Murli du jour du lundi 25 avril 2022

25-04-2022 praatahmurli om shanti "baapdaada"' madhuban

“meethe bachche - puraani deh aur deh ke sambandhi jo ek do ko duhkh dene vaale hain, un sabko bhool ek baap ko yaad karo, shreemat par chalo''

prashn:- baap ke saath-saath vaapis chalne ke liye baap ki kis shreemat ka paalan karna pade?

uttar:- baap ki shreemat hai bachche pavitra bano, gyaan ki poori dhaarna kar apni karmaateet avastha banaao tab saath-saath vaapis chal sakenge। karmaateet nahin bane to beech mein ruk kar sajaayen khaani padengi। kayaamat ke samay kai aatmaayen shareer chhod bhatakti hain, saath mein jaane ke bajaae yahaan hi pahle saza bhog hisaab chuktu karti hain isliye baap ki shreemat hai bachche sir par jo paapon ka bojha hai, puraane hisaab-kitaab hain, sab yogbal se bhasma karo।

geet:- O door ke musaaphir…

om shanti। abhi tum braahmanon ki buddhi se sarvavyaapi ka gyaan to nikal gaya hai। yeh to achhi reeti samjhaaya jaata hai ki parampita paramatma prajaapita brahma dvaara nai rachna rachte hain। woh thahra rachayita, jisko paramatma kaha jaata hai। yeh bhi bachche jaante hain ki woh aate hain, aakar bachchon ko apna banaate hain। maaya se liberate karte hain। puraani deh, deh sahit jo bhi mitra-sambandhi aadi hain, jo ek do ko duhkh dene vaale hain, unko bhoolna hai। jaise koi boodha hota hai to unko mitra-sambandhi aadi kehte hain raam japo। ab woh bhi jhooth hi bataate hain। na khud jaante hain, na unki buddhi mein paramatma ki yaad thaharti hai। samajhte hain paramatma sarvavyaapi hai। ek taraph gaate hain door ke musaaphir.. aatmaayen door se aakar shareer dhaaran kar apna-apna part bajaati hain। yeh sab baaten manushyon ke liye hi samjhaai jaati hain। manushya shiv ka mandir banaate hain। pooja karte hain। phir bhi yahaan-vahaan dhoondhate rehte hain। kah dete hain hamaare tumhaare sabmen vyaapak hai। unko orphan kehte hain - dhani ko na jaanne vaale। yaad karte hain he bhagwan, parantu jaante nahin। haath jodte hain। samajhte hain woh niraakaar hai। hamaari aatma bhi niraakaar hai। yeh aatma ka shareer hai। parantu aatma ko koi bhi jaante nahin। kehte bhi hain bhrakuti ke beech chamakta hai azab sitaara। agar star hai to phir itna bada ling kyon banaate hain! aatma mein hi 84 janmon ka part hai। yeh bhi nahin jaante hain। idhar udhar dhoondhate dhakka khaate rehte hain। sabko bhagwan kehte hain। badreenaath bhi bhagwan, krishna bhi bhagwan, patthar-thikkar mein bhi bhagwan hai to phir itna door door dhoondhane kyon jaate hain। jo hamaare devi-devta dharma vaala nahin hoga woh na brahman banega, na unko dhaarna hogi। woh aise hi achha-achha kehte rahenge। baap kehte hain bachche main tumko saath le chaloonga। jab tum shreemat par chal pahle pavitra banenge, gyaan ki dhaarna karenge, apni karmaateet avastha banaayenge tab hi mere saath-saath ghar pahunchenge। nahin to beech mein ruk kar bahut kadi saja khaani padegi। marne ke baad kai aatmaayen bhatakti bhi hain। jab tak shareer mile tab tak bhatakti hui saja bhogengi। yahaan bahut gandagi ho jaayegi - kayaamat ke samay। paapon ka bojha bahut sir par hai, sabko hisaab-kitaab to chuktu karna hi hai। koi bachche to abhi tak bhi yog ko samajhte nahin hain। ek minute bhi baap ko yaad nahin karte। tum bachchon ko ghadi-ghadi kaha jaata hai - baba ko yaad karo kyonki sir par bojha bahut hai। manushya kehte hain paramatma sarvavyaapi hai, phir bhi teerthon ki taraph kitna bhatakte hain। samajhte hain yeh sab karmakaanda aadi karne se hamko paramatma se milne ka raasta milega। baap kehte hain patit bhrashtaachaari to mere paas pahunch bhi nahin sakte। kehte hain phalaana paar nirvaan gaya, parantu yeh gapode maarte hain। jaata koi bhi nahin hai। abhi tum jaante ho - bhakti maarga mein kitne dhakke khaate hain। yeh sab shaastra aadi padhte-padhte manushyon ko girna hi hai। baap chadhaate hain, raavan giraate hain। ab baap samjhaate hain tum meri mat par chal pavitra banenge aur achhi tarah padhenge to svarga mein chalenge, nahin to itna oonch pad pa nahin sakenge। pradarshani ki kitni service chalti hai। ab yeh service badhti jaayegi। gaanv-gaanv mein jaayenge। yeh hai nai invention। nai-nai points nikalti rehti hain। jab tak jeena hai tab tak seekhna hi hai। tumhaari em object hai hi bhavishya ke liye। yeh shareer chhodege to tum jaakar prince princess banenge। svarga maana svarga। vahaan narka ka naam-nishaan bhi nahin। dharti bhi uthal-paathal kar nai ban jaati hai। yeh makaan aadi sab khatma ho jaate hain। kehte hain sone ki dvaarika neeche chali gai। neeche koi jaati nahin hai। yeh to chakra chalta hai। yeh teertha yaatra aadi sab bhakti maarga hai। bhakti hai raat। jab bhakti ki raat poori hoti hai to brahma aate hain din karne। dvaapar kaliyug hai brahma ki raat, phir din hona chaahiye। tum bachchon mein bhi nambarvaar hain। sab to ek jaisa padh na sake। bhinna-bhinna darje hain। pradarshani mein dekho kitne aate hain। 