Avyakt murli du samedi 30 novembre 2019

> 30-11-19 om shanti “dincharya'' madhuban

praanapyaare avyaktamoorta maat-pita baapdaada ke ati snehi, sada apni avyakt sthiti dvaara avyakt milan ki anubhootiyaan karne vaale, apne oonche shreshtha svamaan ke phakhur mein rah asambhav ko bhi sambhav banaane vaale sabhi bephikra, begampur ke baadshaah, nimitta teachers bahinen tatha sarva brahman kul bhooshan bhaai bahinen,

eeshvareey sneh sampanna madhur yaad sveekaar karna ji।

baad samaachaar - aap sabhi apne-apne sthaanon se sookshm sneh ki taaron dvaara madhuban vardaan bhoomi mein pahunchkar alaukik avyakt milan ki anubhootiyaan karte honge। vartamaan samay to science ke saadhnon dvaara bhi bahut achhi bhaasna har ek ko mil jaati hai। baba ne ham sabko silence ki bahut badi shakti ke saath-saath divya buddhi ka vimaan bhi diya hai, jis vimaan dvaara jab chaahen teenon lokon ka sair kar sakte hain।

is baar madhuban ghar ki raunak bhi kitni niraali, nyaari aur pyaari hai। karnaatak ki sevaaon ka tarna hai। ismen kuchh santa mahaatmaayen bhi jo bahut samay se sneh samparka mein hain, ve aaye hue hain। sabhi bahut sundar anubhav kar rahe hain। double videshi bhaai bahinen to har group mein apna golden chance lete hi hain। daadi jaanki ji ki alaukik paalna aur unke sneh ki drishti pratidin shaam ke samay class mein sabhi ko mil jaati hai। is baar to hamaare varishtha bhaaeeyon ka, nirvair bhaai, brijmohan bhaai, karoona bhaai, ameerchanda bhaai ka sammaan samaaroh bhi karnaatak ke bhaai bahinon ne 29 November ko daaymandal haal mein bahut dhoomdhaam se manaaya। kareeb 17-18 hajaar bhaai bahinon ka yeh sang madhuban mein bahut achhi alaukik anubhootiyaan kar raha hai। kamaal hai meethe pyaare baapdaada ki jo apne aakaari va niraakaari swaroop dvaara har bachche ko bharpoor kar rahe hain। video dvaara avyakt mahaavaakya sunte bhi har ek ko yahi lagta jaise ham sammukh mein baapdaada se drishti lete milan mana rahe hain। baapdaada ki upasthiti ka har ek anubhav karta hai। aap sab bhi apne-apne tarna anusaar is divya drishyon ka sammukh anubhav karenge hi। achha - sabhi ko yaad… om shanti।

30-11-19 om shanti revise video dvaara 31-10-07 madhuban

“apne shreshtha svamaan ke fakhur mein rah asambhav ko sambhav karte bephikra baadshaah bano''

aaj baapdaada apne chaaron or ke shreshtha svamaandhaari vishesh bachchon ko dekh rahe hain। har ek bachche ka svamaan itna vishesh hai jo vishwa mein koi bhi aatma ka nahin hai। aap sabhi vishwa ki aatmaon ke poorvaj bhi ho aur poojya bhi ho। saare srishti ke vriksha ki jad mein aap aadhaarmoorta ho। saare vishwa ke poorvaj pahli rachna ho। baapdaada har ek bachche ki visheshta ko dekh khush hote hain। chaahe chhota bachcha hai, chaahe bujurga maataayen hain, chaahe pravritti vaale hain। har ek ki alag-alag visheshtaayen hain। aajkal kitne bhi bade te bade saainsadaan hain, duniya ke hisaab se vishesh hain jo prakritijeet to banen, chandramaan tak bhi pahunch gaye lekin itni chhoti si jyoti swaroop aatma ko nahin pahchaan sakte! aur yahaan chhota sa bachcha bhi main aatma hoon, jyoti bindu ko jaanta hai। falak se kehta hai “main aatma hoon।'' kitne bhi bade mahaatmaayen hain aur brahman maataayen hain, maataayen falak se kehti hamne paramatma ko pa liya। pa liya hai na! aur mahaatmaayen kya kehte? paramatma ko paana bahut mushkil hai। pravritti vaale challenge karte hain ki ham sab pravritti mein rehte, saath rehte pavitra rehte hain kyonki hamaare beech mein baap hai isliye donon saath rehte bhi sahaj pavitra rah sakte hain kyonki pavitrata hamaara svadharma hai। par dharma mushkil hota hai, sva dharma sahaj hota hai। aur log kya kehte? aag aur kapoos saath mein rah nahin sakte। bada mushkil hai aur aap sab kya kehte? bahut sahaj hai। aap sabka shuru shuru ka ek geet tha - kitne bhi seth, svaami hain lekin ek alpha ko nahin jaana hai। chhoti si bindi aatma ko nahin jaana lekin aap sabhi bachchon ne jaan liya, pa liya। itne nishchay aur fakhur se bolte ho, asambhav sambhav hai। baapdaada bhi har ek bachche ko vijayi ratna dekh harshit hote hain kyonki himmate bachche madde baap hai isliye duniya ke liye jo asambhav baaten hain woh aapke liye sahaj aur sambhav ho gai hain। fakhur rehta hai ki ham paramatma ke direct bachche hain! is nashe ke kaaran, nishchay ke kaaran parmaatma bachche hone ke kaaran maaya se bhi bache hue ho। bachcha banna arthaat sahaj bach jaana। to bachche ho aur sab vighnon se, samasyaaon se bache hue ho।

