Avyakt murli du jeudi 15 novembre 2018

> om shanti 15-11-18 madhuban

praanapyaare avyaktamoorta maat-pita baapdaada ke ati snehi, sada avyakt swaroop dvaara avyakt milan ki anubhootiyon mein magna rahne vaale, svaraajya takhta nasheen, so baapdaada ke diltakhta nasheen nimitta teachers bahinen tatha desh videsh ke sarva baba ke noore ratna, sada umang utsaah se sampannata aur sampoornata ki manzil ko sameep anubhav karne vaale sabhi brahman kul bhooshan bhaai bahinen,

eeshvareey sneh sampanna madhur yaad sveekaar karna ji।

baad samaachaar - aaj pyaare avyakt baapdaada se mangal milan ka yeh teesra tarna hai। seva mein uttarapradesh, banaaras tatha pashchim nepaal ke bhaai bahinen kaaphi sankhya mein pahunche hue hain। is group mein desh videsh ke kareeb 18 hajaar bhaai bahinon ka sangathan hai। jaise avyakt baapdaada ne hamaari meethi guljaar daadi ji ke dvaara sabhi bachchon ko itna samay paalna di hai। aise hi avyaktavtan vaasi baapdaada abhi bhi apne bachchon ko avyakt vatan se bahut sundar alaukik anubhootiyaan kara rahe hain। savere se hi sabhi antarmukhi ban avyakt sthiti dvaara avyakt milan mana rahe hain। shaam ke samay to vishesh sabhi diamond haal mein usi lagan ke saath upasthit hue hain। bahut shaktishaali vaataavran hai। aise anubhav ho raha hai jaise sabke dilon mein baba ka pyaar samaaya hua hai। daadi ji ko bhi sab yaad karte, video dvaara jo avyakt mahaavaakya sun rahe hain, unse aisa hi anubhav kar rahe hain jaise saakaar mein baapdaada bachchon ke beech mein upasthit hain। sabhi naye puraane bhaai bahinen usi lahar mein anubhootiyon ke saagar mein samaaye hue hain। drama ki yeh vichitra scene jo sabhi baba ke bachche dekhte, sankalpon ko brake dekar vaah meetha baba vaah! vaah aapki prabhu leela vaah ke geet ga rahe hain। shaam ko vishesh avyakt milan ki vidhiyon par class sunne ke pashchaat pyaare baapdaada ko bhog lagaaya gaya। avyakt mahaavaakya sunne ke pashchaat baba ki sneh bhari toli sabko mili, daadiyon tatha varishtha bhaaeeyon ne bhi apni shubh kaamnaayen di।

pyaare baapdaada ke mahaavaakya jo ham sabne sune hain woh aapke paas bhej rahe hain। sabhi ko refresh karna ji। achha - sabhi ko bahut-bahut yaad… om shanti।

15-11-18 avyakt mahaavaakya revise video - 15-11-09 madhuban

''svaraajya ki result check karke svayan ko change karo aur akhanda raajya ke adhikaari bano''

