Murli du jour du lundi 19 octobre 2020

19-10-2020 praatahmurli om shanti "baapdaada"' madhuban

“meethe bachche - tumhein abhi bahut-bahut saadhaaran rehna hai, fashionable oonche kapde pahanne se bhi deh-abhimaan aata hai''

prashn:- takdeer mein oonch pad nahin hai to kis baat mein bachche susti karte hain?

uttar:- baba kehte bachche apna sudhaar karne ke liye chart rakho। yaad ka chart rakhne mein bahut phaayda hai। note book sada haath mein ho। check karo kitna samay baap ko yaad kiya? hamaara register kaisa hai? daivi character hai? karma karte baba ki yaad rehti hai? yaad se hi kat utregi, oonch takdeer banegi।

geet:- bholenaath se niraala…

om shanti। meethe-meethe bachchon paas yeh lakshmi-naaraayan ka chitra ghar mein zaroor hona chaahiye। inko (lakshmi-naaraayan ko) dekh bahut khushi honi chaahiye kyonki tumhaara yeh hai padhaai ka em object। tum jaante ho ham student hain aur eeshvar padhaate hain। eeshvareey student va vidyaarthi hain, ham yeh padhte hain। sabke liye yeh ek hi uddeshya hai। inko dekhte bahut khushi honi chaahiye। geet bhi bachchon ne suna। bahut bhola-naath hai। koi-koi shankar ko bholaanaath samajhte hain phir shiv aur shankar ko mila dete hain। abhi tum jaante ho vo shiv oonch se oonch bhagwan aur shankar devta phir donon ek kaise ho sakte hain। yeh bhi geet mein suna ki bhakton ki raksha karne vaale, zaroor bhakton par koi aapdaayen hain। 5 vikaaron ki aapdaayen sabke oopar hain। bhagat bhi sab hain। gyaani kisko nahin kaha ja sakta। gyaan aur bhakti bilkul alag cheez hai। jaise shiv aur shankar alag hain। jab gyaan milta hai to phir bhakti nahin rehti। tum sukhdhaam ke maalik bante ho। aadhaakalpa ke liye sadgati mil jaati hai। ek hi ishaare se tum aadhaakalpa ka varsa pa lete ho। dekhte ho bhakton ke oopar kitni takleeph hai। gyaan se tum devta ban jaate ho phir jab bhakton par bheed hoti hai arthaat duhkh hota hai tab baap aate hain। baap samjhaate hain drama anusaar jo past hua so phir repeat hona hai। phir bhakti shuru hoti hai to vaam maarga shuru hota hai arthaat patit banne ka maarga। usmein bhi number one hai kaam, jiske liye hi kaha jaata hai kaam par jeet paane se tum jagatjeet banenge। woh koi jeet thode hi paate hain। raavanraajya mein vikaar ke bigar to koi ka bhi shareer paida nahin hota, satayug mein raavan raajya hota nahin। vahaan bhi agar raavan hota to baaki bhagwan ne raamraajya sthaapan karke kya kiya? baap ko kitna ona rehta hai। hamaare bachche sukhi rahen। dhan ikattha karke bachchon ko de dete hain ki sukhi rahen। parantu yahaan to aise ho nahin sakta। yeh hai hi duhkh ki duniya। yeh behad ka baap kehte hain tum vahaan janma-janmaantar sukh bhogte aayenge। athaah dhan mil jaata hai, 21 janma vahaan koi duhkh nahin hoga। devaala nahin maarenge। yeh baaten buddhi mein dhaaran kar aantarik badi khushi rahni chaahiye। tumhaara gyaan aur yog saara gupta hai। sthool hathiyaar aadi kuchh nahin hain। baap samjhaate hain yeh hai gyaan talvaar। unhonne phir sthool hathiyaar nishaaniyaan deviyon ko de di hain। shaastra aadi jo padhte hain vo log kabhi aise nahin kehte ki yeh gyaan talvaar hai, yeh gyaan khadag hai। yeh behad ka baap hi baith samjhaate hain। woh samajhte hain shakti sena ne jeet paai hai to zaroor koi hathiyaar honge। baap aakar yeh sab bhoolen bataate hain। yeh tumhaari baat bahut dher manushya sunenge। vidvaan aadi bhi ek din aayenge। behad ka baap hai na। tum bachchon ko shreemat par chalne mein hi kalyaan hai tab deh-abhimaan tootega, isliye saahookaar log aate nahin hain। baap kehte hain deh ahankaar ko chhodo। achhe kapde aadi ka bhi nasha rehta hai। tum abhi vanvaah mein ho na। abhi jaate ho sasur ghar। vahaan tumko bahut jevar pahnaayenge। yahaan oonche kapde nahin pahanne hain। baap kehte hain bilkul saadhaaran rehna hai। jaise karma main karta hoon, bachchon ko bhi saadhaaran rehna hai। nahin to deh ka abhimaan aa jaata hai। woh sab bahut nuksaan kar dete hain। tum jaante ho ham sasur ghar jaate hain। vahaan hamko bahut jevar milenge। yahaan tumko jevar aadi nahin pahanne hain। aajkal chori aadi kitni hoti hain। raaste mein hi daaku loot lete hain। din pratidin yeh hangaama aadi jyaada badhta jaayega isliye baap kehte hain apne ko aatma samajh mujhe yaad karo। deh-abhimaan mein aane se baap ko bhool jaayenge। yeh mehnat abhi hi milti hai। phir kabhi bhakti maarga mein yeh mehnat nahin milti।

