Murli du jour du mercredi 15 décembre 2021

15-12-2021 praatahmurli om shanti "baapdaada"' madhuban

“meethe bachche - oonch pad ka aadhaar padhaai aur yaad ki yaatra par hai isliye jitna chaaho utna gallop kar lo''

prashn:- kaun sa guhya raaz pahle-pahle nahin samjhaana hai? kyon?

uttar:- drama ka jo guhya raaz hai, woh pahle-pahle nahin samjhaana hai kyonki kai moonjh jaate hain। kehte hain drama mein hoga to aapehi raajya milega। aapehi purushaartha kar lenge। gyaan ke raaz ko poora na samajh matvaale ban jaate hain। yeh nahin samajhte ki purushaartha bina to paani bhi nahin milega।

geet:- bholenaath se niraala…

om shanti। meethe-meethe roohaani bachchon prati good morning। baba ne itne bhabhke se bachchon se good morning ki। bachchon ne respond nahin kiya। bachchon ko to aur hi jaasti aavaaj se bolna chaahiye। roohaani baap roohaani bachchon se good morning karte hain। bachche bhi jaante hain ki ham is shareer dvaara roohaani baap ko good morning karte hain। to bachchon ko itna hullaas se kehna chaahiye na - vaah baba! aakhir woh din aaya aaj, jisko saari duniya pukaarti rehti woh baap sammukh hamse good morning kar rahe hain। phir jab satopradhaan ban jaayenge to patit-paavan ko yaad nahin karenge। abhi tamopradhaan hain tabhi yaad karte hain ki he patit-paavan aao, aakar hamko paavan banaao। ab tum jaante ho ki barobar patit-paavan baba ko hi aana padta hai। vahi supreme father, god father hai। Christ ko supreme father to nahin kahenge। Christ ko san aaph god maante hain। sabse supreme woh ek hi hai। yeh bhi samajhte hain ki woh god father hi in paigambaron ko bhejte hain। yeh bhi zaroor hai ki patiton ko paavan banaane supreme father ko hi aana hai। ab woh to hai niraakaar। kehte bhi hain ki brahma dvaara sthaapna karaate hain। yeh bhi kisko pata nahin ki brahma aur vishnu ka aapas mein kya sambandh hai। niraakaar ko mukh zaroor chaahiye isliye inko bhaageerath bhi kaha jaata hai। mukh dvaara hi to samjhaayenge na। direction dete hain ki manamnaabhav। to mukh dvaara kahenge na। ismen prerna ki to baat ho nahin sakti। baap to brahma dvaara baith sab vedon shaastron ka saar samjhaate hain। har cheez ka saar nikaalte hain na। gaate hain tum maat-pita ham baalak tere...to vahi ismen pravesh kar tumko knowledge dete hain। kitni samajhne ki baaten hain। prajaapita brahma ko bhi pita kehte hain। to maata kahaan? baap baith samjhaate hain ki yeh prajaapita bhi hai to maata bhi hai। main to sabhi aatmaon ka baap hoon। mujhe hi god father kehte hain। bhaaratvaasi pukaarte bhi hain tum maat-pita... parantu arth kuchh bhi nahin jaante। niraakaar ko maata kaise kah sakte। woh ismen pravesh kar adopt karte hain। to yeh brahma maata ban jaati hai। in dvaara hi daivi rachna rachte hain। yeh bhi adopted mother hai। woh father hai। isko phir nandeegan, bail bhi dikhaate hain। gaay ko kabhi bhi nahin dikhaate। yeh bahut wonderful baaten hain। koi-koi naye aate hain to detail mein sunaana padta hai। nahin to in baaton ko woh samajh nahin sakenge। koi shrewd buddhi hote hain to jhat samajh jaate hain। 30 varsha vaale se bhi maas vaale teekhe chale jaate hain isliye aise nahin samajhna chaahiye ki ham to bahut deri se aaye hain। baap kehte hain bachche purushaartha karo। jaise college mein aane vaale padhaai kar gallop kar lete hain। yahaan bhi aise hai। saara madaar padhaai aur yaad par hai। bachche jaante hain ki mool vatan mein to aatmaayen satopradhaan hoti hain। tamopradhaan aatmaayen to vahaan ja nahin sakti। phir sab actor apne-apne part anusaar stage par aate hain। drama hi aisa bana hua hai। had ke drama mein to 50-60 actor honge। yahaan to kitna bada behad ka drama hai। baba ne hamaari buddhi ka taala khol diya hai। to ab samajhte hain ki yeh lakshmi-naaraayan vishwa ke maalik the, kitne saahookaar the। aadhaakalpa vishwa ke maalik the। usko kaha jaata hai advet raajya। vahaan hai hi ek dharma। woh hai raamraajya, yeh hai raavan raajya। raamraajya mein vikaar hote hi nahin। vaastav mein isko eeshvareey raajya kahenge। eeshvar ko raam nahin kaha jaata। bahut log raam-raam ki maala japte hain parantu yaad to bhagwan ko karte hain। naam raam ka right hai kyonki yeh to koi jaante nahin ki eeshvar ka naam roop kya hai? manushya to bahut moonjhe hue hain। raavan kaun hai - yeh nahin jaante। raavan ko jalaane par kitna kharcha karte hain। aage dashahra dikhaane ke liye baahar vaalon ko bhi bulaate the। science ka bhi dekho abhi kitna jor hai। yeh science sukh ke liye bhi hai to duhkh ke liye bhi hai। sukh to isse alpakaal ka hi milta hai। isse hi is duniya ka vinaash hota hai। to yeh duhkh hua na। tumhaari hai silence power। unhon ki hai science power। tum silence se apne svadharma mein rehte ho to pavitra ban jaate ho। yaad se vikarma vinaash hote hain। tum yogbal se raajaai lete ho, ismen ladaai aadi ki baat nahin। tum baba se raajaai ka varsa paate ho। baahubal ki to baat hi alag hai। kalpa-kalpa tum bachche hi patit se paavan bante ho phir paavan se patit banenge। yeh drama hai haar jeet ka। parantu yeh baaten sabki buddhi mein nahin baithengi। sab to satayug mein aayenge nahin। behad ka baap apne bachchon ko hi samjhaate hain। doosre dharma vaale aate hi baad mein hain। yeh puraani duniya hai, daivi dharma ka foundation hi sad gaya hai। baaki aise nahin kahenge ki foundation tha hi nahin। tha magar ab nahin hai। praayah gum ho gaya hai। ab anek dharma hain, inko raavan raajya kehte hain। kehte hain vishnu ki naabhi se brahma nikla। koi se bhi poochho ki is chitra ka arth bataao kya hai? to bata nahin sakenge। aatma to ek hi hai। unko kahenge vishnu। vishnupuri bhi dikhaate hain। yeh hai sangam, brahmaapuri। prajaapita brahma to zaroor chaahiye। brahman hain choti। yeh viraat roop ka chitra bhi khaas bhaaratvaasiyon ke liye hai aur bhaarat mein phir bahut dharma vaale rehte hain, isliye inko variety dharmon ka jhaad bhi kaha jaata hai। yeh hai manushya srishti ka jhaad, parantu ismen variety dharma hain। pahle Deityism phir Islamism, yeh hai brahman। is sangam ka to kisko pata nahin hai। yeh hai purushottam sangamayug। purushottam brahman dharma, jabki social service karte hain। tum bachchon ko roohaani social worker kaha jaata hai। social worker bhaarat mein bahut hain, unhon ko bhi sikhaate hain ki namrata bhaav se seva karo। jo pakke kaangresi the woh to jhaadu aadi bhi lagaate the। mehtar aadi ka kaam bhi kiya karte the। aage jo pakke the woh cheeni ke bartan mein khaana nahin khaate the। jo past hua woh drama hai। vahi repeat hoga। in baaton ko samajhte nahin to moonjhate hain isliye drama ka raaz shuru mein kisi ko samjhaana nahin hai। kahenge agar drama mein noondh hoga to hamko aapehi raajya milega aur purushaartha bhi aapehi karenge। aise matvaale bhi hote hain। gyaan ke raazon ko poora samajhte hi nahin hain। are purushaartha bina to paani bhi nahin milega। aapehi thode hi paani aakar munh mein pad jaayega।

