Murli du jour du mercredi 29 décembre 2021

29-12-2021 praatahmurli om shanti "baapdaada"' madhuban

“meethe bachche - tum aadhaakalpa ke liye sukhdhaam mein holy de manaayenge kyonki vahaan duhkh ka naam nishaan nahin hai''

prashn:- brahman bachchon ko baap aisi kaun si yukti bataate hain, jis yukti se ve apna jeevan saphal bana sakte hain?

uttar:- baba kehte - meethe bachche apna jeevan saphal karna hai to apna tan-man-dhan sab eeshvareey seva mein lagaao। follow father। phir dekhna - iski evaj mein tumko kya milta hai। aatma golden ban jaayegi। tan bhi bahut sundar milega। dhan to athaah mil jaayega।

geet:- aakhir woh din aaya aaj…

om shanti। jab baap om shanti kehte hain to daada bhi om shanti kehte hain। bachche bhi andar mein kehte hain om shanti। jab koi bhaashan karte hain to om shanti kehte hain। vahaan sab baithe hue bhi kehte hain om shanti। respond zaroor dena hota hai। abhi tum bachche samajhte ho aatmaon aur paramatma ka abhi milan ho raha hai। gaaya bhi hua hai - aatma paramatma alag rahe bahukaal... jisse bahut kaal alag rehte hain, unse hi sammukh milte hain। woh aate hain apna part bajaane। bhakti maarga mein jisko itna dhoondhate rehte hain, aakhir woh din bhi aata hai jabki baap se milna hota hai। sirf ek bhaarat hi avinaashi khanda hai, baaki sab hain vinaashi khanda। nai duniya mein to sirf bhaarat hi hota hai। bhaarat ka kabhi vinaash nahin hota hai। yeh to hai hi। abhi to kitne khanda hain। bhaarat mein jab devi-devtaaon ka raajya tha to vahaan koi khanda nahin tha, sirf bhaaratvaasi hi the aur koi manushya nahin the। bhaarat mein sirf sooryavanshi devi-devtaaon ka raajya tha। abhi unhon ke sirf chitra rah gaye hain। yaadgaar to rehna chaahiye na। pahle kitna chhota jhaad hota hai। usko kaha jaata hai raamraajya, eeshvareey raajya। eeshvar ki sthaapna hai na। abhi to hai aasuri sthaapna aur satayug ki hai daivi sthaapna। eeshvar ki sthaapna aadhaakalpa chalti hai phir aasuri sthaapna hoti hai, jisko raavanraajya kaha jaata hai। woh hai nirvikaari duniya aur yeh hai vikaari duniya। duniya mein koi jaante nahin ki yeh duniya ka chakra kaise phirta hai। devi-devta phir kahaan gaye। paavan so phir patit kaise banen। seedhi utarna hota hai na। kalaayen kam hoti jaati hain। jaise chandrama ko grahan lagta hai to kaha jaata hai de daan to chhoote grahan। abhi baap kehte hain 5 vikaaron ko chhodo। jab tum raavan ki jel se chhootenge to raamraajya sthaapan ho jaayega। vahaan yeh 5 vikaar hote nahin। yeh bhi kisko pata nahin। manushya samajhte hain yeh sada se hi chale aate hain। duniya mein manushyon ki hain anek mat। tumhaari hai ek mat, isko kaha jaata hai advait mat। yahaan hai aasuri mat।

tum jaante ho ham bhaaratvaasi raamraajya mein the। poojya so pujaari bane hain। tum bachchon ki buddhi mein yeh knowledge abhi baithi hai। ham hi poojya the phir punarjanma lete-lete pujaari bane hain। woh samajhte hain paramatma hi poojya pujaari bante hain, unki hi saari leela hai, sabhi paramatma hi paramatma hain, yeh sabse badi bhool hai। abhi tum bachchon ko to khushi hoti hai, jis baap ko aadhaakalpa yaad kiya hai, ab woh mila hai। kehte hain duhkh mein simran sab kare, sukh mein kare na koi। vahi aatmaayen phir duhkh mein aati hain to baap ko yaad karti hain। satayug mein koi bhi baap ko bulaayenge nahin। to abhi aatmaon ka paramatma se, paramatma ka ham aatmaon se mela hota hai। baap hi gyaan ka saagar hai, ismen paani ke saagar ki baat nahin। sangam par dekho kumbha ka kitna bada mela lagta hai, abhi sachcha-sachcha mela tumhaara laga hua hai। sab to ikatthe mil nahin sakte। koi kahaan se, koi kahaan se aate hain। mele par kitne laakhon manushya jaate hain snaan karne। janma-janmaantar yeh snaan karte aaye hain। kehte hain yeh mela lagta hi rehta hai। chhota aur bada kumbha bhi kehte hain। ab baap to ek hi baar aate hain patiton ko paavan banaane। ganga patit-paavni hai to kya woh gyaan sunaayegi? yahaan to patit-paavan baap baith srishti ke aadi madhya ant ka gyaan sunaate hain। bachche jaante hain abhi duniya ki haalat kya hai? vinaash to bachchon ne dekha hai। arjun to yeh brahma thahra na। yeh to hai manushya ka rath। yeh bataate hain hamne vinaash bhi dekha, apni raajdhaani bhi dekhi tab chhoda। ghar aadi sab kuchh phat se chhod diya। vinaash to hona hi hai। yeh koi nai baat nahin hai।

