Murli du jour du mercredi 1 juillet 2020

01-07-2020 praatahmurli om shanti "baapdaada"' madhuban

“meethe bachche - bade-bade sthaanon par bade-bade dukaan (centre) kholo, service ko badhaane ke liye plan banaao, meeting karo, vichaar chalaao''

prashn:- sthool wonders to sab jaante hain lekin sabse bada wonder kaun-sa hai, jise tum bachche hi jaante ho?

uttar:- sabse bada wonder to yeh hai jo sarva ka sadgati daata baap svayan aakar padhaate hain। yeh wonderful baat bataane ke liye tumhein apne-apne dukaanon ka bhabhka karna padta hai kyonki manushya bhabhka (show) dekhkar hi aate hain। to sabse achha aur bada dukaan capital mein hona chaahiye, taaki sab aakar samjhen।

geet:- marna teri gali mein…

om shanti। shiv bhagvaanuvaach। roodra bhagvaanuvaach bhi kaha ja sakta hai kyonki shiv maala nahin gaai jaati hai। jo manushya bhakti maarga mein bahut pherte hain uska naam rakha hua hai roodra maala। baat ek hi hai parantu right-ve mein shivbaaba padhaate hain। woh naam hi hona chaahiye, parantu roodra maala naam chala aata hai। to woh bhi samjhaana hota hai। shiv aur roodra mein koi farka nahin hai। bachchon ki buddhi mein hai ki ham achhi reeti purooshaartha kar baba ke maala mein najdeek aa jaaen। yeh drishtaanta bhi bataaya jaata hai। jaise bachche daudi lagaakar jaate hain, nishaan tak jaae phir laut aakar teacher paas khade hote hain। tum bachche bhi jaante ho hamne 84 ka chakra lagaaya। abhi pahle-pahle jaakar maala mein pirona hai। woh hai human student ki race। yeh hai roohaani race। woh race tum kar na sako। yeh to hai hi aatmaon ki baat। aatma to boodhi, javaan va chhoti-badi hoti nahin। aatma to ek hi hai। aatma ko hi apne baap ko yaad karna hai, ismen koi takleeph ki baat nahin। bhal padhaai mein dheele bhi ho jaaen parantu ismen kya takleeph hai, kuchh bhi nahin। sabhi aatmaayen bhaai-bhaai hain। us race mein javaan tej daudenge। yahaan to woh baat nahin। tum bachchon ki race hai roodra maala mein pirone ki। buddhi mein hai ham aatmaon ka bhi jhaad hai। woh hai shivbaaba ki sab manushya-maatra ki maala। aise nahin ki sirf 108 ya 16108 ki maala hai। nahin। jo bhi manushya maatra hain, sabki maala hai। bachche samajhte hain nambarvaar har ek apne-apne dharma mein jaakar viraajmaan honge, jo phir kalpa-kalpa usi jagah par hi aate rahenge। yeh bhi wonder hai na। duniya in baaton ko nahin jaanti। tumhaare mein bhi jo vishaalbuddhi vaale hain woh in baaton ko samajh sakte hain। bachchon ki buddhi mein yahi khyaal rehna chaahiye ki ham sabko raasta kaise bataayen। yeh hai vishnu ki maala। shuru se lekar sijra shuru hota hai, taal-taaliyaan sab hain na। vahaan bhi chhoti-chhoti aatmaayen rehti hain। yahaan hain manushya। phir sab aatmaayen accurate vahaan khadi hongi। yeh wonderful baaten hain। manushya yeh sthool wonders sab dekhte hain parantu woh to kuchh bhi nahin hai। yeh kitna wonder hai jo sarva ka sadgati daata parampita paramatma aakar padhaate hain। krishna ko sarva ka sadgati daata thode hi kahenge। tumko yeh sab points bhi dhaaran karni hai। mool baat hai hi geeta ke bhagwan ki। is par jeet paai to bas। geeta hai hi sarva shaastramai shiromni, bhagwan ki gaai hui। pahle-pahle yeh koshish karni hai। aajkal to bada bhabhka chaahiye, jis dukaan mein bahut show hota hai vahaan manushya bahut ghuste hain। samjhenge yahaan achha maal hoga। bachche darte hain, itne bade-bade centre kholen to laakh do laakh salaami deven, tab dilapsanda makaan mile। ek hi royal bada dukaan ho, bade dukaan bade-bade shahron mein hi nikalte hain। tumhaara sabse bada dukaan nikalna chaahiye kepeetal mein। bachchon ko vichaar saagar manthan karna chaahiye ki kaise service badhe। bada dukaan nikaalenge to bade-bade aadmi aayenge। bade aadmi ka aavaaz jhat phailta hai। pahle-pahle to yeh koshish karni chaahiye। service ke liye bade se bada sthaan aisi jagah banaayen jo bade-bade manushya aakar dekhkar wonder khaayen aur phir vahaan samjhaane vaale bhi first class chaahiye। koi ek bhi halki bi.ke. samjhaati hai to samajhte hain - shaayad sab bi.ke. hi aisi hain isliye dukaan par salesman bhi achhe first class chaahiye। yeh bhi dhandha hai na। baap kehte hain himmate bachche madde baapdaada। woh vinaashi dhan to koi kaam nahin aayega। hamko to apni avinaashi kamaai karni hai, ismen bahuton ka kalyaan hoga। jaise is brahma ne bhi kiya। phir koi bhookh thode hi marte hain। tum bhi khaate ho, yeh bhi khaate hain। yahaan jo khaan-paan milta hai woh aur kahin nahin milta। yeh sab kuchh bachchon ka hi hai na। bachchon ko apni raajaai sthaapan karni hai, ismen badi vishaalbuddhi chaahiye। capital mein naam nikla to sab samajh jaayenge। kahenge barobar yeh to sach batlaati hain, vishwa ka maalik to bhagwan hi banaayega। manushya, manushya ko vishwa ka maalik thode hi banaayega। baba service ki vriddhi ke liye raay dete rehte hain।

