Murli du jour du jeudi 7 mai 2020

07-05-2020 praatahmurli om shanti "baapdaada"' madhuban

“meethe bachche - shreemat hi tumko shreshtha banaane vaali hai, isliye shreemat ko bhoolo mat, apni mat ko chhod ek baap ki mat par chalo”

prashn:- punya aatma banne ki yukti kya hai?

uttar:- punya aatma banna hai to sachchi dil se, pyaar se ek baap ko yaad karo। 2. karmendriyon se koi bhi vikarma na karo। sabko raasta bataao। apni dil se poochho - yeh punya ham kitna karte hain? apni checking karo - aisa koi karma na ho jiski 100 guna saja khaani pade। to checking karne se punya aatma ban jaayenge।

om shanti। roohaani baap baith bachchon ko samjhaate hain, yeh to bachchon ko maaloom hai ki abhi ham shivbaaba ki mat par chal rahe hain। unki hai oonch te oonch mat। duniya yeh nahin jaanti ki oonch te oonch shivbaaba kaise bachchon ko shreshtha banaane ke liye shreshtha mat dete hain। is raavan raajya mein koi bhi manushya maatra, manushya ko shreshtha mat de nahin sakte। tum abhi eeshvareey mat vaale bante ho। is samay tum bachchon ko patit se paavan banne ke liye eeshvareey mat mil rahi hai। abhi tumko pata pada hai ham to vishwa ke maalik the। yeh (brahma) jo maalik tha unko bhi pata nahin tha। vishwa ke maalik phir ekdam patit ban jaate hain। yeh khel bahut achhi reeti buddhi se samajhne ka hai। right-wrong kya hai, ismen hai buddhi ki ladaai। saari duniya hai wrong। ek baap hi hai right, sach bolne vaala। woh tumko sachkhanda ka maalik banaate hain to unki mat leni chaahiye। apni mat par chalne se dhokha khaayenge। parantu woh hai gupta। hai bhi niraakaar। bahut bachche gaphlat karte hain, samajhte hain - yeh to daada ki mat hai। maaya shreshtha mat lene nahin deti hai। shreemat par chalna chaahiye na। baba aap jo kahenge woh ham maanenge zaroor। parantu kai maante nahin hain। nambarvaar purooshaartha anusaar mat par chalte hain baaki to apni mat chala lete hain। baba aaye hain shreshtha mat dene। aise baap ko ghadi-ghadi bhool jaate hain। maaya mat lene nahin deti। shreemat to bahut sahaj hai na। duniya mein koi ko yeh samajh nahin ki ham tamopradhaan hain। meri mat to mashhoor hai, shreemat bhagvat geeta। bhagwan abhi kehte hain main 5 hazaar varsha baad aata hoon, aakar bhaarat ko shreemat de shreshtha te shreshtha banaata hoon। baap to saavdhaan karte hain, bachche shreemat par nahin chalte। baap roz-roz samjhaate rehte hain - bachchon, shreemat par chalna bhoolo mat। in (brahma) ki to baat hi nahin। unki baat samjho। vahi in dvaara mat dete hain। vahi samjhaate hain। khaan-paan khaate nahin, kehte hain main abhokta hoon। tum bachchon ko shreemat deta hoon। number one mat dete hain mujhe yaad karo। koi bhi vikarma nahin karo। apne dil se poochho kitna paap kiya hai? yeh to jaante ho sabka paapon ka ghada bhara hua hai। is samay sabhi wrong raaste par hain। tumhein abhi baap dvaara right raasta mila hai। tumhaari buddhi mein saara gyaan hai। geeta mein jo gyaan hona chaahiye woh hai nahin। woh koi baap ki banaai hui nahin hai। yeh bhi bhakti maarga mein noondh hai। kehte bhi hain bhagwan aakar bhakti ka phal denge। bachchon ko samjhaaya hai - gyaan se sadgati। sadgati bhi sabki hoti hai, durgati bhi sabki hoti hai। yeh to duniya hi tamopradhaan hai। satopradhaan koi hai nahin। punarjanma lete-lete ab pichhaadi aakar hui hai। ab maut sabke sir par khada hai। bhaarat ki hi baat hai। geeta bhi hai devi-devta dharma ka shaastra। to tumhein doosre koi dharma mein jaane se kya faayda। har ek apni-apni kuraan, Bible aadi hi padhte hain। apne dharma ko jaante hain। ek bhaaratvaasi hi anya sab dharmon mein chale jaate hain। aur sab apne-apne dharma mein pakke hain। har ek dharma vaale ki shakla aadi alag hai। baap smriti dilaate hain - bachche, tum apne devi-devta dharma ko bhool gaye ho। tum svarga ke devta the, ham so ka arth bhaaratvaasiyon ko baap ne sunaaya hai। baaki ham aatma so paramatma nahin hain। yeh baaten to bhakti maarga ke guru logon ne banaai hain। guru bhi karodon honge। stri ko pati ke liye kehte hain ki yeh tumhaara guru eeshvar hai। jabki pati hi eeshvar hai phir he bhagwan, he raam kyon kehti ho। manushyon ki buddhi bilkul hi patthar ban gai hai। yeh khud bhi kehte ham bhi aise the। kahaan baikuntha ka maalik shreekrishna, kahaan phir unko gaanv ka chhora kah diya hai। shyaam-sundar kehte hain। arth thode hi samajhte। abhi baap ne tumko samjhaaya hai jo number one sundar vahi number last tamopradhaan shyaam bana hai। tum samajhte ho ham sundar the phir shyaam bane hain, 84 ka chakra lagaae abhi shyaam se sundar banne ke liye baap ek hi davaai dete hain ki mujhe yaad karo। tumhaari aatma patit se paavan ban jaayegi। tumhaare janma-janmaantar ke paap naash ho jaayenge।

