Murli du jour du mercredi 18 mars 2020

18-03-2020 praatahmurli om shanti "baapdaada"' madhuban

“ meethe bachche - is behad naatak ko sada smriti mein rakho to apaar khushi rahegi , is naatak mein jo achhe purooshaarthi aur ananya hain , unki pooja bhi adhik hoti hai ''

prashn:- kaun-si smriti duniya ke sab duhkhon se mukta kar deti hai, harshit rahne ki yukti kya hai?

uttar:- sada smriti rahe ki abhi ham bhavishya nai duniya mein ja rahe hain। bhavishya ki khushi mein raho to duhkh bhool jaayenge। vighnon ki duniya mein vighna to aayenge lekin smriti rahe ki is duniya mein ham baaki thode din hain to harshit rahenge।

geet:- jaag sajniyaan jaag …

om shanti। yeh geet bada achha hai। geet sunne se hi oopar se lekar 84 janmon ka raaz buddhi mein aa jaata hai। yeh bhi bachchon ko samjhaaya hai tum jab oopar se aate ho to via sookshm vatan se nahin aate ho। abhi via sookshm vatan hokar jaana hai। sookshm vatan baba abhi hi dikhaate hain। satayug-treta mein is gyaan ki baat bhi nahin rehti hai। na koi chitra aadi hain। bhakti maarga mein to athaah chitra hain। deviyon aadi ki pooja bhi bahut hoti hai। durga, kaali, sarasvati hai to ek hi parantu naam kitne rakh diye hain। jo achha purooshaartha karte honge, ananya honge unki pooja bhi jaasti hogi। tum jaante ho ham hi poojya se pujaari ban baba ki aur apni pooja karte hain। yeh (baba) bhi naaraayan ki pooja karte the na। wonderful khel hai। jaise naatak dekhne se khushi hoti hai na, vaise yeh bhi behad ka naatak hai, inko koi bhi jaante nahin। tumhaari buddhi mein ab saara drama ka raaz hai। is duniya mein kitne athaah duhkh hain। tum jaante ho abhi baaki thoda samay hai, ham ja rahe hain nai duniya mein। bhavishya ki khushi rehti hai to woh is duhkh ko uda deti hai। likhte hain baba bahut vighna padte hain, ghaata pad jaata hai। baap kehte hain kuchh bhi vighna aayen, aaj lakhapti ho, kal kakhapti ban jaate ho। tumko to bhavishya ki khushi mein rehna hai na। yeh hai hi raavan ki aasuri duniya। chalte-chalte koi na koi vighna padega। is duniya mein baaki thode din hain phir ham athaah sukhon mein jaayenge। baba kehte hain na-kal saanvara tha, gaanvade ka chhora tha, abhi baap hamko knowledge de gora bana rahe hain। tum jaante ho baap beejroop hai, sat hai, chaitanya hai। unko supreme soul kaha jaata hai। woh oonch te oonch rahne vaale hain, punarjanma mein nahin aate hain। ham sab janma-maran mein aate hain, woh reserved hain। unko to ant mein aakar sabki sadgati karni hai। tum bhakti maarga mein janma-janmaantar gaate aaye ho-baba aap aayenge to ham aapke hi banenge। mera to ek baba doosra na koi। ham baba ke saath hi jaayenge। yeh hai duhkh ki duniya। kitna gareeb hai bhaarat। baap kehte hain mainne bhaarat ko hi saahookaar banaaya tha phir raavan ne narka banaaya hai। abhi tum bachche baap ke sammukh baithe ho। grihastha vyavhaar mein bhi to bahut hi rehte hain। sabko yahaan to nahin baithna hai। grihastha vyavhaar mein raho, bhal rangeen kapde pahno, kaun kehta hai saphed kapde pahno। baba ne kabhi kisko kaha nahin hai। tumko achha nahin lagta hai tab saphed kapde pahne hain। yahaan tum bhal saphed vastra pahankar rehte ho, lekin rangeen kapde pahanne vaale, us dress mein bhi bahuton ka kalyaan kar sakte hain। maataayen apne pati ko bhi samjhaati hain-bhagvaanuvaach hai pavitra banna hai। devtaayen pavitra hain tab to unko maatha tekte hain। pavitra banna to achha hai na। abhi tum jaante ho srishti ka ant hai। jaasti paise kya karenge। aajkal kitne daake lagte hain, rishvatkhori kitni lagi padi hai। yeh abhi ke liye gaayan hai-kinki dabi rahi dhool mein.... saphli hogi soi, jo dhani ke naam kharche... dhani to abhi sammukh hai। samajhdaar bachche apna sab kuchh dhani ke naam par saphal kar lete hain।

