Murli du jour du vendredi 29 mai 2020

29-05-2020 praatahmurli om shanti "baapdaada"' madhuban

“meethe bachche - tumhein nasha rehna chaahiye ki jis shiv ki sabhi pooja karte hain, woh abhi hamaara baap bana hai, ham unke sammukh baithe hain”

prashn:- manushya bhagwan se kshama kyon maangate hain? kya unhein kshama milti hai?

uttar:- manushya samajhte hain hamne jo paap karma kiye hain uski saza bhagwan dharmaraaj se dilaayenge, isliye kshama maangate hain। lekin unhein apne karmon ki saza karmabhog ke roop mein bhogni hi padti, bhagwan unhein koi davaai nahin deta। garbhajel mein bhi sazaayen bhogni hai, saakshaatkaar hota hai ki tumne yeh-yeh kiya hai। eeshvareey direction par nahin chale ho isliye yeh saza hai।

geet:- toone raat ganvaai…

om shanti। yeh kisne kaha? roohaani baap ne kaha। woh hai oonch te oonch। sabhi manushyon se bhi, sabhi aatmaon se bhi oonch। sabmen aatma hi hai na। shareer to part bajaane ke liye mila hai। abhi tum dekhte ho sannyaasiyon aadi ke shareer ka bhi kitna maan hota hai। apne gurooon aadi ki kitni mahima karte hain। yeh behad ka baap to gupta hai। tum bachche samajhte ho shivbaaba oonch te oonch hai, unse oonch koi hai nahin। dharmaraaj bhi unke saath hai kyonki bhakti-maarga mein kshama maangate hain - he bhagwan kshama karna। ab bhagwan kya karenge! yahaan government to jel mein daalegi। woh dharma-raaj garbhajel mein danda dete hain। bhogna bhi bhogni padti hai, jisko karmabhog kaha jaata hai। abhi tum jaante ho karmabhog kaun bhogte hain? kya hota hai? kehte hain - he prabhu kshama karo। duhkh haro, sukh do। ab bhagwan koi davaai karte hain kya? woh to kuchh kar na sake। tab bhagwan ko kyon kehte hain? kyonki bhagwan ke saath phir dharmaraaj bhi hai। bura kaam karne se zaroor bhogna padta hai। garbhajel mein saza bhi milti hai। saakshaatkaar sab hote hain। bigar saakshaatkaar saza nahin milti। garbhajel mein to koi davaai aadi nahin hai। vahaan saza bhogni padti hai। jab duhkhi hote hain tab kehte hain bhagwan is jel se nikaalo।

abhi tum bachche kiske saamne baithe ho? oonch te oonch baap hai, parantu hai gupta। aur sabhi ke to shareer dekhne mein aate hain, yahaan shivbaaba ko to apna haath-paanv aadi hai nahin। phool aadi bhi kaun lenge? inke haath se hi lena hoga, agar chaahen to। parantu koi se bhi lete nahin। jaise woh shankaraachaarya kehte hain hamko koi chhue nahin। to baap kehte hain ham patiton ka kuchh bhi kaise lenge। hamko phool aadi ki darkaar nahin। bhakti maarga mein somnaath aadi ke mandir bante hain, phool chadhaate hain। parantu mujhe to shareer hai nahin। aatma ko koi chhuyega kaise! kehte hain ham patiton se phool kaise leven! koi haath bhi nahin laga sakte। patiton ko chhoone bhi na den। aaj ‘baba' kehte kal phir jaakar narkavaasi bante hain। aise ko to dekhen bhi nahin। baap kehte hain - main to oonch te oonch hoon। in sab sannyaasiyon aadi ka bhi drama anusaar uddhaar karna hai। mujhe koi jaanta hi nahin। shiv ki pooja karte hain parantu unko jaante thode hi hain ki yeh geeta ka bhagwan hai aur yahaan aakar gyaan dete hain। geeta mein krishna ka naam daal diya hai। krishna ne gyaan diya baaki shiv kya karte honge! to manushya samajhte hain woh aate hi nahin। are, patit-paavan krishna ko thode hi kahenge। patit-paavan to mujhe kehte hain na। tumhaare mein bhi koi thode hain jo itna regard rakh sakte hain। rehte kitna saadhaaran hain, samjhaate bhi hain - main in saadhuon aadi sabka baap hoon। jo bhi shankaraachaarya aadi hain, in sabki aatmaon ka main baap hoon। shareeron ke baap jo hain woh to hain hi, main hoon sabhi aatmaon ka baap। meri sab pooja karte hain। abhi woh yahaan sammukh baithe hain। parantu sabhi samajhte thode hi hain ki ham kiske saamne baithe hain।

