Murli du jour du vendredi 20 août 2021

20-08-2021 praatahmurli om shanti "baapdaada"' madhuban

“meethe bachche - baap ke right hand banna hai to har baat mein righteous bano, sada shreshtha karma karo''

prashn:- kaun sa sanskaar seva mein bahut vighna daalta hai?

uttar:- bhaav-svabhaav ke kaaran aapas mein jo dvet mat ke sanskaar ho jaate hain, woh seva mein bahut vighna daalte hain। do maton se bahut nuksaan hota hai। krodh ka bhoot aisa hai jo bhagwan ka bhi saamna karne mein deri na kare isliye baba kehte hain meethe bachche, aisa koi bhi sanskaar ho to use nikaal do।

geet:- takdeer jagaakar aai hoon…

om shanti। meethe-meethe roohaani bachchon ne geet suna। roohaani bachchon arthaat shivbaaba jo supreme rooh hai, unke bachchon aatmaon ne shareer roopi karmendriyon dvaara geet suna। ab to bachchon ko aatma-abhimaani banna hai। bahut mehnat bhi hai। ghadi-ghadi apne ko aatma samajh baap ko yaad karna hai। yeh hai gupta mehnat। baap bhi gupta, to mehnat bhi gupta karaate hain। baap svayan aakar kehte hain bachchon, mujhe yaad karo to kalpa 5 hajaar varsha pahle muaaphik phir se satopradhaan banenge। bachche samajhte hain ham hi satopradhaan the phir ham hi ab tamopradhaan bane hain। satopradhaan banna hai zaroor। geet mein bhi kehte hain takdeer jo ganvaai hui hai woh phir paane ke liye tadbeer karaane vaala ek hi sarvashaktimaan baap hai, kyonki sabko paavan banaate hain na। baap bachchon ko samjhaate hain, he roohaani bachchon ab takdeer banaane aaye ho। student school mein takdeer banaane jaate hain na। woh to chhote bachche hote hain। tum chhote nahin ho, tum to bade bujurga ho। takdeer bana rahe ho। haan koi boodhe-boodhe bhi hain। budhaape se javaani mein padhna achha hota hai, javaan ki buddhi achhi hoti hai। yeh to sabke liye bahut sahaj hai। tumhaara shareer to bada hai na। yeh baby hai, itna nahin samajh sakenge kyonki organs chhote hain। stuti-ninda, duhkh-sukh in baaton ko tum samajh sakte ho। aatma to bindi hai। shareer badhta rehta hai। aatma to ekras hi hoti hai। kabhi ghatti-badhti nahin। us aatma ki buddhi ke liye baap kastoori jaisi saugaat de rahe hain kyonki abhi to buddhi bilkul tamopradhaan ban gai hai। so ab svachchha bhi ban rahi hai। yeh chitra tumko samjhaane mein bahut kaam mein aate hain। bhakti maarga mein devtaaon ke aage jaakar maatha jhukaate hain, pooja karte hain। aage tum bhi andhashradha se jaate the। shiv ke mandir mein jaate the, tumko yeh thode hi pata tha ki yeh shivbaaba hai। baba se zaroor varsa mila hai tab to unki mahima gaai jaati hai। koi achha kaam karke jaate hain to unki mahima gaai jaati hai। stamp banaani chaahiye shivbaaba ki। shivbaaba geeta sermonizer.... yeh stamp sahaj ban sakegi। woh baap sabko sukh dene vaala hai। baap kehte hain - main tumko sukhdhaam ka maalik banaane vaala hoon। budhiyaan bhi yeh to samajhti hongi ki ham aaye hain shivbaaba ke paas, jo vichitra hai। jisne is chitra (tan) mein pravesh kiya hai। niraakaar ko vichitra kaha jaata hai। buddhi mein rehta hai ham shivbaaba ke paas jaate hain, jisne yeh tempory chitra dhaaran kiya hai। patiton ko paavan banaae mukti-jeevanmukti dete hain athva shantidham, sukhdhaam ka rahvaasi banaate hain। manushya shanti ke liye hi koshish karte hain। bhagwan mile to shanti mile, sukh ke liye purooshaartha nahin karte hain। bas baap ke paas ghar jaayen, bhagwan mile। is samay sab mukti ki chaahna rakhne vaale hain। jeevanmukti lene vaale sirf tum brahman hi ho। baaki sab mukti ki chaahna rakhne vaale hain। jeevanmukti ka raasta bataane vaala koi hai hi nahin। sannyaasiyon aadi ke paas jaakar shanti maangate hain। kahenge man ki shanti kaise mile। jo bhi raasta bataane vaale hain woh hain hi mukti mein jaane vaale। moksha kya hota hai, woh bhi buddhi mein nahin aata hai। tang hokar kehte hain mukti mein jaayen to achha hai। vaastav mein muktidhaam hai aatmaon ke rahne ka sthaan। itne centres par bachche hain sab jaante hain ki ham nai duniya ke liye raajya-bhaagya lete hain। baba hamko nai duniya ka raajya dete hain। kahaan denge? nai duniya mein denge va puraani duniya mein denge? baap kehte hain main sangam par aata hoon। main na satayug mein, na kaliyug mein aata hoon। donon ke beech mein aata hoon। baap to sabko sadgati denge na। aise to nahin durgati mein chhod jaayenge। sadgati aur durgati ikatthe nahin rah sakte। bachche jaante hain yeh puraani duniya vinaash honi hai, isliye inse pyaar nahin rakhna hai। buddhi kehti hai barobar abhi ham sangamayug par hain। yeh duniya badalne vaali hai। ab baap aaya hua hai, baap kehte hain-main kalpa-kalpa sangam par aata hoon। tumko duhkh se chhudaae hari ke dvaar le jaata hoon। yeh gyaan ki baat hai। haridvaar, krishna ka dvaar arthaat krishnapuri ko kaha jaata hai। achha unke peechhe phir lakshman jhoola laga diya hai। pahle haridvaar aayega। satayug ko hari-dvaar kaha jaata hai। phir raam lakshman aadi dikhaate hain। woh baat koi hai nahin। woh to banaai hui baat hai। raam ko kitne bhaai de diye hain! 4 bhaai to hote nahin। 4-8 bhaai to yahaan hote hain। ek taraph hain eeshvareey santaan, doosre taraph hain aasuri santaan।

