Murli du jour du mercredi 27 mai 2020

27-05-2020 praatahmurli om shanti "baapdaada"' madhuban

“meethe bachche - nishchay gyaan yog se baithta, saakshaatkaar se nahin। saakshaatkaar ki drama mein noondh hai, baaki usse kisi ka kalyaan nahin hota”

prashn:- baap kaun-si taakat nahin dikhaate lekin baap ke paas jaadoogri avashya hai?

uttar:- manushya samajhte hain bhagwan to taakatmand hai, woh mare hue ko bhi jinda kar sakte hain, parantu baba kehte yeh taakat main nahin dikhaata। baaki koi naudha bhakti karte hain to unhein saakshaatkaar kara deta hoon। yeh bhi drama mein noondh hai। saakshaatkaar karaane ki jaadoogri baap ke paas hai isliye kai bachchon ko ghar baithe bhi brahma va shreekrishna ka saakshaatkaar ho jaata hai।

geet:- kaun aaya mere man ke dvaare…

om shanti। yeh bachchon ke anubhav ka geet hai। satsang to bahut hain, khaas bhaarat mein to dher satsang hain, anek mat-mataantar hain, vaastav mein woh koi satsang nahin। satsang ek hota hai। baaki tum vahaan kisi vidvaan, aachaarya, pandit ka munh dekhenge, buddhi us taraph jaayegi। yahaan phir anokhi baat hai। yeh satsang ek hi baar is sangamayug par hota hai। yeh to bilkul nai baat hai, us behad ke baap ka shareer to koi hai nahin। kehte hain main tumhaara niraakaar shivbaaba hoon। tum aur satsangon mein jaate ho to shareeron ko hi dekhte ho। shaastra yaad kar phir sunaate hain, anek prakaar ke shaastra hain, woh to tum janma-janmaantar sunte aaye ho। ab hai nai baat। buddhi se aatma jaanti hai, baap kehte hain - he mere sikeeldhe bachche, he mere saaligraamon! tum bachche jaante ho 5 hazaar varsha pahle is shareer dvaara baba ne padhaaya tha। tumhaari buddhi ekdam door chali jaati hai। to baba aaya hai। baba akshar kitna meetha hai। woh hai maat-pita। koi bhi sunenge to kahenge pata nahin inhon ke maat-pita kaun hain? barobar woh saakshaatkaar karaate hain to usmein bhi woh moonjhate hain। kabhi brahma ko, kabhi krishna ko dekh lete hain। to vichaar karte rehte ki ye kya hai? brahma ka bhi bahuton ko ghar baithe saakshaatkaar hota hai। ab brahma ki to kabhi koi pooja karte nahin hain। krishna aadi ki to karte hain। brahma ko to koi jaante bhi nahin honge। prajaapita brahma to ab aaya hai, yeh hai prajaapita। baap baith samjhaate hain ki saari duniya patit hai to zaroor yeh bhi bahut janmon ke ant mein patit thahre। koi bhi paavan nahin hai isliye kumbha ke mele par, haridvaar ganga saagar ke mele par jaate hain, samajhte hain snaan karne se paavan ban jaayenge। lekin yeh nadiyaan koi patit-paavni thode hi ho sakti। nadiyaan to nikalti hain saagar se। vaastav mein tum ho gyaan gangaayen, mahatva tumhaara hai। tum gyaan gangaayen jahaan tahaan nikalti ho, vo log phir dikhlaate hain, teer maara aur ganga nikli। teer maarne ki to baat nahin। yeh gyaan gangaayen desh-deshaantar jaati hain।

shivbaaba kehte main drama ke bandhan mein baandha hua hoon। sabhi ka part nishchit kiya hua hai। mera bhi part nishchit hai। koi samajhte bhagwan to bahut taakatmand hai, mare hue ko bhi jinda kar sakte hain। yeh sabhi gapode hain। main aata hoon padhaane ke liye। baaki taakat kya dikhaayenge। saakshaatkaar ki bhi jaadoogri hai। naudha bhakti karte hain to main saakshaatkaar karaata hoon। jaise kaali ka roop dikhlaate hain, un par phir tel chadhaate hain। ab aisi kaali to hai nahin, parantu kaali ki naudha bhakti bahut karte hain। vaastav mein kaali to jagat amba hai। kaali ka aisa roop to nahin, parantu naudha bhakti karne se baba bhaavna ka bhaada de dete hain। kaam chita par baithne se kaale bane, ab gyaan chita par baith gore bante hain। jo kaali ab jagdamba bani hai woh saakshaatkaar kaise karaayegi। woh to abhi bahut janmon ke ant ke bhi ant vaale janma mein hai। devtaayen to abhi hain nahin। to woh kya saakshaatkaar karaayenge। baap samjhaate hain yeh saakshaatkaar ki chaabi mere haath mein hai। alpakaal ke liye bhaavna poori karne ke liye saakshaatkaar kara deta hoon। parantu woh koi mere se nahin milte। misaal ek kaali ka dete hain। is reeti bahut hain - hanumaan, ganesh aadi। bhal sikkha log bhi guroonaanak ki bahut bhakti karen to unhein bhi saakshaatkaar ho jaayega। parantu woh to neeche chale aate hain। baba bachchon ko dikhlaate hain dekho yeh guroonaanak ki bhakti kar rahe hain। saakshaatkaar phir bhi main karaata hoon। woh kaise saakshaatkaar karaayenge। unke paas saakshaatkaar karaane ki chaabi nahin hai। yeh baba kehte hain mujhe vinaash, sthaapna ka saakshaatkaar bhi us baba ne karaaya, parantu saakshaatkaar se koi ka bhi kalyaan nahin। aise to bahuton ko saakshaatkaar hote the। aaj woh hain nahin। bahut bachche kehte hain hamko jab saakshaatkaar ho to nishchay baithe। parantu nishchay saakshaatkaar se nahin ho sakta। nishchay baithta hai gyaan aur yog se। 5 hazaar varsha pahle bhi mainne kaha tha ki yeh saakshaatkaar main karaata hoon। meera ne bhi saakshaatkaar kiya। aise nahin ki aatma vahaan chali gai। nahin, baithe-baithe saakshaatkaar kar lete hain lekin mere ko nahin praapta kar sakte।