manushya to sab patit-patiton ko daan karte hain। yahaan to punya aatmaon ka daan lena hai। sivaae braahmanon ke aur koi se connection nahin hai। tum ho punya aatmaayen। tum punya ka hi kaam karte ho। yeh makaan banaate hain, woh bhi tum hi rehte ho। paap ki to koi baat nahin। jo kuchh paise hain-bhaarat ko svarga banaane ke liye kharcha karte rehte hain। apne pet ko bhi patti baandhakar kehte-baba, hamaari ek eet bhi ismen laga do to vahaan hamko mahal mil jaayenge। kitne samajhdaar bachche hain। pattharon ke evaj mein sona milta hai। samay hi baaki thoda hai। tum kitni service karte ho। pradarshani mele badhte jaate hain। sirf bachchiyaan teekhi ho jaaen। behad ke baap ka banti nahin hain, moh chhodti nahin hain। baap kehte hain hamne tumko svarga mein bheja tha, ab phir tumko svarga ke liye taiyaar kar rahe hain। agar shreemat par chalenge to oonch pad paayenge। yeh baaten aur koi samjha na sake। saara srishti chakra tumhaari buddhi mein hai-mool vatan, sookshm vatan aur sthoolavtan। baap kehte hain-bachche, svadarshan chakradhaari bano, auron ko bhi samjhaate raho। yeh dhandha dekho kaisa hai। khud hi dhanvaan, svarga ka maalik banna hai, auron ko bhi banaana hai। buddhi mein yahi rehna chaahiye-kisko raasta kaise bataayen? drama anusaar jo past hua woh drama। second by second jo hota hai, unko ham saakshi ho dekhte hain। bachchon ko baap divya drishti se saakshaatkaar bhi karaate hain। aage chal tum bahut saakshaatkaar karenge। manushya duhkh mein traahi-traahi karte rahenge, tum khushi mein taali bajaate rahenge। ham manushya se devta bante hain to zaroor nai duniya chaahiye। uske liye yeh vinaash khada hai। yeh to achha hai na। manushya samajhte hain aapas mein lade nahin, pees ho jaae। bas। parantu yeh to drama mein noondh hai। do bandar aapas mein lade, makkhan beech mein teesre ko mil gaya। to ab baap kehte hain-mujh baap ko yaad karo aur sabhi ko raasta bataao। rehna bhi saadhaaran hai, khaana bhi saadhaaran hai। kabhi-kabhi khaatiri bhi ki jaati hai। jis bhandaare se khaaya, kehte hain baba yeh sab aapka hai। baap kehte hain trustee hokar sambhaalo। baba sab kuchh aapka diya hua hai। bhakti maarga mein sirf kahne maatra kehte the। abhi main tumko kehta hoon trustee bano। abhi main sammukh hoon। main bhi trustee ban phir tumko trustee banaata hoon। jo kuchh karo poochh kar karo। baba har baat mein raay dete rahenge। baba makaan banaaoon, yeh karoon, baba kahenge bhal karo। baaki paap aatmaon ko nahin dena hai। bachchi agar gyaan mein nahin chalti hai, shaadi karna chaahti hai to kar hi kya sakte hain। baap to samjhaate hain tum kyon apvitra banti ho, parantu kiski takdeer mein nahin hai to patit ban padte hain। anek prakaar ke case bhi hote rehte hain। pavitra rehte bhi maaya ka thappad lag jaata hai, kharaab ho padte hain। maaya badi prabal hai। woh bhi kaam vash ho jaate hain, phir kaha jaata hai drama ki bhaavi। is ghadi tak jo kuchh hua kalpa pahle bhi hua tha। nothing new। achha kaam karne mein vighna daalte hain, nai baat nahin। hamko to tan-man-dhan se bhaarat ko zaroor svarga banaana hai। sab kuchh baap par svaaha karenge। tum bachche jaante ho-ham shreemat par is bhaarat ki roohaani seva kar rahe hain। tumhaari buddhi mein hai ki ham apna raajya phir se sthaapan kar rahe hain। baap kehte hain yeh roohaani hospital kam university teen pair prithvi mein khol do, jisse manushya ever healthy wealthy banen। 3 pair prithvi ke bhi koi dete nahin hain। kehte hain bi.ke. jaadu karengi, behen-bhaai banaayengi। tumhaare liye drama mein yukti badi achhi rakhi hui hai। behen-bhaai kudrishti rakh nahin sakte। aajkal to duniya mein itna gand hai, baat mat poochho। to jaise baap ko taras pada hai, aise tum bachchon ko bhi padna chaahiye। jaise baap narka ko svarga bana rahe hain, aise tum merciful bachchon ko bhi baap ka madadgaar banna hai। paisa hai to hospital kam university kholte jaao। ismen jaasti kharche ki to koi baat hi nahin hai। sirf chitra rakh do। jinhonne kalpa pahle gyaan liya hoga, unka taala khulta jaayega। woh aate rahenge। kitne bachche door-door se aate hain padhne liye। baba ne aise bhi dekhe hain, raat ko ek gaanv se aate hain, savere centre par aakar jholi bharkar jaate hain। jholi aisi bhi na ho jo bahta rahe। woh phir kya pad paayenge! tum bachchon ko to bahut khushi honi chaahiye। behad ka baap hamko padhaate hain, behad ka varsa dene। kitna sahaj gyaan hai। baap samajhte hain jo bilkul pattharbuddhi hain unhein paarasbuddhi banaana hai। baba ko to badi khushi rehti hai। yeh gupta hai na। gyaan bhi hai gupta। mama-baba yeh lakshmi-naaraayan bante hain to ham phir kam banenge kya! ham bhi service karenge। to yeh nasha rehna chaahiye। ham apni raajdhaani sthaapan kar rahe hain yogbal se। abhi ham svarga ke maalik bante hain। vahaan phir yeh gyaan nahin rahega। yeh gyaan abhi ke liye hai। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) samajhdaar ban apna sab kuchh dhani ke naam par saphal karna hai। patiton ko daan nahin karna hai। sivaae braahmanon ke aur koi se bhi connection nahin rakhna hai।

