Murli du jour du lundi 7 septembre 2020

07-09-2020 praatahmurli om shanti "baapdaada"' madhuban

''meethe bachche - baap aaye hain tum puraane bhakton ko bhakti ka phal dene। bhakti ka phal hai gyaan, jisse hi tumhaari sadgati hoti hai''

prashn:- kai bachche chalte-chalte takdeer ko aapehi shoot karte hain kaise?

uttar:- agar baap ka bankar service nahin karte, apne par aur doosron par raham nahin karte to woh apni takdeer ko shoot karte hain arthaat pad bhrashta ho jaate hain। achhi reeti padhen, yog mein rahen to pad bhi achha mile। serviceable bachchon ko to service ka bahut shauk hona chaahiye।

geet:- kaun aaya savere-savere…

om shanti। roohaani bachche samajhte hain ham aatma hain, na ki shareer। aur yeh gyaan abhi hi milta hai-parampita paramatma se। baap kehte hain jabki main aaya hoon to tum apne ko aatma nishchay karo। aatma hi shareer mein pravesh karti hai। ek shareer chhod doosra leti rehti hai। aatma nahin badalti, shareer badalta hai। aatma to avinaashi hai, to apne ko aatma samajhna hai। yeh gyaan kabhi koi de na sake। baap aaye hain bachchon ki pukaar par। yeh bhi kisko pata nahin hai ki yeh purooshottam sangamayug hai। baap aakar samjhaate hain mera aana hota hai kalpa ke purooshottam sangamayug par jabki saara vishwa purooshottam banta hai। is samay to saara vishwa kanishta patit hai। usko kaha jaata hai amarpuri, yeh hai mrityulok। mrityulok mein aasuri gun vaale manushya hote hain, amarlok mein daiveegun vaale manushya hain isliye unko devta kaha jaata hai। yahaan bhi achhe svabhaav vaale ko kaha jaata hai - yeh to jaise devta hai। koi daiveegun vaale hote hain, is samay sab hain aasuri gun vaale manushya। 5 vikaaron mein phanse hue hain tab gaate hain is duhkh se aakar liberate karo। koi ek seeta ko nahin chhudaaya। baba ne samjhaaya hai bhakti ko seeta kaha jaata, bhagwan ko raam kaha jaata। jo bhakton ko phal dene aata hai। is behad ke raavan raajya mein saari duniya phansi hui hai। unhon ko liberate kar raam raajya mein le jaate hain। raghupti raaghav raaja raam ki baat nahin। woh to treta ke raaja the। abhi to sabhi aatmaayen tamopradhaan jadajdeebhoot avastha mein hain, seedhi utarte-utarte neeche aa gaye hain। poojya se pujaari ban gaye hain। devtaayen kiski pooja nahin karte। woh to hain poojya। phir woh jab vaishya, shoodra bante hain to pooja shuru hoti hai, vaam maarga mein aane se pujaari bante hain, pujaari devtaaon ke chitron ke aage naman karte hain, is samay koi ek bhi poojya ho nahin sakta। oonch te oonch bhagwan poojya phir hai satayugi devtaayen poojya। is samay to sab pujaari hain, pahle-pahle shiv ki pooja hoti hai, woh hai avyabhichaari pooja। woh satopradhaan phir sato phir devtaaon se bhi utar kar jal ki, manushyon ki, pakshiyon aadi ki pooja karne lag padte। din-pratidin anekon ki pooja hone lagti hai। aajkal religious conference bhi bahut hoti rehti hain। kabhi aadi sanaatan dharma vaalon ki, kabhi jainiyon ki, kabhi aarya samaajiyon ki। bahuton ko bulaate hain kyonki har ek apne dharma ko to ooncha samajhte hain na। har ek dharma mein koi na koi vishesh gun hone kaaran woh apne ko bada samajhte hain। jainiyon mein bhi kisma-kisma ke hote hain। 5-7 variety hongi। unmein phir koi nange bhi rehte hain, nange banne ka arth nahin samajhte hain। bhagvaanuvaach hain nange arthaat ashareeri aaye the, phir ashareeri bankar jaana hai। woh phir kapde utaar kar nange ban jaate hain। bhagvaanuvaach ke arth ko nahin samajhte hain। baap kehte hain tum aatmaayen yahaan yeh shareer dhaaran kar part bajaane aai ho, phir vaapis jaana hai, in baaton ko tum bachche samajhte ho। aatma hi part bajaane aati hai, jhaad vriddhi ko paata rehta hai। naye-naye kisma ke dharma emerge hote rehte hain, isliye inko variety naatak kaha jaata hai। variety dharmon ka jhaad hai। islaami dekho kitne kaale hain। unhon ki bhi bahut branches nikalti hain। muhammad to baad mein aaye hain। pahle hain islaami। musalmaanon ki sankhya bahut hai, aphreeka mein kitne saahookaar hain sone-heeron ki khaaniyaan hain। jahaan bahut dhan dekhte hain to us par chadhaai kar dhanvaan bante hain। Christian log bhi kitne dhanvaan bane hain। bhaarat mein bhi dhan hai, parantu gupta। sona aadi kitna pakadte rehte hain। ab digambar jain sabha vaale conference aadi karte rehte hain, kyonki har ek apne ko bada samajhte hain na। yeh itne dharma sab badhte rehte hain, kabhi vinaash bhi hona hai, kuchh bhi samajhte nahin। sab dharmon mein oonch to tumhaara brahman dharma hi hai, jiska kisko pata nahin hai। kaliyugi brahman bhi bahut hain, parantu woh hain kukh vanshaavli brahman। prajaapita brahma ke mukh vanshaavli brahman, woh to sab bhaai-behen hone chaahiye। agar woh apne ko brahma ki aulaad kahlaate hain, to bhaai-behen hi thahre phir shaadi bhi kar na saken। siddha hota hai woh brahman brahma ke mukh vanshaavli nahin hain, sirf naam rakh dete hain। vaastav mein devtaaon se bhi oonch braahmanon ko kahenge, choti hain na। yeh brahman hi manushyon ko devta banaate hain। padhaane vaala hai parampita paramatma, svayan gyaan ka saagar। yeh kisko bhi pata nahin hai। baap ke paas aakar brahman bankar phir bhi kal shoodra ban padte hain। puraane sanskaar palatne mein badi mehnat lagti hai। apne ko aatma nishchay kar baap se varsa lena hai, roohaani baap se roohaani bachche hi varsa lenge। baap ko yaad karne mein hi maaya vighna daalti hai। baap kehte hath kaar de dil yaar de। yeh hai bahut sahaj। jaise aashik-maashook hote hain jo ek-do ko dekhne bigar rah na saken। baba to maashook hi hai। aashik sab bachche hain jo baap ko yaad karte rehte hain। ek baap hi hai jo kabhi kisi par aashik nahin hota hai kyonki unse oonch to koi hai nahin। baaki haan bachchon ki mahima karte hain, tum bhakti maarga se lekar mujh maashook ke sab aashik ho। bulaate bhi ho ki aakar duhkh se liberate kar paavan banaao। tum sab ho brides, main hoon bridegroom। tum sab aasuri jel mein phanse hue ho, main aakar chhudaata hoon। yahaan mehnat bahut hai criminal aai dhokha deti hai, civil aai banne mein mehnat lagti hai। devtaaon ke kitne achhe characters hain, ab aisa devta banaane vaala zaroor chaahiye na।

