Murli du jour du dimanche 20 juin 2021

20-06-21 praatahmurli om shanti ''avyakt-baapdaada'' revise 22-01-88 madhuban

himmat ka pahla kadam - samarpanta (brahma baap ki jeevan kahaani)

aaj sneh ke saagar baapdaada apne snehi bachchon ko dekh harshit ho rahe hain। har ek snehi aatmaon ko ek hi lagna hai, shreshtha sankalp hai ki ham sabhi baap samaan banen, sneh mein sama jaayen। sneh mein sama jaana arthaat baap samaan banna। sabhi ki dil mein yeh dridh sankalp hai ki humein baapdaada dvaara praapta hue sneh, shaktishaali paalna aur akhut avinaashi khazaanon ka return avashya karna hai। return mein kya denge? sivaae dil ke sneh ke aapke paas aur hai hi kya? jo bhi hai woh baap ka diya hua hi hai, woh kya denge। baap samaan banna - yahi return hai aur yeh sabhi kar sakte ho।

baapdaada dekh rahe the ki aajkal sabhi ke dil mein vishesh brahma baap ki smriti jyaada emerge hai। smriti shareer ki nahi hai lekin charitron ke visheshtaaon ki smriti hai kyonki alaukik brahman jeevan gyaan-swaroop jeevan hai, gyaanasvarup hone ke kaaran deh ki smriti bhi duhkh ki lahar nahin laayegi। agyaani jeevan mein kisi ko bhi yaad karenge to saamne deh aayegi, deh ke sambandh ke kaaran duhkh mahsoos hoga। lekin aap brahman bachchon ko baap ki smriti aate samarthi aa jaati hai ki humein bhi “baap samaan'' banna hi hai। alaukik baap ki smriti samarthi arthaat shakti dilaati hai। chaahe koi-koi bachche dil ka sneh naynon ke motiyon dvaara bhi pragat karte hain lekin duhkh ke aasu nahin, viyog ke aansu nahin, yeh sneh ke moti hain। dil ke milan ka sneh hai। viyogi nahin lekin raajayogi hain kyonki dil ka sachcha sneh shakti dilaata hai ki jaldi se jaldi pahle main baap ka return doon। return dena arthaat samaan banna। is vidhi se hi apne snehi baapdaada ke saath sweet hom mein return honge arthaat saath vaapas jaayenge। return karna bhi hai aur baap ke saath return jaana bhi hai isliye aapka sneh va yaad duniya se nyaara aur baap ka pyaara banne ka hai।

to baapdaada bachchon ke samartha banne ka sankalp, samaan banne ka umang dekh rahe the। brahma baap ki visheshtaaon ko dekh rahe the। agar brahma baap ki visheshtaaon ka varnan karen to kitni hongi? har kadam mein visheshtaayen raheen। sankalp mein bhi sarva ko vishesh banaane ka har samay umang-utsaah raha। apni vritti dvaara har aatma ko umang-utsaah mein laana - yeh visheshta sada hi pratyaksha roop mein dekhi। vaani dvaara himmat dilaane vaale, naaummeed ko ummeed mein laane vaale, nirbal aatma ko udti kala ki vidhi se udaane vaale, seva ke yogya banaane vaale, har bol anmol, madhur, yukti-yukta the। aise hi karma mein bachchon ke saath har karma mein saathi ban karmayogi banaaya। sirf saakshi hokar dekhne vaale nahin lekin sthool karma ke mahatva ko anubhav karaane ke liye karma mein bhi saathi bane। jo karma main karoonga, mujhe dekh bachche svatah hi karenge - is paath ko sada karma karke padhaaya। sambandh-samparka mein chhote bachchon ko bhi sambandh se bachchon samaan ban khush kiya। vaanaprastha ko bhi vaanaprastha roop se anubhvi ban sambandh-samparka se sada umang-utsaah mein laaya। baal se baal roop, yuva se yuva roop aur bujurga se bujurga roop ban sada aage badhaaya, sada sambandh-samparka se harek ko apnaapan anubhav karaaya। chhota bachcha bhi kahega ki “jitna mujhe baba pyaar karta, utna kisko nahin karta!'' to har ek ko itna pyaar diya jo harek samjhe ki baba mera hai। yeh hai sambandh-samparka ki visheshta। dekhne mein har ek aatma ki visheshta va gun ko dekhna। sochne mein dekho, sada jaante hue ki yeh last number ke daane hain lekin aisi aatma ke prati bhi sada aage badhen - aisa har aatma prati shubh chintak rahe। aisi visheshtaayen sabhi bachchon ne anubhav keen। in sabhi baaton mein samaan banna arthaat follow father karna hai। yeh follow karna koi mushkil hai kya? isi ko hi sneh, isi ko hi return dena kaha jaata hai।

