Murli du jour du dimanche 11 juillet 2021

11-07-21 praatahmurli om shanti ''avyakt-baapdaada'' revise 03-02-88 madhuban

brahma maat-pita ki apne brahman bachchon ke prati do shubh aashaaen

aaj vishwa ki sarva aatmaon ki sarva aashaayen poorn karne vaale baapdaada apni shubh aashaaon ke roohaani deepkon ko dekh rahe the। jaise baap sarva ki shubh aashaayen poorn karne vaale hain, to bachche bhi baap ki shubh aashaayen poorn karne vaale hain। baap bachchon ki aashaayen poorn karte, bachche baap ki karte। baap ki bachchon prati shubh aashaayen kaunsi hain, woh jaante ho na? har ek brahman aatma baap ki aashaaon ke deepak hain। deepak arthaat sada jaagti jyot। sada jaga hua deepak pyaara lagta hai। agar baar-baar timtimaata deepak ho to kaisa lagega? baap ki sarva aashaaon ko poorn karne vaale arthaat sada jagamgaate hue deepkon ko baapdaada bhi dekh harshit hote hain।

aaj baapdaada aapas mein roohrihaan kar rahe the। baapdaada ke saamne sada kaun rehte hain? bachche rehte hain na। to roohrihaan bhi bachchon ki hi karenge na। shiv baap brahma se poochh rahe the ki bachchon ke prati ab tak koi shubh aashaayen hain? to brahma ne bola ki bachche nambarvaar apni shakti pramaan, sneh pramaan, attention pramaan sada baap ki shubh aashaaon ko poorn karne mein lage hue zaroor hain, har ek ki dil mein umang-utsaah zaroor hai - jabki baap ne hamaari sarva aashaayen poorn ki hain to ham bhi baap ki sarva aashaayen poorn karke hi dikhaayen lekin karke dikhaane mein nambarvaar ban jaate hain। sochna aur karke dikhaana - ismen antar pad jaata hai। koi-koi bachche aise bhi hain jo sochna aur karke dikhaana - ismen samaan hain lekin sabhi aise nahin hain। jis samay baap ke sneh aur baap dvaara praaptiyon ko smriti mein laate hain ki baap ne kya banaaya aur kya diya, to sneh swaroop hone ke kaaran bahut umang-utsaah mein udte hain ki baap ne jo kaha hai woh main hi karke dikhaaoonga lekin jab seva ke va sangathan ke samparka mein aate hain arthaat practical karne ke liye karma mein aana padta hai to kahaan sankalp aur karma samaan ho jaata hai arthaat vahi umang-utsaah rehta hai aur kabhi karma mein aane samay sangathan ke sanskaar va maaya va prakriti dvaara aaye hue circumstance roopi paper kahaan mushkil anubhav karaate hain isliye sneh se jo umang-utsaah ka sankalp raha, woh circumstance kaaran, sanskaar kaaran karne mein antar daal deta hai। phir sochte hain - agar yeh nahin hota to bahut achha hota। “agar'' aur “magar'' ke chakra mein aa jaate hain। hona to yeh chaahiye lekin aisa hua, isliye yeh hua - is agar, magar ke chakra mein aa jaate hain isliye umang-utsaah ka sankalp aur practical karma mein antar ho jaata hai।

