Murli du jour du dimanche 28 juin 2020

28-06-20 praatahmurli om shanti ''avyakt-baapdaada'' revise 18-02-86 madhuban

nirantar sevaadhaari tatha nirantar yogi bano

aaj gyaan saagar baap apni gyaan gangaaon ko dekh rahe hain। gyaan saagar se nikli hui gyaan gangaayen kaise aur kahaan-kahaan se paavan karte hue is samay saagar aur ganga ka milan mana raheen hain। yeh ganga saagar ka mela hai, jis mele mein chaaron or ki gangaayen pahunch gai। baapdaada bhi gyaan gangaaon ko dekh harshit hote hain। har ek ganga ke andar yeh dridh nishchay aur nasha hai ki patit duniya ko, patit aatmaon ko paavan banaana hi hai। isi nishchay aur nashe se har ek seva ke kshetra mein aage badhte ja rahe hain। man mein yahi umang hai ki jaldi se jaldi parivartan ka kaarya sampanna ho। sabhi gyaan gangaayen gyaan saagar baap samaan vishwa-kalyaani, vardaani aur mahaadaani merciful aatmaayen hain isliye aatmaon ki duhkh, ashaanti ki aavaaj anubhav kar aatmaon ke duhkh ashaanti ko parivartan karne ki seva teevragti se karne ka umang badhta rehta hai। duhkhi aatmaon ke dil ki pukaar sunkar raham aata hai na। sneh uthta hai ki sabhi sukhi ban jaaen। sukh ki kirnen, shanti ki kirnen, shakti ki kirnen vishwa ko dene ke nimitta bane hue ho। aaj aadi se ab tak gyaan gangaaon ki seva kahaan tak parivartan karne ke nimitta bani hai, yeh dekh rahe the। abhi bhi thode samay mein anek aatmaon ki seva karni hai। 50 varshon ke andar desh-videsh mein seva ka foundation to achha daala hai। sevaasthaan chaaron or sthaapan kiye hain। aavaaj phailaane ke saadhan bhinna-bhinna roop se apnaaye hain। yeh bhi theek hi kiya hai। desh-videsh mein bikhre hue bachchon ka sangathan bhi bana hai aur banta rahega। abhi aur kya karna hai? kyonki abhi vidhi bhi jaan gaye ho। saadhan bhi anek prakaar ke ikatthe karte ja rahe ho aur kiye bhi hain। sva-sthiti, sva-unnati uske prati bhi attention de rahe hain aur dila rahe hain। ab baaki kya raha hai? jaise aadi mein sabhi aadi ratnon ne umang-utsaah se tan-man-dhan, samay-sambandh, din-raat baap ke havaale arthaat baap ke aage samarpan kiya, jis samarpan ke umang-utsaah ke phalasvaroop seva mein shaktishaali sthiti ka pratyaksha roop dekha। jab seva ka aarambha kiya to seva ke aarambha mein aur sthaapna ke aarambha mein, donon samay yeh visheshta dekhi। aadi mein brahma baap ko chalte-phirte saadhaaran dekhte the va krishna roop mein dekhte the? saadhaaran roop mein dekhte bhi nahin dikhaai deta tha, yeh anubhav hai na! daada hai yeh sochte the? chalte-phirte krishna hi anubhav karte the। aise kiya na? aadi mein brahma baap mein yeh visheshta dekhi, anubhav ki aur seva ki aadi mein jab bhi jahaan bhi gaye, sabne deviyaan hi anubhav kiya। deviyaan aai hain, yahi sabke bol sunte, yahi sabhi ke mukh se nikalta ki yeh alaukik vyaktiyaan hain। aise hi anubhav kiya na? yeh deviyon ki bhaavna sabhi ko aakarshit kar seva ki vriddhi ke nimitta bani। to aadi mein bhi nyaare-pan ki visheshta rahi। seva ki aadi mein bhi nyaarepan ki, devi pan ki visheshta rahi। abhi ant mein vahi jhalak aur phalak pratyaksha roop mein anubhav karenge, tab pratyakshata ke nagaade bajenge। abhi raha hua thoda-sa samay nirantar yogi, nirantar sevaadhaari, nirantar saakshaatkaar swaroop, nirantar