abhi tum sangam par ho। tum jaante ho baap aate hi hain purooshottam sangamayug par। ladaai bhi zaroor hogi। atomic bombs aadi khoob banaate rehte hain। kitna bhi maatha maaro ki yeh banda ho jaae parantu aise ho nahin sakta। drama mein noondh hai। samjhaane se bhi samjhenge nahin। maut hona hi hai to banda kaise hoga। samajhte bhi hain to bhi banda nahin karenge। drama mein noondh hai। yaadvon aur kaurvon ko khalaas hona hi hai। yaadav hain yooropvaasi। unhon ka hai science ghamanda, jisse vinaash hota hai। phir jeet hoti hai silence ghamanda ki। tumko shanti ghamanda mein rehna (shant swaroop rehna) sikhaaya jaata hai। baap ko yaad karo - dead silence। ham aatma shareer se nyaari hain। shareer chhodne ke liye jaise ham purooshaartha karte hain, aise kabhi koi shareer chhodne ke liye purooshaartha karte hain kya? saari duniya dhoondhakar aao - koi hai jo bole - he aatma ab tumko shareer chhod jaana hai। pavitra bano। nahin to phir saza khaani padegi। saza kaun khaate hain? aatma। us samay saakshaatkaar hota hai। tumne yeh-yeh paap kiye hain, khaao saza। us samay feel hota hai। jaise janma-janmaantar ki saza milti hai। itna duhkh bhogna, baaki sukh ka balance kya raha। baap kehte hain - abhi koi paap karma nahin karo। apna register rakho। har ek school mein chaal-chalan ka register rakhte hain na। education minister bhi kahenge bhaarat ka character theek nahin hai। bolo, ham in (lakshmi-naaraayan) jaise characters banaate hain। yeh lakshmi-naaraayan ka chitra to sada saath mein hona chaahiye। yeh hai em object। ham aise bante hain। is aadi sanaatan devi-devta dharma ki ham sthaapna kar rahe hain shreemat par। yahaan chaal chalan ko sudhaara jaata hai। tumhaari yahaan kachahri bhi hoti hai। sab centres par bachchon ko kachahri karni chaahiye। roz bolo chart rakho to sudhaar hoga। kiski takdeer mein nahin hai to phir susti kar lete hain। chart rakhna bada achha hai।

