Murli du jour du dimanche 6 décembre 2020

06-12-20 praatahmurli om shanti ''avyakt-baapdaada'' revise 20-02-87 madhuban

yaad, pavitrata aur sachche sevaadhaari ki teen rekhaaen

aaj sarva snehi, vishwa-sevaadhaari baap apne sada sevaadhaari bachchon se milne aaye hain। sevaadhaari baapdaada ko samaan sevaadhaari bachche sada priy hain। aaj vishesh, sarva sevaadhaari bachchon ke mastak par chamakti hui vishesh teen lakeeren dekh rahe hain। har ek ka mastak trimoorti tilak samaan chamak raha hai। yeh 3 lakeeren kiski nishaani hain? in teen prakaar ke tilak dvaara har ek bachche ke vartamaan result ko dekh rahe hain। ek hai sampoorn yogi jeevan ki lakeer। doosri hai pavitrata ki rekha va lakeer। teesri hai sachche sevaadhaari ki lakeer। teenon rekhaaon mein har bachche ki result ko dekh rahe hain। yaad ki lakeer sabhi ki chamak rahi hai lekin nambarvaar hai। kisi ki lakeer va rekha aadi se ab tak avyabhichaari arthaat sada ek ki lagna mein magna rahne vaali hai। doosri baat - sada atoot rahi hai? sada seedhi lakeer arthaat direct baap se sarva sambandh ki lagna sada se rahi hai va kisi nimitta aatmaon ke dvaara baap se sambandh jodne ke anubhvi hain? direct baap ka sahaara hai va kisi aatma ke sahaare dvaara baap ka sahaara hai? ek hain seedhi lakeer vaale, doosre hain beech-beech mein thodi tedhi lakeer vaale। yeh hain yaad ki lakeer ki visheshtaayen।

doosri hai sampoorn pavitrata ki lakeer va rekha। ismen bhi nambarvaar hain। ek hain brahman jeevan lete hi brahman jeevan ka, vishesh baap ka vardaan praapta kar sada aur sahaj is vardaan ko jeevan mein anubhav karne vaale। unhon ki lakeer aadi se ab tak seedhi hai। doosre - brahman jeevan ke is vardaan ko adhikaar ke roop mein anubhav nahin karte; kabhi sahaj, kabhi mehnat se, bahut purooshaartha se apnaane vaale hain। unhon ki lakeer sada seedhi aur chamakti hui nahin rehti hai। vaastav mein yaad va seva ki saphalta ka aadhaar hai - pavitrata। sirf brahmachaari banna - yeh pavitrata nahin lekin pavitrata ka sampoorn roop hai - brahmachaari ke saath-saath brahmaachaari banna। brahmaachaari arthaat brahma ke aachran par chalne vaale, jisko follow father kaha jaata hai kyonki follow brahma baap ko karna hai। shiv baap ke samaan sthiti mein banna hai lekin aachran va karma mein brahma baap ko follow karna hai। har kadam mein brahmachaari। brahmacharya ka vrat sada sankalp aur svapna tak ho। pavitrata ka arth hai - sada baap ko companion (saathi) banaana aur baap ki company mein sada rehna। companion bana diya? ‘baba mera' - yeh bhi aavashyak hai lekin har samay company bhi baap ki rahe। isko kehte hain sampoorn pavitrata। sangathan ki company, parivaar ke sneh ki maryaada, woh alag cheez hai, woh bhi aavashyak hai। lekin baap ke kaaran hi yeh sangathan ke sneh ki company hai - yeh nahin bhoolna hai। parivaar ka pyaar hai, lekin parivaar kiska? baap ka। baap nahin hota to parivaar kahaan se aata? parivaar ka pyaar, parivaar ka sangathan bahut achha hai lekin parivaar ka beej nahin bhool jaae। baap ko bhool parivaar ko hi company bana dete hain। beech-beech mein baap ko chhoda to khaali jagah ho gai। vahaan maaya aa jaayegi isliye sneh mein rehte, sneh dete-lete samooh ko nahin bhoolen। isko kehte hain pavitrata। samajhne mein to hoshiyaar ho na।