to baapdaada dekh rahe the ki har ek bachche ne abhi tak kitna return kiya hai? lakshya to sabhi ka hai lekin pratyaksha jeevan mein hi number hai। sabhi number one banna chaahte hain। do-teen number banna koi pasanda nahin karenge। yeh bhi lakshya shaktishaali achha hai lekin lakshya aur lakshan samaan hona - yahi samaan banna hai। iske liye jaise brahma baap ne pahla kadam himmat ka kaun-sa uthaaya jis kadam se hi padmaapadma bhaagyavaan aadi se anubhav kiya? pahla kadam himmat ka - sab baat mein samarpanta। sab kuchh samarpan kiya। kuchh socha nahin ki kya hoga, kaise hoga। ek second mein baap ki shreshtha mat pramaan baap ne eeshaara diya, baap ka eeshaara aur brahma ka karma va kadam। isko kehte hain himmat ka pahla kadam। tan ko bhi samarpan kiya। man ko bhi sada manmanaabhav ki vidhi se siddhi-swaroop banaaya isliye man arthaat har sankalp siddha arthaat saphalta swaroop banen। dhan ko bina koi bhavishya ki chinta ke nishchinta ban dhan samarpit kiya kyonki nishchay tha ki yeh dena nahin hai lekin padmaguna lena hai। aise sambandh ko bhi samarpit kiya arthaat laukik ko alaukik sambandh mein parivartan kiya। chhoda nahin, kalyaan kiya, parivartan kiya। main-pan ki buddhi, abhimaan ki buddhi samarpit ki isliye sada tan, man, buddhi se nirmal, sheetal, sukhdaai ban gaye। kaise bhi laukik parivaar se va duniya ki anjaan aatmaon se paristhitiyaan aai lekin sankalp mein bhi, svapna mein bhi kabhi sanshay ke sookshm swaroop “sankalpamaatra'' ki halchal mein nahin aaye।

brahma ki vishesh is baat ki kamaal rahi jo aap sabke aage saakaar roop mein brahma baap example tha lekin brahma ke aage koi saakaar example nahin tha। sirf atal nishchay, baap ki shreemat ka aadhaar raha। aap logon ke liye to bahut sahaj hai! aur jitna jo peechhe aaye hain, unke liye aur sahaj hai! kyonki anek aatmaon ke parivartan ki shreshtha jeevan aapke aage example hai। yeh karna hai, banna hai - clear hai। isliye aap logon ko “kyoon, kya'' ka question uthne ki margin nahin hai। sab dekh rahe ho। lekin brahma ke aage question uthne ki margin thi। kya karna hai, aage kya hona hai, right kar raha hoon va wrong kar raha hoon - yeh sankalp uthna sambhav tha lekin sambhav ko asambhav banaaya। ek bal ek bharosa - isi aadhaar se nishchaybuddhi number one vijayi ban gaye। isi samarpanta ke kaaran buddhi sada halki rahi, buddhi par bojh nahin raha। man nishchinta raha। chehre par sada hi bephikar baadshaah ke chinha spashta dekhe। 350 bachche aur khaane ke liye aata nahin aur time par bachchon ko khaana khilaana hai! to socho, aisi haalat mein koi bephikar rah sakta hai? ek baje bel (ghanti) bajna hai aur 11.00 baje tak aata nahin, kaun bephikar rah sakta? aisi haalat mein bhi harshit, achal raha। yeh baap ki jimmevaari hai, meri nahin hai, main baap ka to bachche bhi baap ke hain, main nimitta hoon - aisa nishchay aur nishchinta kaun rah sakta? man-buddhi se samarpit aatma। agar apni buddhi chalaate ki pata nahin kya hoga! sab bhookhe to nahin rah jaayenge, yeh to nahin hoga, woh to nahin hoga! aise vyartha sankalp va sanshay ki margin hote hue bhi samartha sankalp chale ki sada baap rakshak hai, kalyaankaari hai। yeh visheshta hai samarpanta ki। to jaise brahma baap ne samarpan haane se pahla kadam “himmat'' ka uthaaya, aise follow father karo। nishchay ki vijay avashya hoti hai। to time par aata bhi aa gaya, bel bhi baj gaya aur paas ho gaye। isko kehte hain question mark arthaat tedha raasta na le sada kalyaan ki bindi lagaao। full-stop। isi vidhi se hi sahaj bhi hoga aur siddhi bhi praapta hogi। to yeh thi brahma ki kamaal। aaj pahla ek kadam sunaaya hai, phikar ke bojh se bhi bephikar ban jaao। isko hi kaha jaata hai sneh ka return karna। achha!

