Murli du jour du samedi 2 mai 2020

02-05-2020 praatahmurli om shanti "baapdaada"' madhuban

“meethe bachche - abhi tum sangam par ho, tumhein puraani duniya se tailuk (naata) tod dena hai kyonki yeh puraani duniya ab khatma honi hai”

prashn:- sangam ki kaun-si visheshta saare kalpa se nyaari hai?

uttar:- sangam ki hi visheshta hai - padhte yahaan ho, praalabdha bhavishya mein paate ho। saare kalpa mein aisi padhaai nahin padhaai jaati jiski praalabdha doosre janma mein mile। abhi tum bachche mrityulok mein padh rahe ho amarlok ke liye। aur koi doosre janma ke liye padhta nahin।

geet:- door desh ka rahne vaala…

om shanti। door desh ka rahne vaala kaun? yeh to koi bhi jaante nahin। kya unko apna desh nahin hai jo paraaye desh mein aaye hain? woh apne desh mein nahin aate hain। yeh raavan raajya paraaya desh hai na। kya shivbaaba apne desh mein nahin aate hain? achha, raavan ka pardesh kaun-sa hai? aur desh kaun-sa hai? shivbaaba ka apna desh kaun-sa hai, paraaya desh kaun-sa hai? phir baap aate hain paraaye desh mein, to unka desh kaun-sa hai? apne desh ki sthaapna karne aate hain lekin kya woh apne desh mein khud aate hain? (ek-do ne sunaaya) achha, is par sab vichaar saagar manthan karna। yeh bahut samajhne ki baat hai। raavan ka paraaya desh bataana bahut sahaj hai। raam raajya mein kabhi raavan aata nahin। baap ko raavan ke desh mein aana padta hai kyonki raavan raajya ko change karna hota hai। yeh hai sangamayug। woh satayug mein bhi nahin aate, kaliyug mein bhi nahin aate। sangamayug par aate hain। to yeh raam ka bhi desh hai, raavan ka bhi desh hai। is kinaare raam ka, us kinaare raavan ka hai। sangam hai na। abhi tum bachche sangam par ho। na is taraph, na us taraph ho। apne ko sangam par samajhna chaahiye। hamaara us taraph tailuk nahin hai। buddhi se puraani duniya se tailuk todna padta hai। rehte to yahaan hi hain। parantu buddhi se jaante hain yeh puraani duniya hi khatma honi hai। aatma kehti hai abhi main sangam par hoon। baap aaya hua hai, unko khivaiya bhi kehte hain। abhi ham ja rahe hain। kaise? yog se। yog ke liye bhi gyaan hai। gyaan ke liye bhi gyaan hai। yog ke liye samjhaaya jaata hai apne ko aatma samjho phir baap ko yaad karo। yeh bhi gyaan hai na। gyaan arthaat samjhaani। baap mat dene aaye hain। kehte hain apne ko aatma samjho। aatma hi 84 janma leti hai। baap bachchon ko hi vistaar se baith samjhaate hain। abhi yeh raavan raajya khatma hona hai। yahaan hai karma-bandhan, vahaan hain karma-sambandh। bandhan duhkh ka naam hai। sambandh sukh ka naam hai। ab karma-bandhan ko todna hai। buddhi mein hai ham is samay brahman sambandh mein hain phir daivi sambandh mein jaayenge। brahman sambandh ka yeh ek hi janma hai। phir 8 aur 12 janma daivi sambandh mein honge। yeh gyaan buddhi mein hai isliye kaliyugi chhi-chhi karmabandhan se jaise glaani karte hain। is duniya ke karmabandhan mein abhi rehna nahin hai। buddhi milti hai - yeh sab hain aasuri karmabandhan। ham bhi gupta ek yaatra par hain। yeh baap ne yaatra sikhlaai hai phir is karma-bandhan se nyaare ho ham karmaateet ho jaayenge। yeh karma-bandhan ab tootna hi hai। ham baap ko yaad karte hain ki pavitra ban chakra ko samajh chakravarti raaja banen। padh rahe hain phir unka em object, praalabdha bhi chaahiye na। tum jaante ho hamko padhaane vaala behad ka baap hai। behad ke baap ne hamko 5 hazaar varsha pahle padhaaya tha। yeh drama hai na। jinko kalpa pahle padhaaya tha unko hi padhaayenge। aate rahenge, vriddhi ko paate rahenge। sab to satayug mein nahin aayenge। baaki sab jaayenge vaapis ghar। is paar hai narka, us paar hai svarga। us padhaai mein to samajhte hain ham yahaan padhte hain, phir praalabdha bhi yahaan paayenge। yahaan ham padhte hain sangamayug par, inki praalabdha hamko nai duniya mein milegi। yeh hai nai baat। duniya mein aise koi nahin kahenge ki tumko iski praalabdha doosre janma mein milegi। is janma mein agle janmon ki praalabdha paana - yeh sirf is sangamayug par hi hota hai। baap bhi aate hi sangamayug par hain। tum padhte ho purooshottam banne ke liye। ek hi baar bhagwan gyaan saagar aakar padhaate hain nai duniya amarpuri ke liye। yeh to hai kaliyug, mrityulok। ham padhte hain satayug ke liye। narkavaasi se svargavaasi hone ke liye। yeh hai paraaya desh, woh hai apna desh। us apne desh mein baap ko aane ki darkaar nahin hai। woh desh bachchon ke liye hi hai, vahaan satayug mein raavan ka aana nahin hota hai, raavan gum ho jaata hai। phir aayega dvaapar mein। to baap bhi gum ho jaata hai। satayug mein koi bhi unko jaante nahin। to yaad bhi kyon karenge। sukh ki praalabdha poori hoti hai to phir raavan raajya shuru hota hai, inko paraaya desh kaha jaata hai।

