Murli du jour du samedi 5 mars 2022

05-03-2022 praatahmurli om shanti "baapdaada"' madhuban

“meethe bachche - baap se tumhein sumat mili hai, tumhaari buddhi ka taala khula hai isliye tumhaara kartavya hai sabko apni buddhi ka sahayog dena।''

prashn:- sangamayug par tum bachchon ke andar kaun si aash utpanna hoti hai jo baap hi poori karte hain?

uttar:- sangam par tum bachchon mein svarga jaane ki aash utpanna hoti hai। pahle kabhi socha bhi nahin tha ki ham koi svarga mein jaayenge, abhi yeh nai aash utpanna hui hai। yeh aash ek baap hi poori karta, yeh aash poori hone ke baad phir koi aash nahin rahegi। gaayan bhi hai apraapta nahin koi vastu devtaaon ke khajaane mein।

geet:- aakhir woh din aaya aaj…

om shanti। sabhi bhakton ke liye zaroor koi din aana hai। sab bhagwan ko hi yaad karte hain। baaki sabhi hain seetaayen, bhaktiyaan, sabhi duhkhi hain। yaad karte-karte aakhir woh din aata hai, jabki baap aakar haath pakadte hain। unko khivaiya, baagvaan, patit-paavan bhi kaha jaata hai। ab bachche jaante hain hamne ek ka haath pakda hai। naastik se aastik bane hain। baap ne bachchon ko apna parichay de apna banaaya hai varsa dene ke liye। baap se hi varsa milta hai na। ab yeh hai behad ka baap, parampita isliye sab bachche jo bhagat hain ve sab unko yaad karte hain। parantu yeh baat bhakta nahin samajhte। kitna dhoomdhaam se baaje-gaaje bajaate teerthon par jaate hain। kumbha ke mele lagte hain, ved shaastra aadi padhte hain। yeh sab hai bhakti maarga ki saamagri isliye bhagwan ko yaad karte hain ki woh aakar is durgati se chhudaaye। pukaarte rehte hain parantu baap ka kisko pata nahin, jisko baap ka pata na ho woh jaise bachcha hi nahin। baap ko na jaanne kaaran, naastik banne kaaran duhkh hi duhkh hai। baap ka bachcha banne se sada sukh hi sukh hai। baap hai svarga ka rachayita। vahaan sabhi to nahin chalenge। limited number hi aayenge baap se varsa lene। baaki sab dharma vaale mukti ka varsa lene aate hain। lena sabko baap se hi hai।

baap kehte hain abhi main tumko sahaj te sahaj baat samjhaata hoon। bas mujh apne baap ko yaad karo aur yeh baap hi samjhaate hain ki 5 hajaar varsha pahle bhi tum mile the। har 5 hajaar varsha ke baad milte rahenge। apne liye to jaise puraani baat hai। kalpa-kalpa tum raajya ganvaate ho aur phir paate ho। 84 janma tum hi lete ho। yeh hai bahut janmon ke ant ka janma। tum samajhte ho ham pahle ksheersaagar mein the phir aakar vishay saagar mein phanse hain। ksheersaagar va vishay saagar koi hai nahin। parantu paavan the phir maaya raavan ne patit banaaya, ab phir baap paavan banaane aaye hain। geet mein bhi kehte hain aakhir woh din aaya aaj। bhaktimaarga mein tumko koi yeh aash nahin thi ki ham svarga ke maalik banen। yeh baat to buddhi mein thi hi nahin। yeh baba bhi bahut geeta padhte the, sunte the। parantu yeh aash nahin thi ki ham raajayog seekh nar se naaraayan banenge, to anaayaas hi baap ne aakar pravesh kiya। baba kehte hain main ab tumhaari svarga ki aash poorn karne aaya hoon। ab svarga mein chalne ki aash buddhi mein dhaaran karo। svarga ka rachayita hai baap। woh bahut sahaj reeti baith samjhaate hain। haan kaam mahaashatru hai, yeh to sannyaasi bhi kehte hain isliye gharbaar chhod dete hain। woh to hui ek do ki baat। unka nivritti maarga ka part drama mein hai। hai to woh bhi bhagat। god father kehte hain lekin woh kaun hai - yeh nahin jaante। phir kehte hain bhaj raadhe govinda... kisko bhaje? krishna ka naam phir govinda rakh diya hai। jo suna hai woh likh diya hai, bhala govinda kisko kahen? gaooon ko charaane vaala, murli sunaane vaala to ek baap hi hai। hai bhi human gau ki baat। aage tum bhi kuchh nahin samajhte the। abhi baap ne aakar sumat di hai। maaya raavan kumat dete hain, baap sumat dete hain। sumat hai shivbaaba ki, kumat hai raavan ki। sumat maana shreemat, kumat maana jhoothi mat। abhi tum contrast ko jaante ho। ham jhoothi mat par the, svarga ki aash to thi nahin। abhi baap ne nai aash pragat ki hai। vahaan koi apraapta vastu hoti nahin, jiske liye maatha maarna pade। ab tum sabki nai aash hai। bhal purushaartha nambarvaar karte ho। baap to number one mat dete hain na। kehte hain yeh to aisa hai jo brahma bhi utar aaye to bhi unki mat nahin lenge। yeh pichhaadi ki mahima hai। tumhaari mahima pichhaadi mein gaai jaayegi। jab tum sampoorn ban jaayenge tab vaah-vaah niklegi। abhi to chadhte girte rehte hain। abhi-abhi khushi mein naachte, abhi-abhi murda ban padte। maaya bhinna-bhinna prakaar se thokar maar deti hai। kahaan na kahaan soot munjha deti hai jo shreemat ko chhod raavan ki mat par chal padte hain phir chillaate rehte hain।