aatmaayen janma-janmaantar se deh-abhimaan par hiri hui hain isliye baap ko yaad nahin kar sakte। deh ko hi dekhte hain। dehi-abhimaani hon to us baap ko yaad karen aur baap ki shreemat par chalen। baap kehte hain mujhe jaanne ke liye sab purushaarthi hain। ant mein poore dehi-abhimaani banne vaale hi paas honge। baaki sabmen zara-zara deh-abhimaan rahega। baap to hai gupta। unko kuchh bhi de nahin sakte। bachchiyaan shiv ke mandir mein bhi jaakar samjha sakti hain। kumaariyon ne hi shivbaaba ka parichay diya hai। hain to kumaar-kumaariyaan donon zaroor। kumaaron ne bhi parichay diya hoga। maataaon ko khaas uthaate hain kyonki unhonne purooshon se jaasti service ki hai। to bachchon ko service ka shauk hona chaahiye। jaise us padhaai ka bhi shauk hota hai na। woh hai jismaani, yeh hai roohaani। jismaani padhaai padhenge, yeh drill aadi seekhenge, milega kuchh bhi nahin। samjho, abhi kisko bachcha janmata hai to dhoomdhaam se unki chhathi aadi manaate hain, parantu woh paayenge kya! itna samay hi nahin jo kuchh pa sake। yahaan se bhi jaakar janma lete hain parantu woh bhi samjhenge to kuchh nahin। yahaan ka bichhuda hua hoga to jo seekhkar gaya hoga usi anusaar chhotepan mein hi shivbaaba ko yaad karta hoga। yeh to mantra hai na। chhote bachchon ko sikhlaayenge, woh bindu aadi to kuchh samjhega nahin। sirf shivbaaba-shivbaaba kehte rahenge। shivbaaba ko yaad karo to svarga ka varsa paayenge। aise unko samjhaayenge to woh bhi svarga mein aa jaayenge। parantu oonch pad nahin pa sakenge। aise bahut bachche aate hain, shivbaaba-shivbaaba kehte rehte hain। phir ant mati so gati ho jaayegi। yeh raajdhaani sthaapan ho rahi hai। ab manushya shiv ki pooja karte hain, parantu jaante thode hi hain jaise chhota bachcha shiv-shiv kehte hain, samajhte nahin। yahaan bhi pooja karte hain parantu pahchaan kuchh bhi hai nahin। to unko batlaana chaahiye, tum jiski pooja karte ho vahi gyaan ka saagar, geeta ka bhagwan hai। woh hamko padha rahe hain। is duniya mein aur koi manushya nahin jo kah sake ki shivbaaba hamko raajayog padha rahe hain। yeh sirf tum jaante ho so bhi bhool jaate ho। bhagvaanuvaach main tumko raajayog sikhaata hoon। kisne kaha - bhagvaanuvaach, kaam mahaashatru hai, is par jeet pahno। puraani duniya ka sannyaas karo। tum hathayogi had ke sannyaasi ho। woh hai shankaraachaarya, yeh hai shivaachaarya। woh hamko sikhlaate hain। krishna aachaarya nahin kah sakte। woh to chhota bachcha hai। satayug mein gyaan ki darkaar nahin rehti hai।

