Murli du jour du dimanche 25 octobre 2020

25-10-20 praatahmurli om shanti ''avyakt-baapdaada'' revise 09-04-86 madhuban

sachche sevaadhaari ki nishaani

aaj gyaan soorya, gyaan chandrama apne dharti ke taara mandal mein sabhi sitaaron ko dekh rahe hain। sitaare sabhi chamakte hue apni chamak va roshni de rahe hain। bhinna-bhinna sitaare hain। koi vishesh gyaan sitaare hain, koi sahaj yogi sitaare hain, koi gundaan moorta sitaare hain। koi nirantar sevaadhaari sitaare hain। koi sada sampanna sitaare hain। sabse shreshtha hain har second saphalta ke sitaare। saath-saath koi-koi sirf ummeedon ke sitaare bhi hain। kahaan ummeedon ke sitaare aur kahaan saphalta ke sitaare! donon mein mahaan antar hai। lekin hain donon sitaare aur har ek bhinna-bhinna sitaaron ka vishwa ki aatmaon par, prakriti par apna-apna prabhaav pad raha hai। saphalta ke sitaare chaaron or apna umang-utsaah ka prabhaav daal rahe hain। ummeedon ke sitaare svayan bhi kabhi muhabbat, kabhi mehnat donon prabhaav mein rahne kaaran doosron mein aage badhne ki ummeed rakh badhte ja rahe hain। to har ek apne aapse poochho ki main kaun-sa sitaara hoon? sabhi mein gyaan, yog, gunon ki dhaarna aur seva bhaav hai bhi lekin sab hote hue bhi kismen gyaan ki chamak hai to kismen vishesh yaad ki, yog ki hai। aur koi-koi apne gun-moorta ki chamak se vishesh aakarshit kar raha hai। chaaron hi dhaarna hote hue bhi percentage mein antar hai isliye bhinna-bhinna sitaare chamakte hue dikhaai de rahe hain। yeh roohaani vichitra taaraamandal hai। aap roohaani sitaaron ka prabhaav vishwa par padta hai। to vishwa ke sthool sitaaron ka bhi prabhaav vishwa par padta hai। jitna shaktishaali aap svayan sitaare bante ho utna vishwa ki aatmaon par prabhaav pad raha hai aur aage padta hi rahega। jaise jitna ghor andhiyaara hota hai to sitaaron ki rimjhim jyaada spashta dikhaai deti hai। aise apraapti ka andhakaar badhta ja raha hai aur jitna badhta ja raha hai, badhta jaayega utna hi aap roohaani sitaaron ka vishesh prabhaav anubhav karte jaayenge। sabhi ko dharti ke chamakte hue sitaare jyoti bindu ke roop mein prakaashmay kaaya pharishte ke roop mein dikhaai denge। jaise abhi aakaash ke sitaaron ke peechhe woh apna samay, energy aur dhan laga rahe hain। aise roohaani sitaaron ko dekh aashcharyavat hote rahenge। jaise abhi aakaash mein sitaaron ko dekhte hain, aise is dharti ke mandal mein chaaron or pharishton ki jhalak aur jyortimay sitaaron ki jhalak dekhenge, anubhav karenge - yeh kaun hain, kahaan se is dharti par apna chamatkaar dikhaane aaye hain। jaise sthaapna ke aadi mein anubhav kiya hai ki chaaron or brahma aur krishna ke saakshaatkaar ki lahar phailti gai। yeh kaun hai? yeh kya dikhaai deta hai? yeh samajhne ke liye bahuton ka attention gaya। aise ab ant mein chaaron or yeh donon roop “jyoti aur pharishta'' usmein baap-daada aur bachche sabki jhalak dikhaai degi। aur sabhi ka ek se anekon ka isi taraph svatah hi attention jaayega। abhi yeh divya drishya aap sabke sampanna banne tak raha hua hai। pharishte pan ki sthiti sahaj aur svatah anubhav karen tab woh saakshaat pharishte saakshaatkaar mein dikhaai denge। yeh varsha pharishtepan ki sthiti ke liye vishesh diya hua hai। kai bachche samajhte hain ki kya sirf yaad ka abhyaas karenge va seva bhi karenge va seva se mukta ho tapasya mein hi rahenge। baapdaada seva ka yathaartha arth suna rahe hain:-

