Murli du jour du vendredi 19 juin 2020

19-06-2020 praatahmurli om shanti "baapdaada"' madhuban

“meethe bachche - abhi tumhein ninda-stuti, maan-apmaan, duhkh-sukh sab kuchh sahan karna hai tumhaare sukh ke din abhi sameep aa rahe hain''

prashn:- baap apne brahman bachchon ko kaun-si ek warning dete hain?

uttar:- bachche kabhi bhi baap se roothna nahin। agar baap se roothenge to sadgati se bhi rooth jaayenge। baap warning dete hain-roothne vaalon ko badi kadi saza milegi। aapas mein ya braahmani se bhi roothe to phool bante-bante kaanta ban jaayenge, isliye bahut-bahut khabardaar raho।

geet:- dheeraj dhar manuva…

om shanti। meethe-meethe sikeeldhe bachchon ne geet suna, tum bachchon ke jo bhi janma-janmaantar ke duhkh hain sab door ho jaane chaahiye। is geet ki line suni, tum jaante ho abhi hamaara duhkh ka part poora hota hai aur sukh ka part shuru hota hai। jo poori reeti nahin jaante hain woh kisi na kisi baat mein duhkh zaroor dekhte hain। yahaan baba ke paas aane se bhi koi na koi prakaar ka duhkh bhaasega। baba samajh sakte hain, bahut bachchon ko takleeph hoti hogi। jab teertha yaatra par jaate hain to kahaan bheed hoti hai, barsaat pad jaati hai, kabhi toofaan lag padte hain। jo sachche bhagat honge woh to kahenge kya harja hai, bhagwan ke paas jaate hain। bhagwan samajh kar hi yaatra par jaate hain। dher ke dher bhagwan hain manushyon ke। to jo achhe majboot hote hain, woh to kehte hain harja nahin, achhe kaam mein hamesha vighna padte hain, vaapis lautkar thode hi jaayenge। koi-koi to laut bhi jaate hain। kabhi vighna padte hain, kabhi nahin bhi padte hain। baap kehte hain bachche yeh bhi tumhaari yaatra hai। tum kahenge ham behad ke baap paas jaate hain, woh baap sabke duhkh harne vaala hai। yeh nishchay hai, aajkal dekho madhuban mein kitni bheed hai, baba ko ona rehta hai, bahuton ko takleeph bhi hoti hogi। pat mein sona padta hai। baba thode hi chaahta hai bachchon ko pat mein sulaayen। parantu drama anusaar bheed ho gai hai, kalpa pahle bhi hui thi phir hogi, ismen koi duhkh nahin hona chaahiye। yeh bhi jaante hain padhne vaale koi to raaja banenge koi phir rank bhi banenge। koi ka ooncha martaba, koi ka kam। parantu sukh zaroor hoga। yeh bhi baba jaante hain, koi bahut kachche hain, jo kuchh bhi sahan nahin kar sakte hain। unhon ko kuchh takleeph hogi, kahenge ham to naahek aaye ya kahenge hamko braahmani jor karke le aai hai। aise bhi honge jo kahenge hamko braahmani ne naahek phansaaya। poori pahchaan nahin ki vishwa vidyaalay mein aaye hain। is samay ki padhaai se koi to raav banenge। koi rank bhi banne vaale hain bhavishya mein। yahaan ke rank aur raav mein aur vahaan ke rank, raav mein raat-din ka farka hota hai। yahaan ke raav bhi duhkhi hain to rank bhi duhkhi hain। vahaan donon sukhi rehte hain। yahaan to hai hi patit vikaari duniya। bhal kiske paas bahut dhan hai, baap samjhaate hain yeh dhan maal sab mitti mein mil jaana hai। yeh shareer bhi khatma ho jaayega। aatma to mitti mein nahin milti, kitne bade-bade saahookaar hain, bidla jaise, parantu unko kya pata ki ab yeh puraani duniya badal rahi hai। maaloom hota to phat se aa jaate। kehte yahaan bhagwan aaya hua hai phir bhi jaayenge kahaan? sivaae baap ke koi ko sadgati mil na sake। agar koi rooth gaya to kahenge sadgati se rooth gaya। aise bahut roothte rahenge, girte rahenge। aashcharyavat sunanti, nishchay hovanti....... koi to samajhte hain barobar in bigar koi raasta hai nahin। inse to sukh aur shanti ka varsa milega। in bigar sukh-shanti milna asambhav hai। jab dhan bahut ho tab to sukh mile। dhan mein hi sukh hota hai na। vahaan (mool vatan mein) to aatmaayen shanti mein baithi hain। koi kahe hamaara part nahin hota to sadaiv ham vahaan rehte, parantu aise kahne se thode hi hoga। bachchon ko samjhaaya gaya hai-yeh bana-banaaya khel hai। bahut hain jo kisi na kisi sanshay mein aakar chhod jaate hain। braahmani se rooth jaate hain ya aapas mein roothkar padhaai chhod dete hain।

