Murli du jour du lundi 7 mars 2022

07-03-2022 praatahmurli om shanti "baapdaada"' madhuban

“meethe bachche - simar-simar sukh paao, baap ka simran karo to tan ke kal-klesh mit jaayenge, tum nirogi ban jaayenge''

prashn:- is samay tum bachche yuddhasthal par ho, jeet va haar ka aadhaar kya hai?

uttar:- shreemat par chalne se jeet, apni mat va doosron ki mat par chalne se haar। ek taraph hain raavan mat vaale, doosri taraph hain raam mat vaale। baap kehte hain bachche raavan ne tumhein bahut sataaya hai। ab tum mere se buddhiyog lagaao to vishwa ke maalik ban jaayenge। agar kaarne akaarne apni mat par chale ya khit-pit mein aaye, padhaai chhodi to maaya munh pher degi, haar kha lenge, isliye bahut-bahut khabardaar rehna hai।

geet:- dekh tere sansaar ki haalat…

om shanti। insaan ko kitna badalna hota hai। yeh sirf tum brahman bachche hi jaan sakte ho। to manushya kitna oonche te ooncha ja sakta hai phir vahi manushya kitna neeche te neecha banta hai। manushya satayugi satopradhaan vishwa ka maalik ban sakte hain aur manushya hi tamopradhaan worth not penny ban jaate hain। yeh sab kuchh tumne jaana hai behad ke baap dvaara। ek hi patit-paavan sadgati daata hai। vahi paavan banaate hain। raavan phir patit banaate hain। phir parampita paramatma aakar kitna oonch banaate hain, tab hi gaaya jaata hai eeshvar ki gat mat nyaari hai। unki mahima bhi sabse nyaari hai। baap ki mahima aparmaapaar hai kyonki un jaisi mat aur kiski hoti hi nahin। unko kaha jaata hai shreemat bhagvat। mat to sabki hoti hai। barrister ki mat, surgeon ki mat, dhobi ki mat, sannyaasiyon, udaasiyon aadi ki mat। phir bhi gaaya jaata hai he eeshvar tumhari gat mat sabse nyaari hai। parampita paramatma hi oonche te oonch shreshtha te shreshtha hai। yeh koi manushya va devta ki mat nahin hai। tumhaare mein bhi jo pakke nishchaybuddhi hain, vahi is baat ko samajh aur samjha sakte hain। woh jaante hain ki baba ki shreemat se ham kitna shreshtha bante hain। baba loveful, peaceful hai। har baat mein full hai to tumko bhi full varsa baap se lena hai। full varsa kya hai? number one vishwa ka maalik banna। kam se kam sooryavanshi maala mein to piro jaayen। ham hi poojya the phir ham hi pujaari banen। saari duniya unki maala pherti hai। simarni zaroor simarti hai। parantu simarni ka arth kuchh bhi jaante nahin। kehte hain simar-simar sukh paao arthaat ek ko hi simarna chaahiye phir yeh log sabko kyon simarte hain। baap kehte hain sabko nahin simro, sirf mujh ek ko hi simro। mujh baap ko khoob yaad karo, mujhe yaad karte-karte tum mere paas pahunch jaayenge। main direction deta hoon to grihastha vyavhaar mein rahkar sirf mujh baap ko yaad karo। kitna sahaj upaay hai। kehte hain simar-simar sukh paao arthaat jeevanmukti pad paao। kal-klesh sab tan se mit jaayenge। vahaan tumhaare shareer ko koi rog nahin rehta। ab baap tum bachchon ko sammukh suna rahe hain, tum sunkar auron ko sunaate ho। sabse achha yeh tape record sunaata hai। jara bhi miss nahin karenge। baaki expressions (haav-bhaav) ko to nahin dekh sakenge। buddhi se samjhenge ki baba aise aise samjhaate honge। yeh tape masheen to khajaane ki khaan hai। manushya to shaastron ka daan karte hain। geeta chhapaakar daan karte hain। yeh tape kitni wonderful cheez hai। jara naazuk hai isliye sambhaal se chalaani padti hai। yeh hai hospital kam university। sabko health, wealth ka varsa de sakti hai। murli se hi sab kuchh milta hai। parantu maaya mohini aisi hai jo sab kuchh bhula deti hai ya raavan mohit karte hain ya raam mohit karte hain। raam ek baar mohit karte, raavan ne to aadhaakalpa se kheenchate-kheenchate ekdam mitti paleet kar di hai। yahaan har cheez tamopradhaan hai। 5 tatva bhi tamopradhaan hain। satayug mein 5 tatva bhi satopradhaan honge। kitni badi bhaari aamadni hai। lete kaun hain! koto mein koi। bandarbuddhi ko mandir buddhi banaane mein kitni mehnat lagti hai। saari duniya veshyaalay ban gai hai। phir main hi aakar shivaalay banaata hoon। bhaarat shivaalay tha, ab raavan ne veshyaalay banaaya hai। aadha-aadha samay hai। baap kehte hain bachche ab khoob service karo। vo log to kahne maatra kah dete hain ki patit-paavan aao, parantu jaante nahin। anek mat-mataantar hain। bhagwan khud kehte hain yeh bhrashtaachaari duniya hai। manushya bhrashta bante hain vish se। kaam sabse mahaashatru hai। vahaan yeh vikaar hote hi nahin। yeh bhaarat most beloved baap ka birthplace hai। raavan jo dushman hai unko jalaate hain। jaise deviyon ke chitra banaae pooja kar phir dubote hain। yeh sab hai andhashraddha। paadri log bhi aisi baaten sunaakar bahuton ko convert karte hain। hai to drama ki bhaavi। parantu woh mehnat bahut karte hain। is samay saari duniya mein hai raavan raajya। is samay sab hain raavan ki chhi-chhi mat par। parampita paramatma patit-paavan, jiski sabse jaasti mahima hai, unko sarvavyaapi kah diya hai। manushya ka aur koi dushman nahin। maaya se hi manushya peedit hain। unse to ek baap hi aakar chhudaate hain aur to koi chhuda na sake। sharan padi main teri, prabhu meri laaj rakho.....aisa bhi geet hai। ab tumko raavan se hi bachaate hain। raavan ne kitna sataaya hai। baba kehte ek, raavan le jaata hai doosri taraph। baap kehte hain meri mat par chalo, raavan phir bhula dete hain। baap aate hain vishwa ka maalik banaane। blood se bhi likhkar dete hain phir bhi maaya bhulaakar mukh mod deti hai। yeh saari buddhi ki baat hai। baap kehte hain bachche ab vaapis chalna hai isliye mujhe yaad karo to oonch pad paayenge।

