Murli du jour du samedi 12 février 2022

12-02-2022 praatahmurli om shanti "baapdaada"' madhuban

“meethe bachche - baap aaye hain anaathon ko sanaath banaane, sabko duhkhon se chhudaakar sukhdhaam mein le jaane''

prashn:- kalpa-kalpa baap apne bachchon ko kaun si aathat (dhairya) dete hain?

uttar:- meethe bachche - tum bephikar raho, vishwa mein shanti sthaapan karna, sarva ko duhkhon se chhudaana mera kaam hai। main hi aaya hoon tum bachchon ko is raavan raajya se chhudaakar raamraajya mein le chalne। tum bachchon ko vaapis le jaana mera hi farja hai।

geet:- chhod bhi de aakaash sinhaasan…

om shanti। bachchon ne geet suna। bachche yaad karte hain - apne parmapriy parampita ko ki phir se aao, kyonki maaya ki parchhaai pad gai hai athva raavanraajya ho gaya hai। sab duhkhi hi duhkhi hain। kehte hain ham sab patit hain। to baba kehte hain ki main kalpa-kalpa, kalpa ke sangamayuge aata hoon। 5 hajaar varsha pahle bhi aaya tha phir se kalpa ke sangamayuge aaya hua hoon। baap aakar aathat dete hain। bachche bephikar raho, yeh mera hi part hai। bachche kehte hain baba aao, aakar phir se raajayog sikhaao। patit duniya ko aakar paavan banaao। is samay sab orphan hain। orphan unko kaha jaata hai jinko maa baap nahin hon। aapas mein ladte-jhagadte rehte hain। sab bade duhkhi hain। saari duniya mein ashaanti hai isliye bachchon ko duhkh se paar kar va raavan ke raajya se chhudaakar raamraajya, sukhdhaam mein le jaane aaye hain। baap kehte hain yeh mera farja hai। saare world ka arthaat sabhi aatmaon ka ek hi baap hai। sabhi kehte hain he behad ke baba, aap abhi oopar se takhta chhodkar aaye ho। brahm mah-tatva mein rehte hain na। yahaan hain jeev aatmaayen। vahaan hai aatmaon ka sthaan, jisko brahmaanda kaha jaata hai। to baap bachchon ko samjhaate hain yeh naatak hai sukh aur duhkh ka। bulaate bhi hain he parampita paramatma kyonki duhkhi hain। yeh geet bhi is par gaaya hua hai। bachchon ki kya bhool hui hai। baap ko bhoole hain। geeta ka bhagwan, jisne sahaj raajayog sikhaaya, anaath ko sanaath banaaya, unko nahin jaante hain। gaate bhi hain - he anaathon ko sanaath banaane vaale। anaath se sanaath bhaarat ko hi banaate hain। bhaarat hi sanaath, sada sukhi tha। purity, pees, prosperity thi। grihastha aashram tha। bhaarat mahaan pavitra tha। gaate bhi hain 16 kala sampoorn, sampoorn nirvikaari... yahaan to sab anaath ban gaye hain। unko pata hi nahin hai - hinsa, ahinsa kisko kaha jaata hai। woh samajhte hain gau aadi ko maarna hinsa hai। baap kehte hain ek do par kaam kataari chalaana hinsa hai। raavan ki praveshta ke kaaran sab patit ban pade hain। baap kehte hain number one dushman hai deh-abhimaan। phir kaam, krodh yeh 5 vikaar tumhaare dushman hain, jinhonne tumhein anaath banaaya hai। baba poochhte hain he bhaaratvaasi bachchon tumhein yaad aata hai ki satayug mein ham sanaath the to kitne sukhi the! yahaan koi shareer chhodte hain to kehte hain - svarga gaya। narka se gaya na। to samjhaana chaahiye ki bhaarat is samay narka hai, isko raurav narka kaha jaata hai। garud puraan mein kathaayen hain। aur koi nadi nahin hai, vishay saagar mein sab gote khaate rehte hain। ek do ko kaatte, duhkhi karte rehte hain। baap aakar samjhaate hain yeh duhkh aur sukh ka drama bana hua hai। baaki aise nahin ki abhi-abhi narka, abhi-abhi svarga hai। jiske paas bahut dhan hai, woh svarga mein hain। nahin, dhanvaan bhi duhkhi hote hain। is samay saari duniya duhkhi hai। baap samjhaate hain tumhaara dhani hai maat-pita, jiske liye hi tum gaate ho tum maat pita... manushyon ko to pata hi nahin, lakshmi-naaraayan ke aage bhi kahenge - tum maat pita... raadhe krishna ke aage bhi kahenge tum maat pita... kyonki baap ko hi nahin jaante। baap rachayita aur unki rachna ko nahin jaante। yeh srishti ka chakra hai। maaya ka chakra nahin kahenge। maaya 5 vikaaron ko kaha jaata hai। dhan ko sampatti kaha jaata hai। sampattivaan bhav, aayushvaan bhav, putravaan bhav। yeh aasheervaad baap hi dete hain। baaki woh sab to bhaktimaarga ke guru hain। gyaan saagar ek hi hai jiske liye gaate hain। geeta sunaakar phir kah dete shreekrishna bhagvaanuvaach। are krishna kaise bhagwan hoga! yeh to oopar vaale ko bulaate hain ki roop badalkar aao। tum aatmaayen to roop badalti ho। baap bhi to manushya tan mein hi aayenge na। bail par to nahin aayenge। tum kehte ho baba aap bhi hamaare muaaphik roop badalkar manushya tan mein aao। main koi bail va kachchha machchha mein nahin aata hoon। pahle-pahle manushya srishti rachi jaati hai prajaapita brahma dvaara। to do baap ho gaye - ek to parampita paramatma shiv, jisko kehte hain - he anaathon ko sanaath banaane vaale baba aao, phir gaate hain gyaan soorya pragta... gyaan soorya woh baap hi hai jo sabse oonch hai। is khel ko bhi samajhna chaahiye na। bhaarat par hi khel hai। baaki woh by-plot hain। bhaarat ka devi-devta dharma hi shreshtha number one hai। daivi dharma, daivi karma shreshtha the। ab dharma karma bhrashta ban gaye hain।