aaj dilaaraam baap apne raajdulaare bachchon se milne aaye hain। dulaare kyon hain? jaante ho ki aap har ek bachcha teen takhta ke maalik ho? ek svaraajya ka takhta, doosra hai baapdaada ke dil ka takhta aur teesra hai bhavishya ka takhta। teenon takhta ke adhikaari ho। apne bhavishya takhta ka bhi yahaan hi abhyaas kar rahe ho। bhavishya ki taiyaari va purushaartha abhi hi kar rahe ho। ab ka purushaartha anek janma ka raajya bhaagya dilaane vaala hai। is samay hi apne raajya bhaagya ke sanskaar dhaaran kar rahe ho kyonki ab ka purushaartha bhavishya ke raajya ka adhikaari banaata hai। to check karo ki is samay apna purushaartha yathaartha hai? jaise bhavishya mein ek raajya hoga to abhi check karo ki hamaara ek raajya man mein chalta hai? purushaartha mein ek raajya hai? ya maaya raajya mein vighna daalti hai? ek raajya ke bajaae maaya ka prabhaav to nahin padta? do raajya to nahin hote hain? bhavishya ki visheshta hai hi ek raajya ki। to abhi ka abhyaas bhavishya mein chalta hai। to check karo ki abhi svaraajya hai? svaraajya mein kahaan maaya dakhal to nahin karti hai? do raajya to nahin hain? agar do raajya chalta hai to ek raajya ke sanskaar kab bharenge? bhavishya ki visheshta hai hi ek raajya aur ek dharma। dharma kaun sa hai? aapki vishesh dhaarna kaun si hai? sampoorn pavitrata। to check karo ki ek dharma hai? beech mein doosra dharma apvitrata ka dakhal to nahin deta? saath mein yeh bhi check karo ki la and order ek ka hai ya maaya bhi beech mein dakhal karti hai? ek ka raajya nirvighna chalta hai? aur baat - raajya mein sada sukh aur shanti natural rehti hai। to abhi dekho apne raajya mein sada sukh shanti hai? koi dakhal to nahin hota? svaraajya mein maaya apna dakhal dekar ashaanti to nahin phailaati hai? svaraajya mein koi salvation, koi prashansa ka prabhaav to maaya nahin daalti hai? sada sukh, shanti, aanand, prem, ateendriy sukh kaayam rehta hai? kyonki jaante ho ki bhavishya raajya mein sarva praapti hain, sampannata hai, is kaaran santushtata bhi hai। to abhi bhi svaraajya sampanna rehta hai ki koi kami rehti? kyonki abhi ke purushaartha mein agar kami rah gai to bhavishya akhanda raajya ke adhikaari kaise banenge! saara aadhaar abhi ke purushaartha par hai। abhi ki koi bhi kami bhavishya ke sampoorn raajya ke adhikaari nahin ban sakte। bahutkaal ka yeh svaraajya ka abhyaas bhavishya raajya ke adhikaari banaata hai। to yeh apni checking sada rahe kyonki abhi agar bahutkaal ka purushaartha nahin hoga to praalabdha bhi kam milti hai isliye baapdaada samay prati samay yeh attention khinchava raha hai ki iske liye abhi apne ko sampanna aur sampoorn banaao। agar abhi beech-beech mein kah dete hain ki purushaartha chal raha hai lekin purushaartha ke beech mein to-to to nahin aata! yeh to ho jaayega, yeh to kar lenge, yeh sanskaar avinaashi 21 janma ka, akhanda raajya ka adhikaari nahin banaayega।

to baapdaada sada ke liye attention dila raha hai, check karo ki agar koi bhi vighna aata hai, toofaan aata hai to toofaan tohpha ban jaata hai? toofaan, toofaan nahin lekin tohpha ban jaaye। koi bhi maaya ka vaar hota hai, anubhav karaati hai maaya, to woh anubhav bhi aise anubhav ho ki hamko yeh anubhav ki seedhi aage badhaati hai। iske liye baapdaada kehte sada apna chart aapehi check karo। jitna apna chart check karenge utna hi check karke change karenge। to har ek apne chart ko check karte ho? karte ho? jo roz karta hai woh haath uthaao। jo roz karta hai, kabhi kabhi nahin? roz chart check karo aur change karo kyonki samay ka ishaara baapdaada ne kaaphi samay se diya hai। samay ko dekh bhi rahe ho, manushyon ke man mein chinta badh rahi hai aur aapke man mein chinta nahin lekin prabhu chintan hai। prabhu chintan hone ke kaaran aap sada jaante ho ki ham nimitta hain, nirmaan hain kyonki karaavanhaar baap hai। iske kaaran aapke man mein chinta nahin hai, karaavanhaar kara raha hai, yeh smriti sada aage badha rahi hai।

abhi vishesh har ek ko yeh check karna hai ki is sangamayug ka ek ek second samay aur sankalp shubh chalta hai? is samay ke mahatva ko jaan ek second, second nahin lekin ek second ki value hai, mahatva hai। kabhi kabhi bachche kehte hain ki sankalp chala lekin do chaar second chala। lekin sangam samay ki value hai, abhi ek second ek ghante ke baraabar hai। itna is samay ki value hai kyonki baapdaada ne kah diya hai ki achaanak kisi bhi samay aapka final paper hoga। baapdaada bhi bataayega nahin isliye is samay ka attention svayan ko sampoorn aur sampanna banaana hai। baapdaada ne jo sarva khajaane diye hain us ek ek khajaane ko samay par kaarya mein lagaana hai। khajaanon ke maalik ho, maalik ki visheshta yeh hai ki jis samay jis khajaane ki aavashyakta hai us samay woh khajaana kaarya mein lagta hai! aap order karo samaane ki shakti ko to samaane ki shakti kaarya mein lagti hai? kyonki maalik usko kaha jaata hai jo samay par apne khajaane kaarya mein laga sake। to abhi sabhi ko itna sva par attention dena hai। sabke andar khushi ka khajaana sada hi chehre aur chalan mein dikhaai de। khushi avinaashi baap ki den hai। to avinaashi baap ki den ko avinaashi rakho। khushi ke liye kaha jaata hai - khushi jaisi koi khuraak nahin, khushi jaisa koi khajaana nahin। to jiske andar sada khushi hai unke naynon se, chehre se, chalan se automatic dikhaai deti hai। baapdaada ka vardaan hai ki sada khush raho aur sada khushi baanto kyonki khushi baantane se khushi badhegi aur koi bhi khajaana baantane se kam hota hai lekin khushi ka khajaana jitna baantenge utna badhega। to check karo khushi ka khajaana sada kaayam hai?

