Murli du jour du dimanche 21 juillet 2019

21-07-19 praatahmurli om shanti ''avyakt-baapdaada'' revise 02-01-85 madhuban

sarvottam sneh, sambandh aur seva

aaj baapdaada sabhi bachchon ki sneh bhari saugaaten dekh rahe the। har ek bachche ki sneh sampanna yaad saugaat bhinna-bhinna prakaar ki thi। ek baapdaada ko, anek bachchon ki saugaaten anek sankhya mein mileen। aisi saugaaten aur itni saugaaten vishwa mein kisi ko bhi mil nahin sakteen। yeh thi dil ki saugaaten dilaaraam ko। aur sabhi manushya aatmaayen sthool saugaat dete hain। lekin sangamayug mein yeh vichitra baap aur vichitra saugaaten hain। to baapdaada sabhi ke sneh ki saugaat dekh harshit ho rahe the। aisa koi bhi bachcha nahin tha - jiski saugaat nahin pahunchi ho। bhinna-bhinna moolya ki zaroor thi। kisi ki jyaada moolya ki thi, kisi ki kam। jitna atoot aur sarva sambandh ka sneh tha utne value ki saugaat thi। nambarvaar sneh aur sambandh ke aadhaar se dil ki saugaat thi। donon hi baap saugaaton mein se nambarvaar moolyavaan ki maala bana rahe the, aur maala ko dekh check kar rahe the ki moolya ka antar vishesh kis baat se hai। to kya dekha? sneh sabhi ka hai, sambandh bhi sabhi ka hai, seva bhi sabhi ki hai lekin sneh mein aadi se ab tak sankalp dvaara va svapna mein bhi aur koi vyakti ya vaibhav ki taraph buddhi aakarshit nahin hui ho। ek baap ke ekras atoot sneh mein sada samaaye hue hon। sada sneh ke anubhvon ke saagar mein aisa samaaya hua ho jo sivaae us sansaar ke aur koi vyakti va vastu dikhaai na de। behad ke sneh ka aakaash aur behad ke anubhvon ka saagar। is aakaash aur saagar ke sivaae aur koi aakarshan na ho। aise atoot sneh ki saugaat nambarvaar vailyuebal thi। jitne varsha beete hain utne varshon ke sneh ki value automatic jama hoti rehti hai aur utni value ki saugaat baapdaada ke saamne pratyaksha hui। teen baaton ki visheshta sabhi ki dekhi -

1. sneh atoot hai - dil ka sneh hai va samay pramaan aavashyakta ke kaaran, apne matlab ko siddha karne ke kaaran hai - aisa sneh to nahin hai? 2. sada sneh swaroop emerge roop mein hai va samay par emerge hota baaki samay merge rehta hai? 3. dil khush karne ka sneh hai va jigri dil ka sneh hai? to sneh mein yeh sab baaten check ki।

2. sambandh mein - pahli baat sarva sambandh hai va koi-koi vishesh sambandh hai? ek bhi sambandh ki anubhooti agar kam hai to sampannata mein kami hai aur samay prati samay woh raha hua ek sambandh bhi apni taraph aakarshit kar leta hai। jaise baap shikshak satguru yeh vishesh sambandh to jod liya lekin chhota sa sambandh potra dhotra bhi nahin banaaya to woh bhi sambandh apne taraph kheench lega। to sambandh mein sarva sambandh hai?

doosri baat - baap se har sambandh 100 pratishat hai va koi sambandh 100 pratishat hai, koi 50 pratishat hai va nambarvaar hain? percentage mein bhi full hai va thoda alaukik, thoda laukik, donon mein percentage mein baanta hua hai?

teesra - sarva sambandh ki anubhooti ka roohaani ras sada anubhav karte va jab aavashyakta hoti hai tab anubhav karte? sada sarva sambandhon ka ras lene vaale hain va kabhi-kabhi?

