Murli du jour du dimanche 13 février 2022

13-02-22 praatahmurli om shanti ''avyakt-baapdaada'' revise 10-01-90 madhuban

holeehans ki visheshtaayen

aaj sarva bachchon ko vishesh aatma banaane vaale baapdaada har ek holeehans ki visheshta dekh rahe hain। jaise hans ki nirnay-shakti aur parakhne ki shakti vishesh hoti hai isliye grahan karne ki shakti bhi vishesh hai jo moti aur kankad donon ko parakhta hai aur phir nirnay karta hai, uske baad moti grahan karta hai, kankad-patthar chhod deta hai। to parakhna, nirnay karna aur grahan karna arthaat dhaaran karna - teenon shaktiyon ki visheshta ke kaaran sangamayugi sarasvati maa ki savaari hans dikhaaya hai। to ek sarasvati maa ka yaadgaar nahin lekin maa samaan banne vaali gyaan-veena vaadini aap sabhi ho। is gyaan ko dhaaran karne ke liye bhi yeh teenon visheshtaayen ati aavashyak hain। aap sabhi ne brahman-jeevan dhaaran karte hi gyaan dvaara vivek dvaara pahle parakhne ki shakti ke aadhaar ko pahchaana, apne-aapko pahchaana, samay ko pahchaana। apne brahman parivaar ko pahchaana, apne shreshtha kartavya ko pahchaana, iske baad nirnay kiya tab hi brahman-jeevan dhaaran ki। yeh vahi kalpa pahle vaala behad ka baap hai, param aatma hai, main bhi vahi kalpa pahle vaali shreshtha aatma hoon, adhikaari aatma hoon - is parakhne ke baad nirnay kiya। bina baap ko parakhne ke nirnay nahin kar sakte। kai aatmaayen abhi tak bhi sambandh-samparka mein hain, bahut achha, bahut achha kehti rehti hain lekin parmaatma-pahchaan va parakhne ki shakti na hone kaaran nirnay nahin kar sakte ki kya banna hai va kya karna hai, isliye brahman-jeevan dhaaran nahin kar sakte। sahayogi bante hain lekin sahaj yogi jeevan nahin bana sakte kyonki donon shaktiyaan nahin hain, isliye holeehans nahin ban sakte। pavitrata roopi moti aur apvitrata roopi kankad - donon ko alag nahin samajhte to pavitrata ko grahan karne ki shakti nahin aa sakti। to holeehans ki visheshta hai pahle shakti “parakhna'' arthaat pahchaanna। aap holeehanson mein yeh donon shaktiyaan hain na? kyonki baap ko pahchaana, apne-aapko bhi pahchaana, nirnay bhi theek kiya tab to brahman bane aur chale rahe ho। is baat mein to sab pakke paas ho। lekin jo seva karte ho aur karma mein aate ho, saare din ki dincharya mein jo karma karte ho, sambandh-samparka mein aate ho, usmein saphaltaapoorvak har karma rahe va har samparka vaali aatma ke sambandh mein aane mein sada saphalta rahe। har prakaar ki seva mansa-vaacha-karmana - teenon mein sada saphalta anubhav ho, uska bhi aadhaar parakhne ki shakti aur nirnay karne ki shakti hai। ismen full paas ho?