baba kehte hain - bachche, shreemat ko kabhi nahin bhoolna। parantu kaarne akaarne apni mat par ya koi ki khitpit se baap ko chhod dete hain। isko kaha jaata hai yuddha sthal। ek taraph hai raavan ki mat vaale। doosre taraph hain raam ki mat vaale। are tum bhagwan se svarga ka varsa lo na। itne sab le rahe hain, kya yeh moorkha hain! tum bhi bhagwan ki santaan ho, tum bhi varsa lo। parampita paramatma brahma dvaara nai srishti rachte hain। aise nahin ki vishnu dvaara devta rache। brahma dvaara vishnupuri rachi। kehte bhi hain barobar theek hai। vishnu ki raajdhaani mein ham raajya lenge। baithe-baithe phir gum ho jaate hain। kaarne akaarne matbhed mein aa jaate hain। koi badhann pada va koi ne kuchh kaha to bhool jaate hain। dekho yeh dher bi. ke. hain, parampita paramatma se varsa le rahe hain। achhi reeti padh rahe hain parantu baahar jaate hain to bhool jaate hain। maaya bhrashta buddhi bana deti hai। kitni mehnat ki jaati hai samjhaane ke liye। bachche ghadi-ghadi dhandhedhori se chhutti le jaate hain service par। sabhi par raham karne chaahte hain kyonki in jaisa duhkhi worth not penny duniya mein koi hai nahin। sabhi ka yeh dhan daulat mitti mein mil jaayega। baaki tumhaari hai sachchi kamaai। tum haath bhartu karke jaayenge। baaki sab haath khaali jaayenge। yeh to sab jaante hain vinaash hona hai zaroor। sab kehte hain yeh vahi mahaabhaarat mahaabhaari ladaai ka samay hai, sabko kaal kha jaayega। parantu hona kya hai, yeh samajhte nahin hain। baap khud kehte hain main tum sabko vaapis le jaane ke liye aaya hoon। mujhe hi kaal, mahaakaal kehte hain। maut saamne khada hai isliye ab tum meri mat par chalo aur pad bhi ooncha le lo। jeevanmukti mein bhi pad hai। mukti mein to sab dharma sthaapak baith jaayenge। woh bhi pahle jab aayenge to satopradhaan phir sato rajo tamo mein aate hain। oonch aur neech, beggar aur prince। bhaarat is samay sabse neech patit hai। kal phir paavan prince banega। devi devta dharma bahut sukh dene vaala hai। itna sukh aur koi dharma mein ho na sake। tum bachche satayug ke maalik the, ab narka ke maalik bane ho phir tum first janma satayug mein lenge। ham so ka arth bhi nahin samajhte hain। ham jeev aatma is samay brahman hain, inke pahle shoodra the। kal ham so devta phir kshatriy banenge। phir vaishya, shoodra dynasty mein aayenge। abhi hamaari chadhti kala hai। satayug mein yeh gyaan nahin rahega, inke pahle ham utarti kala mein the। baba chadhti kala mein le jaate hain। parantu kiski buddhi mein yeh gyaan thaharta nahin hai kyonki buddhi yog mere saath nahin hai isliye golden aged bartan banta hi nahin।

