Murli du jour du dimanche 19 décembre 2021

19-12-21 praatahmurli om shanti ''avyakt-baapdaada'' revise 13-12-89 madhuban

divya brahman janma ke bhaagya ki rekhaaen

aaj vishwa rachayita baapdaada apne vishwa ki sarva manushya-aatmaon roopi bachchon ko dekh rahe hain। sarva aatmaon mein arthaat sarva bachchon mein do prakaar ke bachche hain। ek hain baap ko pahchaanne vaale aur doosre hain pukaarne vaale va parakhne ke prayatna karne vaale। lekin hain sabhi bachche। to aaj donon prakaar ke bachchon ko dekh rahe the। sarva bachchon mein se pahchaanne vaale va praapta karne vaale bachche bahut thode hain aur pahchaan karne ke prayatna vaale anek hain। pahchaanne vaale bachchon ke mastak par shreshtha bhaagya ki lakeer chamak rahi hai। sabse shreshtha bhaagya ki lakeer hai - baap dvaara divya brahman janma ki। divya janma ki rekha ati shreshtha chamak rahi hai। pukaarne vaale bachche anjaane bhi maante yahi hain ki bhagwan ne humein racha hai lekin anjaan hone kaaran divya janma ki anubhooti nahin kar sakte। aap bhi kehte ho - humein baapdaada ne divya janma diya, woh bhi kehte - bhagwan ne racha, bhagwan hi rachta hai, bhagwan hi paalanhaar hai। lekin donon ke kahne mein kitna antar hai! aap anubhav se, nashe se, knowledge se kehte ho ki hamko baapdaada, maat-pita ne racha arthaat brahman janma diya। rachta ko, janma ko, janmapatri ko, divya janma ki vidhi aur siddhi - sabko jaante ho। har ek ko apna divya janma ka birth-de yaad hai na? is divya janma ki visheshta kaunsi hai? saadhaaran janmadhaari aatmaaen apna birth-de alag manaati, phraindsa-de alag manaati, padhaai ka din alag manaati aur aap kya kahenge? aapka birth-de bhi vahi hai to marriage-de aur padhaai ka din bhi vahi hai। mother-de kaho, father-de kaho, engagement-de kaho, sab ek hi hai। aisa divya janma kab suna? saare kalpa mein aisa din aap aatmaon ka phir kabhi bhi nahin aata। satayug mein bhi birth-de aur marriage-de ek hi nahin hoga। lekin is sangamayug ke is mahaan janma ki yeh visheshta bhi hai aur vichitrata bhi hai। vaise to jis din brahman bane vahi janmadin, vahi marriage-din hai kyonki sabhi yahi vaayda karte ho - ek baap doosra na koi। yeh dridh sankalp pahle hi karte ho na। tumheen se khaaoon, tumheen se baithoon, tumheen se sarva sambandh nibhaaoon - yeh sabne vaayda kiya na। paandavon ne, maataaon ne, kumaariyon ne sabhi ne vaayda kiya hai। to aur kahaan svapna mein bhi man nahin ja sakta। aise pakke ho na va koi saathi chaahiye? seva ke liye koi vishesh saathi chaahiye? to saathi-divas kiska manaayenge? sevaadhaari saathi ka va baap saathi hai uska divas manaayenge? chaahe service karne vaale hain, chaahe service lene vaale hain lekin seva ke samay seva ki, phir itne nyaare aur pyaare bano jo jara bhi vishesh jhukaav nahin ho। jo seva mein madad karega woh vishesh hoga na! chaahe bhaai ho va behen ho, jo vishesh seva karta woh vishesh adhikaar bhi rakhega! to seva ke saathi bano lekin saakshi hoke saathi bano। saaksheepan bhool jaata hai to sirf saathi banne mein baap bhool jaata hai। saakshi ban part bajaane ki practice karo।

