Murli du jour du mercredi 6 avril 2022

06-04-2022 praatahmurli om shanti "baapdaada"' madhuban

“meethe bachche - gyaan ki guhya baaton ko siddha karne ke liye vishaalbuddhi ban bahut yukti se samjhaana hai, kaha jaata hai saamp bhi mare laathi bhi na toote''

prashn:- haahaakaar ke samay paas hone ke liye kaun sa mukhya gun zaroor chaahiye?

uttar:- dhairyata ka। ladaai ke samay hi tumhaari pratyakshata hogi। jo majboot honge, vahi paas ho sakenge, ghabraane vaale naapaas ho jaate hain। ant mein tum bachchon ka prabhaav niklega tab kahenge aho prabhu teri leela… sab jaanenge gupta vesh mein prabhu aaya hai।

prashn:- sabse bada saubhaagya kaun sa hai?

uttar:- svarga mein aana bhi sabse bada saubhaagya hai। svarga ke sukh tum bachche hi dekhte ho। vahaan aadi-madhya-ant duhkh nahin hota। yeh baaten manushyon ki buddhi mein mushkil hi baithti hain।

geet:- nai umar ki kaliyaan.....

om shanti। bhagvaanuvaach। aage shreekrishna bhagvaanuvaach kehte the। ab tum bachchon ko nishchay hua hai shreekrishna bhagvaanuvaach nahin hai। shreekrishna to trikaaldarshi arthaat svadarshan chakradhaari nahin hai। ab yeh agar bhakta log sunen to bigdenge। kahenge, tum inhon ki shraddha kyon kam karte ho। jabki inka nishchay krishna mein hain ki woh svadarshan chakradhaari hai, svadarshan chakra hamesha vishnu ko ya krishna ko hi dete hain। duniya ko to yeh maaloom hi nahin ki shreekrishna aur vishnu ka kya sambandh hai, na jaanne ke kaaran sirf vishnu ko va krishna ko svadarshan chakradhaari kah dete hain। svadarshan chakra ke arth ka bhi kisko pata nahin hai। sirf chakra de diya hai, maarne ke liye। use ek hinsak hathiyaar bana diya hai। vaastav mein unke paas na hinsak chakra hai, na ahinsak। gyaan bhi raadhe krishna ya vishnu ke paas nahin hain। kaun sa gyaan? yeh srishti chakra ke phirne ka gyaan। woh sirf tumhaare mein hai। ab yeh to badi guhya baaten hain। yeh sab baaten yukti se kaise samjhaai jaaen jo samajh bhi jaayen, preet bhi kaayam rahe। seedha samjhaane se bigdenge। kahenge ki aap devtaaon ki ninda karte hain kyonki woh sab hain ek samaan, sivaae tum braahmanon ke। tum kitni chhoti-chhoti bachchiyaan ho। baba to kehte hain chhoti-chhoti bachchiyon ko aisa hoshiyaar karna chaahiye jo pradarshani mein samjhaane ke laayak banen। jismen gyaan hai woh aapehi offer karte hain - ham pradarshani samjha sakte hain। braahmaniyon ki badi vishaal-buddhi chaahiye। pradarshani mein samjhaane ke liye serviceable ko bhejna chaahiye। sirf dekhne ka shauk nahin। pahle-pahle to yeh nishchay chaahiye ki geeta ka bhagwan niraakaar parampita paramatma shiv hai, shreekrishna ko bhagwan nahin kaha jaata hai, isliye geeta bhi wrong hai। yeh bilkul nai baat ho gai duniya mein। duniya mein sab kehte hain krishna ne geeta gaai। yahaan samjhaaya jaata hai krishna geeta ga na sake। jo mor mukutdhaari hai, double sirtaaj va singaltaaj sooryavanshi, chandravanshi va vaishya, shoodra vanshi, koi bhi geeta ki knowledge ko nahin jaante। woh knowledge bhagwan ne hi sunaae bhaarat ko svarga banaaya tha। to duniya mein sachcha geeta ka gyaan aaye kahaan se? yeh sab bhakti ki line mein aa jaate hain। ved shaastra aadi padhte-padhte nateeja kya hua? girte hi aaye hain, kalaayen kamti hoti hi gai hain। bhal kitni bhi ghor tapasya karen। sir kaat kar rakhen, kuchh bhi phaayda ho na sake। har ek manushya maatra ko tamopradhaan zaroor banna hai। usmein