yeh hai eeshvareey darbaar, ismen koi patit ko baithna nahin chaahiye। nahin to woh ekdam rasaatal mein chala jaayega patit banne se, isliye patit ko aane ka hukm hi nahin hai। aise koi-koi aa jaate hain। samajhte hain inhon ko kya pata ki ham vikaar mein gaye। yeh badi gandi cheez hai। vilaayat mein 4-5 bachche paida karne vaalon ko inaam milta hai। satayug mein to ek hi bachcha hota hai, so bhi vikaar ki vahaan baat nahin। vahaan to raavan raajya hi nahin। woh hai raamraajya। kanya shaadi karti hai to kanya ko gupta reeti se bahut kuchh dete hain, jo kisko pata nahin padta। baap bhi kehte hain bachche tumko gupta daan deta hoon। kisko pata padta hai kya, ham kya de rahe hain। yeh hai gupta। koi samajh nahin sakte ki yeh bi.ke. vishwa ke maalik banenge। yeh tum abhi samajhte ho, ham vishwa ke maalik the phir 84 janma lete hain। ham kalpa-kalpa baba se varsa lete hain। kehte hain baba ham kalpa-kalpa aapse milte hain। kalpa pahle bhi mile the। baba ko hi raam kehte hain। raam treta vaala nahin, unko to sirf unka bachcha hi baba kahega। yeh to hai behad ka baap। ab baap tum bachchon ko kehte hain। tum bachchon ko daiveegun dhaaran kar aisa banna hai। in devi-devtaaon ki kitni mahima karte hain। parantu samajhte kuchh bhi nahin। kehte hain achtam keshvam... ab kahaan raam, kahaan naaraayan। sabko mila dete hain। arth kuchh bhi nahin nikalta। abhi tumko nutshell mein sab kuchh samjhaaya jaata hai। dvaapar se lekar yeh bhakti maarga shuru hota hai। 84 ka chakra lagaakar neeche utarna hi hai। 84 janma gaaye jaate hain। baba ne poochha - yahaan tum baithe ho to kya sab 84 janma lenge ya koi 80-82 bhi lenge? kya sab paas honge? kya bhaaganti ho jaane vaalon ke janma kam jaasti nahin honge? avastha anusaar hi har ek ka part hoga na। bahut hain jo aashcharyavat bhaaganti ho jaayenge। phir satayug mein kaise aayenge। woh to praja mein bhi bahut deri se aayenge kyonki glaani karte hain। itne sab thode hi sooryavanshi mein aa sakte hain। nambarvaar purushaartha anusaar maala banti hai। baap to gyaan ka saagar hai। kaun sa usmein gyaan hai, yeh bhi koi nahin jaante hain। tumko ab gyaan mil raha hai। woh to sirf stuti karte hain, samajhte kuchh bhi nahin। isko kaha jaata hai bhakti maarga। tyohaar bhi jo manaaye jaate hain woh hain sab is samay ke, jo phir baad mein manaaye jaate hain। tumko to aadhaakalpa sukh mein holy de mil jaati hai। kabhi duhkh ka naam nahin dekhenge। holy de ho jaata hai kyonki tum pavitra ho jaate ho na। baap samjhaate hain tumhaara yeh antim janma hai। jab raavanraajya shuru hota hai, usko mrityulok kaha jaata hai। mrityulok murdaabaad... amarlok jindaabaad hota hai। sukh aur duhkh, raam aur raavan ka yeh khel hai। raam dvaara tum raajya paate ho, raavan dvaara tum raajya ganvaate ho। baap kehte hain - tum apne jeevan ko nahin jaante ho aur koi aise kah na sake, baap hi batlaate hain। woh to 84 laakh kah dete hain। phir to kalpa ki aayu laakhon varsha ho jaati hai। kuchh bhi buddhi mein nahin aata, jo in baaton ko samajh saken। kalpa ki aayu bhi wrong likh di hai। yeh shaastra aadi sab bhakti maarga ke hain। tum bachchon ko kitna sahaj samjhaaya jaata hai। aage chalkar aur achhi reeti samjhaayenge। jab koi marta hai to us samay sirf thoda vairaagya aata hai, usko kaha jaata hai shamshaani vairaagya। shamshaan se baahar nikal maarket mein gaye to khalaas, jaakar maas madira khareed karenge। tum bachchon ko is samay hai saari puraani duniya se vairaagya। baba samjhaate hain vairaagya do prakaar ka hai। nivritti maarga vaalon ka hai had ka vairaagya। woh pravritti maarga ke liye gyaan denge hi nahin। donon pavitra bano - yeh woh kah nahin sakte। geeta woh suna na saken। tumko to gyaan saagar se gyaan milta hai। woh samajhte bhi hain parantu unko dar rehta hai। aage chalkar maan lenge barobar geeta krishna ne nahin sunaai। agar ab kahenge to unke sab followers bhaag jaayenge। phat se kahenge inko bi.ke. ka jaadu laga hai।