conference mein topic rakhi hai ''maanav jeevan mein dharma ki aavashyakta।'' drama ko na jaanne kaaran moonjhe hue hain। tumhaare sivaae koi samjha na sake। Christian athva bauddhi aadi ko yeh thode hi maaloom hai ki Christ, buddha aadi phir kab aayenge! tum jhat hisaab-kitaab bata sakte ho। to samjhaana chaahiye dharma ki to aavashyakta hai na। pahle-pahle kaun-sa dharma tha, phir kaun-se dharma aaye hain! apne dharma vaale bhi poora samajhte nahin hain। yog nahin lagaate। yog bigar taakat nahin aati, jauhar nahin bharta। baap ko hi almighty authority kaha jaata hai। tum kitna almighty bante ho, vishwa ke maalik ban jaate ho। tumhaare raajya ko koi chheen na sake। us samay aur koi khanda hote nahin। abhi to kitne khanda hain। yeh srishti chakra kaise phirta hai। 5 hazaar varsha ka yeh chakra hai, baaki srishti lambi kitni hai। woh thode hi maap kar sakte। dharti ka karke maap kar sakte hain। saagar ka to kar na saken। aakaash aur saagar ka ant koi pa na sake। to samjhaana hai - dharma ki aavashyakta kyon hai! saara chakra bana hi hai dharmon par। yeh hai hi variety dharmon ka jhaad, yeh jhaad hai andhon ke aage aaina।