abhi sabhi bachchon ko chaahe desh, chaahe videsh sabhi bachchon ko baapdaada ek baat ki vishesh mubaarak de rahe hain। kaun si baat? jo sabhi ne chaahe desh mein, chaahe videsh mein apne umang-utsaah se aatmaaonko baap ka sandesh de diya। sabhi ne apni khushi se jo kaarya kiya us kaarya mein programme ek kiya, har jagah ek programme kiya lekin uska phal hajaar guna praapta kiya। baapdaada ko yahi sankalp hai ki ab ke samay pramaan jo circumstance hain woh aage aage naazuk hote jaayenge isliye chaahe gaanv hai, chaahe koi bhi kona hai, aise ulhana nahin rah jaae ki hamaara baap aaya aur hamko aapne sandesh nahin diya isliye sabhi ne jo umang-utsaah se kaarya kiya, baapdaada khush hai aur aise hi aapas mein milkar aise programme banaate rehna। baapdaada ne dekha ki umang-utsaah aur himmat sabhi ne apne-apne vidhi se kaarya mein lagaaya hai lekin abhi to sabne bahut achha kiya, aage bhi samay pramaan yeh lakshya rakho ki koi bhi kona bina sandesh ke rah nahin jaae। ismen apna bhi purushaartha achha chalta aur aatmaaonka bhi kalyaan hota hai। sabhi ko yeh programme achhe lage na! achha laga! to baapdaada sabhi bachchon ko yahi baar-baar kehte ki aatmaaonke prati merciful bano। aajkal duhkh ashaanti ke kaaran sabhi dil se kehte hain raham karo, daya karo। to baap ke saathi aap bachche ho, to baap bachchon dvaara abhi har ek bachche ka merciful ka part dekhna chaahte hain। aapka umang hai ki duhkhamay sansaar badalkar sukhmay sansaar aana hi hai। to sukhmay sansaar aane ke liye yeh duhkh ashaanti ka vinaash hone ke liye haalten badal rahi hain। to aaj ka yahi baap ka sandesh yaad rakho ki ab chaahe mansa, chaahe vaacha, chaahe chehre aur chalan se seva ki gati badhaate chalo। apna raajya sameep laate chalo। achha।

is baari jo pahli baar aaye hain baapdaada se milne, woh haath uthaao। achha bahut hain। sabhi utho। mubaarak ho। phir bhi samaapti ke pahle pahunch gaye ho। naya janma le liya, iski sabhi ke taraph se abhi aane vaale bachchon ko baapdaada aur chaaron or ke bachchon dvaara mubaarak ho, mubaarak ho। brahman parivaar ko dekh khushi hoti hai na! lekin jo abhi aaye ho unhon ko baapdaada yahi kehte to abhi bahut samay beet gaya, bahut thoda raha isliye purushaartha teevra karna hai। teevra purushaarthi aage badhenge, chalna nahin udna। udti kaaÀla ka purushaartha karenge to baap ka varsa der se aate hue bhi poora apna hak le sakte ho। har second khush rehna aur sabhi ko paigaam dena, sandesh dena। achha।