to apne itne shreshtha svamaan ko jaante ho na! kyon sahaj hai? kyonki aap silence ki shakti dvaara, parivartan shakti ko kaarya mein lagaate ho। negative ko positive mein parivartan kar lete ho। maaya kitne bhi samasya ke roop mein aati hai lekin aap parivartan ki shakti se, silence ki shakti se samasya ko samaadhaan swaroop bana dete ho। kaaran ko nivaaran roop mein badal dete ho। hai na itni taakat? course bhi karaate ho na! negative ko positive karne ki vidhi sikhaate ho। yeh parivartan shakti baap dvaara varse mein mili hai। ek hi shakti nahin, sarvashaktiyaan parmaatma varsa mila hai, iseelie baapdaada har roz kehte hain, har roz murli sunte ho na! to har roz baapdaada yahi kehte - baap ko yaad karo aur varse ko yaad karo। baap ki yaad bhi sahaj kyon aati hai? jab varse ki praapti ko yaad karte to baap ki yaad praapti ke kaaran sahaj aa jaati hai। har ek bachche ko yeh roohaani fakhur rehta hai, dil mein geet gaate hain - paana tha vo pa liya। sabhi ke dil mein yeh svatah hi geet bajta hai na! fakhur hai na! jitna is fakhur mein rahenge to fakhur ki nishaani hai, bephikra honge। agar kisi bhi prakaar ka sankalp mein, bol mein ya sambandh-samparka mein phikar rehta hai to fakhur nahin hai। baapdaada ne bephikra baadshaah banaaya hai। bolo, bephikra baadshaah ho? hain to haath uthaao jo bephikar baadshaah hain? bephikar ho ya kabhi-kabhi phikar aa jaata hai? achha hai। jab baap bephikra hai, to bachchon ko kya phikar hai।

baapdaada ne to kah diya hai sab phikra va kisi bhi prakaar ka bojh hai to baapdaada ko de do। baap saagar hai na। to bojh saara sama jaayega। kabhi baapdaada bachchon ka ek geet sunke muskaraata hai। pata hai kaun sa geet? kya karen, kaise karen… kabhi-kabhi to gaate ho na। baapdaada to sunta rehta hai। lekin baapdaada sabhi bachchon ko yahi kehte hain - he meethe bachche, laadle bachche saakshi-drishta ke sthiti ki seat par set ho jaao aur seat par set hoke khel dekho, bahut maza aayega, vaah! trikaaldarshi sthiti mein sthit ho jaao। seat se neeche aate isliye upset hote ho। set raho to upset nahin honge। kaun si teen cheezen bachchon ko pareshaan karti hain? 1- chanchal man, 2- bhatakti buddhi aur 3- puraane sanskaar। baapdaada ko bachchon ki ek baat sunkar hansi aati hai, pata hai kaun si baat hai? kehte hain baba kya karen, mere puraane sanskaar hain na! baapdaada muskaraata hai। jab kah hi rahe ho, mere sanskaar, to mera banaaya hai? to mere par to adhikaar hota hi hai। jab puraane sanskaar ko mera bana diya, to mera to jagah lega na! kya yeh brahman aatma kah sakti hai mere sanskaar? mera-mera kaha hai to mere ne apni jagah bana di hai। aap brahman mera nahin kah sakte। yeh past jeevan ke sanskaar hain। shoodra jeevan ke sanskaar hain। brahman jeevan ke nahin hain। to mera-mera kaha hai to woh bhi mere adhikaar se baith gaye hain। brahman jeevan ke shreshtha sanskaar jaante ho na! aur yeh sanskaar jinko aap puraane kehte ho, woh bhi puraane nahin hain, aap shreshtha aatmaon ka puraane te puraana sanskaar anaadi aur aadi sanskaar hai। yeh to dvaapar, madhya ke sanskaar hain। to madhya ke sanskaar ko baap ki madad se samaapta kar dena, koi mushkil nahin hai। parantu hota kya hai? baap jo sada aapke saath combined hai, use combined jaan sahayog nahin lete, combined ka arth hi hai samay par sahayogi। lekin samay par sahayog na lene ke kaaran madhya ke sanskaar mahaan ban jaate hain।