2) buddhi roopi jholi mein koi aisa chhed na ho jo gyaan bahta rahe। behad ka baap behad ka varsa dene ke liye padha rahe hain, is gupta khushi mein rehna hai। baap samaan merciful banna hai।

vardaan:- sarva ko umang - utsaah ka sahayog de shaktishaali banaane vaale sachche sevaadhaari bhav

sevaadhaari arthaat sarva ko umang-utsaah ka sahayog dekar shaktishaali banaane vaale। abhi samay kam hai aur rachna jyaada se jyaada aane vaali hai। sirf itni sankhya mein khush nahin ho jaana ki bahut aa gaye। abhi to bahut sankhya badhni hai isliye aapne jo paalna li hai uska return do। aane vaali nirbal aatmaon ke sahayogi ban unhein samartha, achal adol banaao tab kahenge sachche sevaadhaari।

slogan:- rooh ko jab, jahaan aur jaise chaaho sthit kar lo-yahi roohaani drill hai।

maateshvari ji ke anmol mahaavaakya

1) “ paramatma guru , teacher , pita ke roop mein bhinna - bhinna sambandh ka varsa deta hai ''

dekho, paramatma teen roop dhaaran kar varsa deta hai। woh hamaara baap bhi hai, teacher bhi hai to guru bhi hai। ab pita ke saath pita ka sambandh hai, teacher ke saath teacher ka sambandh hai, guru se gurupne ka sambandh hai। agar pita se phaarakti le li to varsa kaise milega? jab paas hokar teacher dvaara certificate lenge tab teacher ka saath milega। agar baap ka vaphaadaar, pharmaandaar bachcha ho direction par nahin chale to bhavishya praalabdha nahin banengi। phir poorn sadgati ko bhi nahin praapta kar sakenge, na phir baap se pavitrata ka varsa le sakenge। paramatma ki pratigya hai agar tum teevra purushaartha karoge to tumko 100 guna phaayda de doonga। sirf kahne maatra nahin, unke saath sambandh bhi gahra chaahiye। arjun ko bhi hukm kiya tha ki sabko maaro, nirantar mere ko yaad karo। paramatma to samartha hai, sarvashaktivaan hai, vo apne vaayde ko avashya nibhaayega, magar bachche bhi jab baap ke saath tod nibhaayenge, jab sabse buddhiyog tod ek paramatma se jodenge tab hi unse sampoorn varsa milega।

2) “ sarva manushya aatmaayen punarjanma mein aati hain ''

dekho, jo bhi dharma sthaapan karne aate hain woh punarjanma le apne dharma ki paalna karne aate hain। woh na khud mukta hote, na auron ko mukta karte, agar aise mukta hote jaayen to baaki jaakar, na mukta hone vaale hi srishti par bachen। parantu aisa to ho nahin sakta ki paapaatma rah jaaven aur punyaatma chali jaaen। jaise sanyaasi hain woh nirvikaari hain, agar woh mukta hote jaayen to paapaatma rehte jaayen, phir to na sanyaasiyon ki vriddhi dekhne mein aave aur na srishti aise chal sake। punya aatmaayen srishti ko thamaati hain nirvikaari bal ke sahaare, to srishti chalti hai। nahin to kaamaagni se srishti jal jaayegi। to yeh law nahin hai ki beech se koi aatma mukti pad mein chali jaaye। jaise vriksha ka ek patta bhi beej mein sama nahin sakta, jhaad paida ho vriddhi ko paae jadajdeebhoot hona chaahiye phir naya jhaad emerge hota hai isliye jo bhi dharma sthaapan karne aate hain vo phir paalna jarur karte hain parantu jiska hamne sahaara pakda hai, woh jab anek adharma ka vinaash kare tab ek dharma sthaapan ho। yeh sthaapna, vinaash aur paalna teenon kaam karta hai aur dharma pitaayen sirf sthaapna ka kaarya karte, vinaash ka kaarya nahin karte। vinaash ka kaam karaana, woh to paramatma ke haath mein hai tab usko trimoorti kaha jaata hai। achha। om shanti।