baap samjhaate hain dharma mukhya hain chaar, sabse pahle hai devi-devta dharma। satayug sthaapna ka kartavya ek baap hi karenge na। woh hai heavenly god father। baap kehte hain main kalpa ke ek hi sangamayuge aata hoon। tum bachche jaante ho ham sanaath ban rahe hain। anaathon ko sanaath banaane vaala ek hi baap hai। manushya, manushya ko to alpakaal ka hi sukh de sakte hain। yeh hai hi duhkh ki duniya। traahi-traahi karte rehte hain। bhaarat sukhdhaam tha, abhi duhkhadhaam hai। aaye hain shantidham se, ab naatak poora hota hai। yeh chola puraana ho gaya hai, grihastha mein rehte pavitra banna hai। main tumhaara baap aaya hoon pavitra heaven sthaapan karne। pahle pavitra the, abhi apvitra hain। aadhaakalpa raamraajya hai, aadhaakalpa raavan raajya hai। abhi tum eeshvareey god mein ho। yeh eeshvareey family hai। daada (grand father) hai shivbaaba। prajaapita brahma hai baba। yeh reality hai। tum jaante ho niraakaar baap ne pravesh kiya hai। manushya tan mein aaye hain। woh baap baith aatmaon se baat karte hain। unko roohaani surgeon kaha jaata hai। rooh ko injection lagaate hain। yeh jo aatma ko nirlep kehte hain lekin aatma kaise nirlep hogi। aatmaon mein hi sanskaar hain, jis anusaar janma leti hai। abhi tum bachche parampita paramatma ko jaante ho। sab unko hi yaad karte hain he patit-paavan parampita paramatma aap is manushya srishti ke beejroop baap ho। chaitanya ho, gyaan ke saagar ho। saari knowledge aatma mein hai। phir sanskaaron anusaar padhaai se jaakar tum raaja bante ho। baap mein bhi gyaan ke sanskaar hain na। srishti ke aadi madhya ant ka gyaan hai। tumko bhi trikaaldarshi banaate hain। tum jaante ho ki ham aatmaayen mool vatan se aati hain। brahm ko paramatma nahin kah sakte। baap aakar jo knowledge sunaate hain uska naam rakha hai geeta। baap hi aakar raajdhaani sthaapan karte hain। aur koi raajdhaani nahin sthaapan karte। abhi raajdhaani sthaapan honi hai isliye pavitra banna hai। abhi baap tum bachchon ko knowledge dekar pavitra banaae dhanka banaate hain। drama ka akshar bhi koi nahin jaante hain। yeh anaadi avinaashi drama hai। sabhi aatmaon ko avinaashi part mila hua hai। paramatma ka bhi part hai। baba ne samjhaaya hai ki shiv koi itna bada ling nahin hai। unko kaha jaata hai parampita paramatma। aatma ka roop kya hai? star, light, chamakta hai bhrikuti ke beech ajab sitaara, itni chhoti si aatma mein kitna bada part hai। wonder hai na। baap kehte hain meri aatma mein bhi part hai। bhakti maarga mein main tumhaari kitni service karta hoon। is samay to bada wonderful part hai। kalpa-kalpa tum bachchon ka part chalta rehta hai। actors bhi nambarvaar hote hain। sabse pahle hai baba। baap ke paas jo knowledge hai woh sabko dete hain। baap kehte hain bachche yeh raajdhaani sthaapan ho rahi hai। ab purooshaartha kar oonch pad paao, jo seat chaahiye lo। purooshaartha karna hai praalabdha ke liye। behad ke baap dvaara behad ka sukh lene ke liye। jagat amba ko kaha jaata hai goddess oph knowledge। kahaan se knowledge mili? brahma se। brahma ko kisne diya? shiv paramatma ne। brahma dvaara brahmaakumaar kumaariyon ko yeh knowledge mil rahi hai, jo brahman phir is yagya ke nimitta bante hain। inko kaha jaata hai roodra gyaan yagya, jismen yeh saari puraani duniya khatma ho jaayegi। tyohaar sabhi is sangam ke hain। shiv ke badle krishna raatri kah, krishna ka janma raat mein dikha diya hai। shivraatri ka arth nahin samajhte hain। kaliyug hai raat, satayug hai din। raat mein aakar din banaate hain, usko kaha jaata hai shiv jayanti। behad ki raat, behad ka din hai। yeh shiv shakti sena bhaarat ko svarga banaane vaali hai। dekho, kaise gupta baith padhte hain। yogbal se raajya lete hain। praacheen raajayog mashhoor hai, jisse vishwa ki raajaai milti hai। sabhi paavan ho jaate hain। yeh knowledge aatma dhaaran karti hai। aatma ka bhi gyaan koi mein nahin hai। vahaan aatma ka gyaan rehta hai। baaki paramatma ka, rachna ka nahin। yeh knowledge sirf tum braahmanon ko hi hai। tum sabse oonch ho, jo roohaani seva karte ho। ek musaaphir aate hain tum sajniyon ko gora banaane। ek musaaphir baaki sab hain sajniyaan। praja banne va muktidhaam mein nivaas karne vaali badi baraat hai। saajan aate hi hain - sabko shrangaar kar le jaane, sabhi machchharon sadrishya jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) light house banna hai। ek aankh mein shantidham, doosri aankh mein sukhdhaam phirta rahe। is duhkhadhaam ko dekhte hue bhi nahin dekhna hai।