service ki vriddhi tabhi hogi jab bachchon ki phraakdil hogi। jo bhi kaarya karte ho phraakdili se karo। koi bhi shubh kaarya aapehi karna - yeh bahut achha hai। kaha bhi jaata hai aapehi kare so devta, kahne se kare woh manushya। kahne se bhi na kare...... baba to daata hai, baba thode hi kisko kahenge yeh karo। is kaarya mein itna lagaao। nahin। baba ne samjhaaya hai bade-bade raajaaon ka haath kabhi banda nahin rehta। raajaayen hamesha daata hote hain। baba raay dete hain - kya-kya jaakar karna chaahiye। khabardaari bhi bahut chaahiye। maaya par jeet paani hai, bahut oonch pad hai। pichhaadi mein result nikalti hai phir jo bahut marks se paas hote hain unko khushi bhi hoti hai। pichhaadi mein saakshaatkaar to sabko honge na, parantu us samay kar kya sakenge। takdeer mein jo hai vahi milta hai। purooshaartha ki baat alag hai। baap bachchon ko samjhaate hain vishaal buddhi bano। abhi tum dharma aatmaayen bante ho। duniya mein dharmaatma to bahut hokar gaye hain na। bahut unhon ka naamaachaar hota hai। phalaana bahut dharmaatma manushya tha। koi-koi to paise ikatthe karte-karte achaanak mar jaate hain। phir trustee bante hain। koi bachcha bhi naalaayak hota hai to phir trastri karte hain। is samay to yeh hai hi paap aatmaon ki duniya। bade-bade guruon aadi ko daan karte hain। jaise kashmeer ka mahaaraaja tha, will karke gaya ki aarya samaajiyon ko mile। unka dharma vriddhi ko paaye। abhi tumko kya karna hai, kis dharma ko vriddhi mein laana hai? aadi sanaatan devi-devta dharma hi hai। yeh bhi kisko pata nahin hai। abhi tum phir se sthaapan kar rahe ho। brahma dvaara sthaapna। ab bachchon ko ek ki yaad mein rehna chaahiye। tum yaad ke bal se hi saare srishti ko pavitra banaate ho kyonki tumhaare liye to pavitra srishti chaahiye। inko aag lagne se pavitra banti hai। kharaab cheez ko aag mein pavitra banaate hain। inmen sab apvitra vastu padkar phir achhi hokar niklegi। tum jaante ho yeh bahut chhi-chhi tamopradhaan duniya hai। phir satopradhaan honi hai। yeh gyaan yagya hai na। tum ho brahman। yeh bhi tum jaante ho shaastron mein anek baaten likh di hain, yagya par phir daksha prajaapita ka naam dikhaaya hai। phir roodra gyaan yagya kahaan gaya। iske liye bhi kya-kya kahaaniyaan baith likhi hain। yagya ka varnan kaaydesir hai nahin। baap hi aakar sab kuchh samjhaate hain। abhi tum bachchon ne gyaan yagya racha hai shreemat se। yeh hai gyaan yagya aur phir vidyaalay bhi ho jaata hai। gyaan aur yagya donon akshar alag-alag hain। yagya mein aahuti daalni hai। gyaan saagar baap hi aakar yagya rachte hain। yeh bada bhaari yagya hai, jismen saari puraani duniya svaaha honi hai।

