Murli du jour du mercredi 2 février 2022

02-02-2022 praatahmurli om shanti "baapdaada"' madhuban

“meethe bachche - tum abhi eeshvareey khajaane se pal rahe ho, tumhaara kartavya hai - gyaan ka khajaana baantakar sabka kalyaan karna''

prashn:- maaya ki grahchaari aane se bachche kaun sa wonderful khel karte hain?

uttar:- jab grahchaari aati hai to aise oonche te oonche baap, teacher aur satguru teenon ko hi bhool jaate hain। wonder hai jo achhe-achhe nishchaybuddhi bachche bhi kehte - ham nahin maante। aashcharyavat sunanti, kathanti bhaaganti ho jaate hain। aaj mama baba kehte kal gum ho jaate। pata hi nahin chalta lekin baba kahe phir bhi sab aayenge kyonki sabko sharnaagti to ek baap ke paas hi milni hai।

geet:- om namo shivaae…

om shanti। yeh geet to bachche samay prati samay sunte bhi hain aur apne paarlaukik parampita paramatma ko yaad bhi karte hain। yaad hamesha unko kiya jaata hai jisse kuchh na kuchh sukh milta hai। banaaras mein shiv ke mandir hain। vahaan bahut jaate hain aur niraakaar baap ko yaad karte hain। jaise lakshmi-naaraayan ko sab yaad karte hain kyonki unke raajya mein sukh tha, tab hi raaja raani ki mahima nikalti hai। saari duniya yaad karti hai O god father। woh ek hi world ka father hai aur koi to world ka father nahin hai, world ka father hai niraakaar god, us ek ko hi avtaar arthaat reincarnation bhi kehte hain। woh ek hi baap hai jisko apna sookshm va sthool shareer nahin hai। brahma, vishnu, shankar ko bhi sookshm shareer hai। unko bhi avtaar nahin kahenge। avtaar akshar bahut ooncha hai। woh sabka baap, sabko sukh dene vaala patit-paavan hai। sarva manushya aatmaayen jo bhi aati hain woh pahle satopradhaan phir sato rajo tamon mein aati hain। unko patit duhkhi hona hi hai। punarjanma to sab lete hain na। brahma ko bhi manushya kaha jaata, vishnu ke do roop lakshmi-naaraayan ko bhi manushya kaha jaata। to unhon ko bhi ham avtaar nahin kah sakte hain। avtaar to sirf ek hi hai। baap aate hi hain bachchon ko varsa dene। aate bhi tab hain jab saari duniya patit ho jaati hai। jo bhi manushya maatra hain, sab god father ki rachna hain। bhinna naam roop se sab god father zaroor kehte hain। har ek aatma ki buddhi us baap ko yaad karti hai। aise nahin brahma vishnu shankar ko yaad karte hain। brahma vishnu shankar ko baap nahin kahenge। baap to ek creator ko hi kahenge। jab sangamayug hota hai, sabhi manushya patit ho jaate hain tab baap avtaar lete hain, kalpa ke sangamayug par, kaliyug ko satayug banaane। creator hai na। dikhaate hain brahma dvaara sthaapna karaate hain, shankar dvaara vinaash, vishnu dvaara paalna karaate hain। aate bhi hain bhaarat mein। shivraatri bhi bhaarat mein hi manaai jaati hai। parantu jaante nahin ki shiv ka naam roop desh kaal kya hai! baap kehte hain mujhe na jaan sarvavyaapi kah dete hain। meri bahut glaani kar dete hain, jis kaaran bhaaratvaasi bilkul hi patit ho gaye hain। jab bhaarat mein sab patit aatmaayen ban jaati hain tab phir main aata hoon। kaliyug mein koi bhi punya aatma, pavitra aatma nahin ho sakti। pavitra duniya mein pavitra aatmaayen rehti hain, usko kaha jaata hai sampoorn nirvikaari duniya। uski bhent mein kaliyug hai vicious duniya। kaliyug ke ant aur satayug ke aadi ko kaha jaata hai sangam। dvaapar aur treta ko nahin milaayenge। ant maana saari puraani duniya ka ant aur nai duniya ka aadi। satayug hai paavan duniya phir kalaayen kamti hoti jaati hain। satayug treta ko bhi ek samaan nahin rakhenge। baap kehte hain mujhe bachchon ne nambarvaar hi pahchaana hai - is samay hi yeh kaha jaata hai kyonki maaya saamne khadi hai, ghadi-ghadi bhula deti hai। kehte hain ham brahma ke bachche shiv ke potre hain। yeh kehte bhi bhool jaate hain। agyaan mein aisi baat kabhi nahin bhoolenge। yahaan saamne kah dete hain ki ham brahma ke bachche nahin hain। ekdam bhool jaate hain। itna bhool jaate hain jo phir kabhi yaad bhi nahin karte hain। yeh ek bada wonder hai। bhaaratvaasi yeh bhi jaante