kai bachchon ko sampoorn pavitrata ki sthiti mein aage badhne mein mehnat lagti hai isliye beech-beech mein koi ko companion banaane ka bhi sankalp aata hai aur company bhi aavashyak hai - yeh bhi sankalp aata hai। sannyaasi to nahin banna hai lekin aatmaon ki company mein rehte baap ki company ko bhool nahin jaao। nahin to samay par us aatma ki company yaad aayegi aur baap bhool jaayega। to samay par dhokha milna sambhav hai kyonki saakaar shareerdhaari ke sahaare ki aadat hogi to avyakt baap aur niraakaar baap peechhe yaad aayega, pahle shareerdhaari yaad aayega। agar kisi bhi samay pahle saakaar ka sahaara yaad aaya to number one woh ho gaya aur doosra number baap ho gaya। jo baap ko doosre number mein rakhte to usko pad kya milega? number one ya tu? sirf sahayog lena, snehi rehna woh alag cheez hai, lekin sahaara banaana alag cheez hai। yeh bahut guhya baat hai। isko yathaartha reeti se jaanna pade। koi-koi sangathan mein snehi banne ke bajaae nyaare bhi ban jaate hain। darte hain na maaloom phans jaaen, isse to door rehna, theek hai। lekin nahin। 21 janma bhi pravritti mein, parivaar mein rehna hai na। to agar dar ke kaaran kinaara kar lete, nyaare ban jaate to woh karma-sannyaasi ke sanskaar ho jaate hain। karmayogi banna hai, karma-sannyaasi nahin। sangathan mein rehna hai, snehi banna hai lekin buddhi ka sahaara ek baap ho, doosra na koi। buddhi ko koi aatma ka saath va gun va koi visheshta aakarshit nahin kare, isko kehte hain pavitrata।

pavitrata mein mehnat lagti - isse siddha hai vardaata baap se janma ka vardaan nahin liya hai। vardaan mein mehnat nahin hoti। har brahman aatma ko brahman janma ka pahla vardaan - ‘pavitra bhav, yogi bhav' ka mila hua hai। to apne se poochho - pavitrata ke vardaani ho ya mehnat se pavitrata ko apnaane vaale ho? yeh yaad rakho ki hamaara brahman janma hai। sirf jeevan parivartan nahin lekin brahman janma ke aadhaar par jeevan ka parivartan hai। janma ke sanskaar bahut sahaj aur svatah hote hain। aapas mein bhi kehte ho na - mere janma se hi aise sanskaar hain। brahman janma ka sanskaar hai hi ‘yogi bhav, pavitra bhav'। vardaan bhi hai, niji sanskaar bhi hai। jeevan mein do cheejen hi aavashyak hain। ek - companion, doosri - company, isliye trikaaldarshi baap sabhi ki aavashyaktaaon ko jaan companion bhi badhiya, company bhi badhiya dete hain। vishesh double videshi bachchon ko donon chaahiye isliye baapdaada ne brahman janma hote hi companion ka anubhav kara liya, suhaagin bana diya। janmate hi companion mil gaya na? companion mil gaya hai va dhoondh rahe ho? to pavitrata niji sanskaar ke roop mein anubhav karna, isko kehte hain shreshtha lakeer athva shreshtha rekha vaale। foundation pakka hai na?

teesri lakeer hai sachche sevaadhaari ki। yeh sevaadhaari ki lakeer bhi sabhi ke mastak par hai। seva ke bina bhi rah nahin sakte। seva brahman jeevan ko sada nirvighna banaane ka saadhan bhi hai aur phir seva mein hi vighnon ka paper bhi jyaada aata hai। nirvighna sevaadhaari ko sachche sevaadhaari kaha jaata hai। vighna aana, yeh bhi drama ki noondh hai। aane hi hain aur aate hi rahenge kyonki yeh vighna ya paper anubhvi banaate hain। isko vighna na samajh, anubhav ki unnati ho rahi hai - is bhaav se dekho to unnati ki seedhi anubhav hogi। isse aur aage badhna hai kyonki seva arthaat sangathan ka, sarva aatmaon ki dua ka anubhav karna। seva ke kaarya mein sarva ki duaayen milne ka saadhan hai। is vidhi se, is vritti se dekho to sada aise anubhav karenge ki anubhav ki authority aur aage badh rahi hai। vighna ko vighna nahin samjho aur vighna arth nimitta bani hui aatma ko vighnakaari aatma nahin samjho, anubhvi banaane vaale shikshak samjho। jab kehte ho ninda karne vaale mitra hain, to vighnon ko paas karaake anubhvi banaane vaala shikshak hua na। paath padhaaya na। jaise aajkal ke jo beemaariyon ko hataane vaale doctors hain, woh exercise (vyaayaam) karaate hain, to exercise mein pahle darda hota hai, lekin woh darda sada ke liye bedarda banaane ke nimitta hota hai, jisko yeh samajh nahin hoti hai woh chillaate hain, isne to aur hi darda kar liya। lekin is darda ke andar chhipi hui dava hai। is prakaar roop bhal vighna ka hai, aapko vighnakaari aatma dikhaai padti lekin sada ke liye vighnon se paar karaane ke nimitta, achal banaane ke nimitta vahi bante isliye sada nirvighna sevaadhaari ko kehte hain sachche sevaadhaari। aise shreshtha lakeer vaale sachche sevaadhaari kahe jaate hain।