seva ki saphalta va samparka mein saphalta sada na hone ka kaaran check karo - to kaarya ko, vyakti ko, aatma ko parakhne ki shakti mein antar pad jaata hai। jis aatma ko jis samay jis vidhipoorvak sahayog chaahiye va shiksha chaahiye, sneh chaahiye, us samay agar parakhne ki shakti teevra hai to avashya sambandh mein saphalta praapta hogi। lekin hota kya hai? jis aatma ko jo sahayog va vidhi us samay chaahiye vo na dekar va na parakhne kaaran apne dhang se usko sahayog dete ho va vidhi apnaate ho, isliye santushtata ki saphalta nahin hoti। jaise shaareerik beemaari ko parakhne ki doctor ko vidhi na aaye to kya hota hai? theek hone ke bajaae ek se anek rog aur paida ho jaate hain। patient ko santushtata ki saphalta nahin milti। jisko saadhaaran shabdon mein baapdaada kehte hain ki har ek ki nabja ko pahchaano। chalna aur chalaana bhi zaroori hai। to kya karna padega? pahchaanne arthaat parakhne ki shakti ko teevra karna pade। ismen antar pad jaata hai, jisko aap saadhaaran bhaasha mein kehte ho handling ka farka। kehte ho na - inki handling puraani hai, inki nai hai…। yeh antar kyon pada? kyonki har samay har aatma aur har kaarya ko parakhne ki shakti chaahiye। total parakhne ki shakti aa gai hai lekin vistaar se aur behad ke parakhne ki shakti ki aavashyakta hai - us samay aatma ki grahan shakti kitni hai, vaayumandal kya hai aur us aatma ki sunne va shiksha lene ki mood kaisi hai..। jaise koi kamjor shareer vaala ho aur usko jyaada-se-jyaada taakat ka injection de deven to kya haalat hogi? woh to heartfail ho jaayega, shanti mein chala jaayega। aise agar sambandh mein aane vaali aatma kamjor hai, aatma mein himmat nahin hai lekin aap usko shiksha ka dose dete jaao, uska mood, samay vaayumandal parakh na sake to result kya hogi? ek to dilshikasta ho jaayega aur shakti na hone kaaran grahan nahin kar sakega, aur hi jidda aur siddha karne mein uchhlega। aapne to achhi bhaavna se kiya lekin saphalta na milne ka kaaran parakhne aur nirnay karne ki shakti kam hai, isliye saphaltaamoorta banne mein percentage ho jaati। to saare din ke karma aur sambandh mein parakhne ke shakti ki aavashyakta hui na isliye shiksha bhal do lekin sab baaton ko parakhkar phir kadam uthaao। aise hi seva ke kshetra mein bhi agar aatmaon ki aavashyakta aur ichchha parakhne ke bina kitna bhi achha gyaan de do, kitni bhi mehnat kar lo lekin saphalta nahin hogi। “achha-achha'' kehna to ek reeti-rasam ho gai hai kyonki aap koi buri baat to kehte bhi nahin ho। lekin jo saphalta ka lakshya rakhte ho, usmein sameep anubhav karo uske liye parakhne ki shakti ati aavashyak hai। jaise koi mukti ka ichchhuk hai aur usko aap jeevan mukti aur mukti - donon bhi de do lekin woh ruchi nahin rakhega। paani ke pyaase ko 36 prakaar ka bhojan de do lekin woh santushta paani ki boond se hi hoga, na ki bhojan se। to mukti ke ichchhuk ko parakhkar agar usko mukti ke baare mein spashteekran denge to uski ichchha bhi badhegi aur jeevanmukti mein parivartan bhi ho jaayenge। kisko dhaarna ki baaten sunna achha lagta hai, usko aap kalpa 5000 varsha ka va geeta ka bhagwan kaun - yeh bataana shuru kar do to aur hi interest khatma ho jaayega isliye seva mein bhi aatma ki sthiti va uski aastha kya hai - usko parakhna aavashyak hai। to seva mein saphalta ka aadhaar kis shakti par hua? parakhne ki shakti chaahiye। chaahe agyaani aatmaon ki seva, chaahe seva-saathiyon ki seva - donon mein saphalta ka aadhaar ek hi hai। to holeehans ki visheshta - sabse pahle parakhne ki shakti ko badhaao। parakhne ki shakti yathaartha hai, shreshtha hai to nirnay bhi yathaartha hoga aur aap jisko jo dena chaahte hain woh usmein grahan karne ki shakti svatah hi hogi। aur kya ban jaayenge? number one saphaltaamoorta। to chaahe seva mein, chaahe sambandh mein lakshya ko praapta karne ke liye is lakshan ko dhaaran karo।

