Murli du jour du jeudi 6 août 2020

06-08-2020 praatahmurli om shanti "baapdaada"' madhuban

“meethe bachche - savere-savere uth yahi chintan karo ki main itni chhoti-si aatma kitne bade shareer ko chala rahi hoon, mujh aatma mein avinaashi part noondha hua hai''

prashn:- shivbaaba ko kaun-si practice hai, kaun-si nahin?

uttar:- aatma ka gyaan ratnon se shrringaar karne ki practice shivbaaba ko hai, baaki shareer ka shrringaar karne ki practice unhein nahin kyonki baba kehte mujhe to apna shareer hai nahin। main inka shareer bhal kiraaye par leta hoon lekin is shareer ka shrringaar yeh aatma svayan karti, main nahin karta। main to sada ashareeri hoon।

geet:- badal jaae duniya na badlenge ham …

om shanti। bachchon ne yeh geet suna। kisne suna? aatma ne in shareer ke kaanon dvaara suna। bachchon ko bhi yeh maaloom pada ki aatma kitni chhoti hai। woh aatma is shareer mein nahin hai to shareer koi kaam ka nahin rehta। kitni chhoti aatma ke aadhaar par yeh kitna bada shareer chalta hai। duniya mein kisko bhi pata nahin hai ki aatma kya cheez hai jo is rath par viraajmaan hoti hai। akaalmoorta aatma ka yeh takhta hai। bachchon ko bhi yeh gyaan milta hai। kitna ramneek, rahasya yukta hai। jab koi aisi rahasyayukta baat suni jaati hai to chintan chalta hai। tum bachchon ka bhi yahi chintan chalta hai - itni chhoti si aatma hai itne bade shareer mein। aatma mein 84 janmon ka part noondha hua hai। shareer to vinaash ho jaata hai। baaki aatma rehti hai। yeh badi vichaar ki baate hain। savere uthkar yeh khyaal karna chaahiye। bachchon ko smriti aai hai aatma kitni chhoti hai, unko avinaashi part mila hua hai। main aatma kitni wonderful hoon। yeh naya gyaan hai। jo duniya mein kisko bhi nahin hai। baap hi aakar batlaate hain, jo simran karna hota hai। ham kitni chhoti si aatma kaise part bajaati hai। shareer 5 tatvon ka banta hai। baba ko thode hi maaloom padta hai। shivbaaba ki aatma kaise aati-jaati hai। aise bhi nahin, sadaiv ismen rehti hai। to yahi chintan karna hai। tum bachchon ko baap aisa gyaan dete hain jo kabhi koi ko mil na sake। tum jaante ho barobar yeh gyaan inki aatma mein nahin tha। aur satsangon mein aisi-aisi baaton par koi ka khyaal nahin rehta hai। aatma aur paramatma ka rinchak bhi gyaan nahin hai। koi bhi saadhu-sannyaasi aadi yeh thode hi samajhte ki ham aatma shareer dvaara inko mantra deti hai। aatma shareer dvaara shaastra padhti hai। ek bhi manushya maatra aatma-abhimaani nahin hai। aatma ka gyaan koi ko hai nahin, to phir baap ka gyaan kaise hoga।