tum jaante ho jab se raavan aaya hai tum girte-girte paap aatma bane ho। yeh hai hi paap aatmaon ki duniya। ek bhi sundar nahin। baap bigar sundar koi bana na sake। tum aaye ho svargavaasi sundar banne। abhi narkavaasi shyaam hain kyonki kaam chita par chadh kaale bane hain। baap kehte hain kaam mahaashatru hai। in par jo jeet paayenge vahi jagat jeet banenge। number one hai kaam। unko hi patit kaha jaata hai। krodhi ko patit nahin kahenge। bulaate bhi hain ki aakar patit se paavan banaao। to ab baap aaye hain kehte hain yeh antim janma paavan bano। jaise raat ke baad din, din ke baad raat hoti hai, vaise sangamayug ke baad phir satayug aana hai। chakra phirna hai। baaki aur koi aakaash mein athva paataal mein duniya nahin hai। srishti to yahi hai। satayug, treta… yahaan hi hai। jhaad bhi ek hi hai, aur koi ho nahin sakta। yeh sab gapode hain jo kehte hain anek duniyaayen hain। baap kehte hain yeh sab hain bhakti maarga ki baaten। ab baap satya baat sunaate hain। ab apne andar dekho - ham kahaan tak shreemat par chal satopradhaan arthaat punya aatma ban rahe hain? satopradhaan ko punya aatma, tamopradhaan ko paap aatma kaha jaata hai। vikaar mein jaana paap hai। baap kehte hain ab pavitra bano। mere bane ho to meri shreemat par chalna hai। mukhya baat hai koi paap nahin karo। number one paap hai vikaar mein jaana। phir aur bhi paap bahut hote hain। chori chakaari, thagi aadi bahut karte hain। phir bahuton ko government pakadti bhi hai। ab baap bachchon ko kehte hain tum apne dil se poochho - ham koi paap to nahin karte hain? aise mat samjho - hamne chori ki va rishvat khaai to yeh baba to jaani-jaananhaar hai, sab jaante hain। nahin, jaani-jaananhaar ka arth koi yeh nahin hai। achha, koi ne chori ki, baap jaanenge phir kya? jo chori ki uska danda sau guna ho hi jaayega। bahut-bahut saza khaayenge। pad bhi bhrashta ho jaayega। baap samjhaate hain aise agar kaam karenge to danda bhogna padega। koi eeshvar ka bachcha bankar phir chori karta, shivbaaba jisse itna varsa milta hai, unke bhandaare se chori karta, yeh to bahut bada paap hai। koi-koi mein chori ki aadat hoti hai, unko jel bird kaha jaata hai। yeh hai eeshvar ka ghar। sab kuchh eeshvar ka hai na। eeshvar ke ghar mein aate hain baap se varsa lene। parantu koi-koi ki aadat ho jaati hai, uski saja sauguna ban jaati hai। sazaayen bhi bahut milengi aur phir janma by janma dirty ghar mein jaae janma lenge, to apna hi nuksaan kiya na। aise bahut hain jo yaad mein bilkul nahin rehte, sunte kuchh nahin। buddhi mein chori aadi ke hi khyaalaat chalte rehte hain। aise bahut satsang mein jaate hain। chappal chori kar lete, unka dhandha hi yeh rehta hai। jahaan satsang hota vahaan jaakar chappal chori kar aayenge। duniya bilkul hi dirty hai। yeh hai eeshvar ka ghar। chori ki aadat to bahut kharaab hai। kaha jaata hai - kakh ka chor so lakh ka chor। apne andar se poochhna chaahiye - ham kitna punya aatma bane hain? kitna baap ko yaad karte hain? kitna ham svadarshan chakradhaari bante hain? kitna samay eeshvareey service mein rehte hain? kitne paap katte ja rahe hain? apna potaamel roz dekho। kitna punya kiya, kitna yog mein raha? kitne ko raasta bataaya? dhandha aadi to bhal karo। tum karmayogi ho। karma to bhal karo। baba yeh badges banaate rehte hain। achhe-achhe logon ko is par samjhaao। is mahaabhaarat ladaai dvaara hi svarga ke gates khul rahe hain। krishna ke chitra mein neeche likhat badi first class hai। parantu bachche abhi itna vishaal buddhi nahin hue hain। thoda hi dhan milta hai to naachne lag padte hain। koi ko jaasti dhan hota hai to samajhte hain hamaare jaisa koi nahin hoga। jin bachchon ko baap ki parvaah nahin, unhein baap jo itna avinaashi gyaan ratnon ka khazaana dete hain uski bhi kadar nahin rehti hai। baba ek baat kahega, woh doosri baat kar lete। parvaah na hone ke kaaran bahut paap karte rehte hain। shreemat par chalte nahin। phir gir padte hain। baap kahenge yeh bhi drama। unki takdeer mein nahin hai। baba to jaante hain na। bahut paap karte hain, agar nishchay ho ki baap hamko padhaate hain to khushi rahni chaahiye। tum jaante ho ham bhavishya nai duniya mein prince-princess banenge, to kitni khushi rahni chaahiye। parantu bachche to abhi tak bhi murjhaate rehte hain। woh avastha thaharti nahin hai।