to saare din mein yeh check karo - saare din ki dincharya mein parakhne ki shakti kahaan tak yathaartha hui aur kahaan correction-addition karne ki aavashyakta rahi? karne ke baad correction apne-aap hoti zaroor hai kyonki divya buddhi ka vardaan sabko mila hua hai। chaahe samasya ke vash, samay va paristhiti ke vash va koi aatmaon ke sang ke vash va maaya dvaara manmat ke vash, us samay parvash ho jaate hain lekin samay, paristhiti, sang ka prabhaav, manmat ka prabhaav jab halka ho jaata hai phir divya buddhi apna kaam karti hai, jisko aap log kehte ho josh se hosh mein aa gaye। phir mahsoos hota hai ki yeh correction va addition honi chaahiye thi va karni hai। lekin register mein va karmon ke hisaab ke kitaab mein daag nahin, lekin bindi to pad gai, bilkul saaph to nahin raha na isliye kaha jaata hai, karmo ki leela ati guhya hai।

teachers to karmon ki leela ko achhi reeti jaan gai hain na। teachers saara din kya geet gaati hai ki “vaah mere shreshtha karmon ki leela'' karmon ke gahan gati ki leela nahin, shreshtha karmon ki leela। duniya vaale to har karma mein, har kadam mein karmon ko hi kootte rehte hain ki haay mere karma! aap kahenge - “vaah shreshtha karma''! ab ismen aur aage badho ki sada vaah shreshtha karma ho, saadhaaran karma nahin। karmon ko kootna to khatma ho gaya lekin shreshtha karma hon ismen underline karna। agar mix karma hai - saadhaaran bhi hain, shreshtha bhi hain to saphalta bhi mix ho jaati hai। abhi vishesh attention yeh dena hai ki saadhaaranta ko visheshta mein parivartan karo। is par bhi kabhi sunaayenge ki baapdaada har ek ki roz ki dincharya mein kya-kya dekhte hain? saadhaaranta kitni hai aur visheshta kitni hai - yeh result dekhte rehte hain।

baapdaada ke paas dekhne ke saadhan itne hain jo ek hi samay desh-videsh ke sabhi bachchon ko dekh sakte hain। alag-alag dekhne ki aavashyakta nahin, 5 minute mein sabka pata lag jaata। bachchon ke “vaah-vaah'' ke geet bhi gaate hain, saath-saath samaan banaane ki em se check bhi karte hain। sunaaya tha na ki baap ke sneh va baap ki pahchaan - ismen to sab paas ho aur kabhi-kabhi to kamaal ke kaam bhi karte ho। achhi kamaal hai, na ki dhamaal vaali kamaal। koi-koi bachche dhamaal ki bhi kamaal karte hain na! hoti dhamaal hai lekin kehte hain - yeh to hamaari kamaal hai isliye baapdaada kehte - parakhne ki shakti ko badhaao। apne karmon ko bhi parakh sakenge aur doosron ke karmon ko bhi yathaartha parakh sakenge। ulte ko sulta nahin kahenge। yeh parakhne ki shakti ki kami hai। aur sada ek baat yaad rakho sabke liye kah rahe hain - kabhi bhi koi aisa vyartha va saadhaaran karma karte ho aur apne-aapko pahchaan nahin sakte ho ki yeh right hai va wrong hai, to jab aisi paristhiti aati hai, vasheebhoot ho jaate hain, us samay aisi paristhiti mein siddhi ko praapta karne ki shreshtha vidhi kya hai? kyonki us samay apni buddhi to vasheebhoot hai। right ko bhi wrong samajhte ho, wrong ko wrong nahin samajhte ho, right samajhte ho। phir jidda karenge ya siddha karenge। yeh nishaani hai vasheebhoot buddhi ki। aise samay par sadaiv ek baapdaada ki shreshtha mat yaad rakho ki jinhon ko baap ne nimitta banaaya hai, woh nimitta aatmaayen jo direction deti hain, usko mahatva dena chaahiye। us samay yeh nahin socho ki nimitta bane hue shaayad koi ke kahne se kah rahi hain, ismen dhokha kha lete ho। nimitta bani hui shreshtha aatmaon dvaara jo shiksha va direction milte hain, usko us samay mahatva dene se agar koi buri baat bhi hogi to aap jimmevaar nahin। jaise brahma baap ke liye sada kehte hain ki agar brahma dvaara koi galti bhi hogi to woh galti bhi badal ke aapke prati sahi ho jaayegi। to aise nimitta bani hui aatmaon prati kabhi bhi yeh vyartha sankalp nahin uthna chaahiye। maano koi aisa phainsala bhi de dete hain jo aapko theek nahin lagta hai। lekin aap usmein jimmevaar nahin hain। aapka paap nahin banega। aapka kaam theek ho jaayega kyonki baap baitha hai। baap, paap ko badal lega। yeh guhya rahasya hai। gupta machinery hai। isliye nimitta bani hui shreshtha aatmaon ke shreshtha direction ko mahatva se kaarya mein lagaao। ismen aapka phaayda hai, nuksaan bhi badalkar phaayde mein ho jaayega। yeh baap ki guarantee hai। samjha? isliye sunaaya ki karmon ki leela badi vichitra hai। baap jimmevaar hai। jinko nimitta banaaya hai uska bhi jimmevaar baap hai। aapke paap ko badalne ka bhi jimmevaar hai। aise hi nimitta nahin banaaya hai, soch-samajh ke drama ke la-mujeeb nimitta banaaya gaya hai। samjha!