yogi, nirantar saakshaat baap - is vidhi se siddhi praapta karenge। golden jubilee manaai arthaat golden duniya ke saakshaatkaar swaroop tak pahunche। jaise golden jubilee manaane ke drishya mein saakshaat deviyaan anubhav kiya, baithne vaalon ne bhi, dekhne vaalon ne bhi। chalte-phirte ab yahi anubhav seva mein karaate rehna। yeh hai golden jubilee manaana। sabhi ne golden jubilee manaai ya dekhi? kya kahenge? aap sabki bhi golden jubilee hui na। ya koi ki silver hui, koi ki taambe ki hui? sabhi ki golden jubilee hui। golden jubilee manaana arthaat nirantar golden sthiti vaala banna। abhi chalte phirte isi anubhav mein chalo ki main pharishta so devta hoon। doosron ko bhi aapke is samartha smriti se aapka pharishta roop va devi-devta roop hi dikhaai dega। golden jubilee manaai arthaat abhi samay ko, sankalp ko, seva mein arpan karo। abhi yeh samarpan samaaroh manaao। sva ki chhoti-chhoti baaton ke peechhe, tan ke peechhe, man ke peechhe, saadhnon ke peechhe, sambandh nibhaane ke peechhe samay aur sankalp nahin lagaao। seva mein lagaana arthaat sva unnati ki gift svatah hi praapta hona। abhi apne prati samay lagaane ka samay parivartan karo। shvaans jaise bhakta log shvaans-shvaans mein naam japne ka prayatna karte hain। aise shvaans-shvaans seva ki lagan ho। seva mein magan ho। vidhaata bano vardaata bano। nirantar mahaadaani bano। 4 ghante ke 6 ghante ke sevaadhaari nahin abhi vishwa kalyaankaari stage par ho। har ghadi vishwa kalyaan prati samarpit karo। vishwa kalyaan mein sva kalyaan svatah hi samaaya hua hai। jab sankalp aur second seva me busy rahenge, phursat nahin hogi, maaya ko bhi aapke paas aane ki phursat nahin hogi। samasyaayen samaadhaan ke roop mein parivartan ho jaayengi। samaadhaan swaroop shreshtha aatmaon ke paas samasya aane ki himmat nahin rakh sakti। jaise shuru mein seva mein dekha devi roop, shakti roop ke kaaran aaye hue patit drishti vaale bhi parivartit ho paavan banne ke jigyaasu ban jaate। jaise patit parivartan ho aapke saamne aaye, aise samasya aapke saamne aate samaadhaan ke roop me parivartit ho jaae। abhi apne sanskaar parivartan mein samay nahin lagaao। vishwa kalyaan ki shreshtha bhaavna se shreshtha kaamna ke sanskaar emerge karo। is shreshtha sanskaar parivartan mein samay nahin ganvaao। is shreshtha sanskaar ke aage had ke sanskaar svatah hi samaapta ho jaayenge। ab yuddha mein samay nahin ganvaao। vijayeepan ke sanskaar emerge karo। dushman vijayi sanskaaron ke aage svatah hi bhasma ho jaayega, iseelie kaha tan-man-dhan nirantar seva mein samarpit karo। chaahe mansa karo, chaahe vaacha karo, chaahe karmana karo lekin seva ke sivaae aur koi samasyaaon mein nahin chalo। daan do vardaan do to sva ka grahan svatah hi samaapta ho jaayega। avinaashi langar lagaao kyonki samay kam hai aur seva aatmaon ki, vaayumandal ki, prakriti ki, bhoot pret aatmaon ki, sabki karni hai। un bhatakti hui aatmaon ko bhi thikaana dena hai। muktidhaam mein to bhejenge na! unhon ko ghar to denge na! to abhi kitni seva karni hai। kitni sankhya hai aatmaon ki! har aatma ko mukti va jeevanmukti deni hi hai। sab kuchh seva mein lagaao to shreshtha meva khoob khaao। mehnat ka meva nahin khaao। seva ka meva, mehnat se chhudaane vaala hai।