tum jaante ho ham is 84 ke chakra ko jaanne se hi chakravarti raaja ban jaate hain। kitna sahaj hai aur phir pavitra bhi banna hai। yaad ki yaatra ka chart rakho, ismen tumko bahut phaayda hai। note book nahin nikaala to samjho - baba ko yaad nahin kiya। note book sada haath mein rakho। apna chart dekho - kitna samay baap ko yaad kiya। yaad bigar junk utar na sake। kat utaarne ke liye cheez ko ghaaslet mein daalte hain na। karma karte hue bhi baap ko yaad karna hai to purooshaartha ka phal mil jaayega। mehnat hai na। aise hi thode hi taaj rakh denge sir par। baba itna oonch pad dete hain, kuchh to mehnat karni hai। ismen haath paanv aadi kuchh bhi nahin chalaane hain। padhaai to bilkul sahaj hai। buddhi mein hai shivbaaba se brahma dvaara ham yeh ban rahe hain। kahaan bhi jaate ho to badge pada rahe। bolo, vaastav mein kot oph arms yeh hai। samjhaane ki badi royalty chaahiye। bahut meethaapan se samjhaana hai। kot oph arms par bhi samjhaana hai। preet buddhi aur vipreet buddhi kisko kaha jaata hai? tum baap ko jaante ho? laukik baap ko to god nahin kahenge। woh behad ka baap hi patit-paavan, sukh ka saagar hai। unse hi sukh ghanere milte hain। agyaan kaal mein samajhte hain maa-baap sukh dete hain। sasurghar bhej dete hain। ab tumhaara hai behad ka sasurghar। woh hai had ka। woh maa-baap karke 5-7 laakh, karod denge। tumhaara to baap ne naam rakha hai padma padmapti banne vaale bachchon। vahaan to paise ki baat hi nahin। sab kuchh mil jaata hai। bade achhe-achhe mahal hote hain। janma-janmaantar ke liye tumko mahal milte hain। sudaama ka misaal hai na। chaaval mutthi suna hai to yahaan woh bhi le aate hain। ab chaaval rukha thode hi khaayenge। to unke saath kuchh masaale aadi bhi le aate hain। kitna prem se le aate hain। baba to hamko janma-janmaantar ke liye denge isliye kaha jaata hai daata। bhakti maarga mein tum eeshvar arth dete ho to alpakaal ke liye doosre janma mein mil jaata hai। koi gareebon ko dete hain, college banaate hain to doosre janma mein padhaai ka daan milta hai। dharmashaala banaate hain to makaan milta hai kyonki dharmashaala mein bahut aakar sukh paate hain। yeh to janma-janmaantar ki baat hai। tum jaante ho - shivbaaba ko jo dete hain woh sab hamaare hi kaam mein lagaate hain। shivbaaba to apne paas rakhte nahin hain। inko bhi kaha sab kuchh de do to vishwa ke maalik ban jaayenge। vinaash saakshaatkaar bhi karaaya, raajaai ka saakshaatkaar bhi karaaya। bas nasha chadh gaya। baba hamko vishwa ka maalik banaate hain। geeta mein bhi hai arjun ko saakshaatkaar karaaya। mujhe yaad karo to tum yeh banenge। vinaash aur sthaapna ka saakshaatkaar karaaya। to inko bhi shuru mein khushi ka paara chadh gaya। drama mein yeh part tha। bhaageerath ko bhi koi jaante thode hi hain। to tum bachchon ko yeh em object buddhi mein rahni chaahiye। ham yeh bante hain। jitna purooshaartha karenge utna oonch pad paayenge। gaaya jaata hai follow father। is samay ki baat hai। behad ka baap kehte hain main jo raay deta hoon us par follow karo। isne kya kiya so bhi bataate hain। unko saudaagar, ratnaagar, jaadoogar kehte hain na। baba ne achaanak hi sab kuchh chhod diya। pahle un ratnon ka jauhri tha, ab avinaashi gyaan ratnon ka jauhri bana। hell ko heaven banaana kitna bada jaadu hai। phir saudaagar bhi hai। bachchon ko kitna achha sauda dete hain। kakh-pan chaaval mutthi lekar mahal de dete hain। kitni achhi kamaai karaane vaala hai। javaahraat ke vyaapaar mein bhi aise hota hai। koi American graahak aata hai to unse 100 ki cheez ka 500, hazaar bhi le lenge। unse to bahut paise lete hain। tumhaare paas to sabse puraani cheej hai praacheen yog।