sevaabhaav arthaat sada har aatma ke prati shubh bhaavna। shreshtha kaamna ka bhaav। seva bhaav arthaat har aatma ki bhaavna pramaan phal dena। bhaavna had ki nahin lekin shreshtha bhaavna। aap sevaadhaariyon prati agar koi roohaani sneh ki bhaavna rakhte, shaktiyon ke sahayog ki bhaavna rakhte, khushi ki bhaavna rakhte, shaktiyon ke praapti ki bhaavna rakhte, umang utsaah ki bhaavna rakhte, aise bhinna-bhinna bhaavna ka phal arthaat sahayog dvaara anubhooti karaana, to seva bhaav isko kaha jaata hai। sirf speech karke aa gaye, ya group samjhaakar aa gaye, course poora karaake aa gaye, va centre kholkar aa gaye, isko sevaabhaav nahin kaha jaata। seva arthaat kisi bhi aatma ko praapti ka meva anubhav karaana, aisi seva mein tapasya sada saath hai।

tapasya ka arth sunaaya - dridh sankalp se koi bhi kaarya karna। jahaan yathaartha seva bhaav hai vahaan tapasya ka bhaav alag nahin। tyaag, tapasya, seva in teenon ka combined roop sachchi seva hai, aur naamdhaari seva ka phal alpa-kaal ka hota hai। vahaan hi seva ki aur vahaan hi alpakaal ke prabhaav ka phal praapta hua aur samaapta ho gaya, alpakaal ke prabhaav ka phal alpakaal ki mahima hai - bahut achha bhaashan kiya, bahut achha course karaaya, bahut achhi seva ki। to achha-achha kahne ka alpa-kaal ka phal mila aur unko mahima sunne ka alpakaal ka phal mila। lekin anubhooti karaana arthaat baap se sambandh judvaana, shaktishaali banaana - yeh hai sachchi seva। sachchi seva mein tyaag tapasya na ho to yeh 50-50 vaali seva nahin, lekin 25 pratishat seva hai।