tum bachche jaante ho ham aatmaon ko baap kehte hain meethe-meethe bachchon! tum kitna samajhdaar ban rahe ho। aisa koi manushya nahin jo samjhe ki is shareer mein jo aatma hai, unko parampita paramatma baith padhaate hain। kitni samajhne ki baaten hain। parantu phir bhi dhandhe aadi mein jaane se bhool jaate hain। pahle to baap aatma ka gyaan dete hain jo koi bhi manushya maatra ko nahin hai। gaayan bhi hai na - aatmaayen-paramatma alag rahe bahukaal... hisaab hai na। tum bachche jaante ho aatma hi bolti hai shareer dvaara। aatma hi shareer dvaara achhe va bure kaam karti hai। baap aakar aatmaon ko kitna gul-gul banaate hain। pahle-pahle to baap kehte hain savere-savere uthkar yahi practice va khyaal karo ki aatma kya hai? jo is shareer dvaara sunti hai। aatma ka baap parampita paramatma hai, jisko patit-paavan, gyaan ka saagar kehte hain। phir koi manushya ko sukh ka saagar, shanti ka saagar kaise kah sakte। kya lakshmi-naaraayan ko kahenge sadaiv pavitrata ka saagar? nahin। ek baap hi sadaiv pavitrata ka saagar hai। manushya to sirf bhakti maarga ke shaastron ka baith varnan karte hain। practical anubhav nahin hai। aise nahin samjhenge ham aatma is shareer se baap ki mahima karte hain। woh hamaara bahut meetha baba hai। vahi sukh dene vaala hai। baap kehte hain - he aatmaayen, ab meri mat par chalo। yeh avinaashi aatma ko avinaashi baap dvaara avinaashi mat milti hai। woh vinaashi shareerdhaariyon ko vinaashi shareerdhaariyon ki hi mat milti hai। satayug mein to tum yahaan ki praalabdha paate ho। vahaan kabhi ulti mat milti hi nahin। abhi ki shreemat hi avinaashi ban jaati hai, jo aadhaakalpa chalti hai। yeh naya gyaan hai, kitni buddhi chaahiye isko grahan karne ki। aur act mein aana chaahiye। jinhon ne shuru se bahut bhakti ki hogi vahi achhi reeti dhaaran kar sakenge। yeh samajhna chaahiye - agar hamaari buddhi mein theek reeti dhaarna nahin hoti hai, to zaroor shuru se hamne bhakti nahin ki hai। baap kehte hain kuchh bhi nahin samajhte ho to baap se poochho kyonki baap hai avinaashi surgeon। unko supreme soul bhi kaha jaata hai। aatma pavitra banti hai to unki mahima hoti hai। aatma ki mahima hai to shareer ki bhi mahima hoti hai। aatma tamopradhaan hai to shareer ki bhi mahima nahin। is samay tum bachchon ko bahut guhya buddhi milti hai। aatma ko hi milti hai। aatma ko kitna meetha banna chaahiye। sabko sukh dena chaahiye। baba kitna meetha hai। aatmaon ko bhi bahut meetha banaate hain। aatma koi bhi akartavya kaarya na kare - yeh practice karni hai। check karna hai ki mere se koi akartavya to nahin hota hai? shivbaaba kabhi akartavya kaarya karenge? nahin। woh aate hi hain uttam se uttam kalyaankaari kaarya karne। sabko sadgati dete hain। to jo baap kartavya karte hain, bachchon ko bhi aisa kartavya karna chaahiye। yeh bhi samjhaaya hai, jisne shuru se lekar bahut bhakti ki hai, unki buddhi mein hi yeh gyaan thahrega। abhi bhi devtaaon ke dher bhakta hain। apna sir dene ke liye bhi taiyaar rehte hain। bahut bhakti karne vaalon ke pichhaadi, kam bhakti karne vaale latakte rehte। unki mahima gaate hain। unka to sthool mein sab dekhne mein aata hai। yahaan tum ho gupta। tumhaari buddhi mein srishti ke aadi-madhya-ant ka saara gyaan hai। yeh bhi bachchon ko maaloom hai - baba hamko padhaane aaye hain। ab phir ham ghar jaayenge। jahaan sab aatmaayen aati hain, woh hamaara ghar hai। vahaan shareer hi nahin to aavaaz kaise ho। aatma ke bina shareer jad ban jaata hai। manushyon ka shareer mein kitna moh rehta hai! aatma shareer se nikal gai to baaki 5 tatva, un par bhi kitna lav rehta hai। stri pati ki chita par chadhne liye taiyaar ho jaati hai। kitna moh rehta hai shareer mein। abhi tum samajhte ho nashtomoha hona hai, saari duniya se। yeh shareer to khatma hona hai। to unse moh nikal jaana chaahiye