abhi tum jaante ho shivbaaba brahma tan mein aaye hain। shivbaaba hai, brahma hai daada। prajaapita hai। woh aatmaon ka pita to anaadi hai, is samay braahmanon ko rachte hain। aise nahin ki shivbaaba saaligraam ko rachte hain। nahin, saaligraam to avinaashi hain hi hain। sirf baap aakar pavitra banaate hain। jab tak aatma pavitra nahin bani hai tab tak shareer kaise pavitra ban sakta। ham aatmaayen pavitra thi to satopradhaan thi। abhi apvitra tamopradhaan hain phir satopradhaan kaise banen। yeh to sahaj samajh ki baat hai। tum is samay khaad padne se patit tamopradhaan ho gaye ho। ab phir satopradhaan banna hai। hisaab-kitaab chuktu kar sab shantidham va sukhdhaam mein aayenge। aatmaayen niraakaari ghar se kaise aati hain, uski yaadgaar bhi Christian log jhaad mein bulb lagaakar manaate hain। tum jaante ho yeh sabhi dharmon ki alag-alag shaakhaayen hain, vahaan se aatmaayen kaise nambarvaar neeche utarti hain, yeh knowledge tumko mil gai hai। ham aatmaon ka ghar shanti-dhaam hai। abhi hai sangam। vahaan se sab aatmaayen aa jaayengi phir sab jaayenge। pralay to hone ki nahin hai। tum jaante ho ham baba se takdeer banaane phir se svaraajya lene aaye hain। yeh koi sirf kahne maatra nahin hai। yaad se hi varsa milega। baap kehte hain- deh sahit jo bhi deh ke mitra-sambandhi aadi hain, sabko bhool jaao। chitra aur vichitra hain na। vichitra unko kaha jaata hai jinko dekha nahin jaata hai। yeh bahut maheen baaten hain। aatma kitni chhoti hai। unko ghadi-ghadi part bajaana padta hai aur kiski buddhi mein aisi baaten hain nahin। pahle-pahle to yeh buddhi mein bithaana hai ki ham aatma hain, woh hamaara baap hai। unko hi patit-paavan, he bhagwan kah yaad karte hain। doosri koi jagah jaane ki darkaar nahin hai। to yaad bhi ek ko karna chaahiye na। bhagwan ko yaad karte hain to zaroor usse kuchh milne ka hoga। phir dar-dar dhakke kyon khaate ho! bhagwan ko to paramdham se aana padega na। ham to ja nahin sakte kyonki patit hain। patit vahaan ja na saken। abhi tum wonder khaate ho। bhakti maarga ka part kaise wonderful hai। ek bhagwan ko hi yaad karte hain - he eeshvar, he parampita, O god father। jab woh ek hi hai phir doosre taraph dhakke kyon khaate ho! woh ek oopar mein rehte hain। parantu yeh sab noondh hain, drama anusaar bhakti karte hain, behad besamjhi se। abhi tum phir behad samajhdaar bante ho। shreemat par chalne vaale hi samajhdaar bante hain। woh phir chhipe nahin rah sakte, woh sadaiv shreshthaachaari kaam hi karenge। baap kehte hain - ham duhkh harta sukh karta hain to bachchon ko bhi kitna meetha banna chaahiye। baap ka right hand banna chaahiye। aise bachche hi baap ko priy lagte hain। right hand hain na। tumko maaloom hai left haath se itna kaam nahin kar sakte hain kyonki right haath righteous kaam karte hain isliye is right haath ko hi shubh kaam mein lagaate hain। pooja hamesha right hand se karte hain। baap kehte hain - har baat mein righteous bano। baap mila hai to khushi honi chaahiye।