abhi tum samajhte ho ham sangamayug par hain, hamko raasta dikhlaane vaala baap mila hai। baaki sab dhakke khaate rehte hain। jo bahut thake hue honge, jinhonne kalpa pahle raasta liya hoga, woh aate rahenge। tum pande sabko raasta bataate ho, yeh hai roohaani yaatra ka raasta। seedha chale jaayenge sukhdhaam। tum pande paandav sampradaay ho। paandav raajya nahin kahenge। raajya na paandavon ko, na kaurvon ko hai। donon ko taaj nahin hai। bhakti maarga mein donon ko taaj de diya hai। agar den bhi to kaurvon ko light ka taaj nahin denge। paandavon ko bhi light nahin de sakte kyonki purooshaarthi hain। chalte-chalte gir padte hain tab kisko deven isliye yeh sab nishaani vishnu ko di hain kyonki woh pavitra hain। satayug mein sab pavitra sampoorn nirvikaari hote hain। pavitrata ki light ka taaj hai। is samay to koi pavitra nahin hain। sannyaasi log kahlaate hain ki ham pavitra hain। parantu duniya to pavitra nahin hai na। janma phir bhi vikaari duniya mein hi lete hain। yeh hai raavan ki patit puri। paavan raajya satayug nai duniya ko kaha jaata hai। ab tum bachchon ko baap baagvaan kaanton se phool banaate hain। woh patit-paavan bhi hai, khivaiya bhi hai, baagvaan bhi hai। baagvaan aaye hain kaanton ke jangal mein, tumhaara commander to ek hi hai। yaadvon ka commander chief shankar ko kahen? yoon to woh koi vinaash karaate nahin hain। jab samay hota hai to ladaai lagti hai। kehte hain shankar ki prerna se moosal aadi bante hain। yeh sab kahaaniyaan baith banaai hain। puraani duniya khatma to zaroor honi hai। makaan puraana hota hai to gir padta hai। manushya mar jaate hain। yeh bhi puraani duniya khatma honi hai। yeh sab dabkar mar jaayenge, koi doob marenge। koi shock mein marenge। bombs aadi ki jahreeli vaayu bhi maar daalegi। bachchon ki buddhi mein hai ki abhi vinaash hona hi hai। ham us paar ja rahe hain। kaliyug poora ho satayug ki sthaapna zaroor honi hai। phir aadhaakalpa ladaai hoti hi nahin।