seva mein sadaiv svachchha buddhi, svachchha vritti aur svachchha karma saphalta ka sahaj aadhaar hai। koi bhi seva ka kaarya jab aarambha karte ho to pahle yeh check karo ki buddhi mein kisi aatma ke prati bhi svachchhata ke bajaae agar beeti hui baaton ki jara bhi smriti hogi to usi vritti, drishti se unko dekhna, unse bolna hota। to seva mein jo svachchhata se sampoorn saphalta honi chaahiye, woh nahin hoti। beeti hui baaton ko va vrittiyon aadi sabko samaapta karna - yeh hai svachchhata। beeti ka sankalp bhi karna kuchh percentage mein halka paap hai। sankalp bhi srishti bana deta hai। varnan karna to aur badi baat hai lekin sankalp karne se bhi puraane sankalp ki smriti srishti athva vaayumandal bhi vaisa bana deti hai। phir kah dete - ‘mainne jo kaha tha na, aise hi hua na'। lekin hua kyon? aapke kamjor, vyartha sankalp ne yeh vyartha vaayumandal ki srishti banaai, isliye sada sachche sevaadhaari arthaat puraane vibration ko samaapta karne vaale। jaise science vaale shastra se shastra ko khatma kar dete hain, ek vimaan se doosre vimaan ko gira dete hain। yuddha karte hain to samaapta kar dete hain na। to aapka shuddh vibration, shuddh vibration ko emerge kar sakta hai aur vyartha vibration ko samaapta kar sakta hai। sankalp, sankalp ko samaapta kar sakta hai। agar aapka powerful (shaktishaali) sankalp hai to samartha sankalp vyartha ko khatma zaroor karega। samjha? seva mein pahle svachchhata arthaat pavitrata ki shakti chaahiye। yeh teen lakeeren chamakti hui dekh rahe hain।

seva ke visheshta ki aur anek baaten suni bhi hain। sab baaton ka saar hai - nihsvaartha, nirvikalp sthiti se seva karna saphalta ka aadhaar hai। isi seva mein hi svayan bhi santushta aur harshit rehte aur doosre bhi santushta rehte। seva ke bina sangathan nahin hota। sangathan mein bhinna-bhinna baaten, bhinna-bhinna vichaar, bhinna-bhinna tareeke, saadhan - yeh hona hi hai। lekin baaten aate bhi, bhinna-bhinna saadhan sunte hue bhi svayan sada anek ko ek baap ki yaad mein milaane vaale, ekras sthiti vaale raho। kabhi bhi anekta mein moonjho nahin - ab kya karen, bahut vichaar ho gaye hain, kiska maanen, kiska na maanen? agar nihsvaartha, nirvikalp bhaav se nirnay karenge to kabhi kisi ko kuchh vyartha sankalp nahin aayega kyonki seva ke bina bhi rah nahin sakte, yaad ke bina bhi rah nahin sakte isliye seva ko bhi badhaate chalo। svayan ko bhi sneh, sahayog aur nihsvaartha bhaav mein badhaate chalo। samjha?

