Murli du jour du mercredi 9 août 2017

09/08/17 praatahmurli om shanti "baapdaada"' madhuban

''meethe bachche - ab yeh puraana ghar chhod baap ke saath chalna hai isliye is ghar (shareer) se mamatva mitaate jaao, apne ko aatma nishchay karo''

prashn:- dehi-abhimaani bachchon ke mukh se kaun se shabd nahin niklenge?

uttar:- mere man ko shanti kaise mile? yeh shabd dehi-abhimaani bachchon ke mukh se nahin nikal sakte। deh-abhimaan vaale hi yeh shabd bolte hain kyonki unhein aatma ka gyaan hi nahin hai। tum jaante ho aatma ka svadharma hi shant hai। man ke shanti ki to baat hi nahin। aatma apne svadharma mein tik jaaye to man shant ho jaayega। aatma so paramatma kahne vaale is baat ko samajh nahin sakte।

geet:- marna teri gali mein…

om shanti। bachche jaante hain marna kisko kaha jaata hai। aatma shareer se alag ho jaati hai, unko marna kaha jaata hai। yahaan bachche jaante hain ham jeete ji shareer se alag hain aur apne parampita paramatma ke saath unke dhaam jaane vaale hain। jo aatmaayen ja nahin sakti hain unko yog se pavitra bana rahe hain। isko kaha jaata hai knowledge। rooh ko knowledge milti hai। yeh bachche-bachche kahne vaala kaun hai? parampita paramatma, jisko sabhi bhagat yaad karte hain। aatma samajhti hai patit-paavan baap mukti-jeevanmukti dene vaala hai। unko to apna shareer hai nahin। yeh loan liya hai। hamko bhi yeh chhodna hai aur jiska ghar hai unko bhi chhodna hai। vaise tum bachchon ka bhi yeh puraana ghar hai, inmen khidkiyaan aadi sab hain। to baap kehte hain bachche yeh puraana ghar sabko chhod dena hai। mere saath ghar chalna hai, isliye jeete ji is ghar se mamatva mitaate jaao। apne ko aatma nishchay karo aur baap ko yaad karo। yeh to bachche jaante hain - do cheezen hain - jeev aur aatma। manushya jab duhkhi hote hain to jeevghaat karte hain। aatma-ghaat nahin। aatma jaanti hai, shareer ke kaaran aatma ko duhkh hota hai, isliye unko chhodna chaahti hai। tumhaari aatma jaanti hai ki abhi ham duhkhadhaam mein hain। yeh shareer bhi puraana ghar hai। baba ne samjhaaya hai - yeh akaaltakhta hai jo chhodkar phir doosra lena hota hai। takhta ke badle ghar kehna theek hai। ghar mein khidkiyaan aadi hoti hain, isliye shareer ko ghar kaha jaata hai। takhta ke oopar raajaai ki jaati hai। is samay to duhkhadhaam hai। haan, yeh zaroor hai aatma ko ghar arthaat naye shareer mein baith phir sinhaasan par baith jaana hai। raajaai karni hai। duniya mein aisa to koi nahin jisko baap se raajaai milti hai, jab tak baap na aaye tab tak baadshaahi kaise mile!