na। parantu bahut moh rehta hai। braahmanon ko khilaate hain। yaad karte hain na - phalaane ka shraadh hai। ab woh thode hi kha sakte hain। tum bachchon ko to ab in baaton se alag ho jaana chaahiye। drama mein har ek apna part bajaate hain। is samay tumko gyaan hai, hamko nashtomoha banna hai। mohjeet raaja ki bhi kahaani hai na aur koi moh jeet raaja hota nahin। yeh to kathaayen bahut banaai hain na। vahaan akaale mrityu hoti nahin। to poochhne ki bhi baat nahin rehti। is samay tumko mohjeet banaate hain। svarga mein moh jeet raajaayen the, yatha raaja raani tatha praja aise hain। woh hai hi nashtomoha ki raajdhaani। raavan raajya mein moh hota hai। vahaan to vikaar hota nahin, raavan raajya hi nahin। raavan ki raajaai chali jaati hai। raam raajya mein kya hota hai, kuchh bhi pata nahin। sivaae baap ke aur koi yeh baaten bata na sake। baap is shareer mein hote bhi dehi-abhimaani hai। loan athva kiraaye par makaan lete hain to usmein bhi moh rehta hai। makaan ko achhi reeti pharnish karte hain, inko to pharnish karna nahin hai kyonki baap to ashareeri hai na। inko koi bhi shrringaar aadi karne ki practice hi nahin hai। inko to avinaashi gyaan ratnon se bachchon ko shrringaarne ki hi practice hai। srishti ke aadi-madhya-ant ka raaz samjhaate hain। shareer to apvitra hi hai, inko jab doosra naya shareer milega to pavitra honge। is samay to yeh puraani duniya hai, yeh khatma ho jaani hai। yeh bhi duniya mein kisko pata hi nahin hai। dheere-dheere maaloom padega। nai duniya ki sthaapna aur puraani duniya ka vinaash - yeh to baap ka hi kaam hai। baap hi aakar brahma dvaara praja rach nai duniya ki sthaapna kar rahe hain। tum nai duniya mein ho? nahin, nai duniya sthaapan hoti hai। to braahmanon ki choti bhi oonch hai। baba ne samjhaaya hai, baba ke sammukh aate ho to pahle yeh yaad karna hai ki ham eeshvar baap ke sammukh jaate hain। shivbaaba to niraakaar hai। unke sammukh ham kaise jaayen। to us baap ko yaad kar phir baap ke sammukh aana hai। tum jaante ho woh ismen baitha hua hai। yeh shareer to patit hai। shivbaaba ki yaad mein na rah koi kaam karte ho to paap lag jaata hai। ham shivbaaba ke paas jaate hain। phir doosre janma mein doosre sambandhi honge। vahaan devtaaon ki god mein jaayenge। yeh eeshvareey god ek hi baar milti hai। mukh se kehte hain baba ham aapka ho chuka। bahut hain jinhonne kabhi dekha bhi nahin hai। baahar mein rehte hain, likhte hain shivbaaba ham aapki god ke bachche ho chuke hain। buddhi mein gyaan hai। aatma kehti hai-ham shivbaaba ke ban chuke। inke pahle ham patit ki god ke the। bhavishya mein pavitra devta ki god mein jaayenge। yeh janma durlabh hai। heere jaisa tum yahaan sangamayug par bante ho। sangamayug koi us paani ke saagar aur nadiyon ko nahin kaha jaata। raat din ka farka hai। brahmaputra bade te badi nadi hai, jo saagar mein milti hai। nadiyaan jaakar saagar mein padti hain। tum bhi saagar se nikli hui gyaan nadi ho। gyaan saagar shivbaaba hai। bade te bade nadi hai brahmaputra। inka naam brahma hai। saagar se inka kitna mel hai। tumko maaloom hai nadiyaan kahaan se nikalti hain। saagar se hi nikalti hain, phir saagar mein padti hain। saagar se meetha paani kheenchate hain। saagar ke bachche phir saagar mein jaakar milte hain। tum bhi gyaan saagar se nikli ho phir sab vahaan chali jaayengi, jahaan woh rehte hain, vahaan tum aatmaayen bhi rehti ho। gyaan saagar aakar tumko pavitra meetha banaate hain। aatma jo khaari ban gai hai unko meetha banaate hain। 5 vikaaron roopi chhi-chhi namkeen tumse nikal jaati hai, to tum tamopradhaan se sato-pradhaan ban jaate ho। baap purooshaartha bahut karaate hain। tum kitne satopradhaan the, svarga mein rehte the। tum bilkul chhi-chhi ban gaye ho। raavan ne tumko kya banaaya hai। bhaarat mein hi gaaya jaata hai heere jaisa janma amolak।