sada har kadam mein baap ko follow karne vaale, har kadam mein sneh ka return karne vaale, sada nishchaybuddhi ban, nishchinta bephikar baadshaah rahne vaale, man-vaani-karma-sambandh mein baap samaan banne vaale, sada shubhchintak, sada har ek ki visheshta dekhne vaale, har aatma ko sada aage badhaane vaale, aise baap samaan bachchon ko snehi baap ka sneh sampanna yaadapyaar aur namaste।

party se mulaakaat :-

1. apne ko oonche te oonche baap ki oonche te oonchi brahman aatmaayen samajhte ho? brahman sabse oonche gaaye jaate hain, oonche ki nishaani sada braahmanon ko choti dikhaate hain। duniya vaalon ne naam-dhaari braahmanon ki nishaani choti dikha di hai। to choti rakhne vaale nahin lekin choti ki sthiti mein rahne vaale। unhonne sthool nishaani dikha di hai, vaastav mein hai oonchi sthiti mein rahne vaale। braahmanon ko hi purushottam kaha jaata hai। purushottam arthaat purushon se uttam, saadhaaran manushyaatmaaon se uttam। aise purushottam ho na। purush aatma ko bhi kehte hain, shreshtha aatma banne vaale arthaat purushon se uttam purush banne vaale। devtaaon ko bhi purushottam kehte hain kyonki dev-aatmaayen hain। aap dev-aatmaon se bhi oonche brahman ho - yeh nasha sada rahe। doosre nashe ke liye kahenge - kam karo, roohaani nashe ke liye baap kehte hain - badhaate chalo kyonki yeh nasha nuksaan vaala nahin hai, aur sabhi nashe nuksaan vaale hain। yeh chadhaane vaala hai, woh giraane vaale hain। agar roohaani nasha utar gaya to puraani duniya ki smriti aa jaayegi। nasha chadha hua hoga to nai duniya ki smriti rahegi। yeh brahman sansaar bhi naya sansaar hai। satayug se bhi yeh sansaar ati shreshtha hai! to sada is smriti se aage badhte chalo।

2. sada apne ko vishwa-rachta baap ki shreshtha rachna anubhav karte ho? brahman jeevan arthaat vishwa-rachta ki shreshtha rachna। har ek direct baap ki rachna hai - yeh nasha hai? duniya vaale to sirf anjaan banke kehte hain ki hamko bhagwan ne paida kiya hai। aap sabhi bhi pahle anjaan hokar kehte the lekin abhi jaante ho ki ham shivvanshi brahmaakumaar/kumaari hain। to abhi gyaan ke aadhaar se, samajh se kehte ho ki hamko bhagwan ne paida kiya hai, ham mukh vanshaavli hain। direct baap ne brahma dvaara rachna rachi hai। to baapdaada va maat-pita ki rachna ho। direct bhagwan ki rachna - yeh abhi anubhav se kah sakte ho। to bhagwan ki rachna kitni shreshtha hogi! jaisa rachayita vaisi rachna hogi na। yeh nasha aur khushi sada rehti hai? apne ko saadhaaran to nahin samajhte ho? yeh raaz jab buddhi mein aa jaata hai to sada hi roohaani nasha aur khushi chehre par va chalan mein svatah hi rehti hai। aapka chehra dekh karke kisko anubhav ho ki sachmuch yeh shreshtha rachta ki rachna hain। jaise raaja ki raajkumaari hogi to uski chalan se pata chalega ki yeh royal ghar ki hai। yeh saahookaar ghar ki ya yeh saadhaaran ghar ki hai। aise aapke chalan se, chehre se anubhav ho ki yeh oonchi rachna hai, oonche baap ke bachche hain!

