Murli du jour du mardi 28 avril 2020

28-04-2020 praatahmurli om shanti "baapdaada"' madhuban

“ meethe bachche - ab yeh naatak poora hota hai , tumhein vaapis ghar jaana hai , isliye is duniya se mamatva mita do , ghar ko aur naye raajya ko yaad karo ''

prashn:- daan ka mahatva kab hai, uska return kin bachchon ko praapta hota hai?

uttar:- daan ka mahatva tab hai jab daan ki hui cheej mein mamatva na ho। agar daan kiya phir yaad aaya to uska phal return mein praapta nahin ho sakta। daan hota hi hai doosre janma ke liye isliye is janma mein tumhaare paas jo kuchh hai usse mamatva mita do। trustee hokar sambhaalo। yahaan tum jo eeshvareey seva mein lagaate ho, hospital va college kholte ho usse anekon ka kalyaan hota hai, uske return mein 21 janmon ke liye mil jaata hai।

om shanti। bachchon ko apna ghar aur apni raajdhaani yaad hai? yahaan jab baithte ho to baahar ke gharghaat, dhandhe-dhori aadi ke khyaalaat nahin aane chaahiye। bas apna ghar hi yaad aana hai। ab is puraani duniya se nai duniya mein return hai, yeh puraani duniya to khatma ho jaani hai। sab svaaha ho jaayega aag mein। jo kuchh in okhon se dekhte ho, mitra-sambandhi aadi yeh sab khatma ho jaana hai। yeh gyaan baap hi roohon ko samjhaate hain। bachchon, ab vaapis apne ghar chalna hai। naatak poora hota hai। yeh hai hi 5 hazaar varsha ka chakra। duniya to hai hi, parantu unko chakra lagaane mein 5 hazaar varsha lagte hain। jo bhi aatmaayen hain sab vaapas chali jaayengi। yeh puraani duniya hi khatma ho jaayegi। baba bahut achhi tarah har ek baat samjhaate hain। koi-koi manhoos hote hain to muphta apni jaaydaad ganva baithte hain। bhakti maarga mein daan-punya to karte hain na। koi ne dharmashaala banaai, koi ne hospital banaai, budvi mein samajhte hain inka phal doosre janma mein milega। bigar koi aash, anaasakta ho koi kare - aisa hota nahin hai। bahut kehte hain phal ki chaahna ham nahin rakhte hain। parantu nahin, phal avashya milta hai। samjho koi ke paas paisa hai, unse dharmaau de diya to budvi mein yeh rahega hamko doosre janma mein milega। agar mamatva gaya, meri yeh cheez hai aisa samjha to phir vahaan nahin milega। daan hota hi hai doosre janma ke liye। jabki doosre janma mein milta hai to phir is janma mein mamatva kyon rakhte, isliye trustee banaate hain to apna mamatva nikal jaae। koi achhe saahookaar ke ghar mein janma lete hain to kahenge usne achhe karma kiye hain। koi raaja-raani ke paas janma lete hain, kyonki daan-punya kiya hai parantu woh hai alpakaal ek janma ki baat। abhi to tum yeh padhaai padhte ho। jaante ho is padhaai se hamko yeh banna hai, to daiveegun dhaaran karna hai। yahaan daan jo karte ho unse yeh roohaani university, hospital kholte hain। daan kiya to phir unse mamatva mita dena chaahiye kyonki tum jaante ho ham bhavishya 21 janma ke liye baap se lete hain। yeh baap makaan aadi banaate hain। yeh to tempory hai। nahin to itne sab bachche kahaan rahenge। dete hain sab shivbaaba ko। dhani woh hai। woh inke dvaara yeh karaate hain। shivbaaba to raajya nahin karta। khud hai hi daata। unka mamatva kismen hoga! abhi baap shreemat dete hain ki maut saamne khada hai। aage tum kisko dete the to maut ki baat nahin thi। ab baba aaya hai to puraani duniya hi khatma honi hai। baap kehte hain main aaya hi hoon is patit duniya ko khatma karne। is rudra yagya mein saari puraani duniya svaaha honi hai। jo kuchh apna bhavishya banaayenge to nai duniya mein milega। nahin to yahaan hi sab kuchh khatma ho jaayega। koi na koi kha jaayega। aajkal manushya udhaar par bhi dete hain। vinaash hoga to sab khatma ho jaayenge। koi kisko kuchh dega nahin। sab rah jaayega। aaj achha hai, kal devaala nikaal dete। koi ko bhi kuchh paisa milne ka nahin hai। koi ko diya, woh mar gaya phir kaun baith return karte hain। to kya karna chaahiye? bhaarat ke 21 janmon ke kalyaan liye aur phir apne 21 janmon ke kalyaan ke liye usmein laga dena chaahiye। tum apne liye hi karte ho। jaante ho shreemat par ham oonch pad paate hain, jisse 21 janma sukh-shanti milegi। inko kaha jaata hai avinaashi baba ki roohaani hospital aur university, jisse health, wealth aur happiness milti hai। koi ko health hai, wealth nahin to happiness rah nahin sakti। donon hain to happy bhi rehte hain। baap tumko 21 janmon ke liye donon dete hain। vo 21 janmon ke liye jama karna hai। bachchon ka kaam hai yukti rachna। baap ke aane se gareeb bachchon ki takdeer khul jaati hai। baap hai hi gareeb nivaaz। saahookaaron ki takdeer mein hi yeh baaten nahin hain। is samay bhaarat sabse gareeb hai। jo saahookaar tha vahi gareeb bana hai। is samay sab paap aatmaayen hain। jahaan punya aatma hain vahaan paap aatma ek bhi nahin। woh hai satayug satopradhaan, yeh hai kaliyug tamopradhaan। tum abhi purushaartha kar rahe ho satopradhaan banne ka। baap tum bachchon ko smriti dilaate hain to tum samajhte ho barobar ham hi svargavaasi the। phir hamne 84 janma liye hain। baaki 84 laakh yoniyaan to gapoda hai। kya itna janma jaanvar yoni mein rahe! yeh pichhaadi ka manushya ka martaba hai? kya ab vaapis jaana hai?