tumko ab bholaanaath baap mila hai। kitna bhola hai। tumko kya banaate hain। kakhpan ke badle tumko 21 janma ke liye kya bana dete hain। manushyon ko kuchh bhi pata nahin। kabhi kahenge bholaanaath ne yeh diya, kabhi kahenge amba ne diya, guru ne diya। yahaan to hai padhaai। tum eeshvareey paathshaala mein baithe ho। eeshvareey paathshaala kahenge geeta ko। geeta mein hai bhagvaanuvaach। parantu yeh bhi kisko pata nahin hai ki bhagwan kisko kaha jaata hai। koi se bhi poochho - parampita paramatma ko jaante ho? baap hai baagvaan। tumko kaanton se phool bana rahe hain। unko garden oph allaah kehte hain। european log bhi kehte hain paradise। barobar bhaarat paristaan tha, ab kabristaan hai। abhi phir tum paristaan ke maalik bante ho। baap aakar soye hue ko jagaate hain। yeh bhi tum jaante ho nambarvaar purooshaartha anusaar। jo khud jaag jaate hain to doosron ko bhi jagaate hain। nahin jagaate hain to goya khud jaga hua nahin hai। to baap samjhaate hain in geeton aadi ki bhi drama mein noondh hai। koi geet bahut achhe hain। jab tum udaas ho jaate ho to yeh geet bajaao to khushi mein aa jaayenge। raat ke raahi thak mat jaana - yeh bhi achha hai। ab raat poori hoti hai। manushya samajhte hain jitna bhakti karenge utna bhagwan jaldi milega। hanoomaan aadi ka saakshaatkaar hua to samajhte hain bhagwan mila। baap kehte hain yeh saakshaatkaar aadi ki sab drama mein noondh hai। jo bhaavna rakhte hain uska saakshaatkaar ho jaata hai। baaki aisa koi hota nahin hai। baap ne kaha hai yeh badge to sabko sadaiv pada rahe। kisma-kisma ke bante rehte hain। yeh bahut achha hai samjhaane ke liye।

tum roohaani military ho na। military ko hamesha nishaani rehti hai। tum bachchon ko bhi yeh hone se nasha rahega - ham yeh ban rahe hain। ham student hain। baba hamko manushya se devta bana rahe hain। manushya devtaaon ki pooja karte hain। devtaayen to devta ki pooja nahin karenge। yahaan manushya devtaaon ki pooja karte hain kyonki woh shreshtha hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) buddhi mein sada apni em object yaad rakhni hai। lakshmi-naaraayan ka chitra sada saath rahe, isi khushi mein raho ki ham aisa banne ke liye padh rahe hain, abhi ham hain godly student।

2) apna puraana kakhpan chaaval mutthi de mahal lene hain। brahma baap ko follow kar avinaashi gyaan ratnon ka jauhri banna hai।

vardaan:- ashareeri pan ke injection dvaara man ko control karne vaale ekaagrachitta bhav

jaise aajkal agar koi control mein nahin aata hai, bahut tang karta hai, uchhalta hai ya paagal ho jaata hai to unko aisa injection laga dete hain jo woh shant ho jaae। aise agar sankalp shakti aapke control mein nahin aati to ashreereepan ka injection laga do। phir sankalp shakti vyartha nahin uchhlegi। sahaj ekaagrachit ho jaayenge। lekin yadi buddhi ki lagaam baap ko dekar phir le lete ho to man vyartha ki mehnat mein daal deta hai। ab vyartha ki mehnat se chhoot jaao।

slogan:- apne poorvaz swaroop ko smriti mein rakh sarva aatmaon par raham karo।