Murli du jour du vendredi 4 février 2022

04-02-2022 praatahmurli om shanti "baapdaada"' madhuban

“meethe bachche - apne dil roopi darpan mein dekho ki andar mein koi bhoot to nahin hai, bhooton ko nikaalne ka prayatna karte raho''

prashn:- baap aur bachchon ke beech, sangam par duniya se bilkul nyaari rasam chalti hai, woh kaun si?

uttar:- duniya mein bachche baap ko namaste karte hain lekin yahaan baap bachchon ko namaste karte hain। baap khud kehte hain meethe bachche, main tumhaari seva mein aakar upasthit hua hoon, to tum bachche mere se bhi bade thahre। doosra main nirhankaari, niraakaari baap hoon to zaroor main pahle namaste karoonga। yeh bhi sangam ki nyaari rasam hai।

om shanti। aane se pahle-pahle baap bachchon se namaste kare ya bachche baap ko namaste karen? (bachche baap ko karen) nahin। pahle baap ko namaste karna pade। sangamayug ki rasam-rivaaz hi sabse nyaari hai। baap khud kehte hain - main sabhi ka baap, tumhaari seva mein aakar upasthit hua hoon to zaroor bachche bade thahre na। duniya mein to bachche baap ko namaste karte hain, yahaan baap bachchon ko namaste karte hain। gaaya bhi hua hai niraakaari, nirhankaari to woh bhi dikhlaana pade na। vo to sannyaasiyon ke charnon mein jhukte hain, charnon ko choomte hain samajhte kuchh bhi nahin। baap to aate hi hain kalpa ke baad bachchon se milne। tum bahut sikeeldhe bachche ho, isliye kehte hain meethe bachche tum thak gaye ho। dropdi ke paanv dabaaye to servant hua na। “vande maatram'' kisne uchchaara hai? baap ne। bachche samajhte hain baap aaya hua hai, saari srishti ki behad ki seva par। srishti par kitna kichda hai, yeh hai narka। to baap ko aana padta hai narka ko svarga banaane। bahut dil se aate hain। jaante hain mujhe bachchon ki seva mein aana hai। kalpa-kalpa seva par upasthit hue hain। yahaan baithe sabhi ki seva ho jaati hai। aise nahin ki sabhi ke paas jaana hoga। saari srishti ka kalyaankaari daata to ek hai na। unki bhent mein manushya koi seva kar na saken। unki hai behad ki seva।

geet:- jaag sajniyaan jaag… kitna achha geet hai। navayug par bhi samjhaana chaahiye। yug bhi bhaaratvaasiyon ke liye hi hain। bhaaratvaasiyon se phir woh sunte hain ki satayug treta hokar gaye hain kyonki woh aate hi hain dvaapar mein। to auron se sunte hain ki bhaarat praacheen khanda tha, usmein devtaayen raajya karte the। aadi sanaatan devi-devta dharma tha, jo abhi nahin hai। geeta hai - devi-devta dharma ka maai baap। baaki sab baad mein aate hain। to yeh hua praacheen sab dharmo ke liye। vaastav mein ek geeta hi hai mukhya, jo sabko maanni chaahiye। parantu maante kahaan hain। ve apne dharma shaastra ko hi maante hain। yeh to jaante nahin ki bhagwan ne geeta kab uchchaari? geeta hai baap ki uchchaari hui। usmein baap ke badle bachche ka naam daal mushkilaat kar di hai, isliye siddha nahin hota ki shivraatri kab manaaven। shivjayanti ke baad hoti hai krishna jayanti। kabhi bhi shreekrishna yagya nahin gaaya jaata। roodra gyaan yagya hi gaaya jaata hai। unse hi vinaash jvaala prajvalit hui, so to barobar dekh rahe ho। aadi sanaatan devi-devta dharma ki phir se sthaapna ho rahi hai phir yeh aur anek dharma rahenge nahin। krishna bhi tab aaye jab aur sab dharma na hon। baaki sab aatmaayen muktidhaam mein rehti hain। bhagwan se to sabko milna hota hai na। sabhi baap ko salaam karenge। baap bhi phir aakar bachche ko salaam karte hain। bachche phir baap ko karte hain। is samay baap saakaar mein aaya hua hai। yahaan to sabhi aatmaayen baap se mil na saken kyonki koton mein koi hi aayenge। to sabhi bhagat kab aur kahaan milenge? jahaan se bhagwan se bichhude hain, vahaan hi jaakar milenge। bhagwan ka nivaas sthaan hai hi paramdham। baap kehte hain sab bachchon ko duhkh se liberate kar paramdham le jaata hoon। yeh kaam unka hi hai। baap ko aana hi hai patit srishti ko paavan banaane। heavenly god father hai to zaroor svarga create karenge na। narka ki sthaapna raavan, svarga ki sthaapna baap karte hain। inka right naam hai shiv, bindu। aatma bhi bindu hai, bhrakuti ke beech itni hi rah sakegi। to jaisi aatma hai vaisa paramatma hai। parantu wonder hai jo itni chhoti aatma mein 84 janmon ka part bhara hua hai, jo kabhi ghista nahin। for ever chalta rahega। kitni guhya baaten hain।