baba kehte hain kadam-kadam par saavdhaani lete raho। shreemat par chalne mein hi tumhaara kalyaan hai। tumhaare andar baap ne hi aash pragat ki hai na ki shreemat par chalne se yeh lakshmi-naaraayan jaisa banenge। jaise yeh (brahma) bante hain aise tatatvam। yeh baat bhoolo mat। parantu maaya aisi hai jo shreemat lene ka chance hi nahin deti। kahaan na kahaan ulta kaam kara deti hai। karke phir peechhe aakar kahenge, baba ham yeh kaam kar baithe। time nahin mila jo raay leven। ab kya karen, maaya ne tumko thappad maara, ismen baap kya karenge! har baat mein kadam-kadam par badi saavdhaani chaahiye। sannyaasi kabhi nahin kahenge - stri purush ikatthe rah pavitra rah sakte hain, ismen yuktiyaan bahut hain। brahmaakumaar kumaari kahlaana - kitni badi yukti hai। tum bachche brahman-braahmaniyaan bante ho to kahaan kul ko kalank nahin lagaana। behen bhaai ka naata kabhi ulta nahin hota। law nahin jo behen bhaai aapas mein shaadi karen। yahaan to sab bhaai behen ho jaate hain। is par vo log hansate hain ki yeh phir kahaan ka rivaaz hai। yeh to hai hi nai baat। aisi raay kabhi koi de na sake। koi poochhe tum bi.ke. ho to bhaai behen ho gaye। to buddhi mein bithaana hai kyonki sabki buddhi ka taala banda hai। pattharbuddhi hain to tumko unki buddhi ka taala kholna chaahiye। dher ke dher centres hain, unmein sabhi apne ko brahmaakumaar kumaari kahlaate hain to bhaai behen thahre na। woh criminal assault kar na saken, impossible hai। yeh to nai rachna hai eeshvar ki। woh kehte hain - geeta mein to kabhi suna nahin hain। baap kehte hain yeh to main tumko sikhlaata hoon phir to na shivbaaba hoga, na bi.ke. honge। yeh gyaan praayahlop ho jaayega। phir kahaan sun sakenge। abhi main tumko raajayog sikhla raha hoon। jab raajdhaani ki sthaapna poori ho jaayegi to phir yeh sab khalaas ho jaayega। paandavon ne raajdhaani sthaapan ki। yeh bhi shaastron mein nahin hai। devtaayen to the paavan duniya ke maalik। daitya hain patit duniya ke। inhon ki phir aapas mein ladaai kaise lag sakti। svarga se narka mein ladaai karenge kya! achha, bhala asuron aur devtaaon ki ladaai kaise lagi? zaroor sangam hona chaahiye। woh apna lashkar le aakar ladaai karen, hisaab hi nahin baithta। jahaan asur hain vahaan devta koi hain nahin। jahaan devtaayen hain vahaan asur nahin। to phir ladaai kaise lag sakti! kaurvon, paandavon ki ladaai bhi lag na sake। jo shreemat par chalte hain woh kabhi kisko ladaayenge kaise? ladaane vaale hain manushya। baap ladne va jua khelne ki chhutti nahin de sakte। paandav koi moorkha thode hi the jo jua khelenge va aapas mein ladenge।

