Murli du jour du mercredi 3 juin 2020

03-06-2020 praatahmurli om shanti "baapdaada"' madhuban

“meethe bachche - tumhein shreemat par sabko sukh dena hai, tumko shreshtha mat milti hai shreshtha bankar doosron ko banaane ke liye''

prashn:- merciful bachchon ke dil mein kaun-si lahar aati hai? unhein kya karna chaahiye?

uttar:- jo merciful bachche hain unki dil hoti hai-ham gaanv-gaanv mein jaakar service karen। aajkal bichaare bahut duhkhi hain, unko jaakar khushkhabri sunaayen ki vishwa mein pavitrata, sukh aur shanti ka daivi svaraajya sthaapan ho raha hai, yeh vahi mahaabhaarat ladaai hai, barobar us samay baap bhi tha, abhi bhi baap aaya hua hai।

om shanti। meethe-meethe bachche yahaan baithe ho to yeh zaroor samajhte ho ki ham hain eeshvareey santaan। zaroor apne ko aatma hi samjhenge। shareer hai tab un dvaara aatma sunti hai। baap ne yeh shareer loan par liya hai, tab sunaate hain। abhi tum samajhte ho ham hain eeshvareey santaan va sampradaay phir ham daivi sampradaay banenge। svarga ke maalik hote hi hain devtaayen। ham phir se 5 hazaar varsha pahle muaaphiphak daivi svaraajya ki sthaapna kar rahe hain। phir ham devta ban jaayenge। is samay saari duniya, bhaarat khaas aur duniya aam, sab manushya maatra ek-do ko duhkh hi dete hain। unhon ko yeh bhi pata nahin hai ki sukhdhaam bhi hota hai। parampita paramatma hi aakar sabko sukhi-shant bana dete hain। yahaan to ghar-ghar mein ek-do ko duhkh hi dete hain। saare vishwa mein duhkh hi duhkh hai। abhi tum bachche jaante ho baap hamko 21 janmon ke liye sada sukhi banaate hain। kab se duhkh shuru hua hai phir kab poora hota hai, yeh aur koi ki buddhi mein chintan nahin hoga। tumko hi yeh buddhi mein hai ki ham barobar eeshvareey sampradaay the, yoon to saari duniya ke manushya maatra eeshvareey sampradaay hain। har ek unko father kah bulaate hain। ab bachche jaante hain shivbaaba hamko shreemat de rahe hain। shreemat mashhoor hai। oonch te oonch bhagwan ki oonch te oonch mat hai। gaaya bhi jaata hai unki gat-mat nyaari। shivbaaba ki shreemat hamko kya se kya banaati hai! svarga ka maalik। aur jo bhi manushya maatra hain woh to narka ka maalik hi banaate hain। abhi tum ho sangam par। yeh to nishchay hai na। nishchaybuddhi hi yahaan aate hain aur samajhte hain baba hamko phir se sukhdhaam ka maalik banaate hain। ham hi 100 pratishat pavitra grihastha maarga vaale the। yeh smriti aai hai। 84 janmon ka bhi hisaab hai na। kaun-kaun kitne janma lete hain। jo dharma baad mein aate hain, unhon ke janma bhi thode hote hain।

