche hain woh apne yaad ke chart ko sahaj aur nirantar bana sakte hain kyoki yahaan ek to mahaarthiyon ka sang hai, sang ka rang sahaj lag sakta hai। atenshan hai to yeh jo 8-10 din milte hain ismen bahut achhi progress kar sakte hain। common reeti se seva ki to itna laabh nahin hai, lekin chance hai ek sahaj nirantar yogi banne ka,punya ka khaata jama karne ka, aur bade te bade parivaar ke nashe mein,khushi mein rahne ka। to panjaab vaalon ko chance mila hai, har zone ko milta hai lekin lakshya rakho ki teenon hi phaayde hue! kitna punya ka khaata jama kiya? sahaj yaad ki progress kitni ki? aur sangathan ya parivaar ke sneh, sameepta ka kitna anubhav kiya?yeh teen hi baaton ka result har ek ko apna nikaalna chaahiye। drama mein chance to milta hai lekin chance lene vaale chancellor bano। to panjaab vaale to hoshiyaar hain na! achha hai। achhi sankhya mein bhi aaye ho, aur seva bhi khuli dil se mili hai। aane vaali sankhya bhi achhi aai hai। achha hai sangathan achha hai।

(aaj do wing - graam vikaas wing aur mahila wing meeting ke liye aage hain)

mahila wing:- ismen majority teachers hain kya? teachers haath uthaao। achha chance hai। seva ki seva aur seva ke pahle meva। sangathan ka aur baap se milan ka maja lena। to seva aur meva dono mil gaya। achha hai। abhi koi naya plan banaaya? jo bhi chaahe mahilaaon ka hai,chaahe kisi bhi varga ke groups bane hue hain। to har ek group kuchh vishesh practical chalan aur chehre par koi na koi gun ya shakti ka beeda uthaaye to ham yeh group, mahilaagroop is gun ya shakti ka practical pratyaksha roop mein laayenge। aise har ek varga vaale koi na koi apne vishesh fix karen aur uski aapas mein jaise service ki result note karte ho na,aise aapas mein chaahe likhaapdhi ho, chaahe sangathan ho, yeh bhi check karte rahen। to pahle aap log karke dikhaana। mahila wing karke dikhaao। theek hai na। har ek wing ko ka na kuchh apna plan banaana hai aur samay fix kare ki itne samay mein itni percentage practical mein laani hai। phir jo baapdaada chaahte hain na,chalan aur chitra par aave,woh aa jaayega। to yeh plan bana karke baapdaada ko dena। har ek wing kya karega? seva ka plan jaise note karte ho na, vaise yeh karke dena। theek hai na! karke dena। achha hai chhota-chhota sangathan kamaal kar sakta hai। theek hai। kya samajhti ho teachers? kar sakte hain? kar sakte hain? to plan banaana। achha। mubaarak ho seva ki।

graam vikaas wing:- abhi tak graam vikaas vaalon ne kitne gaanv parivartan kiya hai? kitne gaanv mein kiya hai? (7 gaanv mein kiya hai, ek gaanv mein 75 percent tak kaam hua hai। is meeting mein bhi programme banaaya hai - “samay ki pukaar - svachchha svarnim graamya bhaarat”is project ke antargat gaanv-gaanv ko vyasan mukta aur svachchha banaane ki seva karenge) achha hai - practical hai na। iski total result jo hai president,prime minister ke paas jaati hai? (abhi nahin bheji hai) bhejni chaahiye kyonki yeh jo gaanv-gaanv mein practical kar rahe ho, yeh to government ka hi kaam hai lekin aap sahayogi ban rahe ho to result dekh karke achha maanenge। ek aisa bulletin taiyaar karo jisse government ke sabhi mukhya logon ko woh bulletin jaaye,kitaab nahin,magazine nahin, short mein total result sab taraph ki bhejni chaahiye। achha hai - mubaarak ho। achha - (beech-beech mein khaasi aa rahi hai) aaj baaja shanti chaahta hai।

achha -baapdaada ke paas, chaaron or ke seva ki result bhi aati rehti hai aur vishesh aajkal koi bhi kona rah nahin jaae - sabko sandesh mil jaae, yeh plan jo practical mein kar rahe hain, uski result bhi achhi hai। baapdaada ke paas double videshi bachchon ke samaachaar mile hain aur jinhonne bhi mega programme (bhaarat mein) kiye hain, unhon ka samaachaar bhi sab mila hai। chaaron or seva ki result saphalta poorvak nikli hai। to bachchon ne jaise seva mein sandesh dene ki result mein saphalta praapta ki hai aise hi vaani dvaara, samparka dvaara aur saath-saath apne chehre dvaara saakshaatkaar pharishte roop ka karaate chalo।

achha - jo pahle baari aaye hai woh haath uthaao। bahut hai। achha hai tu let ke board ke pahle aa gaye ho, achha hai,chance lo। kamaal karke dikhaao। himmat rakho,baapdaada ki madad har bachche ke saath hai। achha- baapdaada chaaron or ke saakaar sammookh baithe hue bachchon ko aur apne-apne sthaan par, desh mein baap se milan manaane vaale chaaron or ke bachchon ko bahut-bahut seva ki, sneh ki aur purooshaartha ki mubaarak to de rahe hain lekin pukshaartha mein teevra purushaarthi ban ab aatmaon ko duhkh ashaanti se chhudaane ka aur teevra purushaartha karo। duhkh, ashaanti, bhrashtaachaar ati mein ja raha hai, abhi ati ka ant kar sabhi ko muktidhaam ka varsa baap se dilaao। aise sada dridh sankalp vaale bachchon ko yaad pyaar aur namaste।

om shanti ।