sachche sevaadhaari ki nishaani hai - tyaag arthaat namrata aur tapasya arthaat ek baap ke nishchay, nashe mein dridhta। yathaartha seva isko kaha jaata hai। baapdaada nirantar sachche sevaadhaari banne ke liye kehte hain। naam seva ho aur svayan bhi disturb ho, doosre ko bhi disturb kare - is seva se mukta hone ke liye baapdaada kah rahe hain। aisi seva na karna achha hai kyonki seva ka vishesh gun “santushtata'' hai। jahaan santushtata nahin, chaahe svayan se chaahe samparka vaalon se, woh seva na svayan ko phal ki praapti karaayegi, na doosron ko। isse svayan apne ko pahle santushtamni banaae phir seva mein aave, woh achha hai। nahin to sookshm bojh zaroor hai। woh anek prakaar ka bojh udti kala mein vighna roop ban jaata hai। bojh chadhaana nahin hai, bojh utaarna hai। jab aisa samajhte ho to isse ekaantavaasi banna achha hai kyonki ekaanta-vaasi banne se sva parivartan ka attention jaayega। to baapdaada tapasya jo kah rahe hain - woh sirf din raat baithe-baithe tapasya ke liye nahin kah rahe hain। tapasya mein baithna bhi seva hi hai। light house, might house ban shanti ki, shakti ki kirnon dvaara vaayumandal banaana hai। tapasya ke saath mansa seva judi hui hai। alag nahin hai। nahin to tapasya kya karenge! shreshtha aatma brahman aatma to ho gaye। ab tapasya arthaat svayan sarva shaktiyon se sampanna ban dridh sthiti, dridh sankalp dvaara vishwa ki seva karna। sirf vaani ki seva, seva nahin hai। jaise sukh-shanti pavitrata ka aapas mein sambandh hai vaise tyaag, tapasya, seva ka sambandh hai। baapdaada tapasvi roop arthaat shaktishaali sevaadhaari roop banaane ke liye kehte hain। tapasvi roop ki drishti bhi seva karti। unka shant swaroop chehra bhi seva karta, tapasvi moorta ke darshan maatra se bhi praapti ki anubhooti hoti hai isliye aajkal dekho jo hath se tapasya karte hain unke darshan ke peechhe bhi kitni bheed ho jaati hai। yeh aapki tapasya ke prabhaav ka yaadgaar ant tak chala aa raha hai। to samjha seva bhaav kisko kaha jaata hai। seva bhaav arthaat sarva ki kamjoriyon ko samaane ka bhaav। kamjoriyon ka saamna karne ka bhaav nahin, samaane ka bhaav। svayan sahan kar doosre ko shakti dene ka bhaav isliye sahanshakti kaha jaata hai। sahan karna shakti bharna aur shakti dena hai। sahan karna, marna nahin hai। kai sochte hain ham to sahan karte karte mar jaayenge। kya humein marna hai kya! lekin yeh marna nahin hai। yeh sab ke dilon mein sneh se jeena hai। kaisa bhi virodhi ho, raavan se bhi tej ho, ek baar nahin 10 baar sahan karna pade phir bhi sahanshakti ka phal avinaashi aur madhur hoga। woh bhi zaroor badal jaayega। sirf yeh bhaavna nahin rakho ki mainne itna sahan kiya, to yeh bhi kuchh karen। alpakaal ke phal ki bhaavna nahin rakho। raham bhaav rakho - isko kaha jaata hai “sevaabhaav''। to is varsha aisi sachchi seva ka saboot de sapoot ki list mein aane ka golden chance de rahe hain। is varsha yeh nahin dekhenge ki mela va function bahut achha kiya। lekin santushtamniyaan ban santushtata ki seva mein number aage jaana। “vighna-vinaashak'' title ke ceremony mein inaam lena। samjha! isi ko hi kaha jaata hai “nashtomoha smriti swaroop।'' to 18 varsha ki samaapti ka yeh vishesh sampanna banne ka adhyaay swaroop mein dikhaao। isko hi kaha jaata “baap samaan banna।'' achha!

sada chamakte hue roohaani sitaaron ko sada santushtata ki lahar phailaane vaali santushta maniyon ko, sada ek hi samay par tyaag, tapasya, seva ka prabhaav daalne vaale prabhaavshaali aatmaon ko, sada sarva aatmaon ko roohaani bhaavna ka roohaani phal dene vaale beej swaroop baap samaan shreshtha bachchon ko baap-daada ka sampanna banne ka yaadapyaar aur namaste।

panjaab tatha hariyaana zone ke bhaai-bahnon se avyakt baapdaada ki mulaakaat

sada apne ko achal adol aatmaayen anubhav karte ho? kisi bhi prakaar ki halchal mein achal rehna, yahi shreshtha brahman aatmaon ki nishaani hai। duniya halchal mein ho lekin aap shreshtha aatmaayen halchal mein nahin aa sakti। kyon? drama ki har scene ko jaante ho। knowledgeful aatmaayen, powerful aatmaayen sada svatah hi achal rehti hain। to kabhi vaayumandal se ghabraate to nahin hain! nirbhay ho? shaktiyaan nirbhay ho? ya thoda-thoda dar lagta hai? kyonki yeh to pahle se hi sthaapna ke samay se hi jaante ho ki bhaarat mein civil vaar honi hi hai। yeh shuru ke chitron mein hi aapka dikhaaya hua hai। to jo dikhaaya hai woh hona to hai na! bhaarat ka part hi civil war se hai isliye nothing new। to nothing new hai ya ghabra jaate ho? kya hua, kaise hua, yeh hua… samaachaar sunte dekhte bhi drama ki bani hui bhaavi ko shaktishaali ban dekhte aur auron ko bhi shakti dete - yahi kaam hai na aap sabka! duniya vaale ghabraate rehte aur aap un aatmaon mein shakti bharte। jo bhi samparka mein aaye, use shaktiyon ka daan dete chalo। shanti ka daan dete chalo।