hain ki svarga banaane vaala parampita paramatma hai aur narka banaane vaala maaya raavan hai। phir donon hi baaten bhool jaate hain। na baap ko jaante, na raavan ko jaante। shiv ko poojte hain aur raavan ko jalaate hain। parantu wonder yeh hai jinhon ko poojte hain unke occupation, biography ka pata nahin aur raavan jisko jalaate hain unka bhi pata nahin ki raavan kya cheez hai। manushya maatra yatha raaja raani tatha praja usmein sab aa jaate hain, sab tuchchha buddhi hain। baap samjhaate hain aur jo dharma sthaapan karne aate hain, unko reincarnation nahin kahenge। avatran ek baap ka hi hota hai bhaarat mein। parantu bhaaratvaasi khud hi bhool jaate hain। bhal parampita paramatma ki pooja karte hain parantu woh kab aaya, kya kiya, kuchh bhi jaante nahin। na baap ko, na rachna ke aadi-madhya-ant ko jaante hain, na devi-devtaaon ki biography ko jaante hain, isliye hi duhkhi hain। bhaaratvaasi pahle kitne sukhi the, bilkul hi vishwa ke maalik the। ab woh bhaaratvaasi yeh nahin jaante ki ham sab paavan shreshthaachaari the। agar the to kaise banen, kuchh bhi nahin jaante, yeh hai wonder। baap kitna clear kar samjhaate hain। kisko samjhaayenge? apne bachchon ko samjhaata hoon। bachchon ke hi saamne pratyaksha hota hoon। parantu bachche bhi pratyaksha ho, mama-baba kahkar phir bhool jaate hain। yahi wonder hai। agyaankaal mein kabhi baap teacher guru ko bhool na saken। yahaan yeh paarlaukik baap jo itna bada hai, jo sab duhkh door karte hain, unko bhool jaate hain, tab kaha jaata hai aashcharyavat sunanti, kathanti aho mam maaya tum kitni prabal ho। behad baap ke bananti, teacher samajh unse padhte hue, patit-paavan satguru pakka samajhte hue phir teenon ko hi bhool jaate hain। ek ko bhoole to teenon ko hi bhoole। ek ko yaad karo to teenon hi yaad padenge kyonki yeh teenon hi combined hain। khud hi baap teacher aur satguru hai, so bhi accurate hai। kehte hain main baap hoon tumko zaroor apne paramdham mein le jaaoonga। main tumhaara shikshak hoon, padhaakar tumko zaroor raajaaon ka raaja banaaoonga। main satguru hoon, tum bachchon ko nambarvaar purooshaartha anusaar sabko vaapis zaroor le jaaoonga। yeh guarantee karte hain। aise baap ko bhi chalte-chalte bhool jaate hain। maaya ki grahchaari aisi hai jo aaj kahenge baba, kal kahenge hamko sanshay padta hai। aise hi hota rehta hai। haan koi to phir ant mein aakar varsa lenge। grahchaari utregi to aa jaayenge। aise drama mein noondh hai। vinaash to hona hi hai, phir kiski sharan lenge? sabka sadgati daata to ek hi hai। sabko sharan mein lene vaala bhi hai, sab aakar maatha jhukaane vaale hain। parantu us samay kya kar sakenge। phir aisa hoga to itni bheed ikatthi aa na sake। yeh khel hi bada wonderful bana hua hai। itni bheed aakar kya karegi? phir sheeghra hi vinaash samaane aa jaayega। haan, aavaaj sunenge ki baap kehte hain mujhe yaad karo, ab vaapis jaana hai। baaki milne se kya phaayda। baba direction dete hain ki bhal koi vilaayat mein hai to bhi baap ko yaad karte raho to vikarma vinaash honge। ant mati so gati ho jaayegi। sabko paigaam to milna hi hai। ek jagah par itne thode hi mil sakenge। parantu drama bada wonderful bana hua hai। sabko pata padega ki father aaya hua hai। Christian sab thode hi pope se milte hain। sab pahunch na saken। yeh bhi sabko ant mein pata padega ki baap aaya hai, sabko liberate kar le jaayenge। kitna bada vinaash hona hai। rudra maala kitni jabardasta hai। unki bhent mein vishnu ki maala kitni chhoti hai। yoon to kahen ki yeh saari maala vishnu ki hai। pahla-pahla to vishnu thahra na। humanity ka great-great grand father brahma hi thahra। brahma hi phir vishnu bante hain। vishnu ke do roop hain lakshmi-naaraayan। farka kuchh bhi nahin। yeh badi wonderful baaten hain, isko simran karte raho to khushi bhi rahe। baba ne samjhaaya hai - reincarnation sirf ek ko hi kaha jaata hai kyonki unko apna shareer nahin hai aur sabko apna-apna shareer hai। baba ko to shareer ka loan lena