tum jaante ho baba hamko shaahanshaah banaane aaya hua hai। jaise raajaaon se mahaaraajaayen bade hote hain na। to baap kehte hain tumko raajaaon ka raaja banaaya jaata hai। tumhaari aatma jaanti hai - yeh puraana ghar chhodna hai। aatma ko pahle satopradhaan ghar milta hai। satopradhaan gunvaan aatma hai to shareer bhi aise hi satopradhaan milta hai। aatma samajhti hai, kaise ham aatma ko ghar milta hai। oonch pavitra aatmaon ko shareer bhi aise hi milega। paavan banenge to paavan ghar milega zaroor। jab paavan banaane vaala aaye tab to ham paavan banen। khud kehte hain bachche tum yaad karte the, ab main aaya hoon। kalpa-kalpa is shareer mein aakar yeh yagya rachta hoon। inka naam brahma rakhna padta hai, inko adopt kiya jaata hai। grihastha vyavhaar mein rehte tumne buddhi se sab kuchh puraani cheejon ka sanyaas kar apne ko aatma nishchay kiya hai। abhi jeete ji sab sambandh todne hain। baap kehte hain tumhein is puraani duniya mein rehna nahin hai। samjhaaya jaata hai hamaari em object hai nar se naaraayan va manushya se devta banna va svarga ki baadshaahi paana। yeh bhi samjhaaya hai ki manushya srishti ek hi hai, jo chakra lagaati hai, inko jhaad bhi kehte hain। bad ke jhaad se bhent ki jaati hai। unki aayu bahut badi hoti hai। yeh jhaad jab naya hai tab ham devtaayen hi rehte hain। abhi to puraana ho gaya hai। ismen sab gareeb hain, paai paise ka vyaapaar karne vaale ko baniya kaha jaata hai। tum abhi baniya se shaah bante ho। abhi tum gyaan ratnon ka vyaapaar karte ho। baap se ratna le phir auron ko dete ho। ab tumhaari shreshtha heere jaisi buddhi banti hai। tumhaara vyaapaar hi hai gyaan-ratnon ka। gyaan ratnon ke baad phir woh ratna bhi tumko athaah milte hain। gaaya hua bhi hai - saagar heere javaahron ki thaali le tumhaare aage bhent rakhte hain। tum ab padhaai aur padhaane vaale ko jaan gaye ho। barobar hamaara parampita paramatma gyaan ratnon ka saagar hai, jisko roop-basant bhi kaha jaata hai। aatma gyaan ratnon ka mukh se varnan karti hai। tumhaara dhandha hi yeh hai। tum amritvele uth yeh gyaan ratnon ka dhandha karo। prabhaat achhi hoti hai। kehte hain - raam naam simar prabhaat more man। yeh aatmaon ne kaha na! man-buddhi aatma mein hai। manushya deh-abhimaan mein rehte hain to kehte hain man mera shant nahin hota hai। jaise ki shareer mein man hai। parantu aatma kehti hai mere man ko, buddhi ko gyaan nahin hai। mujhe shanti chaahiye। woh apne ko aatma samajhte nahin hain। shant va ashaanta aatma hoti hai। aatma kehti hai main ashaanta aatma hoon, main shant aatma hoon। deh-abhimaan vaala kahega - hamaare man ko shanti kaise mile? man kya hai? woh bhi samajhte nahin hain। aatma ko shanti milti hai va aatma ke man ko? pahle to aatma ko jaanna pade। aatma ka svadharma shant hai। yeh shareer tumhaare organs hain। inse chaahe kaam lo, chaahe svadharma mein tiko। sanyaasi bhi is baat ko nahin jaante - woh to kah dete, aatma so paramatma, paramatma so aatma। parantu taakat kaise mile jo shanti mein rah saken। jab baap ko yaad karen tab hi taakat mile। sirf shanti se bhi koi phaayda nahin। woh samajhte hain ham aatma so paramatma, ham aatma paramatma ke lok mein chali jaayengi aur kuchh bhi nahin jaante। punarjanma ko hi bhool jaate hain। 84 janmon ko bhi bhool jaate hain। baap sammukh samjhaate hain, tum samajhte ho ki abhi humein baap ke gale ka haar banna hai। ham asul us baap ke gale ka haar the। ab naatak poora hota hai। naatak mein actor khelte bhi rehte hain aur time bhi dekhte rehte hain। abhi naatak poora hota hai, baaki itna time hai। time poora hua, sab actor aakar khade ho jaate hain phir dress badli kar ghar chale jaate hain। hoobhu tumhaara bhi aise hi part hai। baap aaya hai lene liye। yeh prashn hi nahin uthta - aatmaayen vahaan hongi va nahin। hamaara kaam hai varsa lena। zaroor aatmaayen hongi tab to aati rehti hain, vriddhi ko paati rehti hain। abhi bhi aati rehti hain na, tab to birth control aadi karte hain। aatmaon ko vahaan se stage par aana hi hai phir birth control kya karenge। jo kuchh bachi-khuchi aatmaayen hain sab aayengi isliye to vriddhi hoti rehti hai। vriddhi honi hi hai। yeh tum bachchon ko pata hai jo kuchh pichhaadi vaale rahe hue honge woh aate jaayenge, jaise machchhar dekho raat ko aaye aur subah ko dekho to sab mare hue honge। parantu unka koi hisaab-kitaab thode hi hai। yeh jo bade-bade saainsadaan hain woh kitna maatha maarte rehte hain - khoz karte rehte hain। jaise gyaan ki oonchaai hai to maaya bhi kam nahin hai। dekho, aasuri mat par kya-kya bana rahe hain। shreemat kya kehti hai aur science vaale kya karte rehte hain। sukh bhi hai to in cheejon se vinaash bhi hona hai।

science aur silence। tum sadaiv baap ko yaad karte rehte ho silence mein। unko phir science ka kitna ghamanda hai। kitne aeroplane, baarood aadi hain। science par silence ki vijay hoti hai। kai kehte hain man jeete jagatjeet parantu maaya jeete jagatjeet kah sakte hain। aatma ashareeri ho baap ke paas chali jaayegi। kehte hain man mein sankalp vikalpa na aayen। baap kehte hain yeh to zaroor aayenge। maamekam yaad karo। ham aatma apne silence hom, muktidhaam mein jaati hain। piyarghar jaati hain। buddhi mein yahi rehta hai - baba aaya hai hamko le jaayenge। guide baba hi hai। kehte hain mere laadle bachche main tumko saath le jaaoonga। koi ne bhi ghar ka raasta nahin dekha hai। agar ek ne dekha ho to bahut dekh len। woh jaana bhi sikhlaaven। yahaan se manushya tang hokar kehte hain jaayen। satayug mein aise thode hi kahenge। sukhdhaam ko hi sab yaad karte hain। baap kehte hain main sabko le jaaoonga - machchharon ke sadrishya। woh sirf kah dete hain bauddha ki aatma nirvaandhaam gai। agar woh chala gaya to baaki sab unki itni vanshaavli kaise jaayegi। koi ja nahin sakte hain। main to ja sakta hoon na। main aata hi hoon le jaane ke liye। satayug mein to kitne thode hote hain। is samay to aatmaayen kitni athaah hain। machchharon sadrishya hain na। sabko le jaana ek baap ka hi kaam hai। baap kehte hain mere gale ka haar banne se phir vishnu ke gale ka haar banenge। girenge bhi pahle। woh pujaari bante hain tab raavan ke gale ka haar bante hain। aakhreen yeh haalat ho jaati hai।