har bachche ke mastak par vishesh 4 bhaagya ki lakeeren chamakti hain। (1)divya janma ki rekha, (2)parmaatma-paalna ki rekha, (3)parmaatma padhaai ki rekha aur (4)nissvaartha seva ki rekha। sabhi ke mastak mein chaaron hi bhaagya ki rekhaaen chamak rahi hain। lekin chamak mein aur sada ekras vriddhi ko praapta karne mein pharka hone kaaran chamak mein antar dikhaai deta hai। aadi se ab tak chaaron hi rekhaaen sada yathaartha roop se chalti rahen, woh bahut thodon ki hain। beech-beech mein koi-na-koi baat mein bhaagya ki lakeer ya to khandit hoti hai va chamak kam hoti hai, spashta nahin hoti। jaise hasta-rekhaaen bhi dekhte hain na - koi ki khandit hoti, koi ki ekras hoti hain, koi ki spashta hoti hain, koi ki spashta nahin hoti। baapdaada bhi bachchon ke bhaagya ki rekha ko dekhte rehte hain। divya janma to sabhi ne liya lekin divya janma ki rekha khandit hoti va spashta nahin hoti kyonki apne janma ke dharma mein akhanda nahin chalta to unke bhaagya ki lakeer khandit hoti। dharma kya hai, karma kya hai - usko to jaante ho na। aise hi parmaatma-paalna mein to sabhi brahman chal rahe ho। chaahe samarpit ho, chaahe pravritti mein ho lekin baap ke direction se chal rahe ho। pravritti vaale kya kahenge? apna kamaaya hua khaate ho va baap ka khaate ho? baap ka khaate hain na kyonki apna sab-kuchh baap ko de diya to baap ka hi hua na! chaahe kamaate bhi ho lekin kamaaya hua dhan baap ke havaale karte ho ya apne kaam mein lagaate ho? trustee ho na? trustee ka apna kuchh nahin rehta। grihasthi mein apnaapan hota hai, trustee arthaat sab baap ka hai। apne haath se khaana banaate ho to bhi samajhte ho na - brahma bhojan kha rahe hain। pahle bhog kisko lagaate ho? baap ko arpan karte ho na? arpan karna arthaat baap ka khaana। brahma bhojan khaate ho। chaahe bachchon ke arth bhi lagaate ho woh bhi direction anusaar lagaate ho। jaise samarpit bahnen va bhaai bhinna-bhinna kaarya mein tan-man bhi lagaate to dhan bhi lagaate hain। aise pravritti mein rahne vaale bhi chaahe tan lagaate, chaahe dhan lagaate - baap ki shreemat pramaan hi amaanat samajh kaarya mein lagaate ho-aise karte ho na? amaanat mein khyaanat athva manmat to nahin milaate ho na। to parmaatma-paalna sab brahman aatmaon ko mil rahi hai। paalna ki jaati hai shaktishaali banaane ke liye। maata ki paalna ka pratyaksha roop kya hota? bachcha shaktishaali banta hai। to brahma-maa ki paalna dvaara sabhi master sarvashaktimaan bane ho। lekin koi bachche sada shaktiyon ko kaarya mein lagaate aur koi bachche praapta shaktiyon ko arthaat paalna ko kaarya mein nahin lagaate arthaat paalna ko practical mein nahin laate isliye shreshtha paalna milte hue bhi kamjor rah jaate hain aur bhaagya ki lakeer khandit ho jaati hai।

aise hi padhaai ki lakeer-padhaai ka em object hi hai shreshtha pad ko praapta karna। shikshak baap padhaai sabko ek hi padhaata, ek hi samay par padhaata। lekin jo shreshtha brahman-jeevan ka va padhaai ka pad athva nasha hai woh sabko ek jaisa nahin rehta। pharishta so devta status ko sada smriti mein nahin rakhte, isliye bhaagya ki lakeer mein antar pad jaata hai।