to brahma baap bachchon ke prati vishesh do aashaayen suna rahe the kyonki brahma baap ko saath le bhi jaana hai aur saath rehna bhi hai। shiv baap to saath le jaane vaala hai, raajya mein va saare kalpa mein saath nahin rehna hai। woh sada saath rahne vaala hai aur woh saakshi ho dekhne vaala hai। antar hai na। brahma baap ko bachchon ke prati sada hi samaan banaane ki shubh aashaayen emerge rehti hain। vaise baapdaada donon jimmevaar hain lekin phir bhi rachta saakaar mein brahma hai isliye saakaar rachta ko saakaar rachna ke liye svatah hi sneh rehta hai। pahle bhi sunaaya tha na - bachche, maa-baap - donon ke hote hain lekin phir bhi maa ka vishesh sneh bachchon se rehta hai kyonki paalna ke nimitta maa banti hai। baap-samaan banaane vaali nimitta maa hoti hai isliye maa ki mamta gaai hui hai। yeh shuddh mamta hai, moh vaali nahin, vikaar vaali nahin। jahaan moh hota hai, vahaan pareshaan hote hain aur jahaan roohaani mamta kaho, sneh kaho - woh hoga to maa ko bachchon ke prati shaan hota hai, pareshaan nahin hoti। to brahma maa kaho, baap kaho - donon roop se bachchon ke prati kaunsi vishesh aashaayen rakhte hain? ek baap prati aasha hai aur doosri brahman parivaar ke prati shubh aasha hai। baap prati shubh aasha hai ki - jaise baapdaada saakshi bhi hai aur saathi bhi hain, aise baapdaada samaan saakshi aur saathi, samay pramaan donon hi part sada bajaane vaale mahaan aatma banen। to baap prati shubh aasha hui - baapdaada samaan saakshi, saathi banna।

ek baat mein baapdaada donon bachchon se poorn santushta hain, woh kya? har bachche ka baap-daada se sneh achha hai, baapdaada se sneh kabhi tootta nahin hai aur sneh ke kaaran hi chaahe shaktishaali ban, chaahe yathaashakti ban chal rahe hain। brahman aatma roopi moti ban sneh ke dhaage mein piraaye hue zaroor hain। sneh ka dhaaga majboot hai, usse toot nahin sakte hain। sneh ki maala to lambi hai, vijay maala chhoti hai। baapdaada ke sneh ke oopar samarpit bhi hain। koi kitna bhi baap ke sneh se juda karne chaahe, to aise sneh mein phida hain jo juda ho hi nahin sakte। sabhi ko dil ke sneh se “mera baba'' shabd nikalta hai। to sneh ki maala mein to santushta hain lekin baap samaan shaktishaali, agar-magar ke chakra se nyaare - ismen sada shaktishaali ke bajaae yathaashakti hain। baapdaada ismen baap samaan sada shaktishaali banaane ki sab bachchon mein shubh aasha rakhte hain। jahaan saakshi banna hai, vahaan kabhi saathi ban jaate hain aur jahaan saathi banna hai, vahaan saakshi ban jaate hain। samay pramaan donon reeti nibhaana - isko kehte hain baap samaan banna। sneh ki maala to taiyaar hai lekin vijay maala itni lambi taiyaar ho jaae - baapdaada yahi shubh aasha rakhte hain। 108 to kya, baapdaada khuli chhutti dete hain - jitne vijayi banne chaaho utni badi vijay maala ban sakti hai। 108 ki had mein bhi nahin aao। hain hi 108 number, ham to usmein aa nahin sakte - aisi koi baat nahin hai। bano।

vijayi banne ke liye ek balance ki aavashyakta hai। yaad aur seva ka balance to sada sunte rehte hain lekin yaad aur seva ka balance chaahte hue bhi rehta kyon nahin hai? samajhte hue bhi karma mein kyon nahin aata hai? uske liye ek aur balance ki aavashyakta hai, vahi balance brahma baap ki doosri aasha hai। ek aasha to baap prati hui - samaan banne ki। doosri aasha parivaar prati, woh hai - har brahman aatma prati sada shubhbhaavna-shubhkaamna karma mein rahe, sirf sankalp tak va chaahna tak nahin। chaahte to hain। kai kehte hain chaahna to yahi hai ki shubh bhaavna rakhen lekin karma mein badal jaata hai। iska vistaar pahle bhi sunaaya hai। parivaar prati sada shubhbhaavna-shubhkaamna kyon nahin rehti, iska kaaran? jaise baap se dil ka sneh, jigar ka sneh hai aur dil ke jigar ke sneh ki nishaani hai ki atoot hai। baap prati koi kitna bhi aapko miss andarastaind (galatphahmi) kare va koi bhi aapko kaisi bhi baaten aakar sunaae va kabhi saakaar mein svayan baap bhi koi bachchon ko aage badhne ke liye koi ishaara va shiksha de lekin jahaan sneh hota hai vahaan shiksha va koi bhi parivartan ka ishaara misaandarastainding paida nahin karega। sadaiv yahi bhaavna rehti va rahi hai ki baba jo kehta hai usmein kalyaan hai। kabhi sneh ki kami nahin hui, aur hi apne ko baap ke dil ke sameep samajhte rahe ki yeh apne-pan ka sneh hai। isko kehte hain dil ka jigri sneh, jo bhaavna ko parivartan kar deta hai। baap ke prati sneh ki nishaani - sada hi baap ne kaha aur “haan ji'' kiya, aise brahman parivaar ke prati sada hi aisa dil ka sneh ho, bhaavna parivartan ki vidhi ho, tab baap aur parivaar mein sneh ka balance, yaad aur seva ka balance svatah hi practical mein dikhaai dega। to baap ke sneh ka palda bhaari hai lekin sarva brahman parivaar mein sneh ka palda badalta rehta hai। kabhi bhaari, kabhi halka। kiske prati bhaari, kiske prati halka। yeh baap aur bachchon ke sneh ka balance rahe - yahi brahma baap ki doosri shubh aasha hai। samjha? ismen baap samaan bano।