teachers ko achha lagta hai na। ismen phaayda hai, bojh halka ho gaya। koi bhi baat aayegi to kahenge - nimitta bane hue bade jaane। halke ho gaye na। lekin sirf kahne maatra nahin, samajhne-maatra, sneh-maatra, svamaan-maatra ho। in guhya baaton ko baap jaane aur jo samajhdaar bachche hain woh jaanen। nimitta bani hui aatmaon ke liye kuchh bhi kehna arthaat baap ke liye kehna। nimitta baap ne banaaya hai na। baap se jyaada aapko parakhne ki shakti hai?

baapdaada ka ati sneh sabhi bachchon se hai। aise nahin ki nimitta bane hue se hi pyaar hai। doosron se nahin hai। yeh bhi pyaar ke kaaran hi direction dete hain। pyaar nahin hota to kehte - jaise chal rahe hain, chalte rahen। jab itni himmat rakhi hai aur brahman-jeevan mein chal rahe ho, ud rahe ho to chhoti-si kamjori bhi kyon rah jaae। yeh hai pyaar। pyaar vaale ki kami kabhi nahin dekhi jaati hai। yeh hai pyaar ki nishaani। jisse dil ka sachcha pyaar hota hai uski kami ko hamesha apni kami samajhte hain। achha।

koi bhi kaarya karo to kabhi bhi koi halchal ke vaataavran ke prabhaav mein nahin aao। apna prabhaav daalo to woh aapke prabhaav mein aa jaayenge aur dil se yahi niklega ki saphalta hamaara janmasiddha adhikaar hai। himmat ka bahut mahatva hai। kabhi kisi baat mein ghabraaon nahin। hajaar bhujaaon vaale aap bhi ho। baap ki hajaar bhujaayen aapki bhi to hui na। achha -

chaaron or ke sada parakhne ki shakti ki vishesh aatmaon ko, sada har karma aur sambandh mein shreshtha saphalta praapta karne vaali saphaltaamoorta aatmaon ko, sada himmat aur shubhbhaavna aur shubhkaamna dvaara parivartan karne vaali shaktishaali aatmaon ko, sada “vaah mere shreshtha karma'' ke khushi ke geet gaane vaale bachchon ko baapdaada ka yaad-pyaar aur namaste।

vardaan:- shanti ki shakti se, sanskaar milan dvaara sarva kaarya saphal karne vaale sada nirvighna bhav

sada nirvighna vahi rah sakta hai jo si father, follow father karta hai। si sister, si brother karne se hi halchal hoti hai isliye ab baap ko follow karte hue baap samaan sanskaar banaao to sanskaar milan ki raas karte hue sada nirvighna rahenge। shanti ki shakti se athva shant rahne se kitna bhi bada vighna sahaj samaapta ho jaata hai aur sarva kaarya svatah sampanna ho jaate hain।

slogan:- trikaaldarshi woh hai jo kisi bhi baat ko ek kaal ki drishti se nahin dekhte, har baat mein kalyaan samajhte hain।