Murli du jour du mardi 15 février 2022

15-02-2022 praatahmurli om shanti "baapdaada"' madhuban

“meethe bachche - aatma roopi deepak mein yog roopi ghrit daalo to aatma shaktishaali ho jaayegi।''

prashn:- aatma roopi battery mein power bharne ka aadhaar kya hai?

uttar:- aatma roopi battery mein power bharne ke liye buddhiyog ka bal chaahiye। jab buddhiyog bal se sarvashaktimaan baap ko yaad karenge tab battery bharegi। jab tak battery mein power nahin tab tak gyaan ki dhaarna bhi nahin ho sakti hai। aatma mein complete roshni aane mein time lagta hai। yaad karte-karte full roshni aa jaati hai।

geet:- raat ke raahi thak mat jaana…

om shanti। bachchon ne geet ka arth to suna ki tum bachche ab din mein jaane ke liye purooshaartha kar rahe ho। nai duniya mein to roshni hi roshni hai। puraani duniya mein andhiyaara hi andhiyaara hai। yeh hai brahma ki ghor andhiyaari raat। tum abhi din mein ja rahe ho। baap bachchon ko kehte hain yeh buddhi ka yog lagaate-lagaate thak nahin jaana। jitna tum yog lagaate ho utna sojhra hota hai। aatma roopi deepak ki jyot jo ujhaai hui hai, woh aati jaati hai। us bijli mein to phat se current aa jaati hai। parantu aatma mein complete roshni aane mein time lagta hai। ant tak full aa jaayegi। yog lagaate rehna hai, motor ki battery bhi saari raat bharti rehti hai। vaise yeh bhi motor hai। inse ab ghrit khatma ho gaya hai athva power kam ho gai hai। baba ko to powerful sarvashaktimaan kaha jaata hai na। is battery mein sivaae buddhi yogbal ke power aa nahin sakti। sarvashaktimaan baap se hi yog lagaane se saari battery bharti hai। battery bharne ke sivaae knowledge bhi dhaaran nahin ho sakti। ghadi-ghadi baap kehte hain mujhe yaad karo aur varsa le lo। manamnaabhav, kitni sahaj baat hai। manushya to raam-raam ka jaap karte rehte hain aur chaahte hain raamraajya ho। parantu aise raam-raam japne se raamraajya thode hi hoga। aisa raam-raam to janma-janmaantar bahut karte aaye, ganga ke kanthe par baithkar। yeh to koi ko pata hi nahin to raamraajya kisko kaha jaata hai। zaroor raam hi raamraajya banaayenge। unhon ki buddhi mein seeta-raam vaala raajya aa gaya hai। ab us raamraajya mein to raam ko hi aaraam nahin tha। raam raaja ki hi stri chori ho gai to praja ka kya haal hoga। yahaan bhi raajaaon ki stri kabhi thode hi chori hoti hai, yeh log phir raam seeta ke liye kah dete। yeh badi samajhne ki baaten hain। vaastav mein raam to parampita paramatma ko kaha jaata hai। gaate bhi hain tum maat pita... ab maat-pita kaun sa jiske liye yeh gaate hain? ek to hai laukik maat-pita। unki to yeh mahima nahin karenge। zaroor doosra koi parampita hai to zaroor maata bhi honi chaahiye। to gaayan hai paarlaukik maat-pita ka। poochhte hain hu is creator? to jhat kahenge god father। to siddha hai na - maat-pita hai। is samay hi do maat-pita hote hain। satayug mein sirf ek hi maat-pita hota hai। laukik maat-pita hote bhi yahaan gaate hain tum maat-pita... is samay ham bachchon ko baap dvaara sukh ghanere mil jaate hain phir ek maata-pita ho jaata hai। paarlaukik maat-pita dvaara satayug ki praalabdha mein sukh ghanere milte hain, us maat-pita ka hi gaayan hai। phir bhi aise baap ko bachche yaad karna bhool jaate hain। tum bachchon ko to sabko baap ka parichay dena hai ki baba aaya hai। hamesha shivbaaba aur brahma baba kehte hain। prajaapita ka to naam baala hai। shivbaaba, brahma baba। laukik baba woh paarlaukik parampita, woh phir maat-pita kaise bante hain - yeh badi guhya baaten hain। koi bhi aate hain pahle yeh poochho ki parampita paramatma aapka kya lagta hai? prajaapita aapka kya lagta hai? jab amba bhi gupta to yeh brahma bhi gupta। yeh brahma hai badi maa। laukik baap ka to naam roop desh kaal sab jaante hain। ab tum unko paarlaukik maat-pita ka naam roop desh kaal occupation bataao। mama ki bhi yeh badi mama। badi mama dvaara bachchon ko adopt karte hain to maat-pita combined ho jaate hain। inko maat-pita athva baapdaada bhi kehte hain। kisko samjhaane ki badi yuktiyaan chaahiye। bade board par likhna chaahiye niraakaar parampita paramatma ko sab yaad bhi karte hain parantu yeh nahin jaante to woh maat-pita kaise hain। itni bhi manushyon ki buddhi nahin chalti kyonki baaten hain bahut vichitra, jo baap hi aakar sunaate hain। aatma kehti hai - O parampita paramatma, woh bhi hai aatma parantu supreme hai। supreme maana param। woh paramdham mein rahne vaala hai। woh khud to janma-maran mein nahin aate, aakarke ham bachchon ko patit janma-maran se chhudaate hain। paavan janma-maran se nahin chhudaate hain। patit aatma ko hi paavan aatma banaate hain isliye unko patit-paavan kaha jaata hai। manushya to raam-seeta ka bhi arth nahin samajhte। vaastav mein sab bhaktiyaan seetaayen hain। yaad karti hain ek saajan paramatma ko।