ab baap samjhaate hain - maut saamne khada hai। 40-50 hazaar varsha hain nahin। manushya to bilkul ghor andhiyaare mein hain isliye kaha jaata hai pattharbudvi। abhi tum pattharbudvi se paarasbudvi bante ho। yeh baaten koi sannyaasi aadi thode hi bata sakte hain। ab tumko baap smriti dilaate hain ki vaapis jaana hai। jitna ho sake apna bag baggage transfer kar do। baba, yeh sab lo, ham satayug mein 21 janma liye pa lenge। yeh baba bhi to daan-punya karte the। bahut shauk tha। vyaapaari log do paisa dharmaau nikaalte hain। baba ek aana nikaalte the। koi bhi aaye to darvaaje se khaali na jaaye। abhi bhagwan sammukh aaye hain, yeh kisko pata nahin hai। manushya daan-punya karte-karte mar jaayenge phir kahaan milega? pavitra bante nahin, baap se preet rakhte nahin। baap ne samjhaaya hai yaadav aur kaurvon ki hai vinaash kaale vipreet budvi। paandavon ki hai vinaash kaale preet budvi। yooropvaasi sab yaadav hain jo moosal aadi nikaalte rehte hain। shaastron mein to kya-kya baaten likh di hain। dher shaastra bane hue hain, drama plan anusaar। ismen prerna aadi ki baat nahin। prerna maana vichaar। baaki aise thode hi baap prerna se padhaate hain। baap samjhaate hain yeh bhi ek vyaapaari tha। achha naam tha। sabhi ijzat dete the। baap ne pravesh kiya aur isne gaali khaana shuru kar di। shivbaaba ko jaante nahin। na unko gaali de sakte hain। gaali yeh khaate hain। krishna ne kaha na - main nahin maakhan khaayo। yeh bhi kehte hain kaam to sab kuchh baba ka hai, main kuchh nahin karta hoon। jaadoogar woh hai, main thode hi hoon। muphta mein inko gaali de dete hain। hamne koi ko bhagaaya kya? kisko bhi nahin kaha ki tum bhaagkar aao। ham to vahaan the, yeh aapehi bhaag aaye। muphta mein dosh daal diya hai। kitni gaali khaai। kya-kya baaten shaastron mein likh di hain। baap samjhaate hain yeh phir bhi hoga। yeh hai saari gyaan ki baat। koi manushya yeh thode hi kar sakta hai। so bhi British government ke raajya mein koi ke paas itni kanyaayen-maataayen baith jaaen। koi kuchh kar na sake। koi ke sambandhi aate the to ekdam bhaga dete the। baba to kehte the bhal inko samjhaakar le jaao। main koi mana thode hi karta hoon parantu kiski himmat nahin hoti thi। baap ki taakat thi na। nothing new। yeh phir bhi sab hoga। gaali bhi khaani pade। draupdi ki bhi baat hai। yeh sab draupdiyaan aur dushaasan hain, ek ki baat nahin thi। shaastron mein yeh gapode kisne likhe? baap kehte hain yeh bhi drama mein part hai। aatma ka gyaan hi koi mein nahin hai, bilkul hi deh-abhimaani ban pade hain। dehi-abhimaani banne mein mehnat hai। raavan ne bilkul hi ulta bana diya hai। ab baap sulta banaate hain।