to bachchon ko service ka plan banaana hai। bhal gaanvadon aadi mein bhi service karo। tumko bahut kehte hain gareebon ko yeh knowledge deni chaahiye। sirf raay dete hain, khud koi kaam nahin karte। service nahin karte sirf raay dete hain ki aisa karo, bahut achha hai। parantu hamko phursat nahin hai। knowledge bahut achhi hai। sabko yeh knowledge milni chaahiye। apne ko bada aadmi, tumko chhota aadmi samajhte hain। tumko bahut khabardaar rehna hai। us padhaai ke saath phir yeh padhaai bhi milti hai। padhaai se baatcheet karne ka akla aa jaata hai। manners achhe ho jaate hain। anapdhe to jaise bhuttu hote hain। kaise baat karni chaahiye, akla nahin। bade aadmi ko hamesha “aap'' kah baat karni hoti hai। yahaan to koi-koi aise bhi hain jo pati ko bhi tum-tum kah dengi। aap akshar royal hai। bade aadmi ko aap kahenge। to baba pahle-pahle raay dete hain ki dehli jo paristaan thi, phir se ise paristaan banaana hai। to dehli mein sabko sandesh dena chaahiye, advertisement bahut achhi karni hai। topics bhi bataate rehte hain, topic ki list banaao phir likhte jaao। vishwa mein shanti kaise ho sakti hai aakar samjho, 21 janmon ke liye nirogi kaise ban sakte ho, aakar samjho। aisi khushi ki baaten likhi hui ho। 21 janmon ke liye nirogi, satayugi double sirtaaj aakar bano। satayugi akshar to sabmen daalo। sundar-sundar akshar ho to manushya dekhkar khush ho। ghar mein bhi aise board chitra aadi lage hue hon। apna dhandha aadi bhal karo। saath-saath service bhi karte raho। dhandhe mein saara din thode hi rehna hota hai। oopar se sirf dekhbhaal karni hoti hai। baaki kaam assistant manager chalaate hain। koi seth log phraakdil hote hain to assistant ko achha pagaar (majdoori) dekar bhi gaddi par bitha dete hain। yeh to behad ki service hai। aur sab hain had ki service। is behad ki service mein kitni vishaalbuddhi honi chaahiye। ham vishwa par jeet paate hain। kaal par bhi ham jeet paakar amar ban jaate hain। aisi-aisi likhat dekhkar aayenge aur samajhne ki koshish karenge। amarlok ka maalik tum kaise ban sakte ho aakar samjho, bahut topics nikal sakti hain। tum kisko vishwa ka maalik bana sakte ho। vahaan duhkh ka naam-nishaan nahin rehta। bachchon ko kitni khushi honi chaahiye। baba hamko phir se kya banaane aaye hain! bachche jaante hain puraani srishti se nai banni hai, maut bhi saamne khada hai। dekhte ho ladaai lagti rehti hai। badi ladaai lagi to khel hi khalaas ho jaayega। tum to achhi reeti jaante ho। baap bahut pyaar se kehte hain - meethe bachchon, vishwa ki baadshaahi tumhaare liye hai। tum vishwa ke maalik the, bhaarat mein tumne athaah sukh dekhe। vahaan raavan raajya hi nahin। to itni khushi chaahiye। bachchon ko aapas mein milkar raay nikaalni chaahiye। akhbaaron mein daalna chaahiye। dehli mein bhi aeroplane se parche giraao। nimantran dete hain, kharcha koi bahut thode hi lagta hai, bada officer samajh jaae to free bhi kar sakte hain। baba raay dete hain, jaise kalkatta hai vahaan chaurangi mein first class ek hi bada dukaan ho royal, to graahak bahut aayenge। madraas, baambe bade-bade shahron mein bada dukaan ho। baba businessman bhi to hai na। tumse kakhpan paai paise lekar exchange mein kya deta hoon! isliye gaaya jaata hai merciful। kaudi se heere jaisa banaane vaala, manushya ko devta banaane vaala। balihaari ek baap ki hai। baap na hota, to tumhaari kya mahima hoti।