baapdaada ko khushi hai ki desh-videsh mein chhote-bade sabhi ne umang-utsaah se seva ka saboot diya। videsh ki seva ka bhi saphaltaapoorvak kaarya sampanna hua aur desh mein bhi sabhi ke sahayog se sarva kaarya sampanna hue, saphal hue। baapdaada bachchon ke seva ki lagna ko dekh harshit hote hain। sabhi ka lakshya baap ko pratyaksha karne ka achha raha aur baap ke sneh mein mehnat ko muhabbat mein badal kaarya ka pratyakshaphal dikhaaya। sabhi bachche vishesh seva ke nimitta aaye hue hain। baapdaada bhi ‘vaah bachche! vaah!' ke geet gaate hain। sabhi ne bahut achha kiya। kisi ne kiya, kisi ne nahin kiya, yeh hai nahin। chaahe chhote sthaan hain va bade sthaan hain, lekin chhote sthaan vaalon ne bhi kam nahin kiya isliye, sarva ki shreshtha bhaavnaaon aur shreshtha kaamnaaon se kaarya achhe rahe aur sada achhe rahenge। samay bhi khoob lagaaya, sankalp bhi khoob lagaaye, plan banaaya to sankalp kiya na। shareer ki shakti bhi lagaai, dhan ki shakti bhi lagaai, sangathan ki shakti bhi lagaai। sarva shaktiyon ki aahutiyon se seva ka yagya donon taraph (desh aur videsh) saphal hua। bahut achha kaarya raha। theek kiya va nahin kiya - yeh question hi nahin। sada theek raha hai aur sada theek rahega। chaahe multi miliyan pees ka kaarya kiya, chaahe golden jubilee ka kaarya kiya - donon hi kaarya sundar rahe। jis vidhi se kiya, woh vidhi bhi theek hai। kahaan-kahaan cheez ki value badhaane ke liye parde ke andar woh cheez rakhi jaati hai। parda aur hi value ko badha deta hai aur jigyaasa utpanna hoti hai ki dekhen kya hai, parde ke andar hai to zaroor kuchh hoga। lekin yahi parda pratyakshata ka parda ban jaayega। abhi dharni bana li। dharni mein jab beej daala jaata hai vo andar chhipa hua daala jaata hai। beej ko baahar nahin rakhte, andar chhipaakar rakhte hain। aur phal va vriksha gupta beej ka hi swaroop pratyaksha hota। to ab beej daala hai, vriksha baahar stage par svatah hi aata jaayega।

khushi mein naach rahe ho na? ‘vaah baba'! to kehte ho lekin vaah seva! bhi kehte ho। achha। samaachaar to sab baapdaada ne sun liya। is seva se jo desh-videsh ke sangathan se varga ki seva hui, yeh chaaron or ek hi samay ek hi aavaaj bulanda hone ya phailne ka saadhan achha hai। aage bhi jo bhi programme karo, lekin ek hi samay desh-videsh mein chaaron or ek hi prakaar ki seva kar phir seva ka phalasvaroop madhuban mein sangathit roop mein ho। chaaron or ek lahar hone kaaran sab mein umang-utsaah bhi hota hai aur chaaron or roohaani race hoti, (rees nahin) ki ham aur jyaada se jyaada seva ka saboot den। to is umang se chaaron or naam bulanda ho jaata hai isliye kisi bhi varga ka banaao lekin chaaron or saara varsha ek hi roop-rekha ki seva ki taraph attention ho। to un aatmaon ko bhi chaaron or ka sangathan dekh umang aata hai, aage badhne ka chance milta hai। is vidhi se plan banaate, badhte chalo। pahle apni-apni area mein un varga ki seva kar chhote-chhote sangathan ke roop mein programme karte raho aur us sangathan se phir jo vishesh aatmaayen hon, unko is bade sangathan ke liye taiyaar karo। lekin har centre ya aaspaas ke milkar karo kyonki kai yahaan tak nahin pahunch sakte to vahaan par bhi sangathan ka jo programme hota, usse bhi unhon ko laabh hota hai। to pahle chhote-chhote ‘sneh milan' karo, phir zone ko milaakar sangathan karo, phir madhuban ka bada sangathan ho। to pahle se hi anubhvi ban karke phir yahaan tak bhi aayenge। lekin desh-videsh mein ek hi topic ho aur ek hi varga ke hon। aise bhi topics hote hain jismen do-chaar varga bhi mil sakte hain। topic vishaal hai to do-teen varga ke bhi usi topic beech aa sakte hain। to abhi desh-videsh mein dharma satta, raajya satta aur science ki satta - teenon ke saimpalsa taiyaar karo। achha।

sarva pavitrata ke vardaan ke adhikaari aatmaon ko, sada ekras, nirantar yogi jeevan ke anubhvi aatmaon ko, sada har sankalp, har samay sachche sevaadhaari banne vaali shreshtha aatmaon ko vishwa-snehi, vishwa-sevaadhaari baap-daada ka yaadapyaar aur namaste।

vardaan:- combined swaroop ki smriti dvaara abhul banne vaale nirantar yogi bhav

jo bachche svayan ko baap ke saath combined anubhav karte hain unhein nirantar yogi bhav ka vardaan svatah mil jaata hai kyonki vo jahaan bhi rehte hain milan mela hota rehta hai। unhein koi kitna bhi bhulaane ki koshish kare lekin ve abhul hote hain। aise abhul bachche jo baap ko ati pyaare hain vahi nirantar yogi hain kyonki pyaar ki nishaani hai - svatah yaad। unke sankalp roopi naakhoon ko bhi maaya hila nahin sakti।

slogan:- kaaran sunaane ke bajaae uska nivaaran karo to duaaon ke adhikaari ban jaayenge।