3. seva mein - seva mein vishesh kya check kiya hoga? pahli baat - jo mote roop mein checking hai - man, vaani, karma va tan-man-dhan sab prakaar ki seva ka khaata jama hai? doosri baat - tan-man-dhan, man-vaani-karma in 6 baaton mein jitna kar sakte hain utna kiya hai va jitna kar sakte hain, utna na kar yatha shakti sthiti ke pramaan kiya hai? aaj sthiti bahut achhi hai to seva ki percentage bhi achhi, kal kaaran akaaran sthiti kamjor hai to seva ki percentage bhi kamjor rahi hai। jitna aur utna nahin hua। is kaaran yatha shakti nambarvaar ban jaate hain।

teesri baat - jo baapdaada dvaara gyaan ka khajaana, shaktiyon ka khajaana, gunon ka khajaana, khushiyon ka khajaana, shreshtha samay ka khajaana, shuddh sankalpon ka khajaana mila hai, un sab khajaanon dvaara seva ki hai va koi-koi khajaane dvaara seva ki hai? agar ek khajaane mein bhi seva karne mein kami ki hai va pharaakhdil ho khajaanon ko kaarya mein nahin lagaaya hai, thoda bahut kar liya arthaat kanjoosi ki to iska bhi result mein antar pad jaata hai!

chauthi baat - dil se ki hai va duty pramaan ki hai seva ki sada bahti ganga hai va seva mein kabhi bahna kabhi rookna। mood hai to seva ki, mood nahin to nahin ki। aise rukne vaale taalaab to nahin hai।

aise teenon baaton ki checking pramaan harek ki value check ki। to aise-aise vidhipoorvak har ek apne aapko check karo। aur is naye varsha mein yahi dridh sankalp karo ki kami ko sada ke liye samaapta kar sampanna ban, number one moolyavaan saugaat baap ke aage rakhenge। check karna aur phir change karna aayega na। result pramaan abhi kisi na kisi baat mein majority yathaashakti hai। sampanna shakti svarup nahin hai isliye ab beeti ko beeti kar vartamaan aur bhavishya sampanna, shaktishaali bano।

aap logon ke paas bhi saugaaten ikatthi hoti hain to check karte ho na kaun-si kaun-si vailyuebal hain। baap-daada bhi bachchon ka yahi khel kar rahe the। saugaaten to athaah theen। har ek ne apne anusaar achhe te achha umang utsaah bhara sankalp, shaktishaali sankalp baap ke aage kiya hai। ab sirf yathaashakti ke bajaae sada shaktishaali - yeh parivartan karna। samjha। achha!

sabhi sada ke snehi, dil ke snehi, sarva sambandhon ke snehi, roohaani ras ke anubhvi aatmaayen, sarva khajaanon dvaara shaktishaali, sada sevaadhaari, sarva baaton mein yathaashakti ko sada shaktishaali mein parivartan karne vaale, vishesh snehi aur sameep sambandhi aatmaon ko baapdaada ka yaadapyaar aur namaste।

daadi jaanki ji se - madhuban ka shrringaar madhuban mein pahunch gaya। bhale padhaare। baapdaada aur madhuban ka vishesh shrringaar ho, vishesh shrringaar se kya hota hai? chamak ho jaati hai na। to baapdaada aur madhuban vishesh shrringaar ko dekh harshit ho rahe hain। vishesh seva mein baap ke sneh aur sambandh ko pratyaksha kiya, yeh vishesh seva sabke dilon ko sameep laane vaali hai। result to sada achhi hai। phir bhi samay-samay ki apni visheshta ki result hoti hai to baap ke sneh ko apni snehi soorat se naynon se pratyaksha kiya yeh vishesh seva ki। sunne vaala banaana, yeh koi badi baat nahin hai lekin snehi banaana yeh hai vishesh seva। jo sada hoti rahegi। kitne patange dekhe, shama par phida hone ki ichchha vaale kitne parvaane dekhe? abhi naynon ki nazar se parvaanon ko shama ki or ishaara karne ka hi vishesh samay hai। ishaara mila aur chalte rahenge। udte-udte pahunch jaayenge। to yeh vishesh seva aavashyak bhi hai aur ki bhi hai। aisi result hai na। achha hai har kadam mein anek aatmaon ki seva samaai hui hai, kitne kadam uthaaye? to jitne kadam utne hi aatmaon ki seva। achha chakra raha। unhon ke bhi umang utsaah ki abhi season hai। jo hota hai woh achhe se achha hota hai। baapdaada ke murbi bachchon ke har karma ki rekha se anekon ke karmon ki rekha badalti hai। to har karma ki rekha se anekon ki takdeer ki lakeer kheenchi। chalna arthaat takdeer kheenchana। to jahaan-jahaan jaate hain apne karmon ki kalam se anekon ki takdeer ki lakeeren kheenchate jaate। to kadam arthaat karma hi murbi bachchon ke takdeer ki lakeer kheenchane ki seva ke nimitta banen। to abhi baaki last aavaaj hai - “yahi hain, yahi hainˮ jisko dhoondhate hain ve yahi hain। abhi sochte hain - yeh hain va woh hain। lekin sirf ek hi aavaaj nikle yahi hain। abhi woh samay sameep aa raha hai। takdeer ki lakeer lambi hote-hote yeh bhi buddhi ka jo thoda sa taala raha hua hai woh khul jaayega। chaabi to lagaai hai, khula bhi hai lekin abhi thoda sa atka hua hai, woh bhi din aa jaayega।

