Murli du jour du vendredi 19 novembre 2021

19-11-2021 praatahmurli om shanti "baapdaada"' madhuban

“meethe bachche - service ke saath-saath yaad ki yaatra ko bhi kaayam rakhna hai, is roohaani yaatra mein kabhi thande nahin hona''

prashn:- bachchon ki dil agar roohaani service mein nahin lagti to uska kaaran kya hai?

uttar:- agar roohaani service mein dil na lage to zaroor deh-abhimaan ki grahchaari hai। chalte-chalte deh abhimaan ke kaaran jab aapas mein rooth padte hain to service hi chhod dete hain। ek do ki shakla dekhte hi service ke khyaal ud jaate hain isliye baba kehte is grahchaari se sambhaal karo।

geet:- hamaare teertha nyaare hain…

om shanti। is geet ki line ne bachchon ko khabardaar kar diya। kya kaha? buddhi mein yeh yaad rakhna hai ki ham teertha yaatra par hain aur hamaari yeh yaatra sabse nyaari hai। is yaatra ko bhoolo mat। yaatra par hi saara madaar hai aur to jismaani yaatraaon par jaakar phir laut aate hain aur janma-janmaantar yaatra karte hi aate hain। hamaare teertha woh nahin hain। amarnaath mein jaakar phir mrityulok mein chale aana। tumhaari woh yaatra nahin hai aur sab manushyon ki woh yaatraayen hain। teertha par jaakar, chakra lagaakar phir aae patit ban jaate hain। kisam-kisam ki yaatraayen hain na। devi ke mandir bhi athaah hain। vikaariyon ke saath kitne yaatra par jaate hain। tum bachchon ne to pran kiya hua hai - nirvikaari rahne ka। tum nirvikaariyon ki yeh yaatra hai। nirvikaari baap jo ever-pure hai, unko yaad karna hai। paani ke saagar ko vikaari va nirvikaari nahin kahenge। aur na unse nikli hui gangaayen hi nirvikaari banaayengi। manushya maatra itne to patit ban pade hain, kuchh bhi samajhte hi nahin। woh jismaani yaatraayen hain - alpakaal kshanbhangur ki yaatraayen। yeh yaatra badi hai। tum bachchon ko uthte baithte yaatra ka khyaal rakhna hai। yaatra par jaate hain to dhandhaadhori grihastha vyavhaar aadi sab bhoolna hota hai। amarnaath ki jay... bas aise kehte jaate hain। maas do maas teertha yaatra kar phir aakar gand mein padte hain। phir jaate hain ganga snaan karne। unko yeh pata hi nahin hai ki ham roz patit hote hain। ganga jamuna par rahne vaale bhi roz patit hote hain। roz ganga par jaakar snaan karte hain। ek to niyam hota hai, doosre phir bade dinon par jaate hain samajhte hain ki ganga patit-paavni hai। aise to nahin khaas us ek din par ganga paavan banaane vaali banti hai, phir nahin rehti। jis din mela lagta hai us din woh patit-paavni ban jaati hai। nahin। woh to hai hi hai। roz bhi jaate hain snaan karne। mele par bhi khaas din jaate hain। arth nahin। ganga jamuna cheez to vahi hai। usmein murde bhi daal dete hain।