baba ne samjhaaya hai - vinaash ke liye rehearsal bhi hogi। calamities bhi hongi। bhaarat ko kamzor karte jaayenge। baap khud kehte hain - yeh sab hona hi hai। nahin to vinaash kaise hoga। barpha ki barsaat padegi phir kheti aadi ka kya haal hoga। laakhon marte rehte hain, koi batlaate thode hi hain। to baap mukhya baat samjhaate hain ki aise apne andar jaanch karo, main kitna baap ko yaad karta hoon। baba, aap to bade meethe ho, kamaal hai aapki। aapka farmaan hai mujhe yaad karo to 21 janma ke liye kabhi rogi nahin banenge। apne ko aatma samajh baap ko yaad karo to main guarantee karta hoon, sammukh baap tumko kehte hain tum phir auron ko sunaate ho। baap kehte hain mujh baap ko yaad karo, bahut pyaar karo। tumko kitna sahaj raasta bataata hoon - patit se paavan hone ka। koi kehte hain ham to bahut paap aatma hain। achha phir aise paap nahin karo, mujhe yaad karte raho to janma-janmaantar ke jo paap hain, woh is yaad se bhasma hote jaayenge। yaad ki hi mukhya baat hai। inko kaha jaata hai sahaj yaad, yog akshar bhi nikaal do। sannyaasiyon ke hathayog to kisma-kisma ke hain। anek prakaar se sikhlaate hain। is baba ne guru to bahut kiye hain na। abhi behad ka baap kehte hain - in sabko chhodo। in sabka bhi mujhe uddhaar karna hai। aur koi ki taakat nahin jo aise kah sake। baap ne hi kaha hai - main in saadhuon ka bhi uddhaar karta hoon। phir yeh guru kaise ban sakte। to mool ek baat baap samjhaate hain - apni dil se poochho, ham koi paap to nahin karte hain। kisko duhkh to nahin dete hain? ismen koi takleeph nahin hai। andar jaanch karni chaahiye, saare din mein kitna paap kiya? kitna yaad kiya? yaad se hi paap bhasma honge। koshish karni chaahiye। yeh bahut mehnat ka kaam hai। gyaan dene vaala ek hi baap hai। baap hi mukti-jeevanmukti ka raasta batlaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap jo avinaashi gyaan ratnon ka khazaana dete hain uska kadar karna hai। beparvaah ban paap karma nahin karne hain। agar nishchay hai bhagwan hamko padhaate hain to apaar khushi mein rehna hai।

2) eeshvar ke ghar mein kabhi chori aadi karne ka khyaal na aaye। yeh aadat bahut gandi hai। kaha jaata kakh ka chor so lakh ka chor। apne andar se poochhna hai - ham kitna punya aatma bane hain?

vardaan:- purooshaartha aur seva mein vidhipoorvak vriddhi ko praapta karne vaale teevra purooshaarthi bhav

brahman arthaat vidhipoorvak jeevan। koi bhi kaarya saphal tab hota hai jab vidhi se kiya jaata hai। agar kisi bhi baat mein svayan ke purooshaartha ya seva mein vriddhi nahin hoti hai to zaroor koi vidhi ki kami hai isliye check karo ki amritvele se raat tak mansa-vaacha-karmana va samparka vidhipoorvak raha arthaat vriddhi hui? agar nahin to kaaran ko sochkar nivaaran karo phir dilshikasta nahin honge। agar vidhi poorvak jeevan hai to vriddhi avashya hogi aur teevra purooshaarthi ban jaayenge।

slogan:- svachchhata aur satyata mein sampanna banna hi sachchi pavitrata hai।