dehi-abhimaani banne se svatah smriti rehti hai ki ham aatma hain, yeh deh baaja hai, bajaane liye। yeh smriti bhi rehti to daiveegun bhi aate jaate hain। tum kisko duhkh bhi nahin de sakte। bhaarat mein hi in lakshmi-naaraayan ka raajya tha। 5 hazaar varsha ki baat hai। agar koi laakhon varsha kehte hain to ghor andhiyaare mein hain। drama anusaar jab samay poora hua hai tab baap phir se aaya hai। ab baap kehte hain hamaari shreemat par chalo। maut saamne khada hai। phir andar ki jo kuchh aash hai, woh rah jaayegi। marna to hai zaroor। yeh vahi mahaabhaarat ladaai hai। jitna apna kalyaan kar sako utna achha hai। nahin to tum haath khaali jaayenge। saari duniya haath khaali jaani hai। sirf tum bachche bhartu haath arthaat dhanvaan ho jaate ho। ismen samajhne ki badi vishaalbudvi chaahiye। kitne dharma ke manushya hain। har ek ki apni act chalti hai। ek ki act na mile doosre se। sabke features apne-apne hain, kitne saare features hain, yeh sab drama mein noondh hai। wonderful baaten hain na। ab baap kehte hain apne ko aatma samjho। ham aatma 84 ka chakra lagaati hain, ham aatma is drama mein actor hain, inse ham nikal nahin sakte, moksha pa nahin sakte। phir try karna bhi phaaltu hai। baap kehte hain drama se koi nikal jaae, doosra koi add ho jaae - yeh ho nahin sakta। itna saara gyaan sabki budvi mein rah nahin sakta। saara din aise gyaan mein raman karna hai। ek ghadi aadhi ghadi… yeh yaad karo phir unko badhaate jaao। 8 ghanta bhal sthool service karo, aaraam bhi karo, is roohaani government ki service mein bhi time do। tum apni hi service karte ho, yeh hai mukhya baat। yaad ki yaatra mein raho, baaki gyaan se oonch pad paana hai। yaad ka apna poora chart rakho। gyaan to sahaj hai। jaise baap ki budvi mein hai ki main manushya srishti ka beejroop hoon, inke aadi-madhya-ant ko jaanta hoon। ham bhi baba ke bachche hain। baba ne yeh samjhaaya hai, kaise yeh chakra phirta hai। us kamaai ke liye bhi tum 8-10 ghanta dete ho na। achha graahak mil jaata hai to raat ko kabhi ubaasi nahin aati hai। ubaasi di to samjha jaata hai ki yeh thaka hua hai। budvi kahaan baahar bhatakti hogi। centres par bhi bada khabardaar rehna hai। jo bachche doosron ka chintan nahin karte hain, apni padhaai mein hi masta rehte hain unki unnati sada hoti rehti hai। tumhein doosron ka chintan kar apna pad bhrashta nahin karna hai। hear no evil, si no evil..... koi achha nahin bolta hai to ek kaan se sun doosre se nikaal do। hamesha apne ko dekhna chaahiye, na ki doosron ko। apni padhaai nahin chhodni chaahiye। bahut aise rooth padte hain। aana banda kar dete hain, phir aa jaate hain। nahin aayenge to jaayenge kahaan? school to ek hi hai। apne pair par kulhaada nahin lagaana hai। tum apni padhaai mein masta raho। bahut khushi mein raho। bhagwan padhaate hain baaki kya chaahiye। bhagwan hamaara baap, teacher, satguru hai, unse hi budvi ka yog lagaaya jaata hai। woh hai saari duniya ka number one maashook jo tumko number one vishwa ka maalik banaate hain।

baap kehte hain tumhaari aatma bahut patit hai, ud nahin sakti। pankh kate hue hain। raavan ne sabhi aatmaon ke pankh kaat diye hain। shivbaaba kehte hain mere bigar koi paavan bana nahin sakta। sab actors yahaan hain, vridvi ko paate rehte hain, vaapis koi jaate nahin। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svayan ke chintan aur padhaai mein masta rehna hai। doosron ko nahin dekhna hai। agar koi achha nahin bolta hai to ek kaan se sun doosre se nikaal dena hai। rooth karke padhaai nahin chhodni hai।

2) jeete ji sab kuchh daan karke apna mamatva mita dena hai। poora will kar trustee ban halka rehna hai। dehi-abhimaani ban sarva daiveegun dhaaran karne hain।

vardaan:- apne mool sanskaaron ke parivartan dvaara vishwa parivartan karne vaale udaahran swaroop bhav

har ek mein jo apna mool sanskaar hai, jisko nature kehte ho, jo samay prati samay aage badhne mein rookaavat daalta hai us mool sanskaar ka parivartan karne vaale udaahran swaroop bano tab sampoorn vishwa ka parivartan hoga। ab aisa parivartan karo jo koi yeh varnan na kare ki inka yeh sanskaar to shuru se hi hai। jab percentage mein, ansh maatra bhi puraana koi sanskaar dikhaai na de, varnan na ho tab kahenge yeh sampoorn parivartan ke udaahran swaroop hain।

slogan:- ab prayatna ka samay beet gaya, isliye dil se pratigya kar jeevan ka parivartan karo।