tum bachchon ko ab yeh nishchay rakhna hai, ham eeshvareey aulaad hain। hamko shreshtha mat milti hai, sabko shreshtha banaane ke liye। hamaara vahi baba hamko raajayog sikhlaata hai। manushya samajhte hain ki ved-shaastra aadi sab bhagwan se milne ke raaste hain aur bhagwan kehte hain-inse koi bhi mere saath milta nahin hai। main hi aata hoon, tab to meri jayanti bhi manaate hain, parantu kab aur kiske shareer mein aata hoon, yeh koi nahin jaante। sivaae tum braahmanon ke। abhi tum bachchon ko sabko sukh dena hai। duniya mein sab ek-do ko duhkh dete hain। vo log yeh nahin samajhte ki vikaar mein jaana duhkh dena hai। abhi tum jaante ho yeh mahaan duhkh hai। kumaari jo pavitra thi unko apvitra banaate hain। narkavaasi banne ke liye kitna ceremony karte hain। yahaan to aise hangaamen ki koi baat hi nahin। tum bada shanti se baithe ho। sab khush hote hain, saare vishwa ko sada sukhi banaate hain। tumhaara maan shiv shaktiyon ke roop mein hai। tumhaare aage lakshmi-naaraayan ka to kuchh bhi maan nahin। shiv shaktiyon ka hi naam baala hai kyonki jaise baap ne service ki hai, sabko pavitra banaakar sada sukhi banaaya hai, aise tum bhi baap ke madadgaar bane ho, isliye tum shaktiyaan bhaarat maataaon ki mahima hai। yeh lakshmi-naaraayan to raaja-raani aur praja sab svargavaasi hain। woh badi baat hai kya! jaise woh svargavaasi hain vaise yahaan ke raaja-raani sab narkavaasi hain। aise narkavaasiyon ko svargavaasi tum banaate ho। manushya to kuchh bhi nahin jaante hain। bilkul hi tuchchha buddhi hain। kya-kya karte rehte hain। kitni ladaaiyaan aadi hain। har baat mein duhkhi hi duhkhi hain। satayug mein har haalat mein sukh hi sukh hai। abhi sabko sukh dene ke liye hi baba shreshtha mat dete hain। gaate bhi hain shreemat bhagvaanuvaach। shreemat manushya vaach nahin hai। satayug mein devtaaon ko mat dene ki darkaar hi nahin। yahaan tumko shreemat milti hai। baap ke saath tum bhi gaaye jaate ho shivshaktiyaan। abhi phir se woh part practical mein baj raha hai। ab baap kehte hain tum bachchon ko mansa, vaacha, karmana sabko sukh dena hai। sabko sukhdhaam ka raasta bataana hai। tumhaara dhandha hi yeh hua। shareer nirvaah arth purushon ko dhandha bhi karna hota hai। kehte hain shaam ke samay devtaayen paraama par nikalte hain, ab devtaayen yahaan kahaan se aaye। parantu is samay ko shuddh kehte hain। is time par sabko phursat bhi milti hai। tum bachchon ko chalte, phirte, uthte, baithte yaad karna hai। bas koi dehdhaari ki chaakri aadi nahin karni hai। baap ka to gaayan hai draupdi ke paanv dabaaye। iska bhi arth nahin samajhte hain। sthool mein paanv dabaane ki baat nahin hai। baba ke paas budhiyaan aadi bahut aati hain, jaante hain bhakti karte-karte thak gai hain। aadhaakalpa bahut dhakke khaaye hain na। to yeh pair dabaane ke akshar ko utha liya hai। ab krishna paanv kaise dabaayenge। shobhega? tum krishna ko paanv dabaane dengi? krishna ko dekhte hi unko chatak padengi। unmein to bahut chamatkaar rehta hai। krishna ke sivaae aur koi baat buddhi mein baithti hi nahin। vahi sabse tejomay hai। krishna bachche ne phir murli chalaai, baat hi nahin janchati। yahaan tum shivbaaba se kaise milenge? tum bachchon ko bolna padta hai, shivbaaba ko yaad kar phir inke paas aao। tum bachchon ko to andar mein khushi rahni chaahiye hamko shivbaaba sukhi banaate hain - 21 janmon ke liye। aise baap ke pichhaadi to kurbaan jaana chaahiye। koi sapoot bachche hote hain to baap kurbaan jaate hain। baap ki har kaamna poori karte hain। koi to aise bachche hote hain jo baap ka khoon bhi kara dete hain। yahaan to tumko most beloved banna hai। kisi ko bhi duhkh nahin dena hain। jo merciful bachche hain unki dil hoti hai ham gaanv-gaanv mein jaakar service karen। aajkal bichaare bahut duhkhi hain। unko jaakar khushkhabri sunaao ki vishwa mein pavitrata, sukh, shanti ka daivi svaraajya sthaapan ho raha hai, yeh vahi mahaabhaarat ladaai hai। barobar us samay baap bhi tha। abhi bhi baap aaya hua hai। tum jaante ho baba hamko purushottam bana rahe hain। yeh hai hi purushottam sangamayug। tum bachche jaante ho-ham purushottam kaise bante hain। tumse poochhte hain tumhaara uddeshya kya hai? bolo, manushya se devta banna। devtaayen to mashhoor hain। baap kehte hain jo devtaaon ke bhakta hon unko samjhaao। bhakti bhi pahle-pahle tumne shuru ki shiv ki phir devtaaon ki। to pahle-pahle shivbaaba ke bhakton ko samjhaana hai। bolo shivbaaba kehte hain mujhe yaad karo। shiv ki pooja karte hain parantu yeh thode hi buddhi mein aata hai ki patit-paavan baap hai। bhakti maarga mein dekho dhakke kitne khaate hain। shivling to ghar mein bhi rakh sakte hain। unki pooja kar sakte hain phir amarnaath, badreenaath aadi taraph jaane ki kya darkaar hai। parantu bhakti maarga mein manushyon ko dhakke zaroor khaane hain। tumko unse chhudaate hain। tum ho shiv shakti, shiv ke bachche। tum baap se shakti lete ho। woh bhi milegi yaad se। vikarma vinaash honge। patit-paavan to baap hai na। yaad se hi tum vikarmaajeet paavan bante ho। sabko yeh raasta bataana hai। tum abhi raam ke bane ho। raamraajya mein hai sukh, raavan raajya mein hai duhkh। bhaarat mein hi sabke chitra hain, jinki itni pooja hoti hai। dher ke dher mandir hain। koi hanoomaan ka pujaari, koi kiska! inko kaha jaata hai blind faith। abhi tum jaante ho ham bhi blind the। inko bhi maaloom nahin tha-brahma, vishnu, shankar kaun hain, kya hain। jo poojya the vahi phir pujaari bane। satayug mein hain poojya, yahaan hain pujaari। baap kitna achhi reeti samjhaate hain। tum jaante ho poojya hote hi hain satayug mein। yahaan hain pujaari to pooja hi karte hain। tum ho shivshaktiyaan। abhi tum na pujaari, na poojya ho। baap ko bhool mat jaao। yeh saadhaaran tan hai na। ismen oonch te oonch bhagwan aate hain। tum baap ko apne paas nimantran dete ho na। baba aao, ham bahut patit ban gaye hain। puraani patit duniya, patit shareer mein aakar hamko paavan banaao। bachche nimantran dete hain। yahaan to koi paavan hai hi nahin। zaroor sabhi patiton ko paavan banaakar le jaayenge na। to sabko shareer chhodna pade na। manushya shareer chhodte hain to kitna haay dosh machaate hain। tum khushi se jaate ho। abhi tumhaari aatma race karti hain dekhen kaun shivbaaba ko jaasti yaad karte hain। shivbaaba ki yaad mein rehte-rehte hi shareer chhoot jaae to aho saubhaagya। beda hi paar। sabhi ko baap kehte hain aise purushaartha karo। sannyaasi bhi koi-koi aise hote hain। brahm mein leen hone ke liye abhyaas karte hain। phir pichhaadi mein aise baithe-baithe shareer chhod dete hain। sannaata ho jaata hai।