baba kehte rehte hain tum kaudiyon pichhaadi kyon hairaan hote ho। kaudiyaan bhi jaasti thode hi chaahiye। gareeb jhat samajh jaate hain। saahookaar to kehte hain abhi hamaare liye yahaan hi svarga hai। tum bachche jaante ho - jo bhi manushyamaatra hain sabka is samay kaudi jaisa janma hai। ham bhi aise the। abhi baba hamko kya banaate hain। em-object to hai na। ham nar se naaraayan bante hain। bhaarat ab kaudi jaisa kangaal hai na। bhaaratvaasi khud thode hi jaante। yahaan tum kitne saadhaaran ablaayen ho। koi bada aadmi hoga to unko yahaan baithne ki dil nahin hogi। jahaan bade-bade aadmi sannyaasi guru aadi log honge vahaan ki badi-badi sabhaaon mein jaayenge। baap bhi kehte hain main gareeb nivaaj hoon। kehte hain bhagwan gareebon ki raksha karte hain। abhi tum jaante ho - ham kitne saahookaar the। abhi phir bante hain। baba likhte bhi hain tum padmaapadmapti bante ho। vahaan par maara-maari nahin hoti hai। yahaan to dekho paise ke peechhe kitni maaraamaari hai। rishvat kitni milti hai। paise to manushyon ko chaahiye na। tum bachche jaante ho baba hamaara khajaana bharpoor kar dete hain। aadhaakalpa ke liye jitna chaahiye utna dhan lo, parantu purooshaartha poora karo। gaphlat nahin karo। kaha jaata hai na follow father। father ko follow karo to yeh jaakar banenge। nar se naaraayan, naari se lakshmi, bada bhaari imtahaan hai। ismen jara bhi gaphlat nahin karni chaahiye। baap shreemat dete hain to phir us par chalna hai। kaayde kaanoon ka ullanghan nahin karna hai। shreemat se hi tum shri bante ho। manzil bahut badi hai। apna roz ka khaata rakho। kamaai ki ya nuksaan kiya? baap ko kitna yaad kiya? kitne ko raasta bataaya? andhon ki laathi tum ho na। tumko gyaan ka teesra netra milta hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise baap meetha hai, aise meetha ban sabko sukh dena hai। koi bhi akartavya kaarya nahin karna hai। uttam se uttam kalyaan ka hi kaarya karna hai।

2) kaudiyon ke pichhaadi hairaan nahin hona hai। purooshaartha kar apni jeevan heere jaisi banaani hai। gaphlat nahin karni hai।

vardaan:- challenge aur practical ki samaanta dvaara svayan ko paapon se safe rakhne vaale vishwa sevaadhaari bhav

aap bachche jo challenge karte ho us challenge aur practical jeevan mein samaanta ho, nahin to punya aatma ke bajaae bojh vaali aatma ban jaayenge। is paap aur punya ki gati ko jaankar svayan ko safe rakho kyonki sankalp mein bhi kisi bhi vikaar ki kamjori, vyartha bol, vyartha bhaavna, ghrina va eershya ki bhaavna paap ke khaate ko badhaati hai isliye punya aatma bhav ke vardaan dvaara svayan ko safe rakh vishwa sevaadhaari bano। sangathit roop mein ekmat, ekras sthiti ka anubhav karaao।

slogan:- pavitrata ki shama chaaron or jalaao to baap ko sahaj dekh sakenge।