jahaan-jahaan shiv ke mandir hain, vahaan tum bachche bahut achhi seva kar sakte ho। shiv ke mandiron mein jaao, maataaon ka jaana achha hai, kanyaayen jaayen to usse achha hai। abhi to hamko baba se raajya-bhaagya lena hai। baap hamko padhaate hain phir ham mahaaraaja-mahaaraani banenge। oonch te oonch baap hi hai, aisi shiksha koi manushya de na sake। yeh hai hi kaliyug। satayug mein tha inka raajya। yeh raaja-raani kaise banen, kisne raajayog sikhlaaya, jo satayug ke maalik banen? jiski tum pooja karte ho woh hamko padhaakar satayug ka maalik banaate hain। brahma dvaara sthaapna, vishnu dvaara paalna..... patit pravritti maarga vaale hi paavan pravritti maarga mein jaate hain। kehte bhi hain baba ham patiton ko paavan banaao। paavan banaakar yeh devta banaao। woh hai pravritti maarga। nivriti maarga vaalon ka guru banna hi nahin hai। jo pavitra bante hain unke guru ban sakte hain। aise bahut companion bhi hote hain, vikaar ke liye shaadi nahin karte hain। to tum bachche aisi-aisi service kar sakte ho। andar mein shauk hona chaahiye। ham baba ke sapoot bachche ban kyon na jaakar service karenge। puraani duniya ka vinaash saamne khada hai। ab shivbaaba kehte hain krishna to ho na sake। woh to ek hi baar satayug mein hoga। doosre janma mein vahi features vahi naam thode hi hoga। 84 janma mein 84 features। krishna yeh gyaan kisko sikhla na sake। woh krishna kaise yahaan aayenge। abhi tum in baaton ko samajhte ho। aadhaakalpa achhe janma hote hain phir raavan raajya shuru hota hai। manushya hoobhu jaise jaanvar misal ban jaate hain। ek-do mein ladte-jhagadte rehte hain। to raavan ka janma hua na। baaki 84 laakh janma to hain nahin। itni variety hai। janma thode hi itne lete hain। to yeh baap baith samjhaate hain। woh hai oonch te oonch bhagwan। woh padhaate hain, next mein phir yeh bhi to hai na। nahi padhenge to kisi ke paas jaakar daas-daasiyaan banenge। kya shivbaaba ke paas daas-daasi banenge? baap to samjhaate hain padhte nahin ho to jaakar satayug mein daas-daasiyaan banenge। jo kuchh bhi service nahin karte, khaaya-piya aur soya woh kya banenge! buddhi mein aata to hai na kya banenge! ham to mahaaraaja banenge। hamaare saamne bhi nahin aayenge। khud bhi samajhte hain - aise ham banenge। parantu phir bhi sharma kahaan hai। ham apni unnati kar kuchh pa leven, samajhte hi nahin। tab baba kehte hain aise mat samjho yeh brahma kehte hain, hamesha shivbaaba ke liye samjho। shivbaaba ka to regard rakhna hai na। unke saath phir dharmaraaj bhi hai। nahin to dharmaraaj ke dande bhi bahut khaayenge। kumaariyon ko to bahut hoshiyaar hona chaahiye। aise thode hi yahaan suna, baahar gaye to khalaas। bhakti maarga ki kitni saamagri hai। ab baap kehte hain vish chhodo। svargavaasi bano। aise-aise slogan banaao। bahaadur sherniyaan bano। behad ka baap mila hai phir kya parvaah। government dharma ko hi nahin maanti hai to woh phir manushya se devta banne kaise aayenge। woh kehte hain ham koi bhi dharma ko nahin maante। sabko ham ek samajhte hain phir ladte-jhagadte kyon hain? jhooth to jhooth sach ki ratti bhi nahin hai। pahle-pahle eeshvar sarvavyaapi se hi jhooth shuru hoti hai। hindu dharma to koi hai nahin। Christian ka apna dharma chala aata hai। woh apne ko badalte nahin hain। yeh ek hi dharma hai jo apne dharma ko badal hindu kah dete hain aur phir naam kaise-kaise rakhte, shri shri phalaane...... abhi shri arthaat shreshtha hain kahaan। shreemat bhi kisi ki nahin। yeh to unhon ki iron aged mat hai। unko shreemat kaise kah sakte hain। abhi tum kumaariyaan khadi ho jaao to koi ko bhi samjha sakti ho। parantu yogayukta achhi hoshiyaar bachchiyaan chaahiye। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni unnati karne ke liye baap ki service mein tatpar rehna hai। sirf khaana, peena, sona, yeh pad ganvaana hai।

2) baap ka aur padhaai ka regard rakhna hai। dehi-abhimaani banne ka poora-poora purushaartha karna hai। baap ki shikshaaon ko dhaaran kar sapoot bachcha banna hai।

vardaan:- svayan ko vishwa seva prati arpit kar maaya ko daasi banaane vaale sahaj sampanna bhav

ab apna samay, sarva praaptiyaan, gyaan, gun aur shaktiyaan vishwa ki seva arth samarpit karo। jo sankalp uthta hai check karo ki vishwa seva prati hai। aise seva prati arpan hone se svayan sahaj sampanna ho jaayenge। seva ki lagan mein chhote bade papers ya pareekshaayen svatah samarpan ho jaayengi। phir maaya se ghabraayenge nahin, sada vijayi banne ki khushi mein naachte rahenge। maaya ko apni daasi anubhav karenge। svayan seva mein surrender honge to maaya svatah surrender ho jaayegi।

slogan:- antarmukhta se mukh ko banda kar do to krodh samaapta ho jaayega।