baap aate hi hain patiton ko paavan banaane। woh aakar sahaj raasta bataate hain ki aatma ko paavan banaane ke liye mujhe yaad karo to vikarma vinaash honge। baap hi paavan banaane ke liye shreemat dete hain, mujhe yaad karo। parantu woh niraakaar hai to zaroor saakaar mein aakar shreemat denge। baap kehte hain - yeh mera shareer bhi mukrar hai। yeh badli ho nahin sakta। yeh bhi noondh hai। gaaya bhi jaata hai parampita paramatma brahma dvaara svarga ki sthaapna karaate hain। yeh bhagvaanuvaach hai na। to bolne liye mukh chaahiye। prerna se thode hi padhaai hoti hai। baap aakar in dvaara direction dete hain। yeh chitra aadi is brahma ne thode hi banaaye hain। yeh bhi to purushaarthi hai na। yeh koi knowledgeful nahin hai। yeh to bhaktimaarga mein tha। bhakton ka uddhaar to bhagwan ko hi karna hai। bhakti ka phal aakar dete hain। tum bachchon ko manushya se devta banaate hain। baap ismen pravesh kar raajayog sikhlaate hain, inka naam hai shivbaaba। woh kehte hain mera yeh janma divya alaukik hai। mera aane ka part ek hi baar sangam par hai। aise bhi nahin ki tumhaari aatma ke bulaane par aata hoon। jab mere aane ka samay hota hai - to ek second bhi neeche-oopar nahin hota hai। accurate time par aa jaata hoon। mujhe organs hi kahaan hain jo tumhaari pukaar sunoonga। yeh drama bana banaaya hai। jab samay hota hai to aakar patiton ko paavan banaata hoon। aise nahin ki hamaari radiyaan koi bhagwan sunte hain। bahut bachche baba ko bolte hain ki baba aap to jaani-jaanan-haar ho, bataao ham imtahaan mein paas honge। yeh kaam hoga? baba kehte hain are ham to aate hi hain patiton ko paavan banaane ka raasta bataane। mera jo part hoga, vahi bajaaoonga। jo nahin sunaane ka hai woh to sunaaoonga nahin। main yeh baaten bataane thode hi aata hoon। main bhi drama ke bandhan mein baandha hua hoon। har ek ka part drama mein noondha hua hai। jo nishchaybuddhi nahin hain woh svarga mein chalne ke laayak nahin। aur woh baaten bhi aisi hi karenge। baaki jo sooryavanshi aur chandravanshi gharaane ki aatmaayen hain, unhon ko to baba se zaroor aakar sunna hai aur varsa lena hai। baaki jo jaasti purooshaartha nahin karte hain woh bhi svarga mein to aayenge zaroor। lekin saza khaakar koi pad pa lenge। kehte to bahut hain baba ham to sooryavanshi banenge, naaraayan banenge। parantu bachchon ko purushaartha bhi itna karna chaahiye। baba ko follow karne ki bhi taakat chaahiye। follow father kehte hain to inko dekho yeh kaise surrender hua। sab kuchh eeshvar arth arpan kar diya। eeshvar arth sab kuchh dekar apna mamatva mita dena chaahiye। pahle bhatthi se bahut nikle, ab aise thode hi bhatthi ho sakti hai। is kaarya mein maataayen, kanyaayen aage jaati hain। ismen bhi kanyaayen teekhi jaati hain। deh aur deh ke sambandhon ko bhool jaana hai kyonki ab ghar chalna hai। ab baap kehte hain mujhe yaad karo। ab naatak poora hota hai, baaki samay thoda hai। jaise aashik maashook hote hain। yeh baba maashook hai, aashik nahin hai। baap kehte hain - tum patit bane ho to yaad bhi tumko karna hai। main thode hi patit bana hoon, jo tumko yaad karoon। main to yukti bataata hoon us par chalo। is duniya se mamatva mitaate jaao। ab to vaapis jaana hai। yeh buddhi mein gyaan hai। yeh shareer bhi puraana hai। satayug mein nirogi shareer milega। phir ham gore ban jaayenge। saanvare se gora kaise bante hain, yeh bhi tum hi jaante ho। raam ko bhi kaala banaaya hai। shiv ka ling bhi kaala banaaya hai। woh to kabhi kaala banta nahin hai। woh ever pure hai, unko to saphed banaana chaahiye।