5-7 hajaar roz aate hain। phir nikalte kaun hain! koto mein koi, koi mein bhi koi। likhte hain - baba, 3-4 nikle hain, jo roz aate hain। koi 7 roz ka course bhi uthaate hain, phir aate nahin hain। jo devi-devta dharma ke honge vahi yahaan thahrenge। saadhaaran gareeb hi nikalte hain। saahookaar to mushkil hi thaharte hain। bahut mehnat karni padti hai। chitthi bhi likhte hain। blood se bhi likhkar dete hain। phir chalte-chalte maaya kha jaati hai। yuddha chalti hai to raavan jeet leta hai। baaki jo thoda kuchh sunte hain woh praja mein chale jaate hain। baba to samjhaate rehte hain - shreemat par chalna hai। jaise mama baba aur ananya bachche purushaartha kar rahe hain। mahaarthiyon ke naam to liye jaate hain na! paandav sena mein kaun-kaun hain, unka bhi naam baala hai। to kaurav sena ke bhi mukhya ka naam baala hai। yooropvaasi yaadvon ke bhi naam hain। akhbaar mein bhi jo naameegraami hain, unka naam daalte hain। un sabki parampita paramatma ke saath vipreet buddhi hai। paramatma ko jaanen tab to preet rakhen। yahaan bhi bachche preet rakh nahin sakte। ghadi-ghadi bhool jaate hain, phir pad bhrashta ho padta hai। jitna baap ko yaad karenge, utne vikarma vinaash honge aur pad ooncha milega। doosron ko bhi aap samaan banaana hai, merciful banna hai aur andhon ki bhi laathi banna hai। koi andhe, koi kaane, koi jhunjhaar hote hain। yahaan bhi bachche nambarvaar hain। aise phir saadhaaran praja mein naukar chaakar jaakar banenge। aage chalkar tum sab saakshaatkaar karenge। eeshvar ko sarvavyaapi kehna - yeh koi samajh nahin hai। eeshvar to gyaan ka saagar hai। vahi aakar tumhein gyaan de rahe hain, raajayog bhi sikhla rahe hain। shreekrishna ki aatma, jisne ab 84 janma poore kiye hain, ab woh raajayog seekh rahe hain। kitni guhya baaten hain। is samay sabhi baap ko bhoolne ke kaaran mahaan duhkhi ban pade hain। tum bachche jitna-jitna purushaartha karenge, utni tumhaare se khaamiyaan nikalti jaayengi, badi oonchi manzil hai। karodon se 8 mukhya nikalte hain। phir 108 ki maala banti hai। phir hain 16 hajaar। yeh bhi bheeti di jaati hai - purushaartha karne ke liye। vaastav mein 16 hajaar hain nahin। maala hai 108 ki। oopar phool phir yugal daana, nambarvaar vishnu ki maala banti hai। purushaartha karaane ke liye kitna samjhaaya jaata hai। jo is dharma ke nahin honge to kuchh bhi samjhenge nahin। svarga ke sukh paane ke laayak hi nahin। bhal pujaari bahut hain, woh bhi aayenge to praja mein। praja pad to kuchh nahin hai। mama baba kehte ho to follow kar mama baba ke takhtansheen bano। heart-fail kyon hote ho! school mein koi bachcha kahe ki ham paas nahin honge to sab kahenge yeh dull head hai। sensible bachche bahut achha padhte hain aur oonch number mein aate hain। tum bachche pradarshani mein bahut achhi service kar sakte ho। baba se bhi poochh sakte ho - baba main service karne laayak hoon। to baba batla sakta hai ki bachche abhi tumko bahut kuchh seekhna hai athva laayak banna hai। vidvaan aadi ke saamne samjhaane vaale bhi hoshiyaar chaahiye। pahle-pahle to yeh nishchay karaaya jaata hai ki bhagwan aaya hua hai। bulaate ho door desh ke rahne vaale aao, hamko saath le chalo kyonki ham bahut duhkhi hain। satayug mein to itne sab manushya honge hi nahin। sabhi aatmaayen muktidhaam mein chali jaayengi, jiske liye duniya itni bhakti karti hai। baap kehte hain main sabko le jaaoonga। second mein mukti-jeevanmukti। nishchay hua to jeevanmukta banenge phir jeevanmukti mein bhi pad hai। purushaartha karna hai jeevanmukti mein raaja-raani pad paayen। mama-baba mahaaraaja mahaaraani bante hain to ham kyon na pad paayen। purushaartha karne vaale chhip nahin sakte। saari raajdhaani sthaapan ho rahi hai। daivi dharma vaale jo bhi hain aayenge zaroor। mama baba raaja-raani bante hain to ham bhi kyon na purushaartha karen।