baba ne samjhaaya hai ki yeh baba ka rudra gyaan yagya hai। ablaaon par atyaachaar bahut hote hain। vish ke liye kitna tang karte hain। bolo, bhagwan kehte hain kaam mahaashatru hai, is par vijay paane se tum svarga mein aa jaayenge। aise-aise samjhaane se bahut jeet bhi paate hain। phir unko devi kah poojte hain। madad bhi milti hai। manushya to sunkar dar jaate hain ki stri purush ikatthe rehte pavitra rahe, yeh ho nahin sakta। kehte hain zaroor kuchh jaadu hai। aise satsang mein kabhi nahin jaana। shuru mein bachchiyaan bhaagi to woh naam ho gaya hai। bhatthi jo bani to zaroor bhaage honge na। baandheliyon ko bahut raay milti hai, ismen bahaaduri bhi chaahiye। gareeb to samjhenge koi harja nahin। iske kaaran ham svarga ki raajaai kyon gavaayen। yeh ghar se nikaal denge - achha ham jaakar bartan maanjengi, jhaadu lagaayengi। bade ghar vaale to aise chhod na saken। shuru mein to bachchiyon ka part tha। gareebon ke liye bahut sahaj hai। baba kehte hain - baba ke paas aayenge to pahle jhaadu aadi lagaana, sab karna padega। maaya ke toofaan bhi jor se aayenge। bachche yaad padenge, isliye khabardaari chaahiye। pahle nashtomoha bano, tab hai baat। shivbaaba ko mat deni padti hai। gyaan mila hai, kapda kaisa bhi pahno, harja nahin hai। baap tumhein naynon par bithaakar svarga mein le chalte hain। saajan pichhaadi sajni jaati hai to matki mein jyoti jagaate hain। baap aate hi hain sabko gul-gul banaakar le jaane। pure to sabhi banenge। paapon ka bojha sir par hai to hisaab-kitaab ant mein chuktu kar jaana hai, iske liye tum yaad mein rahne ki itni mehnat karte ho, jo nahin karte woh aise hi thode hi mukti mein jaayenge। kayaamat ke samay khoob saja khaakar phir muktidhaam mein chale jaayenge। aatma ka to svadharma hai silence। ham ashareeri ho baithte hain। in karmendriyon se kaam nahin lete hain, chup ho baith jaate hain। parantu kab tak? aakhreen karma to karna hai na। saadhu santa aadi koi ko bhi yeh pata nahin hai ki aatma ka svadharma hi silence hai। sannyaasi log shanti ko dhoondhane jaate hain। baba kehte hain shanti to tumhaare gale ka haar hai। phir ham jangal mein kyon jaayen! ham karmayogi hain। baba kehte hain mujhe yaad karo to vikarma vinaash honge। phir svarga ko yaad karo, 63 janma bhakti ki ghamsaan ne hairaan kar diya, abhi tumko sab hangaamon se chhuda diya hai।

baba ke direction milte hain ki ab ashareeri bano kyonki tumko mere paas aana hai phir tumko svarga mein bhej doonga, ismen hangaamen ki koi baat hi nahin। bhakti maarga mein tumne dhakke khaaye, so to phir bhi khaane padenge। sabko punarjanma lete-lete tamopradhaan banna hi hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kadam-kadam par badi saavdhaani se chalna hai। shreemat par moonjhana nahin hai। kabhi kul ko kalank nahin lagaana hai।

2) baap ke paas jaane ke liye puraane sab hisaab-kitaab chuktu karne hain। ashareeri banne ka poora abhyaas karna hai।

vardaan:- baap ki sameepta ke anubhav dvaara svapna mein bhi vijayi banne vaale samaan saathi bhav

bhakti maarga mein sameep rahne ke liye satsang ka mahatva bataate hain। sang arthaat sameep vahi rah sakta hai jo samaan hai। jo sankalp mein bhi sada saath rehte hain woh itne vijayi hote hain jo sankalp mein to kya lekin svapna maatra bhi maaya vaar nahin kar sakti। sada maayaajeet arthaat sada baap ke sameep sang mein rahne vaale। koi ki taakat nahin jo baap ke sang se alag kar sake।

slogan:- sada nirvighna rehna aur sarva ko nirvighna banaana - yahi yathaartha seva hai।

anmol gyaan ratna (daadiyon ki puraani diary se)

apne nishchay mein sthit ho apni kalpa pahle vaali noondh ko banaana hai। aise nahin ki noondh anusaar nishchay karna hai। kai samajhte hain ki yeh gyaan to mere bhaagya mein hi nahin hai, aisa noondha hua hai। lekin nahin। yeh nishchay avashya rakhna hai ki mere bhaagya mein noondh hai। purushaartha karke apni praalabdha banaani hai kyonki viraat film anusaar bani hui to hai lekin purushaartha se is bani ko banaana hai। bani siddha hi tab hogi, jab bani ko maalik ban banaaven। bani hui ko aage se hi samajh khada nahin ho jaana chaahiye। lekin purushaartha se jo praalabdha siddha hoti hai unko hi praalabdha samajhna chaahiye। yahi gyaan hai। baaki noondh samajh purushaarthaheen ho jaana, yeh agyaan hai। achha - om shanti।