abhi tum bachchon ko roohaani yaatra par rehna hai। bas ab ham jaate hain ghar। ismen ganga snaan karne va shaastra padhne ki koi baat hi nahin। baap aate bhi ek hi baar hain। saari duniya bhi patit se paavan ek hi baar banti hai। yeh bhi jaante hain satayug hai nai duniya, kaliyug hai puraani duniya। baap ko aana hai zaroor। nai duniya ki sthaapna aur puraani duniya ka vinaash karne। yeh unka hi kaam hai। parantu maaya ne aisa tamopradhaan buddhi bana diya hai jo kuchh bhi samajhte nahin। pradarshani mein kitne dher bade aadmi aate hain। sannyaasi bhi aayenge phir bhi samjhenge koton mein koi। tum laakhon karodon ko samjhaate ho tab koi virla aata hai। bahuton ko samjhaana hoga। aakhreen tumhaari yeh samjhaani aur chitra aadi sab akhbaaron mein bhi padenge। seedhi bhi akhbaar mein padegi। kahenge yeh to bhaarat ke liye hi hai aur dharma vaale kahaan jaayenge। kayaamat ka samay bhi gaaya hua hai। kayaamat arthaat vaapis jaane ka। puraani duniya ka vinaash nai duniya ki sthaapna hogi to zaroor sab vaapis jaayenge na। sabka vinaash hona hai। nai duniya sthaapan ho rahi hai। yeh baaten koi nahin jaante sivaae tum bachchon ke। tum jaante ho narkavaasiyon ka vinaash, svargavaasiyon ki sthaapna ho rahi hai। kalpa-kalpa aisa hi hota hai। abhi jo thoda bahut time hai, ismen bhi bahuton ko samjhaani milti jaayegi। mele hote rahenge। sab taraph se likhte rehte hain ham mela karen, pradarshani karen। parantu saath-saath apni yaad ki yaatra bhi bhoolni nahin chaahiye। bachche bilkul hi thande chal rahe hain। yaatra aise karte hain jaise boodhe। jaise taakat hi nahin, kuchh khaaya hi nahin hai। baba ka kitna khyaal chalta rehta hai। khyaalaat karte-karte neend hi fit jaati hai। vichaar saagar manthan to sabko karna chaahiye na। bachche jaante hain hamko behad ka baap padhaate hain। to bachchon ko kitna apaar khushi honi chaahiye। is padhaai se ham vishwa ke maalik bante hain। koi-koi ki to chalan aisi hai - jaise kekde hain। kekdon ko baap devta banaate hain। phir bhi chalan mushkil kiski sudharti hai। is seedhi ke chitra mein badi achhi knowledge hai। parantu bachche itna kaam nahin karte। yaatra hi nahin karte। baap ko yaad karen to buddhi ka taala bhi khulta jaae। golden buddhi banti jaae। tum bachchon ki paarasbuddhi honi chaahiye, bahuton ka kalyaan karna chaahiye। tum satopradhaan se ab tamopradhaan bane ho, phir satopradhaan banna hai। baap kehte hain mujhe yaad karo। krishna ko bhagwan nahin kaha ja sakta। unko to kehte hain saanvara-shyaam। baap ne saanvare ki aatma ko baith phir samjhaaya hai। yeh aatma jaanti hai ki baba hamko vishwa ka maalik banaate hain to khushi mein kitna dimaag pur (bharpoor) hona chaahiye। ismen ghamanda ki koi baat nahin। baap kitna nirhankaari hai। buddhi mein kitni khushi rehti hai। kal ham heere javaahron ke mahal banaayenge। nai duniya mein raajdhaani chalaayenge। yeh to bilkul patit duniya hai। is duniya ke manushya to koi kaam ke nahin, kuchh nahin jaante hain। yeh bhi dikhaana chaahiye - heere jaisa jeevan tha। vahi phir 84 janma le kaudi misal ban jaate hain। yeh seedhi ka chitra number one hai। phir doosre number mein hai trimoorti।

tum kehte ho - nikat bhavishya mein shreshthaachaari bhaarat ban jaayega। shreshthaachaari duniya mein bahut thode manushya honge, abhi kitne dher manushya hain। mahaabhaarat ladaai bhi saamne khadi hai। sab aatmaayen machchharon sadrishya jaayengi। aag bhadak rahi hai। jitna koshish karte hain sudhaarne ki, utna hi bigadte jaate hain। baap bachchon ko raajayog sikhla rahe hain। bachchon ko kitna nasha chadhaate hain। koi-koi to yahaan se baahar nikle, saara gyaan ud jaata hai। smriti kuchh bhi rehti nahin। nahin to shauk ho ki jaakar service karen। baap bhi gun dekh service par bhejenge na। ismen bade harshit rahenge। service mein khushi ka paara chadhega। achhe-achhe puraane bachche aapas mein rooth padte hain thodi-thodi baat mein। aise thode hi in baaton ke kaaran tumko service nahin karni hai। service to khushi se karni chaahiye। jiske saath banti nahin hai, uski shakla dekhne se hi service ka khyaal ud jaata hai। service mein dil nahin lagti hai to kinaara kar lete hain। phir to gyaani aur agyaani mein koi farka nahin raha। deh-abhimaan ki grahchaari aakar baithti hai। yeh hai pahle number ki beemaari। baap kehte hain - bachche dehi-abhimaani bano। aatma hi sab kuchh karti hai na। aatma hi vikaari aur nirvikaari banti hai। svarga mein nirvikaari thi। raavanraajya mein aatma hi vikaari bani hai। yeh bhi drama aisa bana hua hai isliye pukaarte hain he patit-paavan aao। jo nirvikaari the, vahi patit vikaari bane hain। yeh kiski bhi buddhi mein nahin hai ki ham hi nirvikaari the, ab vikaari bane hain। ham aatma mool vatan ki rahne vaali hain। vahaan to ham aatma nirvikaari honge। yahaan shareer mein aakar part bajaate-bajaate vikaari bane hain। yeh baap baith samjhaate hain। aatma shantidham se aati hai to zaroor pavitra hi hogi phir apvitra bani hai। pavitra duniya mein 9 laakh hote hain। phir itni sab aatmaayen kahaan se aai? zaroor shantidham se aai hongi। woh hai peaceful incorporeal world। vahaan sab aatmaayen pavitra rehti hain phir part bajaate-bajaate, sato-rajo-tamo mein aati hain। paavan se patit hona hai। phir baap aakar sabko paavan banaayenge। yeh drama chalta hi rehta hai। drama ke aadi-madhya-ant ka raaz baap ke sivaae aur koi batla na sake। us baap ko koi jaante hi nahin hain। rishi-muni bhi neti-neti kah gaye। ham bhagwan ko aur unki rachna ko nahin jaante hain। phir kehte bhi hain - god father is knowledgeful। woh paramatma sarva aatmaon ka baap, beejroop hai। woh hai aatmaon ka beejroop aur yeh prajaapita brahma hai manushya srishti ka beejroop। woh niraakaar baap ismen pravesh kar manushyon ko samjhaate hain, manushya dvaara। unko manushya srishti ka beejroop nahin kahenge। woh hai aatmaon ka pita aur yeh brahma hai manushya srishti ka prajaapita, jis dvaara baap aakar gyaan dete hain। shareer alag, aatma alag hai na। man-buddhi chit aatma mein hai। aatma aakar shareer mein pravesh karti hai, part bajaane ke liye।