tum abhi baahar service par nikle ho, aahiste-aahiste tumhaari vriddhi hoti jaati hai। toofaan lagne se bahut patte girte bhi hain na। aur dharmon mein toofaan lagne ki baat nahin rehti। unko to oopar se aana hi hai, yahaan tumhaari sthaapna badi wonderful hai। pahle-pahle vaale bhagat jo hain unko hi aakar bhagwan ko phal dena hai, apne ghar le jaane ka। bulaate bhi hain ham aatmaon ko apne ghar le jaao। yeh kisko pata nahin hai ki baap svarga ka bhi raajya-bhaagya dete hain। sanyaasi log to sukh ko maante hi nahin। vo chaahte hain moksha ho। moksha ko varsa nahin kaha jaata। khud shivbaaba ko bhi part bajaana padta hai to phir kisko moksha mein kaise rakh sakte। tum brahmaakumaar-kumaariyaan apne dharma ko aur sabke dharma ko jaante ho। tumko taras padna chaahiye। chakra ka raaz samjhaana chaahiye। bolo, tumhaare dharma sthaapak phir apne samay par aayenge। samjhaane vaala bhi hoshiyaar chaahiye। tum samjha sakte ho ki har ek ko satopradhaan se sato-rajo-tamo mein aana hi hai। abhi hai raavan raajya। tumhaari hai sachchi geeta, jo baap sunaate hain। bhagwan niraakaar ko hi kaha jaata hai। aatma niraakaar god father ko bulaati hai। vahaan tum aatmaayen rehti ho। tumko paramatma thode hi kahenge। paramatma to ek hi hai oonch te oonch bhagwan, phir sab hain aatmaayen bachche। sarva ka sadgati daata ek hai phir hain devtaayen। unmein bhi number one hai krishna kyonki aatma aur shareer donon pavitra hain। tum ho sangamayugi। tumhaara jeevan amoolya hai। devtaaon ka nahin, braahmanon ka amoolya jeevan hai। baap tumko bachcha banaae phir tumhaare par kitni mehnat karte hain, devtaayen thode hi itni mehnat karenge। woh padhaane liye bachchon ko school bhej denge। yahaan baap baith tumko padhaate hain। woh baap teacher guru teenon hain। to kitna regard hona chaahiye। serviceable bachchon ko service ka bahut shauk hona chaahiye। bahut thode hain jo achhe hoshiyaar hain to service mein lage hue hain। hands to chaahiye na। ladaai ke maidaan mein jaane ke liye jinko sikhlaate hain unko naukri aadi sab chhuda dete hain। unhon ke paas list rehti hai। phir military ko koi refuse kar na saken ki ham maidaan par nahin jaayenge। drill sikhlaate hain ki jaroorat par bula lenge। refuse karne vaale par case chalaate hain। yahaan to woh baat nahin hai। yahaan phir jo achhi reeti service nahin karte hain to pad bhrashta ho jaata hai। service nahin karte goya aapehi apne ko shoot karte hain। pad bhrashta ho jaata hai। apni takdeer ko shoot kar dete hain। achhi reeti padhen, yog mein rahen to achha pad mile। apne par raham karna hota hai। apne par karen to doosre par bhi karen। baap har prakaar ki samjhaani dete rehte hain। yeh duniya ka naatak kaise chalta hai, to raajdhaani bhi sthaapan hoti hai। in baaton ko duniya nahin jaanti। ab nimantran to milte hain। 5-10 minute mein kya samjha sakenge। ek-do ghanta den to samjha bhi sakenge। drama ko to bilkul jaante nahin। points achhi-achhi jahaan-tahaan likh deni chaahiye। parantu bachche bhool jaate hain। baap creator bhi hai, tum bachchon ko create karte hain। apna banaaya hai, director ban direction bhi dete hain। shreemat dete aur phir act bhi karte hain। gyaan sunaate hain। yeh bhi unki oonch te oonch act hai na। drama ke creator, director aur mukhya actor ko na jaana to kya thahra? achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is amoolya jeevan mein padhaane vaale teacher ka bahut bahut regard rakhna hai, padhaai mein achha hoshiyaar ban service mein lagna hai। apne oopar aapehi raham karna hai।

2) apne aapko sudhaarne ke liye civilized banna hai। apne character sudhaarne hain। manushyon ko devta banaane ki seva karni hai।

vardaan:- sankalp aur bol ke vistaar ko saar mein laane vaale antarmukhi bhav

vyartha sankalpon ke vistaar ko samet kar saar roop mein sthit hona tatha mukh ke aavaaj ke vyartha ko samet kar samartha arthaat saar roop mein le aana-yahi hai antarmukhta। aise antarmukhi bachche hi silence ki shakti dvaara bhatakti hui aatmaon ko sahi thikaana dikha sakte hain। yeh silence ki shakti anek roohaani rangat dikhaati hai। silence ki shakti se har aatma ke man ka aavaaj itna sameep sunaai deta hai jaise koi sammukh bol raha hai।

slogan:- svabhaav, sanskaar, sambandh, samparka mein light rehna arthaat pharishta banna।