abhi baap aaye hain purooshaartha karaane, yeh last chance hai। deri ki to phir achaanak hi mar jaayenge। maut saamne khada hai। achaanak baithe-baithe manushya mar jaate hain। marne ke pahle to yaad ki yaatra karo। abhi tum bachchon ko ghar jaana hai isliye baap kehte hain - bachche, ghar ko yaad karo, isse ant mati so gati ho jaayegi, ghar chale jaayenge। parantu sirf ghar ko yaad karenge to paap vinaash nahin honge। baap ko yaad karenge to paap vinaash ho aur tum apne ghar chale jaayenge isliye baap ko yaad karte raho। apna chart rakho to maaloom padega, saare din mein hamne kya kiya? 5-6 varsha ki aayu se lekar apni life mein kya-kya kiya..... woh bhi yaad rehta hai। aise bhi nahin, saara time likhna padta hai। dhyaan mein rehta hai - bageeche mein baith baba ko yaad kiya, dukaan par koi graahak nahin hai ham yaad mein baithe rahe। andar mein note rahega। agar likhne chaahte ho to phir diary rakhni pade। mool baat hai hi yeh। ham tamopradhaan se satopradhaan kaise banen! pavitra duniya ke maalik kaise banen! patit se paavan kaise banen! baap aakar yeh knowledge dete hain। gyaan ka saagar baap hi hai। tum abhi kehte ho baba ham aapke hain। sadaiv aapke hi hain, sirf bhoolkar deh-abhimaani ho gaye hain। abhi aapne bataaya hai to ham phir dehi-abhimaani bante hain। satayug mein ham dehi-abhimaani the। khushi se ek shareer chhod doosra lete the to tum bachchon ko yeh sab dhaarna kar phir samjhaane laayak banna hai, to bahuton ka kalyaan hoga। baba jaante hain drama anusaar nambarvaar purooshaartha anusaar serviceable ban rahe hain। achha, kisko jhaad aadi nahin samjha sakte ho, bhala yeh to sahaj hai na - kisko bhi bolo tum apne ko aatma samajh baap ko yaad karo। yeh to bilkul sahaj hai। yeh baap hi kehte hain mujhe yaad karo to vikarma vinaash honge aur koi manushya kah na sake sivaae tum braahmanon ke। aur koi na aatma ko, na paramatma baap ko jaante hain। aise hi sirf kah denge to kisko teer lagega nahin। bhagwan ka roop jaanna pade। yeh sab naatak ke actors hain। har ek aatma shareer ke saath act karti hai। ek shareer chhod doosra le phir part bajaati hai। woh actors kapde badli kar bhinna-bhinna part bajaate hain। tum phir shareer badalte ho। vo koi mel va female ki dress pahnenge alpakaal ke liye। yahaan mel ka chola liya to saari aayu mel hi rahenge। woh had ke drama, yeh hai behad ka। pahli-pahli mukhya baat hai baap kehte hain mujhe yaad karo। yog akshar bhi kaam mein nahin laao kyonki yog to anek prakaar ke seekhte hain। woh sab hain bhakti maarga ke। ab baap kehte hain mujhe yaad karo aur ghar ko yaad karo to tum ghar mein chale jaayenge। shivbaaba inmen aakar shiksha dete hain। baap ko yaad karte-karte tum paavan ban jaayenge phir pavitra aatma udegi। jitna-jitna yaad kiya hoga, service ki hogi utna woh oonch pad paayenge। yaad mein hi bahut vighna padte hain। paavan nahin banenge to phir dharmaraaj puri mein sajaayen bhi khaani padegi। ijjat bhi jaayegi, pad bhi bhrashta hoga। pichhaadi mein sab saakshaatkaar honge। parantu kuchh kar nahin sakenge। saakshaatkaar karaayenge tumko itna samjhaaya phir bhi yaad nahin kiya, paap rah gaye। ab khaao saza। us samay padhaai ka time nahin rehta। aphsos karenge hamne kya kiya! naahek time ganvaaya। parantu saza to khaani pade। kuchh ho thode hi sakega। naapaas hue to hue। phir padhne ki baat nahin। us padhaai mein to naapaas ho phir padhte hain, yeh to padhaai hi poori ho jaayegi। ant samay mein pashchaataap na karna pade uske liye baap raay dete hain - bachche, achhi reeti padh lo। jharmui-jhagmui mein apna time vesta mat karo। nahin to bahut pachhtaana padega। maaya bahut ulte kaam kara deti hai। chori kabhi nahin ki hogi, woh bhi karaayegi। peechhe smriti aayegi hamko to maaya ne dhokha de diya। pahle dil mein khyaal aata hai, phalaani cheez uthaaoon। buddhi to mili hai, yeh right hai va wrong hai। yeh cheez uthaaoon to wrong hoga, nahin uthaayenge to right hoga। ab kya karna hai? pavitra rehna to achha hai na। sang mein aakar loose nahin hona chaahiye। ham bhaai-behen hain phir naam-roop mein kyon phansen। deh-abhimaan mein nahin aana hai। parantu maaya badi jabardasta hai। maaya wrong kaam karaane ke sankalp laati hai। baap kehte hain tumko wrong kaam karna nahin hai। ladaai chalti hai phir gir padte hain, phir right buddhi aati hi nahin। hamko right kaam karna hai। andhon ki laathi banna hai। achhe te achha kaam hai yeh। shareer nirvaah ke liye samay to hai। raat ko neend bhi karni hai। aatma thak jaati hai to phir so jaati hai। shareer bhi so jaata hai। to shareer nirvaah ke liye, aaraam karne ke liye time to hai। baaki samay meri service mein lag jaao। yaad ka chart rakho। likhte bhi hain phir chalte-chalte fail ho jaate hain। baap ko yaad nahin karte, service nahin karte to wrong kaam hota rehta hai। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jharmui jhagmui mein apna time vesta nahin karna hai। maaya koi bhi ulta kaam na karaaye, yeh dhyaan rakhna hai। sangadosh mein aakar kabhi loose nahin hona hai। deh-abhimaan mein aakar kisi ke naam-roop mein nahin phansana hai।

2) ghar ki yaad ke saath-saath baap ko bhi yaad karna hai। yaad ke chart ki diary banaani hai। note karna hai - hamne saare din mein kya-kya kiya? kitna samay baap ki yaad mein rahe?

vardaan:- udaarchit ki visheshta dvaara sva aur sarva ka uddhaar karne vaale aadhaar aur uddhaarmoorta bhav

udaarchit arthaat sada har kaarya mein phraakhdil badi dil vaale। apne gun se doosre ko gunvaan banaane mein sahayogi banna, shakti va visheshta bharne mein sahayogi banna arthaat mahaadaani phraakhdil banna hi udaarchit aatma ki visheshta hai, aisi visheshta sampanna aatmaayen hi aadhaar aur uddhaarmoorta banne mein saphalta ka vardaan praapta karti hain kyonki seva ke aadhaar swaroop banna arthaat sva aur sarva ke uddhaar ke nimitta ban jaana।

slogan:- “aap aur baap” donon aisa combined raho jo teesra koi alag kar na sake।