baba ko bachche patra likhte hain - baba kabhi-kabhi centre par aata hoon। ab bachchi ki shaadi karaani hai। koi gyaani ladka lekar do to shaadi karaaven। bachchi kahe ham shaadi nahin karengi। bahut bachchiyaan maar khaati hain। ablaaon par atyaachaar hote hain। baba likhte hain maa baap aur bachche teenon hi baba ke paas aa jaao to baba samjhaayenge। aadarneey pitaashri likhte ho to aa jaao। paisa nahin ho, ticket ke liye to woh bhi mil sakte hain। sammukh aane se shreemat milegi। kumaari ka ghaat to nahin karna hai na। nahin to paap aatma ban padenge। baap ki shreemat par chalkar pavitra banna pade। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jeevanmukta pad paane ka purushaartha karna hai। jaise maa baap mahaaraaja mahaaraani bante hain, aise follow kar takhtansheen banna hai। sensible ban padhaai achhi reeti padhni hai।

2) baap se sachchi preet rakhni hai। merciful ban andhon ko raasta dikhaana hai। baap se sammukh shreemat le paap aatma banne se bachna aur bachaana hai।

vardaan:- maaya va prakriti ke bhinna-bhinna cartoon show ko saakshi ban dekhne vaale santoshi aatma bhav

sangamayug par baapdaada ki vishesh den santushtata hai। santoshi aatma ke aage kaisi bhi hilaane vaali paristhiti aise anubhav hogi jaise puppet show (kathputli ka khel)। aajkal cartoon show ka fashion hai। to kabhi koi bhi paristhiti aae use aisa hi samjho ki behad ke screen par cartoon show va puppet show chal raha hai। maaya va prakriti ka yeh ek show hai, jisko saakshi sthiti mein sthiti ho, apni shaan mein rehte hue, santushtata ke swaroop mein dekhte raho - tab kahenge santoshi aatma।

slogan:- kisi bhi prakaar ke defect se pare rehna hi perfect banna hai।

maateshvari ji ke anmol mahaavaakya - “paramatma ka sachcha bachcha bante koi sanshay mein nahin aana chaahiye''

bhagvaanuvaach bachchon ke prati bachche, jab paramatma khud is srishti par utra hua hai, to us paramatma ko humein pakka haath dena hai lekin pakka sachcha bachcha hi baba ko haath de sakta hai। is baap ka haath kabhi nahin chhodna, agar chhodenge to phir nidhan ka ban kahaan jaayenge! jab paramatma ka haath pakad liya to phir sookshm mein yeh sankalp nahin chaahiye ki main chhod doon va sanshay nahin hona chaahiye। pata nahin ham paar karenge va nahin, koi aise bhi bachche hote hain jo pita ko na pahchaanne ke kaaran pita ke bhi saamne padte hain aur aise bhi kah dete hain hamko koi ki bhi parvaah nahin hai। agar aisa khyaal aaya to aise na laayak bachche ki sambhaal pita kaise karega phir to maano ki gira ki gira kyonki maaya to giraane ki bahut koshish karti hai kyonki pareeksha to avashya legi ki kitne tak yoddha roostam pahalvaan hai! ab yeh bhi jaruri hai, jitna jitna ham prabhu ke saath roostam bante jaayenge utna maaya bhi roostam ban hamko giraane ki koshish karegi। jodi poori banegi jitna prabhu balvaan hai to maaya bhi utni balvaani dikhlaayegi, parantu apne ko to pakka nishchay hai aakhreen bhi paramatma mahaan balvaan hai, aakhreen unki jeet hai। shvaanso shvaans is vishvaas mein sthit hona hai, maaya ko apni balvaani dikhlaani hai, woh prabhu ke aage apni kamjori nahin dikhaayegi, bas ek baari bhi kamjor bana to khalaas hua isliye bhal maaya apna force dikhlaaye, parantu apne ko maayaapti ka haath nahin chhodna hai, vo haath poora pakda to maano unki vijay hai, jab paramatma hamaara maalik hai, to unka haath chhodne ka sankalp nahin aana chaahiye। agar haath chhoda to bada moorkha thahra isliye paramatma kehta hai, bachche jab main khud samartha hoon, to mere saath hote tumhein bhi samartha avashya banenge। samjha bachche। achha - om shanti।