ab manushya shanti maangate hain kyonki sab shanti mein hi jaane vaale hain। kehte hain sukh kaag vishta ke samaan hai। ab geeta mein to hai raajayog se raajaaon ka raaja banna, to jo sukh ko kaag vishta samaan samajhte hain unhon ko raajaai kaise mile। yeh to pravritti maarga ki baat hai। grihastha vyavhaar mein rehte tumko kamal phool samaan pavitra rehna hai। charity begins at hom। shivbaaba bhi kehte hain main pahle is (saakaar brahma) ko samjhaata hoon। shivbaaba ka yeh chaitanya hom hai। pahle-pahle yeh (brahma) seekhte hain phir unse adopted children nambarvaar seekh rahe hain। yeh badi guhya baaten hain। sadgati daata patit-paavan khud aakar yeh sab raaz samjhaate hain। aise nahin ki vahaan se prerna karte hain। woh to yahaan aate hain। yaadgaar bhi hai shiv ke anek mandir hain। khud kehte hain main saadhaaran brahma tan mein aata hoon। yeh khud apne janmon ko nahin jaante hain, ismen ek ki baat nahin। sabhi brahma mukh vanshaavli baithe ho, brahma mukh ke dvaara tum brahman rache gaye ho। tum braahmanon ko hi samjhaate hain। yagya hamesha braahmanon dvaara hi chalta hai। un geeta sunaane vaalon ke paas brahman to hain nahin, isliye woh yagya bhi nahin thahra। yeh to behad ke baap ka racha hua bahut bada bhaari yagya hai। kab se degiyaan (bade-bade pateele) chadhte aaye hain। bhandaara ab tak chalta hi rehta hai। samaapta kab hoga? jab saari raajdhaani sthaapan ho jaayegi। baap kehte hain tumko vaapis ghar le jaayenge phir nambarvaar part bajaane bhej denge। aise aur koi kah na sake ki main tumhaara panda hoon, tumko saath le jaaoonga। patit manushyon ko paavan banaakar le jaate hain। phir apne-apne dharma sthaapan karne samay part bajaane aatmaayen aana shuru karti hain। anek dharma abhi hain, baaki ek dharma nahin hai। to geeta hai sabhi shaastron mein shiromni kyonki unse sabki gati sadgati hoti hai। bhaaratvaasiyon mein bhi gyaan woh lete hain jo atmaayen pahle-pahle paramatma se alag hui hain। pahle-pahle woh aana shuru karengi nambarvaar phir sabko aana hai। sato rajo tamo se to sabko paas karna hai। ab kalpa ki aayu poori hui hai। sab aatmaayen haazir hain। baap bhi aa gaye hain। har ek ko apna part bajaana hai। naatak mein sab actors stage par ikatthe to nahin aate। apne time par aate hain। baap ne samjhaaya hai - nambarvaar kaise aate hain। varno ka bhi raaz samjhaaya hai। choti to braahmanon ki hai parantu braahmanon ko bhi rachne vaala kaun hai। shoodra to nahin rachenge। choti ke oopar phir hai braahmanon ka baap brahma। brahma ka baap phir hai shivbaaba। to tum ho shivvanshi brahma mukh vanshaavli। tum brahman so phir devta banenge। varnon ka hisaab samjhaana hai। bachchon ko raay bhi di jaati hai sabhi ek jaise hoshiyaar to nahin hain। koi naye ke aage vidvaan, pandit aakar debate karenge to woh samjha nahin sakenge। to kehna chaahiye main to nai hoon, aap phalaane time par aana phir hamaare se badi behen aapko samjhaayengi। mere se to teekhe hain। class mein nambarvaar to hote hain। ismen deh-abhimaan nahin aana chaahiye। nahin to aabru chali jaati hai। kahenge bi.ke. to poora samjha nahin sakti। deh-abhimaan ko chhod refer karna chaahiye badon ki taraph, baba bhi kehte hain na - ham oopar se poochhenge। mahaarthi, ghodesvaar pyaade to hain na। kinhon ki sher par savaari bhi hai। sher sabse teekha hota hai। jangal mein akela rehta hai aur haathi hamesha jhunda mein rehta hai। akela ho to koi maar bhi de। shaktiyon ki bhi sher par savaari dikhaate hain।