baap kehte hain - bachche, is samay saari duniya mein raavan raajya hai। sirf lanka mein nahin। raavan ko jalaate bhi yahaan hain। lanka, hindustaan mein nahin। woh to bauddhiyon ka alag khanda hai। to is samay saari duniya raavan ke bandhan mein hai। saari duniya mein raavan ka raajya hai। aadhaakalpa hai raamraajya, aadhkalpa hai raavan raajya। aadhkalpa din, aadhaakalpa raat। yeh sab baaten buddhi mein rakhne ki hain। is samay tum raavan par vijay pa rahe ho। jo poori vijay paayenge vahi maalik banenge। satayug aadi mein lakshmi-naaraayan ka raajya tha। unhonne yeh svarga ki praalabdha kahaan se aur kaise paai। satayug mein manushya bahut thode honge। laakhon ki andaaj mein honge। jamuna ke kanthe par raajdhaani hogi। vahaan koi vikaar hota hi nahin। kaha hi jaata hai sampoorn nirvikaari। bachche bhi yogbal se hi paida hote hain। vahaan rona, peetna kuchh nahin hota। parantu pahle yeh baaten nahin nikaalni hain। pahli baat hi yeh uthaao ki niraakaar parampita paramatma aur ham aatmaayen bhi parlok se aate hain to tumhaara paarlaukik parampita se kya sambandh hai? number one baat hai yeh। pahle yeh baap ka sambandh nikaalo to maa ka aur varse ka sambandh niklega। ek alpha ko bhoolne se hi sab kuchh bhoole hain। raavan ne pahle-pahle alpha se hi bhulaaya hai phir alpha ki madad se ham raavan par jeet paate hain। samjhaane ki points to bahut hain। pradarshani mein mukhya baat alpha ki samjhaani hai। alpha ke baad hi be te aata hai। alpha ko nahin samjha to kuchh nahin samjhenge। kitna bhi bhal maatha maaro। parampita hai to pita se varsa milta hai। baba ka varsa mila to varse ke hakdaar ban hi jaate hain। trimoorti par samjhaana kitna sahaj hai। oopar mein baap khada hai neeche lakshmi-naaraayan varsa, yeh vishnu khada hai। baba kehte hain mujhe yaad karo to yeh varsa paayenge। bachche kehte baba aap to niraakaar ho, aap kaise varsa denge। bachche, main in brahma dvaara deta hoon। jo aaye unko is baat par hi samjhaao। mool baat hi trimoorti ki hai। trimoorti brahma ka to koi arth hi nahin। samjhaana hai - yeh niraakaar shivbaaba, unko hi gyaan ka saagar kaha jaata hai। phir yeh varsa hai। ab baap to hai niraakaar। phir in lakshmi-naaraayan ko varsa kaise mila, kahaan se aaya? tum yahaan apne ko vishnu kumaar nahin kahlaate ho। tum to ho hi bi. ke.। brahmaapuri manushyon ki hi kahi jaati hai। jahaan khaas brahman rachte hain। sindha mein bhi brahmaapuri thi, yeh kisne samjhaaya? (shivbaaba ne) hamesha baapdaada combined kehna hai। kabhi baba, kabhi daada bolenge। donon aatmaon ka mukh to ek hi hai na। jab jisko chaahe woh use karenge। bandhan thode hi hai। to pahle hai yeh baat ki gyaan saagar geeta ka bhagwan baap hai, woh kehte hain - yeh brahma vishnu shankar to sookshm vatan vaasi hain devtaayen। yeh brahma to manushya hai jab sampoorn banenge to devta kahlaayenge। yeh tapasya kar phir devta bante hain। in brahmaakumaar kumaariyon ko bhagwan sikhlaate hain brahma dvaara। chitron par achhi reeti samjhaana hai। samjhaani bahut sahaj hai। yeh shivbaaba, yeh varsa। yeh shiv to niraakaar hai isliye brahma dvaara dete hain। brahma dvaara svarga ki sthaapna। zaroor abhi hi raajayog seekhte hain - yeh banne ke liye। yeh shivpuri, yeh vishnupuri hai।achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) alpha ki yaad se raavan maaya par jeet paani hai। sabko alpha ka parichay dena hai।