baap kehte hain - sirf baba-baba mukh se nahin kehna hai। parantu baba ko andar mein yaad aise karna hai jo ant mati so gati ho jaaye। deh ka bhaan chhod apne ko aatma samjho। jitna apne ko aatma samjhenge, baap ko yaad karenge utne tumhaare vikarma vinaash honge aur koi upaay hi nahin hai। bhagvaanuvaach - tumhein sabko samjhaana hai ki yeh jo tum yagya, tap, daan karte ho - inse mere se nahin mil sakte ho। abhi tum to ekdam patit ban gaye ho। ek bhi mere paas nahin aaye hain। naatak mein pichhaadi tak sab actors ko rehna hai। jab naatak poora hoga tab sabko vaapis jaana hai। aatmaayen vriddhi ko paati rehti hain। beech se nikal nahin sakti। sthaapna karne vaale hi yahaan baithe hain। 84 janma lene hain। jhaad ko jadajdeebhoot avastha ko paana hai। yeh bahut achhi baaten hain samajhne ki। bada khabardaar bhi rehna hai ki maaya kahaan dhokha na de। apna munh oopar mein rakhna hai, khushi se jaana hai। (murde ka munh pherte hain) baba kehte hain apna munh svarga ki taraph rakho, laat narka ki taraph isliye krishna ka aisa chitra banaaya hai। shyaam sundar bante hain। tum bhi number one gore bante ho tab kehte hain manushya se devta kiye...arthaat kaliyug ko satayug banaana, baap ka kaam hai। tum bachche jaante ho ham shreemat par vishwa ka raajya sthaapan karte hain, usmein aakar raajya karenge। ismen yagya tap karne ki darkaar nahin। baba in dvaara mat dete hain ki mujhe yaad karo। ab raajdhaani sthaapan ho rahi hai। usmein jo pad chaahiye woh le lo। jaise yeh mama ab gyaan gyaaneshvari hai, jaakar raaj raajeshvari banengi। yeh knowledge hai hi raajayog ki। to aise college mein kitna achhi reeti padhna chaahiye। baap kehte hain aaj bahut achhi-achhi points sunaata hoon, isliye poora dhyaan rakho। mitra sambandhiyon ka bhi kalyaan karo। jinki takdeer mein hoga woh uth padenge। shiv ke mandir mein jaakar bhaashan karo। shivbaaba narka ko svarga banaane aaya hai। bahut banne ke liye aayenge। tumhaari maaya ke saath jabardasta ladaai hai। achhe-achhe bachchon ko aaj nasha chadhta, kal gum ho jaate hain। tum jaante ho puraani duniya khatma honi hai। ham yeh puraana shareer chhod nai duniya mein jaakar pair dharenge। yeh dehli paristaan hogi। ab paristaan mein jaane ke liye gul-gul (phool) bano। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) deh-abhimaan ko chhod baba ko andar hi andar aisa yaad karna hai jo ant mati so gati ho jaae। buddhi ko yaad dvaara golden aged banaana hai।

2) kabhi bhi manmat ya matbhed mein aakar padhaai nahin chhodni hai। apna mukh svarga taraph rakhna hai। narka ko bhool jaana hai।

vardaan:- sarva praaptiyon ko saamne rakh shreshtha shaan mein rahne vaale master sarvashaktimaan bhav

ham sarva shreshtha aatmaayen hain, oonche te oonche bhagwan ke bachche hain - yeh shaan sarvashreshtha shaan hai, jo is shreshtha shaan ki seat par rehte hain woh kabhi bhi pareshaan nahin ho sakte। devtaai shaan se bhi ooncha ye braahmanon ka shaan hai। sarva praaptiyon ki list saamne rakho to apna shreshtha shaan sada smriti mein rahega aur yahi geet gaate rahenge ki paana tha vo pa liya...sarva praaptiyon ki smriti se master sarvashaktimaan ki sthiti sahaj ban jaayegi।

slogan:- yogi aur pavitra jeevan hi sarva praaptiyon ka aadhaar hai।