bachchon ko samjhaaya hai - geeta ka bhagwan krishna kehna wrong hai। krishna ke shaastra ko sabhi dharma vaale to nahin maanenge। praacheen devi-devta dharma kisne sthaapan kiya woh siddha kar bataana hai। unko god goddess bhi kehte hain। eeshvar to alag hai। lakshmi-naaraayan ko bhagwan bhagavti kehte hain, woh paalna ke nimitta hain। agar lakshmi-naaraayan ko bhagwan bhagavti kehte to vishnu shankar ko pahle bhagwan kehna pade। tum jaante ho bhagwan bina geeta koi bol na sake। bhagwan ke mukh ki gaai geeta hai। shri shri roodra ki geeta hai, inko koi apna mukh bana na sake। geeta sivaae shivbaaba ke aur kiske mukh se aa na sake। geeta maata hai, unka rachayita shivbaaba hai, woh baith orally samjhaate hain। woh gyaan ka saagar hai na। to rachayita hi rachna ki knowledge denge isliye rishi muni bhi kehte hain beanta hai। eeshvar ki gat mat eeshvar jaane। ab eeshvar ki mat so hai shreemat, jisse sadgati mil jaati hai so to theek hai। gati ke saath sadgati donon kehna pade kyonki bhaarat mein jab svarga hota hai tab aur dharma vaale gati mein hote hain। bhaaratvaasi sadgati arthaat jeevanmukti mein hain। yeh sab raaz baba samjhaate hain jo dhaaran karna hai। bhakti maarga vaale kehte hain ved shaastra aadi sabse eeshvar ka raasta milta hai, parantu aise to hai nahin। yeh koi shimla ki pahaadi thode hi hai jo jahaan se bhi jaao to pahunch jaayenge। yahaan to saajan ko sajniyon ke paas aana pade। sajniyon ka shrangaar karaana pade, svarga ka malik banaane ke liye। sab mahaaraaja mahaaraani banne chaahte hain, parantu baba kehte hain apna munh to pahle dekho। naarad ki baat bhi abhi ki hai। unko lakshmi ko varne ki dil hui to usko kaha pahle apni shakla to dekho। baba bhi kehte hain apna dil roopi darpan dekho। kaam ka bhoot to nahin aata? jaanch karte raho aur bhooton ko nikaalne ka prayatna karte raho। yuktiyaan to baba sab batlaate rehte hain। man mein sankalp to bahut aayenge, karma mein nahin aana chaahiye। baba achhe karma sikhlaate hain na। karma-akarma-vikarma ki gati ka gyaan bhi geeta mein hai aur to koi nahin jaante। vikarma karaane vaali hai maaya, woh satayug mein hoti nahin। ab shreemat par chalne se hi tum svarga mein chal sakte ho। yeh kisi manushya ki mat nahin hai। baap ki shreemat se svarga ban raha hai auron ki mat se svargavaasi ban na saken aur bhi bhrashta bante jaayenge।