bhi khaas bhaaratvaasi devi-devta dharma vaale hi sabse neeche gire hue hain। pahle sabse satopradhaan the, ab tamopradhaan ban gaye hain। jo bilkul oonch paradise ke maalik the, woh ab narka ke maalik ban gaye hain। tum bachchon ki buddhi mein yeh rehna chaahiye ki shareer puraani jutti hai, jisse ham padh rahe hain। devi devta dharma vaalon ki sabse jaasti puraani jutti hai। bhaarat shivaalay tha, devtaaon ka raajya tha। heere javaahron ke mahal the। ab to veshyaalay mein asur vikaariyon ka raajya hai। drama anusaar phir inko veshyaalay se shivaalay banna hi hai। baap samjhaate hain sabse jaasti bhaaratvaasi hi gire hain। aadhaakalpa tum hi vishay vikaari the। ajaamil jaisi paap aatma bhi bhaarat mein hi the। sabse bada paap hai vikaar mein jaana। devtaayen jo sampoorn nirvikaari the, woh ab vikaari bane hain। gore se saanvare bane hain। sabse oonch hi sabse neench bane hain। baap kehte hain jab sampoorn tamopradhaan ban jaate hain tab unhon ko main aakar sampoorn satopradhaan banaata hoon। abhi to koi ko sampoorn nirvikaari kah na saken, bahut farka hai। bhal karke yeh janma kuchh achha hai। aage ka janma to ajaamil jaisa hona chaahiye। baap kehte hain main patit duniya aur patit shareer mein hi pravesh karta hoon, jo poore 84 janma bhog tamopradhaan bane hain। bhal is samay achhe ghar mein janma hain kyonki phir bhi baba ka rath banna hai। drama bhi kaaydesir bana hua hai, isliye saadhaaran rath ko pakda hai। yeh bhi samajhne ki baaten hain। tum bachchon ko service ka bahut shauk hona chaahiye, baba ko dekho kitna shauk hai। baap to patit-paavan hai, sarva ka avinaashi surgeon hai। tumko kaise achhi davaai dete hain। kehte hain mujhe yaad karne se tum kab rogi nahin banenge। tumko koi dava darmal nahin karni padegi। yeh shreemat hai na ki koi guru ka mantra aadi hai। baap kehte hain mujhe yaad karne se tumhaare vikarma vinaash honge। phir maaya ka vighna nahin aayega। tum mahaaveer kahlaayenge। school mein result pichhaadi ko hi nikalti hai। yeh bhi ant mein maaloom padega। jab ladaai shuru hoti hai, tab tumhaari bhi pratyakshata hoti hai। dekhenge, tum kitne nidar, nirbhay bane ho। baap bhi nirbhay hai na। kitna bhi haahaakaar mach jaae, dhairyata se samjhaana hai ki humein to jaana hi hai, chalo to ham chalen apni manzil mount aabu...... baba ke paas। ghabraana nahin hai, ghabraane mein bhi naapaas ho jaate hain। itna majboot banna hai। pahle-pahle aaphten aayengi famine ki। baahar se anaaj aa nahin sakega, maaraamaari ho jaayegi। us samay kitna nidar banna pade। ladaai mein kitne pahalvaan hote hain, kehte hain marna aur maarna hai। jaan ka bhi dar nahin hai। bhal unko yeh bhi gyaan nahin hai ki shareer chhod doosra lenge। unko to service karni hai। vo log sikhaate hain bolo guroonaanak ki jay.... hanumaan ki jay... tumhaari shiksha hai shivbaaba ko yaad karo। woh naukri to karni hi hai athva desh seva to karni hi hai। jaise tum shivbaaba ko yaad karte ho, is prakaar koi bhi yaad nahin karte hain, shiv ke bhagat to dher hain। parantu tumko direction milte hain shivbaaba ko yaad karo। vaapis jaana hai phir svarga mein aana hai। ab sooryavanshi, chandravanshi donon hi raajya sthaapan ho rahe hain। yeh gyaan sabko milega। jo praja banne laayak hoga woh utna hi samjhega। ant mein tumhaara bahut prabhaav niklega, tab to kahenge aho prabhu teri leela.... jaanenge ki prabhu gupta vesh mein aaya hai। koi kahe