teachers bahinon ke saath:- teachers arthaat sada sampanna। to sampannata ki anubhooti karne vaali ho na। svayan sarva khajaanon se sampanna honge tab doosron ki seva kar sakenge। apne mein sampannata nahin to doosre ko kya denge। sevaadhaari ka arth hi hai sarva khajaanon se sampanna। sada bharpoorta ka nasha aur khushi। koi ek bhi khajaane ki kami nahin। shakti hai, gun nahin। gun hain shakti nahin - aisa nahin, sarva khajaane mein sampanna। jis shakti ka jis samay aahvaan karen, shakti swaroop ban jaae - isko kaha jaata hai sampannata। aise ho? jo yaad aur seva ke balance mein rehta hai, kabhi yaad jyaada ho, kabhi seva jyaada ho - nahin, donon samaan ho, balance mein rahne vaale ho, vahi sampannata ki blessing ke adhikaari hote hain। aise sevaadhaari ho, kya lakshya rakhti ho? sarva khajaanon se sampanna, ek bhi gun kam hua to sampanna nahin। ek shakti bhi kam hui to bhi sampanna nahin kahenge। sada sampanna aur sarva mein sampanna donon hi ho। aise ko kaha jaata hai yogya sevaadhaari। samjha। har kadam mein sampannata। aise anubhvi aatma anubhav ki authority hai। sada baap ke saath ka anubhav ho।

kumaariyon se - sada lucky kumaariyaan ho na। sada apna bhaagya ka chamakta hua sitaara apne mastak par anubhav karte ho। mastak mein bhaagya ka sitaara chamak raha hai na ki chamakne vaala hai? baap ka banna arthaat sitaara chamakna। to ban gaye ya abhi sauda karne ka soch rahi ho? sochne vaali ho ya karne vaali ho? koi sauda tudaane chaahe to toot sakta hai? baap se sauda kar phir doosra sauda kiya to kya hoga? phir apne bhaagya ko dekhna padega। koi lakhapti ka bankar gareeb ka nahin banta। gareeb saahookaar ka banta hai। saahookaar vaala gareeb nahin banega। baap ka banne ke baad kahaan sankalp bhi ja nahin sakta - aise pakke ho? jitna sang hoga utna rang pakka hoga। sang kachcha to rang bhi kachcha isliye padhaai aur seva donon ka sang chaahiye। to sada ke liye pakke achal rahenge। halchal mein nahin aayenge। pakka rang lag gaya to itne hands se itne hi centre khul sakte hain kyonki kumaariyaan hain hi nirbandhan। auron ka bhi bandhan khatma karengi na। sada baap ke saath pakka sauda karne vaali। himmat hai to baap ki madad bhi milegi। himmat kam to madad bhi kam। achha - om shanti।

vardaan:- parmaatma dulaar ko praapta karne vaale ab ke so bhavishya ke raaj dulaare bhav

sangamayug par aap bhaagyavaan bachche hi dilaaraam ke dulaar ke paatra ho। yeh parmaatma dulaar koton mein koi aatmaon ko hi praapta hota hai। is divya dulaar dvaara raaj dulaare ban jaate ho। raajdulaare arthaat ab bhi raaje aur bhavishya ke bhi raaje। bhavishya se bhi pahle ab svaraajya adhikaari ban gaye। jaise bhavishya raajya ki mahima hai ek raajya, ek dharma…aise abhi sarva karmendriyon par aatma ka ek chhatra raajya hai।

slogan:- apni soorat se baap ki seerat dikhaane vaale hi parmaatma snehi hain।

soochna:-aaj maas ka teesra ravivaar hai, sabhi sangathit roop mein saayan 6.30 se 7.30 baje tak antarraashtreey yog mein sammilit ho, beejroop baap ke saath apne poorvaj swaroop ki smriti mein sthit rah poore vriksha ko sneh aur shakti ki sakaash dene ki seva karen। saara din main poorvaj aatma hoon is svamaan mein rahne ka abhyaas karen।