abhi tum yahaan phool banne ke liye aaye ho। mahsoos karte ho-barobar ham kaante se phool ban rahe hain। phool zaroor banna hai। koi ko kuchh sanshay hai, phalaana yeh karte hain, yeh aise hain, isliye ham nahin aayenge। bas roothkar jaae ghar mein baith jaate hain। baap kehte hain aur sabse to bhal rootho lekin ek baap se kabhi nahin roothna। baba warning dete hain, sazaayen bahut kadi hain। garbha mein bhi jo sazaayen milti hain, sab saakshaatkaar karaate hain। bigar saakshaatkaar ke saza mil nahin sakti। yahaan ka bhi saakshaatkaar hoga। tumne padhte-padhte aapas mein lad-jhagadkar, roothkar padhaai chhod di thi। tum bachche samajhte ho hamko father se padhna hai। padhaai kabhi chhodni nahin hai। tum yahaan padhte hi ho manushya se devta banne। aise oonch te oonch baap ke paas tum milne aate ho। kabhi jaasti aa jaate hain, drama anusaar kuchh takleeph ho padti hai। bachchon ko anek toofaan aate hain। phalaani cheez na mili, yeh nahin mila, yeh to kuchh bhi nahin hai। jab maut ka samay aayega to agyaani manushya kahenge hamne kya gunaah kiya hai, naahek jo humein maarte hain। us pichhaadi ke part ko hi kaha jaata hai khoone naahek part। achaanak bombs girenge। dher ke dher marenge। yeh khoone naahek hua na। agyaani manushya aise chillaayenge। tum bachche to bahut khush hote ho, kyonki tum jaante ho is duniya ka vinaash hona hi hai, anek dharmon ka vinaash na ho to ek sat dharma ki sthaapna kaise hogi। satayug mein ek aadi sanaatan devi-devta dharma tha। kisko kya pata satayug aadi mein kya tha। yeh hai purooshottam sangamayug। baap aaye hi hain sabko purooshottam banaane। sabka baap hai na। drama ko to tum jaan gaye ho। sab to satayug mein nahin aayenge। itni karodon aatmaayen satayug mein thode hi aayengi। yeh hain detail ki baaten। bahut bachchiyaan hain jo kuchh bhi samajhti nahin। bhakti maarga ke hire hue hain। gyaan buddhi mein baith na sake। bhakti ki aadat padi hui hai। kehte hain bhagwan kya nahin kar sakta। mare hue ko jinda kar sakte hain। baba ke paas aate hain, kehte hain phalaane manushya ne mare hue ko jagaaya to kya bhagwan nahin kar sakta hai। koi ne achha kaam kiya to bas uski mahima karne lag padte hain। phir unke hazaaron followers ban jaayenge। tumhaare paas to bahut thode aate hain। bhagwan padhaate hain phir itne thode kyon? aise bahut kehte hain। are, yahaan to marna hota hai। vahaan to kanras hai। bade bhabhke se baith geeta sunaate hain, bhagat log sunte hain। yahaan kanras ki baat nahin। tumko sirf kaha jaata hai baap ko yaad karo। geeta mein bhi yeh akshar hain manamnaabhav। baap ko yaad karo to vikarma vinaash honge। baap kehte hain achha braahmani se va centre se rooth jaate ho, achha yeh to kaam karo aur sang tod apne ko aatma samjho, ek baap ko yaad karo। baap hi patit-paavan hai। bas baap ko yaad karte raho। svadarshan chakra phiraate raho। itna yaad kiya to bhi svarga mein zaroor aayenge। svarga mein oonch pad to purooshaartha ke anusaar hi milega। praja banaani pade। nahin to raajaai kis par karenge। jo bahut mehnat karte hain, oonch pad bhi vahi paayenge। oonch pad ke liye hi kitna maatha maarte hain। purooshaartha bigar koi rah nahin sakta। tum bachche jaante ho oonch te oonch patit-paavan baap hai। manushya mahima bhal gaate hain parantu arth nahin samajhte hain। bhaarat kitna saahookaar tha, bhaarat hai svarga, wonder oph world। woh 7 wonders maaya ke। saare drama mein oonch te oonch hai svarga, neeche te neech hai narka। abhi tum baap ke paas aaye ho, jaante ho meetha baba itna oonch te oonch le jaate hain। unko kaun bhoolenge। bhal kahaan bhi baahar jaao sirf ek baat yaad rakho, baap ko yaad karo। baap hi shreemat dete hain - bhagvaanuvaach, na ki brahma bhagvaanuvaach।