baap kehte hain koi bhi baat ka sanshay ho to jo bhi braahmaniyaan (teachers) hain, unse poochho। yeh to jaante ho bachchiyaan bhi nambarvaar hain, nadiyaan bhi nambarvaar hoti hain। koi to talaav bhi hain, bahut ganda, baansi paani hota hai। vahaan bhi shraddhaabhaav se manushya jaate hain। woh hai bhakti ki andhashraddha। kabhi bhi koi se bhakti chhudaani nahin hai। jab gyaan mein aa jaayenge to bhakti aapehi chhoot jaayegi। baba bhi naaraayan ka bhakta tha, chitra mein dekha lakshmi daasi ban naaraayan ke paanv daba rahi hai to yeh bilkul achha nahin laga। satayug mein aisa hota nahin। to mainne ek artist ko kaha ki lakshmi ko is daaseepne se vidaai de do। baba bhakta to tha parantu gyaan thode hi tha। bhakta to sabhi hain। ham to baba ke bachche maalik hain। brahmaanda ka bhi maalik bachchon ko banaate hain। kehte hain tumko raajya-bhaagya deta hoon। aisa baba kabhi dekha? us baap ko poora yaad karna hai। unko tum in aankhon se nahin dekh sakte। unse yog lagaana hai। yaad aur gyaan bhi bilkul sahaj hai। beej aur jhaad ko jaanna hai। tum us niraakaari jhaad se saakaari jhaad mein aaye ho। baba ne saakshaatkaar ka raaz bhi samjhaaya। jhaad ka raaz bhi samjhaaya। karma-akarma-vikarma ki gati bhi baba ne samjhaai hai। baap, teacher, guru teenon se hi shiksha milti hai। abhi baba kehte hain main tumko aisi shiksha deta hoon, aise karma sikhlaata hoon jo tum 21 janma sada sukhi ban jaate ho। teacher shiksha dete hain na। guru log bhi pavitrata ki shiksha dete hain athva kathaayen sunaate hain। parantu dhaarna bilkul nahin hoti। yahaan to baap kehte hain ant mati so gati hogi। manushya jab marte hain to bhi kehte hain raam-raam kaho to buddhi us taraph chali jaati hai। abhi baap kehte hain tumhaara saakaar se yog chhoota। ab main tumko bahut achhe karma sikhlaata hoon। shri krishna ka chitra dekho, puraani duniya ko laat maarte aur nai duniya mein aate hain। tum bhi puraani duniya ko laat maar nai duniya mein jaate ho। to tumhaari narka ke taraph hai laat, svarga taraph hai munh। shamshaan mein bhi andar jab ghuste hain to murde ka munh us taraph kar lete hain। laat pichhaadi taraph kar lete hain। to yeh chitra bhi aisa banaaya hai।