sukh ke din phir aayenge। iske liye hi tum purushaartha karte ho baba ham aapke paas chalen। aapko hi yaad karte-karte jab hamaari aatma pavitra ho jaayegi to aap hamko saath le jaayenge। aage jab kaashi kalvat khaate the to bahut prem se khaate the, bas ham mukta ho jaayenge। aise samajhte the। abhi tum baap ko yaad karte chale jaate ho shantidham। tum baap ko yaad karte ho to is yaad ke bal se paap katte hain, woh samajhte hain hamaare phir paani se paap kat jaayenge। mukti mil jaayegi। ab baap samjhaate hain woh koi yogbal nahin hai। paapon ki saza khaate-khaate phir jaakar janma lete hain, naye sir phir paapon ka khaata shuru hota hai। karma, akarma, vikarma ki gati baap baith samjhaate hain। raamraajya mein karma akarma hote hain, raavan raajya mein karma vikarma ho jaate hai। vahaan koi vikaar aadi hota nahin।

meethe-meethe phool bachche jaante hain baap hamko sab yuktiyaan, sab raaz samjhaate hain। mukhya baat yeh hai ki baap ko yaad karo। patit-paavan baap tumhaare saamne baithe hain, kitna nirmaan hai। koi ahankaar nahin, bilkul saadhaaran chalte rehte hain। baapdaada donon hi bachchon ke servant hain। tumhaare do servant hain oonch te oonch shivbaaba phir prajaapita brahma। vo log trimoorti brahma kah dete hain। arth thode hi jaante hain। trimoorti brahma kya karte hain, kuchh bhi pata nahin hai। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada yeh nishchay rahe ki ham eeshvareey aulaad hain, humein shreshtha mat par chalna hai। kisi ko bhi duhkh nahin dena hai। sabko sukh ka raasta bataana hai।

2) sapoot bachcha ban baap par kurbaan jaana hai, baap ki har kaamna poori karni hai। jaise baapdaada nirmaan aur nirhankaari hai, aise baap samaan banna hai।

vardaan:- kalyaankaari baap aur samay ka har second laabh uthaane vaale nishchaybuddhi, nishchitan bhav

jo bhi drishya chal raha hai use trikaaldarshi bankar dekho, himmat aur hullaas mein rah svayan bhi samartha aatma bano aur vishwa ko bhi samartha banaao। svayan ke toofaanon mein hilo mat, achal bano। jo samay mila hai, saath mila hai, anek prakaar ke khajaane mil rahe hain unse sampattivaan aur samartheevaan bano। saare kalpa mein aise din phir aane vaale nahin hain isliye apni sab chintaayen baap ko dekar nishchaybuddhi ban sada nishchitan raho, kalyaankaari baap aur samay ka har second laabh uthaao।

slogan:- baap ke sang ka rang lagaao to buraaeeyaan svatah samaapta ho jaayengi।