baapdaada ne result mein dekha bahut karke jo purooshaartha mein apne prati sanskaar parivartan ke prati samay dete hain। chaahe 50 varsha ho gaye hain, chaahe ek maas hua hai lekin aadi se ab tak parivartan karne ka sanskaar mool roop mein vahi hota hai, ek hi hota hai। aur vahi mool sanskaar bhinna-bhinna roop mein samasya bankar aata hai। maano drishtaanta ke roop mein kiska buddhi ke abhimaan ka sanskaar hai, kisi ka ghrina bhaav ka sanskaar hai, va kisi ka dilshikasta hone ka sanskaar hai। sanskaar vahi aadi se ab tak bhinna-bhinna samay par emerge hota rehta hai। chaahe 50 varsha laga hai, chaahe ek varsha laga hai। is kaaran us mool sanskaar ko jo samay prati samay bhinna-bhinna roop mein samasya ban karke aata hai, usmein samay bhi bahut lagaaya hai, shakti bhi bahut lagaai hai। ab shaktishaali sanskaar daata, vidhaata, vardaata ka emerge karo। to yeh mahaasanskaar kamjor sanskaar ko svatah samaapta kar dega। abhi sanskaar ko maarne mein samay nahin lagaao। lekin seva ke phal se, phal ki shakti se svatah hi mar jaayega। jaise anubhav bhi hai ki achhi sthiti se jab seva mein busy rehte ho to seva ki khushi se us samay tak samasyaayen svatah hi dab jaati hain kyonki samasyaaon ko sochne ki phursat hi nahin। har second, har sankalp seva mein busy rahenge to samasyaaon ka langar uth jaayega, kinaara ho jaayega। aap auron ko raasta dikhaane ke, baap ka khajaana dene ke nimitta sahaara bano to kamjoriyon ka kinaara svatah hi ho jaayega। samjha - abhi kya karna hai? abhi behad ka socho, behad ke kaarya ko socho। chaahe drishti se do, chaahe vritti se do, chaahe vaani se do, chaahe sang se do, chaahe vibration se do, lekin dena hi hai। vaise bhi bhakti mein yeh niyam hota hai, koi bhi vastu ki kami hoti hai to kehte hain daan karo। daan karne se dena, lena ho jaata hai। samjha golden jubilee kya hai। sirf mana liya yeh nahin soncho। seva ke 50 varsha poore hue abhi naya mod lo। chhota-bada ek din ka va 50 varsha ka sab samaadhaan swaroop bano। samjha kya karna hai। vaise bhi 50 varsha ke baad jeevan parivartan hota hai। golden jubilee arthaat parivartan jubilee, sampanna banne ki jubilee। achha