sneh aisi shreshthata hai jismen aapne kiya ya doosre ne kiya, ismen donon mein samaan khushi ka anubhav ho। jaise baapdaada sthaapna ke kaarya arth nimitta bane lekin jab bachchon ko seva mein saathi banaaya, agar practical mein baap se bhi bachche jyaada seva karte hain, karte rahe hain to baapdaada sada bachchon ko seva mein aage badhte, sneh ke kaaran khush rahen। yeh sankalp kabhi bhi dil ke sneh mein utpanna nahin ho sakta ki bachche kyon seva mein aage jaayen, nimitta to main hoon, mainne hi inko nimitta banaaya। kabhi svapna-maatra bhi yeh bhaavna utpanna nahin hui। isko kaha jaata hai sachcha sneh, nihsvaartha sneh, roohaani sneh। sada bachchon ko aage nimitta banaane mein harshit rahe। bachchon ne kiya ya baap ne kiya, main-pan nahin raha। mera kaam hai, meri duty hai, mera adhikaar hai, meri buddhi hai, mera plan hai - nahin। sneh yeh meraapan mita deta hai। aapne kiya so mainne kiya, mainne kiya so aapne kiya - yeh shubh bhaavna va shubh kaamna, isko kaha jaata hai dil ka sneh। sneh mein kabhi apna ya paraaya nahin lagta। sneh mein kabhi sneh ka bol kaisa bhi saadhaaran, hujjat ka bol ho lekin feel nahin hoga। feeling nahin aayegi - isne yeh kyon kaha। snehi, snehi aatma ke prati anumaan paida nahin karega - aisa hoga, yeh hoga! sada snehi ke prati faith hone ke kaaran uska halka bol bhi aise lagega ki isne avashya koi matlab se kaha hai। bematlab, vyartha nahin lagega। jahaan sneh hoga, vahaan faith zaroor hoga। sneh nahin to faith bhi nahin hoga। to brahman parivaar ke prati sneh va faith hona - isko kehte hain brahma baap ki doosri aasha poorn karna। jaise baap ke prati sneh ke liye baapdaada ne certificate diya, aise brahman parivaar ke prati jo sneh ki paribhaasha sunaai, us vidhi se pratyaksha karma mein aana - yeh bhi certificate lena hai। yeh balance chaahiye। jitna baap se utna bachchon se - yeh balance na hone ke kaaran seva mein jab aage badhte ho to khud hi kehte ho - seva mein maaya aati hai। aur kabhi vaayumandal ko dekh itna bhi kehte ho ki aisi seva se to yaad mein rehna hi achha hai, sabse seva chhudaake bhatthi mein bitha do। aap logon ke paas yeh sankalp hote hain samay pramaan।