baba kehte hain - chitra aise-aise banaao jo dekhne se aakarshan karen। akhbaaron mein kitne chitra padte hain। tumhaare nahin padte hain। baba tum bachchon ko to beakla se aklamand banaate hain। is lakshmi-naaraayan ko aklamand kisne banaaya? baap ne yog dvaara aisa banaaya। tum bachchon ko yeh knowledge mili hai woh phailaana hai, vichaar saagar manthan karna hai। government kitna public ke liye kharcha karti hai। yahaan jo tum bachchon ka so baap ka aur jo baap ka woh tum bachchon ka। baap kehte hain - main hoon nishkaam sevaadhaari। main to daata hoon। yeh khyaal nahin karna chaahiye ki ham shivbaaba ko dete hain। shivbaaba 21 janma ke liye vishwa ka maalik banaate hain। yeh baap leta nahin, deta hai। baba to daata hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise brahma baap surrender hua, aise follow father karna hai। apna sab kuchh eeshvar arth kar trustee ban mamatva mita dena hai।

2) last aate bhi fast jaane ke liye yaad aur padhaai par poora-poora dhyaan dena hai।

vardaan:- puraane sanskaar roopi asthiyon ko sampoorn sthiti ke saagar mein saamne vaale samaan aur sampoorn bhav

baap samaan va sampoorn banne ke liye srishti ki kayaamat ke pahle apni kamjoriyon aur kamiyon ki kayaamat karo। koi bhi uljhan ka naam nishaan na rahe aisa apne ko ujjaval banaao। jaise janma parivartan ke baad puraane janma ki baaten bhool jaati hain aise puraani baaton ko, puraane sanskaaron ko bhasma karo, asthiyon ko bhi sampoorn sthiti ke saagar mein sama do tab kahenge samaan aur sampoorn।

slogan:- vistaar ko saar mein samaane ki jaadoogri seekh lo to baap samaan ban jaayenge।