baap kehte hain - maamekam yaad karo to phir ant mati so gati ho jaayegi। mat aur gat va gati karne ki mat ek hi hai। gaaya bhi jaata hai eeshvar ki gat mat eeshvar hi jaane। patit-paavan vahi hai। woh jaante hain main manushyon ko paavan banaae durgati se sadgati mein kaise le jaaoonga। bhakti maarga mein kitni mehnat karte hai parantu sadgati hoti nahin। phal kuchh bhi milta nahin, sadgati dene vaala to ek hi baap hai। bhakti mein jo jis bhaavna se pooja karte hain, unko woh phal dene vaala main hi hoon। woh bhi drama mein noondh hai, unko aapehi mil jaata hai - apne purooshaartha se। ab pavitra bhi apne purooshaartha se bachchon ko banna hai। baap kehte hain - meethe-meethe baap ko yaad karo। vahi sarvashaktimaan, almighty authority kitna achha banaate hain। tum sab kuchh jaan chuke ho phir baap se varsa le rahe ho। rachayita aur rachna ki knowledge tumhaari buddhi mein hai। tum jaante ho yeh knowledge hamaare mein nahin thi। yagya-tap aadi karna, shaastra aadi sunna - yeh hai shaastron ki knowledge। unko bhakti kaha jaata। usmein em object kuchh hai nahin। padhaai mein em object rehti hai। koi na koi prakaar ki knowledge hoti hai। hamko patit se paavan banne ki knowledge patit-paavan baap ne di hai। srishti ke aadi-madhya-ant ki knowledge baap ne di hai। yeh srishti chakra kaise phirta hai, ismen sabhi actors paartadhaari hain। yeh anaadi naatak bana hua hai। yeh behad ki knowledge to zaroor honi chaahiye।