baapdaada yahi chaahte hain ki sab poojyaneey aatmaayen hain, to poojyaneey aatmaon ka vishesh lakshan dua dena hi hai। to aap sabhi jaante ho ki aap sabhi poojyaneey aatmaayen ho? to yeh dua dena arthaat dua lena understood ho jaata hai। jo dua deta hai, jisko dete hain uski dil se baar-baar dene vaale ke liye dua nikalti hai। to he poojya aatmaayen aapka to niji sanskaar hai - dua dena। anaadi sanskaar hai dua dena। jab aapke jad chitra bhi dua de rahe hain to aap chaitanya poojya aatmaon ka to dua dena, yeh natural sanskaar hai। isko kaho mera sanskaar। madhya, dvaapar ke sanskaar natural aur nature ho gaye hain। vaastav mein yeh sanskaar dua dene ke natural nature hai। jab kisi ko dua dete hain, to woh aatma kitni khush hoti hai, woh khushi ka vaayumandal kitna sukhdaai hota hai! to jinhonne bhi kiya hai, un sabko, chaahe aaye hain, chaahe nahin aaye hain, lekin baapdaada ke saamne hain। to unhon ko baapdaada mubaarak de rahe hain। kiya hai to use apni natural nature banaate hue aage bhi karte, karaate rehna। aur jinhonne thoda bahut kiya hai, nahin bhi kiya hai to woh sabhi apne ko sada main poojya aatma hoon, main baap ki shreemat par chalne vaali vishesh aatma hoon, is smriti ko baar-baar apni smriti aur swaroop mein laana kyonki har ek se jab poochhte hain ki aap kya banne vaale ho? to sab kehte hain ham lakshmi-naaraayan banne vaale hain। raam-seeta mein koi nahin haath uthaata। jab lakshya hai, 16 kala banne ka। to 16 kala arthaat parampoojya, poojya aatma ka kartavya hi hai - dua dena। yeh sanskaar chalte-phirte sahaj aur sada ke liye banaao। ho hi poojya। ho hi 16 kala। lakshya to yahi hai na!

to sankalp karo, baap ke pyaar mein maaya kitne bhi toofaan saamne laaye lekin master sarvashaktivaan aatmaon ke aage toofaan bhi tohpha ban jaayega। aisa vardaan sada yaad karo। kitna bhi ooncha pahaad ho, pahaad badal ke rooi ban jaayega। abhi samay ki sameepta pramaan vardaanon ko har samay anubhav mein laao। anubhav ki authority bano।

jab chaaho tab apne ashareeri banne ki, pharishta swaroop banne ki exercise karte raho। abhi-abhi brahman, abhi-abhi pharishta, abhi-abhi ashareeri, chalte phirte, kaamkaaj karte hue bhi ek minute, do minute nikaal abhyaas karo। check karo jo sankalp kiya, vahi swaroop anubhav kiya? achha।

chaaron or ke sada shreshtha svamaandhaari, sada svayan ko parampoojya aur poorvaj anubhav karne vaale, sada apne ko har subject mein anubhvi swaroop banaane vaale, sada baap ke diltakhta nasheen, bhrikuti ke takhta nasheen, sada shreshtha sthiti ke anubhvon mein sthit rahne vaale, chaaron or ke sabhi bachchon ko yaadapyaar aur namaste।