ab baap samjhaate hain agar devta banna hai to daiveegun dhaaran karo। mukhya baat hai pavitrata ki। yahaan manushyon ka khaan paan hi dekho kitna aasuri hai। janma-janmaantar ki paap aatmaayen hain। punya aatma ek bhi nahin hai। abhi tum ban rahe ho। satayug mein sab punya aatmaayen hoti hain। vahaan hain hi shreshthaachaari paavan। yahaan hai bhrashtaachaari patit। satayug mein 5 vikaar hote nahin। raamraajya raavanraajya mein kitna farka pad jaata hai, inko to raavan raajya kahenge na। patit-paavan ek hi god father hai। tum jaante ho woh hamaara behad ka baap hai। behad ke baap, rachayita ko rachna yaad karti hai। baba ne samjhaaya hai - satayug mein hai ek baap। phir hote hain do baap। laukik aur paarlaukik। tumko hain teen baap। laukik, paarlaukik, alaukik। bhakti maarga mein laukik baap hote bhi paarlaukik baap ko yaad karte hain। yahaan to yeh wonderful hai - baap aur daada। donon baithe hain। yeh bhi tum bachche jaante ho - phir ghadi-ghadi bhool jaate ho। prajaapita brahma to gaaya hua hai na। woh abhi hi milta hai। prajaapita brahma hai saakaar। woh hai niraakaar। niraakaar aur saakaar donon ikatthe hain। donon ka highest position hai, inse bada koi hota nahin aur kitna saadhaaran reeti baithe hain। padhaai bhi kitni sahaj hai bachchon ke liye। baap sirf kehte hain apne ko aatma samjho। aatma avinaashi hai, yeh deh vinaashi hai। ek shareer se aatma nikal jaakar doosra shareer leti hai, tumko rone ki darkaar nahin hai। manushya shareer ko yaad karne se rote hain। tumko rone ki darkaar nahin। satayug mein kabhi rote nahin। vahaan hain hi mohjeet। yeh sab baaten tumko sangam par hi samjhaai jaati hain। tumko yeh lakshmi-naaraayan ka chitra dekhkar bahut khushi honi chaahiye isliye baap ne kaha hai yeh lakshmi-naaraayan, trimoorti ka badge va medal jeb mein daal do। ghadi-ghadi pocket se nikaal kar dekho। oho! ham to yeh banne vaale hain। bahut khushi hogi। auron ko bhi dikhaakar khush karo ki ham yeh ban rahe hain। dekhne se khushi hogi। main to shiv baba ka bachcha hoon। mujhe kisi baat ki kya parvaah karni hai। kuchh ghaata pada so kya! ham to bhavishya 21 janmon ke liye padmapti bante hain। dekho, baba ne sab kuchh de diya। phir phaayde mein hain ya ghaate mein hain? baba ab sammukh samjha rahe hain। tumhaara yeh dhan daulat sab kuchh mitti mein mil jaane vaala hai। apna jeevan saphal karna hai to apna tan-man-dhan ismen lagaao phir inke evaj mein dekho tumko kya milta hai! aatma bhi golden ban jaati to tan bhi sundar, dhan to athaah rehta hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) main shivbaaba ka bachcha hoon, mujhe bhavishya 21 janmon ke liye padmapti banna hai, isi khushi mein rehna hai aur sabko khush karna hai। kisi baat ki parvaah nahin karni hai।

2) ek baap ki advet mat par chalkar behad ka vairaagi banna hai। ek baap ko follow karna hai।

vardaan:- roohaab aur raham ke gun dvaara vishwa nav nirmaan karne vaale vishwa kalyaankaari bhav

vishwa kalyaankaari banne ke liye mukhya do dhaarnaayen aavashyak hain ek eeshvareey roohaab aur doosra raham। agar roohaab aur raham donon saath-saath aur samaan hain to roohaaniyat ki stage ban jaati hai। to jab bhi koi kartavya karte ho va mukh se shabd varnan karte ho to check karo ki raham aur roohaab donon samaan roop mein hain? shaktiyon ke chitron mein in donon gunon ki samaanta dikhaate hain, isi ke aadhaar par vishwa nav-nirmaan ke nimitta ban sakte ho।

slogan:- baap ke pyaar ke peechhe vyartha sankalp nyochhaavar kar do - yahi sachchi kurbaani hai।