sada vishwa kalyaankaari samartha rahne vaale, sada vardaani, mahaadaani sthiti mein sthit rahne vaale, sada sva ki samasyaaon ko auron prati samaadhaan swaroop ban sahaj samaapta karne vaale, har samay har sankalp ko seva mein samarpan karne vaale-aise real gold vishesh aatmaon ko, baap samaan shreshtha aatmaon ko baapdaada ka yaad pyaar aur namaste।

golden jubilee ke aadi ratnon se baapdaada ki mulaakaat

yeh vishesh khushi sada rehti hai ki aadi se ham aatmaon ka saath rahne ka aur saathi banne ka donon hi vishesh part hai। saath bhi rahe aur phir jahaan tak jeena hai vahaan tak sthiti mein bhi baap samaan saathi ban rehna hai। to saath rehna aur saathi banna, yeh vishesh vardaan aadi se ant tak mila hua hai। sneh se janma hua, gyaan to pahle nahin tha na। sneh se hi paida hue, jis sneh se janma hua, vahi sneh sabhi ko dene ke liye vishesh nimitta ho। jo bhi saamne aaye vishesh aap sabse baap ke sneh ka anubhav kare। aap mein baap ka chitra aur aapki chalan se baap ka charitra dikhaai de। agar koi poochhe ki baap ke charitra kya hain to aapki chalan charitra dikhaaye kyonki svayan baap ke charitra dekhne aur saath-saath charitra mein chalne vaali aatmaayen ho। charitra jo bhi hue woh akele baap ke charitra nahin hain। gopi vallabh aur gopikaaon ke hi charitra hain। baap ne bachchon ke saath hi har karma kiya, akela nahin kiya। sada aage bachchon ko rakha। to aage rakhna yeh charitra hua। aise charitra aap vishesh aatmaon dvaara dikhaai den। kabhi bhi “main aage rahoon'' yeh sankalp baap ne nahin kiya। ismen bhi sada tyaagi rahe aur isi tyaag ke phal mein sabhi ko aage rakha, isliye aage ka phal mila। number one har baat mein brahma baap hi bana। kyon bana? aage rakhna aage hona, is tyaag bhaav se। sambandh ka tyaag, vaibhvon ka tyaag koi badi baat nahin। lekin har kaarya mein, sankalp mein bhi auron ko aage rakhne ki bhaavna। yeh tyaag shreshtha tyaag raha। isko kaha jaata hai svayan ke bhaan ko mita dena। mai pan ko mita dena। to direct paalna lene vaalon me vishesh shaktiyaan hain। direct paalna ki shaktiyaan kam nahin hain। vahi paalna abhi auron ki paalna mein pratyaksha karte chalo। vaise vishesh to ho hi। anek baaton mein vishesh ho। aadi se baap ke saath part bajaana, yeh koi kam visheshta nahin hai। visheshtaayen to bahut hain lekin abhi aap vishesh aatmaon ko daan bhi vishesh karna hai। gyaan daan to sab karte hain lekin aapko apni visheshtaaon ka daan karna hai। baap ki visheshtaayen so aapki visheshtaayen। to un visheshtaaon ka daan karo। jo visheshtaaon ke mahaadaani hain, woh sada ke liye mahaan rehte hain। chaahe poojya pan mein, chaahe pujaari pan mein, saara kalpa mahaan rehte hain। jaise brahma baap ko dekha ant mein bhi kaliyugi duniya ke hisaab mein bhi mahaan raha na। to aadi se ant tak aisa mahaadaani mahaan rehta hai। achha - aapko dekhkar sab khush hue, to khushi baanti na। bahut achha manaaya, sabko khush kiya aur khush hue। baapdaada vishesh aatmaon ke vishesh kaarya par harshit hote hain। sneh ki maala to taiyaar hai na। purooshaartha ki maala, sampoorn hone ki maala woh to samay prati samay pratyaksha ho rahi hai।

jitna jo pharishta sampoorn anubhav hota hai woh samjho manka maala mein pirota jaata hai। to woh samay prati samay pratyaksha hote rehte hain। lekin sneh ki maala to pakki hai na। sneh ki maala ke moti sada hi amar hain, avinaashi hai। sneh mein to sabhi paas marks lene vaale hain। baaki samaadhaan swaroop ki maala taiyaar honi hai। sampoorn arthaat samaadhaan swaroop। jaise brahma baap ko dekha samasya le jaane vaala bhi samasya bhool jaata tha। kya lekar aaya aur kya le karke gaya! yeh anubhav kiya na! samasya ki baaten bolne ki himmat nahin rahi kyonki sampoorn sthiti ke aage samasya jaise ki bachpan ka khel anubhav karte the isliye samaapta ho jaati thi। isko kehte hain samaadhaan swaroop। ek-ek samaadhaan swaroop ho jaae to samasyaayen kahaan jaayengi। aadha kalpa ke liye vidaai samaaroh ho jaayega। abhi to vishwa ki samasyaaon ka samaadhaan hi parivartan hai। to kya golden jubilee manaai। mould hone ki jubilee manaai। jo mould hota hai woh jis bhi roop mein laane chaaho, us roop mein aa sakta hai। mould hona arthaat sarva ka pyaara hona। sabki nazar phir bhi nimitta banne vaalon par rehti hai। achha!

vardaan:- shreshthata ke aadhaar par sameepta dvaara kalpa ki shreshtha praalabdha banaane vaale vishesh paartadhaari bhav

is marjeeva jeevan mein shreshthata ka aadhaar do baaten hainh 1-sada paropkaari rehna। 2-baal brahmachaari rehna। jo bachche in donon baaton mein aadi se ant tak akhanda rahe hain, kisi bhi prakaar ki pavitrata arthaat svachchhata baar-baar khandit nahin hui hai tatha vishwa ke prati aur brahman parivaar ke prati jo sada upkaari hain aise vishesh paartadhaari baapdaada ke sada sameep rehte hain aur unki praalabdha saare kalpa ke liye shreshtha ban jaati hai।

slogan:- sankalp vyartha hain to doosre sab khajaane bhi vyartha ho jaate hain।