2) yaad ki yaatra mein thakna nahin hai। apni battery ko charge karne ke liye sarvashaktimaan baap ko yaad karna hai।

vardaan:- ek baap ki yaad dvaara ekras sthiti ka anubhav karne vaale saar swaroop bhav

ekras sthiti mein rahne ki sahaj vidhi hai ek ki yaad। ek baba doosra na koi। jaise beej mein sab kuchh samaaya hua hota hai। aise baap bhi beej hai, jismen sarva sambandhon ka, sarva praaptiyon ka saar samaaya hua hai। ek baap ko yaad karna arthaat saar swaroop banna। to ek baap, doosra na koi - yeh ek ki yaad ekras sthiti banaati hai। jo ek sukhdaata baap ki yaad mein rehte hain unke paas duhkh ki lahar kabhi aa nahin sakti। unhein svapna bhi sukh ke, khushi ke, seva ke aur milan manaane ke aate hain।

slogan:- shreshtha aashaaon ka deepak jagaane vaale hi sachche kul deepak hain।

maateshvari ji ke anmol mahaavaakya - “paramatma dvaara first lottery kyon na win karen''

dekho bahut manushya aise samajhte hain thoda-sa bhi purushaartha karne se ham bhi vaikuntha mein to aa jaayenge na, parantu unhon ko yeh sochna chaahiye ki paramatma baap aaya hai to complete varsa lene ke liye to student ka kaam hai sampoorn purushaartha kar scholarship lena, to pahla number lottery kyon na win karen! woh hai vijay maala mein piroya jaana। baaki do laddu pakadkar baithe hain yahaan ka bhi had ka sukh loon aur vahaan bhi vaikuntha mein kuchh-na-kuchh sukh le lenge, aise vichaarvaan ko madhyam aur kanishtha purushaarthi kahenge na ki sarvottam purushaarthi। jab baap dene mein aanaakaani nahin karta to lene vaale kyon katraate ho? tab gurunaanak ne kaha paramatma to daata hai, samartha hai magar aatmaon ko lene ki bhi taakat nahin, denda de, lenda thak paaye, (dene vaala deta hai lekin lene vaala thak jaata hai) aapke dil mein aata hoga ham kyon na chaahenge ki ham bhi yeh pad paayen, parantu dekho baba kitni mehnat karta hai, phir bhi maaya kitna vighna daalti hai, kyon? ab maaya ka raajya samaapta hone vaala hai। ab maaya ne saara saar nikaal diya hai, tab hi paramatma aate hain, jismen sab ras samaaya hua hai, jisse sabhi sambandh ki rasna milti hai tab hi tvamev maata cha pita... aadi aadi yeh mahima us paramatma ki hai, to balihaari isi samay ki hai jo aisa sambandh hua hai। achha - om shanti।