aise hi seva ki lakeer - seva ki visheshta hai jo brahma baap ne saakaar roop mein antim vardaan roop mein smriti dilaai - niraakaari, nirvikaari aur nirhankaari। niraakaari sthiti mein sthit hone ke bina kisi bhi aatma ko seva ka phal nahin de sakte kyonki aatma ka teer aatma ko lagta hai। svayan sada is sthiti mein sthit nahin hain to jinki seva karte woh bhi sada smriti-swaroop nahin ban sakte। aise hi nirvikaari, koi bhi vikaar ka ansh anya aatma ke shoodra vansh ko parivartan kar brahman vanshi nahin bana sakta। us aatma ko bhi mehnat karni padti hai isliye muhabbat ka phal sada anubhav nahin kar sakte। nirhankaari seva ka arth hi hai phalasvaroop ban jhukna। bina nirmaan bane nirmaan arthaat seva mein saphalta nahin mil sakti। to niraakaari, nirvikaari, nirhankaari - in teenon vardaanon ko sada seva mein practical mein laana, isko kehte hain akhanda bhaagya ki rekha। ab chaaron hi bhaagya ki rekhaaon ko check karo ki akhanda hain ya khandit hain, spashta hain ya aspashta hain? koto mein koi to ban gaye hain lekin banna hai koi mein bhi koi। jo koi mein koi hoga vahi ab sarva ka maanneey aur bhavishya mein poojyaneey banta hai। jo akhanda bhaagya ke lakeervaan hain uski nishaani hai- woh ab bhi sarva brahman-parivaar ka pyaara hoga। maanneey hone ke kaaran sarva ki duaayen, shreshtha aatmaon ke bhaagya ki lakeer ko chamkaati rehti। to apne aapse poochho - main kaun? to suna, aaj kya dekha!

duniya vaale kehte hain paalanhaar hai, janmadaata hai। lekin janmadaata ka parichay hi nahin hai। aur aap nashe se kah sakte ho ki janmadaata paramatma kaise hain, paalanhaar paramatma kaise hain! brahma-maa ki paalna bhi mil rahi hai aur baap ki shreshtha mat par yogya aatmaayen ban gaye। baap bachche ko yogya banaata hai aur maa shaktishaali banaati hai। donon anubhav hain na! achha!

geeta paathshaala vaale jyaada aaye hain। geeta paathshaala vaale kaun hue? geeta ka gyaan sunne vaale “he arjun'' hain। “arjun'' samajhkar geeta-gyaan sunte ho ya “arjun'' doosra hai। “main arjun hoon'' - yeh samajhte ho? sadaiv yeh anubhav karke suno main arjun hoon, mujhe vishesh bhagwan geeta ka gyaan suna raha hai। geeta paathshaala vaale to sabse number one nikal jaayenge। is vidhi se suno to aage chale jaayenge। teachers ko busy rahne ke liye geeta paathshaalaaen achhi hain। geeta paathshaala chakravarti bhi banaati, busy bhi rakhti। vriddhi bhi achhi hoti hai। mehnat kam lete hain, madadgaar jyaada bante hain। balihaari to geeta paathshaala vaalon ki hai na, isliye gaanv vaale baap ko pyaare lagte hain। bade sthaanon par maaya bhi bade roop ki aati hai। gaanv vaalon ko maaya bhi gaanv vaali aati hai, isliye bahut achhe ho gaanv vaale, jyaada sankhya kahaan ki hai? lekin abhi to sabhi madhuban nivaasi ho।

sabhi teachers ki permanent address kaunsi hai? madhuban hai na। woh dukaan hain, yeh ghar hai। jyaada kya yaad rehta hai - ghar ya dukaan? koi-koi ko dukaan jyaada yaad rehti hai। soyenge to bhi dukaan yaad aayegi। aap log jahaan chaaho buddhi ko sthit kar sakte ho। sevaakendra par rehte bhi madhuban nivaasi ban sakte aur madhuban mein rehte bhi sevaadhaari ban sakte ho, yeh abhyaas hai na। second mein socha aur sthit hua, yeh hai teachers ke sthiti ki visheshta। buddhi bhi samarpit hai na ya sirf seva ke liye samarpit ho? samarpit buddhi arthaat jahaan chaahen, jab chaahen vahaan sthit ho jaae। yeh visheshta ki nishaani hai। buddhi sahit samarpit - aise ho na ya buddhi se aadhi samarpit hain aur shareer se saari hain?