vaastav mein seva maayaajeet banaane vaali hai, maaya laane vaali nahin hai, lekin seva mein maaya kyon aati hai? iska mool kaaran dil ka sneh nahin hai, parivaar ke pramaan sneh hai, lekin dil ka sneh tyaag ki bhaavna utpanna karta hai। woh na hone ke kaaran kabhi-kabhi seva maaya-roop ban jaati hai aur aisi seva ko seva ke khaate mein jama nahin kar sakte - chaahe koi 50-60 centres kholne ke bhi nimitta ban jaae! lekin seva ke khaate mein ya baapdaada ki dil mein seva ka jama khaata utna hi hota hai jo maaya se mukta ho, yogayukta ho karte ho। kiske paas do centre hain, dekhne mein do centre ki incharge aati hai, aur koi 50 centres ki incharge dikhaai deti hai, lekin agar do sevaakendra bhi nirvighna hain, maaya se, halchal se, svabhaav-sanskaar ke takkar se mukta hain to do centre vaale ka bhi 50 sevaakendra vaale se jyaada seva ka khaata jama hai। ismen khush nahin ho jaao ki mere 30 centres hain, 40 centres hain lekin maaya se mukta kitne centres hain? centre bhi badhaate jaao, maaya bhi badhaate jaao - aisi seva baap ke register mein jama nahin hoti hai। aap sochenge - ham to bahut seva kar rahe hain, din-raat neend bhi nahin karte, khaana bhi ek baar banaake raat ko kha lete - itna busy rehte! lekin seva ke saath-saath maaya mein bhi busy to nahin rehte? yeh kyon hua, yeh kaise hua, isne kyon kiya, mainne kyon nahin kiya, mera hak, tera hak lekin baap ka hak kahaan gaya? samjha? seva arthaat jismen sva ke aur sarva ke sahayog va santushtata ka phal pratyaksha dikhaai de। agar sarva ki shubh bhaavna-shubh kaamna ka sahayog va santushtata pratyaksha phal ke roop mein nahin praapta hoti hai to check karo - kya kaaran hai, phal kyon nahin mila? aur vidhi ko check karke change karo।

aisi sachchi seva badhaana hi seva badhaana hai। sirf apni dil khush nahin karo ki main bahut achhi seva kar rahi hoon lekin baap ki dil khush karo aur brahman parivaar ke dil ki duaayen lo। isko kaha jaata sachchi seva। dikhaave ki seva to bahut badi hai lekin jahaan dil ki seva hogi, vahaan dil ke sneh ki seva zaroor hogi। isko kehte hai parivaar ke prati brahma baap ki aasha poorn karna। yeh thi aaj ki roohrihaan। baaki aur aage sunaayenge। aaj bhaaratvaasi bachchon ki is season ka last chance hai isliye baapdaada kya chaahte hain - woh sunaaya। ek certificate paas ka liya hai, abhi doosra certificate lena hai। achha! abhi baap ki aashaaon ka deepak sada jagamgaate rehna। achha!

chaaron or ke sarva brahman kul deepak, sada baapdaada ki shubh aashaayen poorn karne vaale, sada baap aur parivaar ke dil ke sneh ka balance rakhne vaale, sada dil ki seva se seva ka khaata jyaada jama karne vaale, aise baap ki shubh aashaaon ke deepkon ki, sachchi dil se seva karne vaale sevaadhaariyon ko baapdaada ka yaadapyaar aur namaste।

vardaan:- drama ki point ke anubhav dvaara sada saaksheepan ki stage par rahne vaale achal adol bhav

drama ki point ke jo anubhvi hain ve sada saaksheepan ki stage par sthit rah ekras, achal-adol sthiti ka anubhav karte hain। drama ke point ki anubhvi aatma kabhi bhi bure mein buraai ko na dekh achchhaai hi dekhegi arthaat sva-kalyaan ka raasta dikhaai dega। akalyaan ka khaata khatma hua। kalyaankaari baap ke bachche hain, kalyaankaari yug hai - is knowledge aur anubhav ki authority se achal-adol bano।

slogan:- jo samay ko amoolya samajhkar saphal karte hain, woh samay par dhokha nahin khaate।