pade। auron ko to apna-apna shareer hai। loan lene vaali cheez doosre ki hoti hai। koi bhi aatma thode hi kahegi ki ham loan lete hain। aatma to kehti hai - mera shareer hai। shivbaaba to kah na sake ki yeh mera shareer hai। woh sirf aadhaar lete hain, bachchon ko knowledge dene aur yog sikhlaane। bachche bhi jaante hain ki baba ne aadhaar liya hai phir bhi ghadi-ghadi bhool jaate hain। deh-abhimaani bante hain to woh regard gum ho jaata hai। nahin to baba kya cheez hai, agar jaane to unke pharmaan par zaroor chalen। kadam-kadam shreemat leni pade। parantu maaya bhula deti hai। kabhi shreemat par, kabhi aasuri mat par chal padte hain। kabhi woh taraph bhaari, woh halka। kabhi unki mat par, kabhi unki mat par। ek hi shivbaaba ki shreemat par chalte rahen to theek, oopar bhi chadhte rahen। parantu apni mat par bhi chal padte hain। baap jo direction aadi dete hain unko amal mein zaroor laana pade। phir kuchh bhi ho jaata hai to kahenge drama mein aisa tha। raajdhaani to sthaapan honi hi hai, ismen zara bhi farka nahin pad sakta। milne liye to bahut aate hain phir ghar gaye to khalaas। poore nishchay se thode hi aate hain। koi ko 5 pratishat nishchay hai to koi ko 15 pratishat। agyaankaal mein jab pata lag jaata hai yeh mera chaacha hai, maama hai to phir sanshay thode hi padta hai। yahaan to maaya sanshay mein laakar gira deti hai। goya nishchay baitha hi nahin hai। nishchay baithe-baithe bhi phir gum ho jaate hain। wonder hai na। yeh ek hi baap teacher satguru hai। har ek nambarvaar purooshaartha anusaar kalpa pahle muaaphik uthaate hain। kalpa pahle jisne jitna varsa liya hai, har ek ki vahi act chal rahi hai। is samay ham braahmanon ki maala nahin ban sakti kyonki grahchaari aati rehti hai to toot padte hain। phir praja ki maala mein aa jaate hain। praja mein bhi kab kaise, kab kaise। maala hai to zaroor। rudra maala aur vishnu ki maala - woh hai roohaani maala, woh hai jismaani maala। isko samajhne ki badi achhi vishaal aur svachchha buddhi chaahiye। vaphaadaar, pharmaanbardaar chaahiye jo shreemat par poora dhyaan deta rahe। shivbaaba ki kitni badi service hai। kehte hain patit-paavan aao। baba paavan duniya sthaapan karte hain। vahi phir patit bante hain। phir unko hi paavan banaane baap ko aana padta hai। kitna wonderful part bajta hai is samay, isliye balihaari is samay parampita paramatma ke part bajaane ki hai। number one yaadgaar hai hi ek ka। jo sab kuchh karte hain, unki hi jayanti manaate hain। jisko banaate hain unki kitni mahima hai। baaki is samay jo bhi manushya maatra hain sab patit, bhrashtaachaari hain। satayug mein the shreshthaachaari, paristaani, kitna raat-din ka farka hai। abhi ham shivbaaba se varsa le rahe hain। ab hamko kya manaana hai? manaana hota hai bhakti maarga mein। is samay shreemat par tumko khoob purooshaartha karna hai, service karni hai। yeh pradarshani par samjhaane ki rasam badi achhi nikli hai। eeshvareey service par bachchon ko poora dhyaan dena hai। jo eeshvareey khajaane se palte hain unko to poori service karni hai, jo jaldi-jaldi manushyon ka kalyaan ho jaae। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) chadhti kala mein jaane ke liye kadam-kadam shreemat par chalna hai। baap ko yathaartha pahchaan kar, dehi-abhimaani ban poora regard rakhna hai।

2) eeshvareey service par poora-poora dhyaan dena hai। yaad se buddhi ko svachchha aur vishaal banaana hai।

vardaan:- knowledge ki light aur might dvaara soul conscious rahne vaale smriti swaroop bhav

aapka anaadi roop niraakaar jyoti swaroop aatma hai aur aadi swaroop hai dev aatma। donon swaroop sada smriti mein tab rahenge jab knowledge ki light-might ke aadhaar se soul conscious sthiti mein rahne ka abhyaas hoga। brahman banna arthaat knowledge ki light-might ke smriti swaroop banna। jo smriti swaroop hain, woh svayan bhi santushta rehte aur doosron ko bhi santushta karte hain।

slogan:- saadhaaranta mein mahaanta ka anubhav karna hi mahaan aatma banna hai।