koi-koi teachers bhi kehti hain - yog mein baithte hain to aatma-abhimaani hone badle seva yaad aati hai। lekin aisa nahin hona chaahiye kyonki last samay agar ashareeri banne ki bajaae seva ka bhi sankalp chala to second ke paper mein fail ho jaayenge। us samay sivaay baap ke, niraakaari, nirvikaari, nirhankaari - aur kuchh yaad nahin। brahma baap ne antim stage yahi banaai na - bilkul niraakaari। seva mein phir bhi saakaar mein aa jaayenge, isliye yeh abhyaas karo - jis samay jo chaahe woh sthiti ho nahin to dhokha mil jaayega। aise nahin socho - seva ka hi to sankalp aaya, kharaab sankalp vikalpa to nahin aaya। lekin controlling power to nahin hui na। controlling power nahin to ruling power aa nahin sakti, phir ruler ban nahin sakenge। to abhyaas karo। abhi se bahut kaal ka abhyaas chaahiye। isko halka nahin chhodo। to suna, teachers ko kya abhyaas karna hai? tab kahenge - teachers baap ko follow karne vaali hain। sada brahma baap ko saamne rakho aur teen vardaan yaad rakho aur follow karo। yeh to sahaj hai na। yeh antim vardaan bahut shaktishaali hai। in teen vardaanon ko agar sada smriti mein rakhte practical mein aao to baap ke diltakhta aur raajya-takhta ke adhikaari zaroor banenge। achha!

sarva baap samaan sada knowledgeful, powerful bachchon ko, sada bhaagya-vidhaata dvaara shreshtha bhaagya ki spashta rekhaaon vaale bhaagyavaan bachche, sada baap samaan tri-vardaan praapta hue vishesh aatmaon ko, sada brahman janma ki paalna aur padhaai ko aage badhaane vaale - aise akhanda bhaagyavaan bachchon ko baapdaada ka yaadapyaar aur namaste।

avyakt-baapdaada ki zone -wise bachchon se mulaakaat - mahaaraashtra group

sada apne ko sarva praaptiyon se bharpoor anubhav karte ho? kabhi khaali to nahin ho jaate? kyonki baap ne itni praaptiyaan karaai hain, agar sarva praapti apne mein jama karo to kabhi bhi khaali nahin ho sakte। is janma ki to baat hi nahin hai lekin anek janma bhi yahaan ki bharpoorta saath rahegi। to jab itna diya hai jo bhavishya mein bhi chalna hai, to abhi khaali kaise honge? agar buddhi khaali rahi to halchal rahegi। koi bhi cheez agar full bhari nahin hoti to usmein halchal hoti hai। to bharpoor hone ki nishaani hai ki maaya ko aane ki margin nahin hai। maaya hi hilaati hai। to maaya aati hai ya nahin? sankalp mein bhi aati hai? maaya ke raajya mein to aadhaakalpa anubhav kiya aur abhi apne raajya mein ja rahe ho। jab maayaajeet banenge tab phir apna raajya aayega aur maayaajeet banne ka sahaj saadhan - sada praaptiyon se bharpoor raho। koi ek bhi praapti se vanchit nahin raho। sarva praapti ho। aise nahin - yeh to hai, ek baat nahin to koi harja nahin। agar jara bhi kami hogi to maaya chhodegi nahin, usi jagah se hilaayegi। to maaya ko aane ki margin hi na ho। aa gai, phir bhagaao to usmein time jaata hai। to maayaajeet bane ho? yeh nahin socho - 2 varsha ya 3 varsha mein ho jaayenge। braahmanon ke liye slogan hai - “ab nahin to kabhi nahin''। ab samay ki raphtaar ke pramaan koi bhi samay kuchh bhi ho sakta hai, isliye teevra purushaarthi bano। achha!

vardaan:- samay aur sankalp sahit apne sarva khajaanon ko will karne vaale mohjeet bhav

jaise bachche ko sab kuchh will kiya jaata hai, aise aap log bhi baap ko apna vaaris banaakar sab kuchh will kar do to will power aa jaayegi। is will power se moh svatah nashta ho jaayega। jaise saakaar baap ne poora hi apne ko will kiya vaise aap logon ki jo smriti hai, samay aur sankalpon ka khajaana hai use will karo arthaat shreemat pramaan sevaaon mein lagaao to mohjeet, bandhanmukta ban jaayenge।

slogan:- ek do ka snehi banne ke liye saralta aur sahansheelta ka gun dhaaran karo।

soochna:- aaj maas ka teesra ravivaar antarraashtreey yog divas hai, baba ke sabhi bachche saayan 6.30 se 7.30 baje tak vishesh apne merciful daata swaroop, sampoorn pavitra swaroop mein sthit ho sarva aatmaon ko pavitrata, sukh shanti ki anchali dene ki seva karen।