tum bachche jaante ho abhi ham ghor andhiyaare se nikal ghor sojhre mein ja rahe hain। tum abhi devta ban rahe ho। yeh bhi samjhaana hai ki aadi sanaatan to devi-devta dharma hai, jise hindu dharma kah diya hai। dheere-dheere yeh baat bhi samajh jaayenge। bachchon ko khada hona chaahiye। ismen to dher bachche chaahiye। dehli mein conference karni pade। paristaan bhi dehli ko kaha jaata hai। yahi jamuna ka kantha tha, dehli capital hai। bahuton ke haath aai hai। devtaaon ki capital bhi yeh thi, dehli mein bahut badi conference honi chaahiye parantu maaya aisi hai jo karne nahin deti। vighna bahut daalti hai। aajkal bhaav-svabhaav bhi bahut ho gaye hain na। bachchon ko aapas mein milkar service mein lagna hai। ve log bhi aapas mein nahin milte hain to raajaai hi ud jaati hai, do party ho jaati hain to president ko bhi uda dete hain। dvet mat bada nuksaan karti hai। phir bhagwan ka bhi saamna karne mein deri nahin karte hain। nuksaan bhi bahut paate hain। krodh ka bhoot aa jaata hai to phir baat mat poochho isliye baba kehte hain gud jaane gud ki gothri jaane। baap bachchon ko srishti ke aadi-madhya-ant ka knowledge suna rahe hain। ab koi dhaarna kare va na kare, woh hai purooshaartha par madaar। aise nahin koi par baba aasheervaad va kripa karenge, ismen kripa aadi maangane ki baat nahin। prerna se agar yog aur gyaan sikhlaana hota, phir to baap kehte hain main is gandi duniya mein aata kyon? prerna, aasheervaad yeh sab bhakti maarga ke akshar hain। ismen purooshaartha karna hota hai, prerna ki baat nahin। tumko 3 engine mili hain ikatthi। vahaan to baap alag, teacher alag milta hai, guru pichhaadi mein milta hai। yahaan to yeh teenon hi ikatthe hain। baap kehte hain - main tumko poojya banaata hoon, tum phir pujaari ban jaayenge। bada yukti se samjhaana hai। aisa na ho koi behosh ho jaae। pahle-pahle mukhya hai do baap ki baat। bhagwan baap hai, unka janma shiv jayanti bhi yahaan manaate hain। zaroor svarga ka maalik banaate honge। bhaarat mein hi svarga tha। abhi narka ke vinaash liye mahaabhaarat ladaai khadi hai। zaroor baap nai duniya ki sthaapna karaane vaala bhi hai। baap ki shreemat par hi ham kehte hain ki bhaarat ko ham paavan banaakar hi chhodenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise baap duhkh harta sukh karta hai, aise baap samaan banna hai। bahut meetha banna hai। sada shubh kaam karke right hand ban jaana hai।

2) kabhi do maten nahin banaani hai। bhaav-svabhaav mein aakar ek-do ka saamna nahin karna hai। krodh ka bhoot nikaal dena hai।

vardaan:- phariyaad ko yaad mein parivartan karne vaale svatah aur nirantar yogi bhav

sangamayug ki visheshta hai - abhi-abhi purooshaartha, abhi-abhi pratyakshaphal। abhi smriti swaroop abhi praapti ka anubhav। bhavishya ki guarantee to hai hi lekin bhavishya se shreshtha bhaagya abhi ka hai। is bhaagya ke nashe mein raho to svatah yaad rahegi। jahaan yaad hai vahaan phariyaad nahin। kya karen, kaise karen, yeh hota nahin hai, thodi madad de do - yeh hai fariyaad। to phariyaad ko chhodkar svatah yogi nirantar yogi bano।

slogan:- jo svayan ko mehmaan samajhkar chalte hain vahi mahaan sthiti ka anubhav karte hain।