mama, baba aur tum bachche, tumko to mama-baba ko follow karna pade, jo unki gaddi par baitho। raaja ke bachche prince-princess kahlaate hain na। tum jaante ho ham bhavishya mein prince-princess bante hain। aisa koi baap-teacher-guru hoga jo tumko aise karma sikhlaaye! tum sadaakaal ke liye sukhi bante ho। yeh shivbaaba ka var hai, woh aasheervaad karte hain। yeh nahin, hamaare oopar unki kripa hai। sirf kahne se kuchh nahin hoga। tumko seekhna hota hai। sirf aasheervaad se tum nahin ban jaayenge। uski mat par chalna hai। gyaan aur yog ki dhaarna karni hai। baap samjhaate hain ki mukh se raam-raam kehna bhi aavaaz ho jaata। tumko to vaani se pare jaana hai। chup rehna hai। khel bhi bahut achhe-achhe nikalte hain। anapdhe ko buddhu kaha jaata hai। baba kehte hain ki ab sabhi ko bhool kar tum bilkul buddhu ban jaao। main jo tumko mat deta hoon us par chalo। paramdham mein tum sabhi aatmaayen bina shareer ke rehti ho phir yahaan aakar shareer leti ho tab jeev aatma kaha jaata hai। aatma kehti hai main ek shareer chhod doosra leti hoon। to baap kehte main tumko first class karma sikhlaata hoon। teacher padhaate hain, ismen taakat ki kya baat hai। saakshaatkaar karaate hain, isko jaadoogri kaha jaata hai। manushya se devta banaana, aisi jaadoogri koi kar na sake। baba saudaagar bhi hai, puraana lekar naya dete hain। inko puraana lohe ka bartan kaha jaata hai। inka koi moolya nahin hai। aajkal dekho taambe ke bhi paise nahin bante। vahaan to sone ke sikke hote hain। wonder hai na। kya se kya ho gaya hai!

baap kehte hain main tumko number one karma sikhlaata hoon। manamnaabhav ho jaao। phir hai padhaai jisse svarga ka prince banenge। abhi devta dharma jo praayahlop ho gaya hai, woh phir se sthaapan hota hai। manushya tumhaari nai baaten sunkar wonder khaate hain, kehte hain ki stri-puroosh donon hi ikatthe rah pavitra rah saken - yeh kaise ho sakta! baba to kehte bhal ikatthe raho, nahin to maaloom kaise pade। beech mein gyaan talvaar rakhni hai, itni bahaaduri dikhaani hai। pareeksha hoti hai। to manushya in baaton mein wonder khaate hain kyonki shaastron mein to aisi baaten hain nahin। yahaan to practical mein mehnat karni padti hai। gandharvi vivaah ki baat yahaan ki hai। abhi tum pavitra bante ho। to baba kehte bahaaduri dikhlaao। sannyaasiyon ke aage saboot dena hai। samartha baba hi saari duniya ko paavan banaate hain। baap kehte hain bhal saath mein raho sirf nangan nahin hona hai। yeh sabhi hain yuktiyaan। badi jabardasta praapti hai sirf ek janma baba ke direction par pavitra rehna hai। yog aur gyaan se ever healthy bante hain 21 janmon ke liye, ismen mehnat hai na। tum ho shakti sena। maaya par jeet pahan jagatjeet bante ho। sabhi thode hi banenge। jo bachche purooshaartha karenge vahi oonch pad paayenge। tum bhaarat ko hi pavitra banaakar phir bhaarat par hi raajya karte ho। ladaai se kabhi srishti ki baadshaahi mil na sake। yeh wonder hai na। is samay sab aapas mein ladkar khalaas ho jaate hain। makkhan bhaarat ko milta hai। dilaane vaali hain vande maatram। majority maataaon ki hai। ab baba kehte hain janma-janmaantar tum guru karte aaye, shaastra padhte aaye ho। ab ham tumko samjhaate hain - judge your self, right kya hai? satayug hai righteous duniya। maaya unrighteous banaati hai। ab bhaaratvaasi, irreligious ban pade hain। religion nahin isliye might nahin rahi hai। irreligious, unrighteous, unlawful, insolvent ban pade hain। behad ka baap hai isliye behad ki baaten samjhaate hain, kehte hain ki phir tumko religious most powerful banaata hoon। svarga banaana to powerful ka kaam hai। parantu hai gupta। incognito warriors hain। baap ka bachchon par bahut pyaar hota hai। mat dete hain। baap ki mat, teacher ki mat, guru ki mat, sonaar ki mat, dhobi ki mat - ismen sabhi maten aa jaati hain। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is ek antim janma mein baap ke direction par chal ghar grihastha mein rehte pavitra rehna hai। ismen bahaaduri dikhaani hai।

2) shreemat par sada shreshtha karma karne hain। vaani se pare jaana hai, jo kuchh padha va suna hai use bhool baap ko yaad karna hai।

vardaan:- shubh chintan dvaara gyaan saagar mein samaane vaale ateendriy sukh ke anubhvi bhav

jaise saagar ke andar rahne vaale jeev jantu saagar mein samaaye hue hote hain, baahar nahin nikalna chaahte, machhli bhi paani ke andar rehti hai, saagar va paani hi uska sansaar hai। aise aap bachche bhi shubh chintan dvaara gyaan saagar baap mein sada samaaye raho, jab tak saagar mein samaane ka anubhav nahin kiya tab tak ateendriy sukh ke jhoole mein jhoolne ka, sada harshit rahne ka anubhav nahin kar sakenge। iske liye svayan ko ekaantavaasi banaao arthaat sarva aakarshan ke vibration se antarmukhi bano।

slogan:- apne chehre ko aisa chalta phirta museum banaao jismen baap bindu dikhaai de।