tum bachchon ko fakhur hona chaahiye ki bhagwan hamko padhaate hain। em object nar se naaraayan banne ki saamne khadi hai। pahle-pahle jinhonne avyabhichaari bhakti shuru ki hai, vahi aakar oonch pad paane ka purooshaartha karenge। baba kitni achhi-achhi points samjhaate hain, bachchon ko bhool jaati hain, tab baba kehte hain points likho। topics likhte raho। doctor log bhi kitaab padhte hain। tum ho master roohaani surgeon। tumko sikhlaate hain aatma ko injection kaise lagaana hai। yeh hai gyaan ka injection। ismen sui aadi to kuchh nahin hai। baba hai avinaashi surgeon, aatmaon ko aakar padhaate hain। vahi apvitra bani hai। yeh to bahut easy hai। baap hamko vishwa ka maalik banaate hain, unko ham yaad nahin kar sakte hain! maaya ka opposition bahut hai isliye baba kehte hain - chart rakho aur service ka khyaal karo to bahut khushi hogi। kitni bhi achhi murli chalaate hain parantu yog hai nahin। baap se sachcha banna bhi bada mushkil hai। agar samajhte hain ham bahut teekhe hain to baba ko yaad kar chart bhejen to baba samjhenge kahaan tak sach hai ya jhooth? achha, bachchon ko samjhaaya - salesman banna hai, avinaashi gyaan ratnon ka। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) em object ko saamne rakh fakhur mein rehna hai, master roohaani surgeon ban sabko gyaan injection lagaana hai। service ke saath-saath yaad ka bhi chart rakhna hai to khushi rahegi।

2) baatcheet karne ke manners achhe rakhne hain, ‘aap' kah baat karni hai। har kaarya phraakdil bankar karna hai।

vardaan:- sva kalyaan ke pratyaksha pramaan dvaara vishwa kalyaan ki seva mein sada saphaltaamoorta bhav

jaise aajkal shaareerik rog heartfail ka jyaada hai vaise aadhyaatmik unnati mein dilshikasta ka rog jyaada hai। aisi dilshikasta aatmaon mein practical parivartan dekhne se hi himmat va shakti aa sakti hai। suna bahut hai ab dekhna chaahte hain। pramaan dvaara parivartan chaahte hain। to vishwa kalyaan ke liye sva kalyaan pahle sample roop mein dikhaao। vishwa kalyaan ki seva mein saphaltaamoorta banne ka saadhan hi hai pratyaksha pamaan, isse hi baap ki pratyakshata hogi। jo bolte ho woh aapke swaroop se practical dikhaai de tab maanenge।

slogan:- doosre ke vichaaron ko apne vichaaron se milaana - yahi hai regard dena।