tum jaante ho ham aadhaakalpa sukh mein aur aadhaakalpa duhkh mein rehte hain। raavan ke gale ka haar pahle-pahle devi-devta dharma vaale bante hain phir aur dharma vaale aayenge, woh bhi raavan ke gale ka haar banenge। ant mein sabhi raavan ke gale ka haar ban jaate hain। yeh drama ka khel aisa bana hua hai jo sivaae baap ke aur koi samjha na sake। points to bahut milti hain na samjhaane ke liye। nutshell mein kaha jaata hai ek baap ko yaad karo। patit duniya ko kaise paavan banaate hain aur phir gale ka haar pahle-pahle kaun bante hain, yeh buddhi mein rehna chaahiye। barobar ham asul mein apne baap ke gale ki maala hain phir baba hamko sooryavanshi, chandravanshi banaate hain। phir raavan ka raajya hota hai। yeh srishti ka chakra kaise phirta hai - tum jaante ho nambarvaar। school mein sab subject mein 100 marks to koi nahin lete hain। haan, koi ek subject mein 100 marks mil sakti hain। ismen bhi marks hain। daiveegun dhaaran karna kitni badi subject hai। saare chakra ka raaz bhi samjhaana hai। koi mein gun kam hain, murli achhi chalaate hain। nambarvaar to hote hi hain na। jo paas hote hain woh gale ka haar bante hain। baap to perfect hai, un jaisa perfect koi ho nahin sakta। woh to janma-maran mein aata hi nahin hai। tumhaari buddhi mein kitni nai-nai points hain jo aur koi ki buddhi mein baith nahin sakti hain। yeh hai god fatherly university, bhagvaanuvaach main raajayog sikhlaata hoon। samajh mein aata hai - bhaarat kitna ameer tha, abhi gareeb hai। praacheen bhaarat bada saahookaar tha, unko paradise kehte hain। ghar mein koi achhe kul ke hote hain, gareeb ban jaate hain to un par taras padta hai। kahenge bichaara kitna gir gaya। phir unko chadhaane ki koshish karte hain। Christian logon ne bhaarat ke paise bahut liye hain, us dhan se khud saahookaar bane hain। bhaarat gareeb ho gaya hai to phir madad bhi denge na। loan ke hisaab se madad dete hain। tum jaante ho kya hisaab-kitaab hai। koi achhe hain to woh samajhte hain - yeh sab len-den ka hisaab khatma hota hai। parantu prerak kaun hai, yeh koi nahin samajhte। in baaton ko abhi tum samajhte ho। bhaarat religious tha to kitni might thi, saare vishwa ke maalik the। pahla dharma devi-devta hai jo baap sthaapan karte hain। ab sabse gira hua hai to zaroor unko madad karenge। jab ladaai shuru hogi to khud ladte bhi rahenge, madad bhi karte rahenge। ab bhi dekho dete rehte hain, nahin to bhaarat bhookh mar jaaye। parantu kabhi aise hua nahin hai। calamities bhi aati rahengi। ladaai tab lagegi jab padhaai poori ho jaae। abhi to padhaai chal rahi hai na। baba ko padhaana hai। brahma dvaara aadi sanaatan devi-devta dharma ki sthaapna ho rahi hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) amritvele uth gyaan ratnon ka dhandha karna hai। roop-basanta ban padhaai padhni aur padhaani hai।

2) baap ke saath vaapis ghar jaana hai, isliye pavitra banna hai। ashareeri ban, baap ki yaad mein rah silence bal se science par vijay paani hai।

vardaan:- divya buddhi dvaara sada divyata ko grahan karne vaale saphaltaamoorta bhav

baapdaada dvaara janma se hi har bachche ko divya buddhi ka vardaan praapta hota hai, jo is divya buddhi ke vardaan ko jitna kaarya mein lagaate hain utna saphaltaamoorta bante hain kyonki har kaarya mein divyata hi saphalta ka aadhaar hai। divya buddhi ko praapta karne vaali aatmaayen adivya ko bhi divya bana deti hain। woh har baat mein divyata ko hi grahan karti hain। adivya kaarya ka prabhaav divya buddhi vaalon par pad nahin sakta।

slogan:- svayan ko mehmaan samajhkar raho to sthiti avyakt va mahaan ban jaayegi।