abhi samay hai ashaanti ke samay shanti dene ka। to shanti ke messenger ho। shanti doot gaaye hue hain na! to kabhi bhi kahaan bhi rehte ho chalte ho, sada apne ko shanti ke doot samajhkar chalo। shanti ke doot hain, shanti ka sandesh dene vaale hai to svayan bhi shant swaroop shakti-shaali honge aur doosron ko bhi dete rahenge। woh ashaanti deven aap shanti do। woh aag lagaayen aap paani daalo। yahi kaam hai na। isko kehte hain sachche sevaadhaari। to aise samay par isi seva ki aavashyakta hai। shareer to vinaashi hai, lekin aatma shaktishaali hoti hai to ek shareer chhoot bhi jaata hai to doosre mein yaad ki praalabdha chalti rahegi isliye avinaashi praapti karaate chalo। to aap kaun ho? shanti ke doot। shanti ke messenger, master shanti daata, master shakti daata। yeh smriti sada rehti hai na! sada apne ko isi smriti se aage badhaate chalo। auron ko bhi aage badhaao yahi seva hai! government ke koi bhi niyam hote hain to unko paalan karna hi padta hai lekin jab thoda bhi samay milta hai to mansa se, vaani se seva zaroor karte raho। abhi mansa seva ki to bahut aavashyakta hai, lekin jab svayan mein shakti bhari hui hogi tab doosron ko de sakenge। to sada shaantidaata ke bachche shanti daata bano। daata bhi ho to vidhaata bhi ho। chalte-phirte yaad rahe - main master shanti daata, master shakti daata hoon - isi smriti se anek aatmaon ko vibration dete raho। tab woh mahsoos karenge ki inke samparka mein aane se shanti ki anubhooti ho rahi hai। to yahi vardaan yaad rakhna ki baap samaan master shanti daata, shakti daata banna hai। sabhi bahaadur ho na! halchal mein bhi vyartha sankalp nahin chale kyonki vyartha sankalp samartha banne nahin dega। kya hoga, yeh to nahin hoga... yeh vyartha hai। jo hoga usko shaktishaali hokar dekho aur doosron ko shakti do। yeh bhi sidescenes aati hain। yeh bhi ek by-plot chal raha hai। by-plat samajhkar dekho to ghabraayenge nahin। achha!

vidaai ke samay (amritvele)

yeh sangamayug ‘amritvela' hai। poora hi sangamayug amritvela hone ke kaaran is samay ki sada ke liye mahaanta gaai jaati hai। to poora hi sangamayug arthaat amritvela arthaat diamond morning। sada baap bachchon ke saath hai aur bachche baap ke saath hain isliye behad ki diamond morning। baapdaada sada kehte hi rehte hain lekin vyakta swaroop mein vyakta desh ke hisaab se aaj bhi sabhi bachchon ko sada saath rahne ki good morning kaho, golden morning kaho, diamond morning kaho jo bhi kaho woh baapdaada sabhi bachchon ko de rahe hain। svayan bhi diamond ho aur morning bhi diamond hai, aur bhi diamond banaane ki hai, isliye sada saath rahne ki good morning। achha!

vardaan:- paanchon tatvon aur paanchon vikaaron ko apna sevaadhaari banaane vaale maayaajeet svaraajya adhikaari bhav

jaise satayug mein vishwa mahaaraaja va vishwa mahaaraani ki raajaai dress ko peechhe se daas-daasiyaan uthaate hain, aise sangamayug par aap bachche jab maayaajeet svaraajya adhikaari ban titles roopi dress se saje sajaaye rahenge to ye 5 tatva aur 5 vikaar aapki dress ko peechhe se uthaayenge arthaat adheen hokar chalenge, iske liye dridh sankalp ki belt se titles ki dress ko tight karo, bhinna bhinna dress aur shrringaar ke set se saj-dhaj kar baap ke saath raho to yeh vikaar va tatva parivartan ho sahayogi sevaadhaari ho jaayenge।

slogan:- jin gunon va shaktiyon ka varnan karte ho unke anubhvon mein kho jaao। anubhav hi sabse badi authority hai।