sabhi taraph se sabhi ke patra, email, samaachaar sabhi baapdaada ke paas pahunch gaye hain, to seva ka phal aur bal, sabhi sevaadhaariyon ko praapta hai aur hota rahega। pyaar ke patra bhi bahut aate hain, parivartan ke patra bhi bahut aate hain। parivartan ki shakti vaalon ko baapdaada amar bhav ka vardaan de rahe hain। jin sevaadhaariyon ne shreemat ko poora follow kiya hai, aise follow karne vaale bachchon ko baapdaada kehte “sada pharmaanbardaar bachche vaah!'' baapdaada yeh vardaan de rahe hain aur pyaar vaalon ko bahut-bahut pyaar se dil mein samaane vaale ati pyaare aur ati maaya ke vighnon se nyaare, aisa vardaan de rahe hain। achha।

seva karnaatak zone ki hai:- achha hai, seva ka jo chance liya hai, woh bhi sabhi santushta hain aur santushta kiya hai, isse apne jama ka khaata bahut achha jama kiya hai। karnaatak ki sankhya bhi kam nahin hai, sankhya achhi hai aur jaise abhi sangathit roop mein milkar nirvighna seva ka record dikhaaya hai, aise hi aage bhi karnaatak sangathit roop mein bahut kuchh kamaal kar sakte hain। baapdaada ke paas naksha hai, kamaal kar sakte hain isliye sangathit roop ka jalva dikhaana। abhi achha kiya hai। saara parivaar karnaatak par khush hai। achha - baapdaada ne karnaatak vaalon ko kaam diya tha, yaad hai, kya diya tha? vaaris quality nikaalne ke liye kaha tha, yaad hai? seva mein to achha number liya, abhi itne vaaris nikaalo jo number one aa jaao। achha।

double videshi:- abhi baapdaada ne dekha hai ki videsh mein bhi seva ka umang achha badh raha hai। pahle kehte the videsh mein student banna bada mushkil hai aur abhi kya hai? abhi mushkil hai ya sahaj hai? sahaj hai?

baapdaada ne dekha ki jaise abhi har saal vriddhi karke baap ke saamne la rahe ho, aise aage bhi jyaada se jyaada vriddhi karte rahenge। baap aur apni pratyakshata karte rahenge। achha group hai। sabhi nishchaybuddhi aur eeshvareey nashe mein rahne vaale, udne vaale hain। chalne vaale nahin banna, udne vaale। chalne vaale samay par nahin pahunch sakenge, udne vaale banna, double light। baaki baapdaada khush hai। jo kiya woh saphal ho gaya। to aap sab kaun hue? saphalta ke sitaare। achha hai। bahut achha।

teachers sabhi utho:- teachers bhi kam nahin hain। baapdaada to sabhi teachers ko guroobhaai dekhte hain। guroobhaai ka arth hai baap samaan। to teachers ko vishesh har karma baap samaan karna hi hai। karenge nahin, karna hi hai kyonki teachers baap ki taraph se student ke aage ek nimitta saakaar roop mein baap samaan hain। teacher ka har karma student ke aage baap samaan dikhaai de। sabke mukh se nikle yeh to baap ko follow kar baap samaan bane hue hain। to aisa lakshya hai na। yahi lakshya hai na। kaandh hilaao। teacher nimitta hain। to nimitta ke oopar jimmevaari bhi hai na। to follow kar rahi ho lekin aur bhi aage karna hai। lakshya bahut achha hai। aur baap to yahi har teacher mein shubh bhaavna rakhte hain ki baap samaan banna hi hai। achha।

daadi jaanki:- om shanti। saari duniya ko pata chalta hai diamond haal mein kya kya ho raha hai। jeevan jeena hai to kaise, agar marna bhi hoga to kaise। ek baba doosra ham aatma, vaah re vaah baba। why why nahin। kyonki kaeeyon ko why kehna achha lagta hai। vaah meethe baba ke bachche vaah! baba ke bachchon ko sukh mila hai ilaahi। kisi ko na duhkh dena, na lena। sirf bolna nahin hai, practical karna hai। koi hamaare ko duhkh deve, ham leve nahin। woh bichaara hai na। baba ke sab bachchon ne baba ko apne diltakhta par bitha diya hai। humein vaani se pare vaanaprastha mein rehna hai। dilaaraam baba hai, uske teenon bachche sukh shanti prem achhi seva kar rahe hain। itni saari sabha ko dekh shukriya baba aapka। aap sabko bulaate ho, khilaate ho, sabko khaana theek milta hai na। sone ka theek milta hai na।

guljaar daadi baba ka rath hai na। humein jo baba kahe woh karna hi hai। daadi guljaar abhi vahaan sun rahi hai na। suno daadi, dekho, hamaare shaantivan mein kitna bada diamond haal hai। saara haal full hai। sab aapko yaad kar rahe hain। achha। om shanti।