2) baap samaan knowledge mein full ban karke behad sukh lene ke liye poora purooshaartha karna hai। jo knowledge mili hai woh doosron ko deni hai।

vardaan:- sarva praaptiyon ki smriti se udaasi ko talaak dene vaale khushiyon ke khajaane se sampanna bhav

sangamayug par sabhi brahman bachchon ko baap dvaara khushi ka khajaana milta hai, isliye kuchh bhi ho jaae - bhal yeh shareer bhi chala jaae lekin khushi ke khajaane ko nahin chhodna। sada sarva praaptiyon ki smriti mein rehna to udaasi ko talaak mil jaayegi। dhandhedhori mein bhal nuksaan bhi ho jaae to bhi man mein udaasi ki lahar na aaye kyonki akhut praaptiyon ke aage yeh kya badi baat hai! agar khushi hai to sab kuchh hai, khushi nahin to kuchh bhi nahin।

slogan:- master duhkh harta, sukh karta ka part bajaane ke liye sarva praaptiyon se sampanna bano।

maateshvari ji ke anmol mahaavaakya

bhagvaanuvaach - bachchon ke prati, bachche, yeh guru mat, shaastra mat koi meri mat nahin hai, yeh to sirf mere naam ki mat dete hain parantu meri mat to main jaanta hoon, mere milne ka pata bhi main aakar deta hoon, unke pahle meri address koi nahin jaanta। geeta mein bhal bhagvaanuvaach hai parantu geeta bhi manushya ne sunaai hai। bhagwan to svayan gyaan ka saagar hai, bhagwan ne jo mahaavaakya sunaaya hai unka yaadgaar phir geeta bani hai। yeh vidvaan, pandit, aachaarya kehte hain paramatma ne sanskrit mein mahaavaakya uchchaaran kiye, use seekhne bigar paramatma mil nahin sakta। yeh to aur hi ulta karmakaanda mein phansaate hain ved, shaastra padh seedhi chadh jaave phir utna hi utarna pade arthaat unko bhoolaae ek paramatma se buddhiyog jodna pade kyonki paramatma saaph kehte hain in karmakaanda, ved, shaastra padhne se meri praapti nahin hoti hai। dekho dhruv, prahlaad, meera ne kya shaastra padha? yahaan to padha hua bhi sab bhoolna padta hai, jaise arjun ne padha tha to unko bhi bhoolna pada। bhagwan ke saaph mahaavaakya hai shvaanso-shvaans mujhe yaad karo ismen kuchh bhi karne ki jarurat nahin hai। jab tak yeh gyaan nahin hai to bhakti maarga chalta hai parantu gyaan ka deepak jag jaata hai to karmakaanda chhoot jaate hain kyonki karmakaanda karte-karte agar shareer chhoot jaave to phaayda kya mila? praalabdha to bani nahin, karmabandhan ke hisaab-kitaab se to mukti mili nahin। log to samajhte hain jhooth na bolna, chori na karna, kisi ko duhkh na dena, yeh achha karma hai। parantu yahaan to sadaakaal ke liye karmon ki bandhaaymaani se chhootna hai aur vikarmon ki jad ko nikaalna hai। ham to ab chaahte hain aisa beej daalen jisse achhe karmon ka jhaad nikle, isliye manushya jeevan mein apne kaarya ko jaan shreshtha karma karne hain। baaki paramatma ko jo jitna pahchaante hain, utna hi nazdeek aate hain। yeh sab raaz paarabrahma mein rahne vaala paramatma, aataal-paataal se jo us paar hai, vo aakar sunaata hai। achha - om shanti।