tum bachche jaante ho ab ek dharma ki sthaapna ho rahi hai। tum yogbal se gupta vesh mein apni kingdom sthaapan kar rahe ho। haath mein hathiyaar aadi to kuchh hain nahin। gyaan ke baan va teer aadi hain। unhonne phir sthool mein dikha diya hai। yeh hai sab gupta shakti। shaktiyon ki dekho kitni pooja hoti hai। 10-20 bhujaaon vaali to koi hai nahi। sabki do bhujaayen hoti hain। manushya srishti mein 8-10 bhuja vaale koi hote nahin। sookshm vatan mein vishnu ko 4 bhuja dikhaate hain, woh bhi arth sahit hain। beej ko jaanne se saare jhaad ka gyaan aa jaata hai।

achha - gyaan ka khajaana to bachchon ko milta rehta hai phir mukh meetha karaane ke liye bachchon ko toli khilaate hain। shiv-baba khud nahin khaate, sab bachchon ke liye hi hai। raajya bhi bachchon ke liye hai। lakshmi-naaraayan bhi zaroor apne bachchon ko denge। sabko to baant nahin denge, yeh baap sabhi bachchon ko dete hain। vahaan praja bhi kahegi ham svarga ke maalik hain। sukh to praja ko bhi hai। duhkh ka naam bhi nahin। baaki nambarvaar to hote hi hain। vahaan to sona bhi athaah hota hai। yahaan to sab khaaniyaan khaali ho gai hain। gaayan bhi hai kiski dabi rahi dhool mein, kinki raaja khaae...। achha!

meethe-meethe sikeeldhe bachchon prati maat-pita baapdaada ka yaad-pyaar aur namaste। maataaon ko vande maatram। bachchon ko yaad-pyaar aur sabko good morning। ab raat poori hoti hai, good morning aa raha hai। naya yug aa raha hai brahmaakumaar kumaariyon ke liye। achha। om shanti।

dhaarna ke liye mukhya saar:-

1) deh-abhimaan ko chhod apne se badon ko aage rakhna hai। koi debate karta hai to badon taraph refer karna hai। aabru nahin ganvaani hai।

2) charity begins at hom। pahle parivaar ka kalyaan karna hai, grihastha vyavhaar mein rehte kamal phool samaan pavitra banna hai।

vardaan:- deh-anhakaar va abhimaan ke sookshm ansh ka bhi tyaag karne vaale aakaari so niraakaari bhav

kaeeyon ka mote roop se deh ke aakaar mein lagaav va abhimaan nahin hai lekin deh ke sambandh se apne sanskaar vishesh hain, buddhi vishesh hai, gun vishesh hain, kalaayen vishesh hain, koi shakti vishesh hai - uska abhimaan arthaat anhakaar, nasha, rob - ye sookshm deh-abhimaan hai। to yeh abhimaan kabhi bhi aakaari pharishta va niraakaari banne nahin dega, isliye iske ansh maatra ka bhi tyaag karo to sahaj hi aakaari so niraakaari ban sakenge।

slogan:- samay par sahayogi bano to padamguna return mil jaayega।