behad ka baap bachchon se poochhte hain - bachche, ham tumko itna saahookaar banaakar gaye phir tumhaari durgati kaise hui? parantu sunte aise hain jaise kuchh bhi samajhte nahin। to bachchon ko thodi takleeph hoti hai, duhkh-sukh, stuti-ninda bhi sab sahan karna padta hai। yahaan ke manushya dekho kaise hain prime minister ko bhi patthar maarne mein deri nahin karte hain। kehte hain-school ke bachchon ka new blood hai। bahut mahima karte hain unki। samajhte hain yeh future ka new blood hai। parantu vahi student duhkh dene vaale nikal padte hain। college ko aag laga dete hain। ek-do ko gaali dete rehte hain। baap samjhaate hain duniya ka kya haal hai। drama ka actor hokar bhi drama ke aadi-madhya-ant aur mukhya actors aadi ko nahin jaante hain to unhein kya kahen! bade te bada kaun hai uski biography to jaanni chaahiye na। kuchh bhi nahin jaante। brahma-vishnu-shankar ka kya part hai, dharma sthaapkon ka kya part hai। manushya to andhashraddha mein aakar sabko preceptor kah dete hain। guru to woh jo sadgati karta hai। ab sarva ka sadgati daata to ek hi parampita paramatma hai। woh param guru bhi hai, phir knowledge bhi dete hain। tum bachchon ko padhaate bhi hain, unka part hi wonderful hai। dharma bhi sthaapan karte hain aur sabhi dharmon ko khalaas bhi karte hain। aur to sirf dharma sthaapan karte hain, sthaapna aur vinaash karne vaale ko hi guru kahenge na। baap kehte hain main kaalon ka kaal hoon। ek dharma ki sthaapna aur baaki sabhi dharmon ka vinaash ho jaayega arthaat is gyaan yagya mein svaaha ho jaayenge। phir na koi ladaai lagegi, na yagya racha jaayega। tum saare vishwa ke aadi-madhya-ant ko jaante ho। aur to sabhi neti-neti kehte hain। tum aise thode hi kahenge। baap bigar aur koi samjha na sake। to tum bachchon ko badi khushi honi chaahiye parantu maaya ka saamna aisa hota hai jo yaad hi mita deti hai। tum bachchon ko duhkh-sukh, maan-apmaan, sahan karna hai। yoon to yahaan koi apmaan kiya nahin jaata। agar koi bhi baat hai to baap ko report karni chaahiye। report nahin karte to bada paap lagta hai। baap ko sunaane se jhat unko saavdhaani milegi। is surgeon se chhipaana nahin chaahiye। bada bhaari surgeon hai। gyaan injection, inko anjan bhi kehte hain। anjan ko gyaan-surma bhi kaha jaata hai। jaadu aadi ki to baat hi nahin hai। baap kehte hain main aaya hoon tumko patit se paavan hone ki yukti bataane। pavitra nahin banenge to dhaarna bhi nahin hogi। isi kaam ke kaaran hi phir paap hote hain। in par jeet paani hai। khud hi vikaar mein jaata hoga to doosre koi ko kah nahin sakenge। woh to mahaapaap ho jaae। baap kahaani bhi sunaate hain-pandit ne kaha raam-raam kahne se saagar paar ho jaayenge। manushya samajhte hain paani ka saagar। jaise aakaash ka ant nahin vaise saagar ka bhi ant nahin pa sakte hain। brahm mahtatva ka bhi ant nahin। yahaan manushya ant paane ka purooshaartha karte hain, vahaan koi purooshaartha nahin karte। yahaan kitna bhi door jaate hain phir laut aate hain। petrol hi nahin hoga to aayenge kaise? yeh hai science vaalon ka ati ahankaar, usse vinaash kar dete hain। aeroplane se sukh bhi hai phir unse ati duhkh bhi hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi kaaran se padhaai nahin chhodni hai। sazaayen bahut kadi hain unse bachne ke liye aur sab sang tod ek baap ko yaad karna hai। roothna nahin hai।

2) gyaan injection va anjan dene vaala ek baap hai, us avinaashi surgeon se koi baat chhipaani nahin hai। baap ko sunaane se jhat saavdhaani mil jaayegi।

vardaan:- har ek ki visheshta ko smriti mein rakhte hue faithful ban ekmat sangathan banaane vaale sarva ke shubhchintak bhav

drama anusaar har ek ko koi na koi visheshta avashya praapta hai, us visheshta ko kaarya mein lagaao tatha auron ki visheshta ko dekho। ek do mein faithful raho to unki baaton ka bhaav badal jaayega। jab har ek ki visheshta ko dekhenge to anek hote bhi ek dikhaai denge। ekmat sangathan ho jaayega। koi kiske glaani ki baat sunaaye to use teka dene ke bajaae sunaane vaale ka roop parivartan kar do, tab kahenge shubhchintak।

slogan:- shreshtha sankalp ka khajaana hi shreshtha praalabdha va brahman jeevan ka aadhaar hai।