paramatma ka va aatma ka saakshaatkaar ho parantu saakshaatkaar se koi phaayda nahin hai। samjho sirf light chingaari dekhi parantu samjhenge kuchh bhi nahin ki yeh kaun hai। kiski aatma hai va paramatma hai? devtaaon ke saakshaatkaar mein phir bhi kuchh bhabhka hota hai, khushi hoti hai। yahaan to yeh bhi nahin jaante ki paramatma ka roop kya hai, jitni pichhaadi hoti jaayegi to baba buddhi ka taala kholta jaayega। svarga mein aana yeh bhi saubhaagya hai। svarga ke sukh aur koi dekh na sake। svarga mein yatha raaja tatha praja rehte hain। ab new dehli naam rakha hai। parantu new bhaarat kab tha? yeh to puraana bhaarat hai। naye bhaarat mein sirf devta dharma tha। bilkul thode the। ab to bahut hain। kitna raat din ka farka hai। akhbaar mein bhi samjha sakte hain। tum new dehli, new bhaarat kehte ho parantu nav bhaarat, new dehli to nai duniya mein hogi। woh to paradise hoga, so tum kaise bana sakte ho। yahaan to anek dharma hain। vahaan ek hi dharma hai। yeh saari samajhne ki baaten hain। ham sab mool vatan se aaye hain। ham sab aatmaayen jyortibindu star misal hain, jaise star aakaash mein khade hain, koi girte bhi nahin hai, aise ham aatmaayen brahmaanda mein rehti hain। bachchon ko ab maaloom pada hai ki nirvaandhaam mein aatma bol na sake kyonki shareer nahin hai। tum kah sakte ho ham aatmaayen paramdham ki rahne vaali hain, yeh nai baat hai। shaastron mein likh diya hai ki aatma budbuda hai। saagar mein sama jaati hai। tum ab jaante ho patit-paavan baap sabko lene ke liye aaya hai। 5 hajaar varsha ke baad hi bhaarat svarga banta hai। yeh gyaan kisi ki buddhi mein nahin hai। baap hi aakar samjhaate hain - ham hi raajya lete hain, ham hi raajya ganvaate hain। inki no end। drama se koi chhoot nahin sakta। kitni sahaj baate hain, parantu kisi ki buddhi mein thaharti nahin hain। abhi aatma ko apne 84 janmon ke chakra ka maaloom pada hai, jisse chakravarti mahaaraaja mahaaraani bante hain। yeh sab khatma hone vaala hai। vinaash saamne khada hai, phir kyon lobh jaasti karen, dhan ikattha karne ka। serviceable bachcha hai to unki yagya se paalna hoti hai। service nahin karte to oonch pad bhi nahin milega। baba se poochh sakte ho ham itni service karte hain jo oonch pad paayen? baba kah dete hain aasaar aise dikhaai dete hain jo tum praja mein chale jaayenge। yahaan hi maaloom pad jaata hai। chhote-chhote bachchon ko bhi sikhlaakar itna hoshiyaar banaana chaahiye jo pradarshani mein service karke show karen। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan nirbhay, nidar banna hai। dhairyata se kaam lena hai, ghabraana nahin hai।

2) vinaash saamne hai isliye jaasti dhan ikattha karne ka lobh nahin karna hai। oonch pad ke liye eeshvareey seva kar kamaai jama karni hai।

vardaan:- sarva khajaane jama kar roohaani phakhur (nashe) mein rahne vaale bephikar baadshaah bhav

baapdaada dvaara sab bachchon ko akhut khajaane mile hain। jisne apne paas jitne khajaane jama kiye hain utna unki chalan aur chehre mein woh roohaani nasha dikhaai deta hai, jama karne ka roohaani phakhur anubhav hota hai। jise jitna roohaani phakhur rehta hai utna unke har karma mein woh bephikra baadshaah ki jhalak dikhaai deti hai kyonki jahaan phakhur hai vahaan phikra nahin rah sakta। jo aise bephikra baadshaah hain woh sada prasannachit hain।

slogan:- gyaani tu aatma woh hai jo gyaan dance ke saath, sanskaar milan ki dance jaanta hai।