tum jaante ho koi shareer chhodte hain to jaakar doosra part bajaayenge, ismen rone se kya hoga। gaya so gaya phir thode hi aakar hamaara maama, chaacha banega। rone se kya phaayda। tumhaari mama gai, drama anusaar part baja rahi hai। aise bahut jaate hain। koi kahaan jaae janma lete hain। yeh samajh mein aata hai jaisa-jaisa aagyaakaari bachcha hoga utna zaroor achhe ghar mein janma liya hoga। yahaan ke jaayenge hi achhe ghar mein। nambarvaar to hote hain na। jaisa jo karma karte hain - aise ghar mein jaate hain। pichhaadi mein tum jaakar raajaai ghar mein janma lete ho। kaun raajaaon ke paas jaayenge, woh khud samajh sakte hain na। phir bhi daivi sanskaar to le jaate hain na। ismen badi vishaal buddhi se vichaar saagar manthan karna hota hai। baap gyaan ka saagar hai। to bachchon ko bhi gyaan ka saagar banna hai। nambarvaar to hote hi hain। samjha jaata hai - aage chal unnati hoti jaayegi। ho sakta hai jo aaj kaam nahin kar sakte hain, woh kal bahuton se teekhe chale jaaen। grahchaari utar jaae। koi par raahu ki grahchaari baithti hai to gutter mein gir padte hain। hadgud hi toot jaate hain। behad ke baap se pratigya kar phir girte hain to dharmaraaj dvaara sajaayen bhi bahut milti hain। yeh behad ka baap, behad ka dharmaraaj hai, phir behad ki saja milti hai। koi baat mein aanaakaani karenge ya ulta kaam karenge to saja zaroor khaayenge। samajhte nahin ki ham bhagwan ki avagya karte hain। itni sab baaten baap samjhaate rehte hain। shreemat par chalo, service mein madadgaar bano। yog ki yaatra par raho। chitron par samjhaane ki practice karenge to aadat pad jaayegi। nahin to oonch pad kaise milega। agyaankaal mein koi ka bachcha bada sapoot hota hai, koi to bade kapoot bhi hote hain। yahaan bhi koi-koi to jhat baba ka kaam kar dikhaate hain। to bachchon ko service behad ki karni hai। behad ki aatmaon ka kalyaan karna hai। paigaam dena hai - manamnaabhav। baap ko yaad karne se tumhaari buddhi tamopradhaan se satopradhaan ban jaayegi। abhi hai kaliyugi tamopradhaan duniya ki end। ab satopradhaan banna hai। aatmaon ki bhi vahaan nambarvaar duniya hai na, jo phir nambarvaar aakar part bajaate hain। aayenge bhi nambarvaar drama anusaar। abhi sab aatmaayen raavan raajya mein duhkhi hain। so bhi samajhte thode hi hain। agar kisko kah do tum patit ho to bigad padenge। baap samjhaate hain yeh hai hi vicious world। baap kehte hain - tum apna raajya-bhaagya le lenge। baaki sab vinaash ho vaapis chale jaane vaale hain। yeh to gaaya hua hai mahaabhaarat ladaai lagni hai, jisse sab dharma khalaas ho baaki ek dharma rahega। yeh ladaai ke baad svarga ke dvaar khulte hain। kitni achhi reeti bachchon ko samjhaate hain। aage chal tumhaari baaten sunte rahenge aur aate jaayenge। sooryavanshi chandravanshi jo patit ban gaye hain vahi aakar nambarvaar apna varsa lenge। praja to dher banengi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) bhagwan ki aagyaaon ki avagya kabhi nahin karni hai। behad seva mein sapoot bachcha ban madadgaar banna hai।

2) gyaan dhan ki gupta khushi se buddhi ko bharpoor rakhna hai। aapas mein kabhi bhi roothna nahin hai।

vardaan:- sarva shaktiyon ki sampatti se sampanna ban daata banne vaale vidhaata, vardaata bhav

jo bachche sarva shaktiyon ke sampattivaan hain - vahi sampanna aur sampoorn sthiti ke sameepta ka anubhav karte hain। unmein koi bhi bhaktapan ke va bhikhaareepan ke sanskaar emerge nahin hote, baap ki madad chaahiye, aasheervaad chaahiye, sahayog chaahiye, shakti chaahiye - yeh chaahiye shabd daata vidhaata, vardaata bachchon ke aage shobhta hi nahin। ve to vishwa ki har aatma ko kuchh na kuchh daan va vardaan dene vaale hote hain।

slogan:- har aatma ko koi na koi praapti karaane vaale vachan hi sat vachan hain।