kumaariyon se:- kanyaayen 100 braahmanon se uttam gaai hui hai yeh mahima kyon hain? kyonki jitna svayan shreshtha honge, utna hi auron ko bhi shreshtha bana sakenge। to shreshtha aatmaayen hain - yeh khushi rehti hai? to kumaariyaan sevaadhaari ban seva mein aage badhte chalo kyonki yeh sangamayug hai hi thode samay ka yug, ismen jitna jo karne chaahe, utna kar sakta hai। to shreshtha lakshya aur shreshtha lakshan vaali ho na? jahaan lakshya aur lakshan shreshtha hain, vahaan praapti bhi sada shreshtha anubhav hoti hai। to sada is eeshvareey jeevan ka phal “khushi'' aur “shakti'' donon anubhav karti ho? duniya mein khushi ke liye kharcha karte, to bhi praapta nahin hoti। agar hoti bhi hai to alpa-kaal ki aur khushi ke saath-saath duhkh bhi hoga। lekin aap logon ki jeevan sada khushi ki ho gai। duniya vaale khushi ke liye tadapte hain aur aapko khushi pratyaksha-phal ke roop mein mil rahi hai। khushi hi aapke jeevan ki visheshta hai! agar khushi nahin to jeevan nahi। to sada apni unnati karte hue aage badh rahi ho na? baapdaada khush hote hain ki kumaariyaan samay par bach gai, nahin to ulti seedhi chadhkar phir utarni padti। chadho aur utro - mehnat hai na। dekho, koi bhi pravritti vaale hain, to bhi kahlaana to brahmaakumaar/brahmaakumaari padta, brahma adharkumaar to nahin kehte। phir bhi kumaar/kumaari bane na। to seedhi utre aur aapko utarna nahin pada, bahut bhaagyavaan ho, samay par baap mil gaya। kumaari hi pooji jaati hai। kumaari jab grihasthi ban jaati hai to bakri ban sabke aage sir jhukaati rehti hai। to bach gai na। to sada apne ko aise bhaagyavaan samajh aage badhte chalo। achha!

maataaon se:- sabhi shaktishaali maataayen ho na? kamzor to nahin? baapdaada maataaon se kya chaahte hain? ek-ek maata “jagatmaata'' ban vishwa ka kalyaan kare। lekin maataayen chaturaai se kaam karti hain। jab laukik kaarya hota hai to kisi na kisi ko nimitta banaakar nikal jaati aur jab eeshvareey kaarya hota to kahengi - bachche hain, kaun sambhaalega? paandavon ko to baapdaada kehte - sambhaalna hai kyonki rachta hain, paandav shaktiyon ko free karen। drama anusaar vartamaan samay maataaon ko chance mila hai, isliye maataaon ko aage rakhna hai। abhi bahut seva karni hai। saare vishwa ka parivartan karna hai to seva poori kaise karoge? teevra gati chaahiye na। to paandav shaktiyon ko free karo to sevaakendra khulen aur aavaaj bulanda ho। achha!

vardaan:- sarva roopon se, sarva sambandhon se apna sab kuchh baap ke aage arpan karne vaale sachche snehi bhav

jisse ati sneh hota hai, to us sneh ke liye sabhi ko kinaare kar sab kuchh unke aage arpan kar dete hain, jaise baap ka bachchon se sneh hai isliye sadaakaal ke sukhon ki praapti snehi bachchon ko karaate hain, baaki sabko muktidhaam mein bitha dete hain, aise bachchon ke sneh ka saboot hai sarva roopon, sarva sambandhon se apna sab kuchh baap ke aage arpan karna। jahaan sneh hai vahaan yog hai aur yog hai to sahayog hai। ek bhi khajaane ko manmat se vyartha nahin ganva sakte।

slogan:- saakaar karma mein brahma baap ko aur ashareeri banne mein niraakaar baap ko follow karo।

soochna:- aaj maas ka teesra ravivaar antarraashtreey yog divas hai, baba ke sabhi bachche saayan 6.30 se 7.30 baje tak vishesh apne eeshta dev, eeshta devi (poojya swaroop) mein sthit ho, bhakta aatmaon ki pukaar sunen, upkaar karen। merciful daata swaroop mein sthit ho unhein sukh shanti ki anchali dene ki seva karen।