seva ka tarna yu.pi. banaaras aur pashchim nepaal ka hai:- jo seva prati aaye hain woh utho। achha chance liya hai। yu.pi. mein aapki seva ka yaadgaar bahut hai। bhaktimaarga ke mandir bhi bahut hain, nadiyaan bhi bahut hain। to yu.pi. vaale chaaron or seva badha bhi rahe hain aur badhaate rahenge। abhi baapdaada sabhi zone ko kehte hain ki har ek apne zone mein ek aisa group banaao jis group mein sabhi varga ke hon। jo aapke varga bane hue hain, seva ke liye aur har ek zone apne area mein har varga ki seva kar rahe ho, karte bhi rahenge lekin har zone mein aisa group service ka ho jismen har varga ka ek ek ho। aur jahaan bhi programme karo vahaan woh group apne apne varga ko vishesh nimantran de। koi bhi varga ulhana nahin de ki humein to sandesh nahin mila। aur har ek jo variety group bane woh seva bhi badhaaye, apne varga ki aur saath mein har ek apna-apna anubhav sunaave ki hamaare ko is naalej se kya mila aur kya anubhav kar rahe hain। to har zone mein aisa seva ka group taiyaar karo। chaahe bhaashan karne ka time itna na bhi mile lekin unhon ko function ke samay peechhe line mein bithaake unka parichay stage secretary deve। ek do ka anubhav bhi rakh sakte ho aur parivaar mein rehte apna kaarya karte hue hamaari jeevan kaise beeti, kaise badli, woh anubhav chance leke time ho to sunaave। achha।

to aaj jo baapdaada ne kaha ki svaraajya adhikaari ban svaraajya ki result check karo, woh check karne se koi bhi kami ko bahut samay se change karna hai kyonki bahut samay akhanda raajya chale iski aavashyakta hai, bahut samay ka purushaartha, bahut samay ki praalabdha ke svatah hi adhikaari bante hain iseelie underline bahut samay ka purushaartha ho। checking karo aur change karo।

chaaron or ke baapdaada ke diltakhtansheen har ek bachche ko baapdaada roz amritvele vishesh shakti baantate hain। amritvele vishesh vardaan, shakti baantate hain। jo amritvele ki shakti vishesh vardaan sveekaar karte hain woh vishesh teevra purushaarthi bante hain। amritvele ka mahatva rakhna arthaat baapdaada ke sada takhtansheen banna। to kai bachchon ka attention hai aur baapdaada roz unhon ko khaas certificate dete hain vaah bachcha vaah!

to chaaron or ke teevra purushaarthi, har samay baapdaada ko apna saathi banaakar combined rahne ke abhyaasi bachchon ko baapdaada vishesh vardaan de rahe hain ki sada udte chalo aur doosron ko bhi udaane ka sahayog dekar udaate chalo। sabhi vijayi hain aur vijay ka phal baapdaada ki har samay duaayen praapta hoti hain। to amar ban sabko amrit pilaate raho। chaaron or ke bachche baapdaada ke saamne hain। har bachche se baapdaada ko dil ka pyaar hai kyonki har bachche mein koi na koi visheshta hai। abhi sarva visheshtaaonse apne ko vishesh aatma banaae aage badhte chalo। baapdaada ka har ek bachche ko personal padamguna yaadapyaar sveekaar ho। achha - abhi to milte rahenge। namaste।

daadi jaanki ji ke vardaani bol:- om shanti।

dekho aaj kitna sundar drishya hain। baapdaada ke mahaavaakya sunte-sunte har ek ki dil ko dekh rahe the। baba ne hamaara chehra chalan kaisa banaaya hai, wonder hai baba ka। baba ne ham sabko teen takhta par bitha diya। baba avyakt hokar ham sabki kitni achhi paalna kar rahe hain। baba kehte hain sada hi apne samay ko saphal karna hai।

baba ne vatan se sabhi se haath uthvaaya। sabhi ne baba ke aage haath uthaaya। baba ki ham sabko bhaasna mil gayi। hamaari bhaavna to hai, baba ne aisi bhaasna di hai। hamne suna 17-18 hajaar log baithe hain। baahar garden mein, conference haal mein bhi baithe hain। har ek samajhta hai ham kitne bhaagyashaali to kya padmaapdam bhaagyashaali hain। jahaan kadam vahaan kamaai hi kamaai hai। mujhe saakaar baba ki ek scene saamne aati hai। baba seedhi par khada tha, ham neeche baithe the। baba ne kaha paanv aise karo। hamne paanv aise kiya, baba ne kaha bachche pharishton ke paanv dharni par nahin hote। ham pharishta samaan banne vaali aatmaayen hain। devta to satayug mein banenge। abhi dharti par paanv nahin hain। baba jaise chala raha hai, sab bahut achha chal raha hai। saari life mein light might aur everything right hai। light ke do arth hain, ek hai light (halka) aur doosra light (roshni)। chaaron or light light nazar aa rahi hai। baba ki might kaam kar rahi hai। achha। om shanti।