Murli du jour du mercredi 1 juin 2022

01-06-2022 praatahmurli om shanti "baapdaada"' madhuban

“meethe bachche - sada eeshvareey seva mein busy raho to baap se lav badhta jaayega, khushi ka paara chadha rahega''

prashn:- nazar se nihaal hone vaale bachchon ki dil mein kaun si khushi rehti hai?

uttar:- unke dil mein svarga ke baadshaahi ki khushi rehti hai kyonki baap ki nazar mili arthaat varse ke adhikaari bane। baap mein sab samaaya hua hai।

prashn:- baap bachchon ko roz bhinna-bhinna dhang se nai points kyon sunaate hain?

uttar:- kyonki bachchon ki anek janmon ki dil poori karni hai। bachche baap dvaara nai-nai points sunte hain to baap ke prati lav badhta jaata hai।

geet:- toone raat ganvaai so ke…

om shanti। bachche baithe hain nazar lagaakar। baap bhi dekh rahe hain aatma ko aur is shareer ko। bachche bhi dekh rahe hain। dekhne mein maja aata hai va sunne mein maja aata hai? kyonki sunna to bahut hua hai। bahut hi gyaan aadi dher ka dher suna hai। tum number one bhagat ho। tumne hi sabse jaasti bhakti ki hai। ved, shaastra, granth, geeta, gaayatri, jap, tap aadi sab padhe kiye hain, bahut sunte hain। baap samjhaate hain kab se lekar yeh sune hain? jab se yeh nikle hain bahut suna hai। baaki baap se nazar milaana so abhi hi hota hai। nazar se nihaal hote hi hain। yeh ek shlok bhi hai - nazar se nihaal svaami keenda satguru। guru bhi hai, svaami bhi hai sajniyon ka। nazar ke saamne baithe hain nazar se hi baap ko jaante hain ki usse hamko vishwa ka maalikapna milta hai। baap ko dekhne se dil khush ho jaati hai kyonki baap se hi sab kuchh milta hai। baap mein hi sab kuchh samaaya hua hai। jab baap mila, nazar ke saamne baithe ho to zaroor bachchon ko svarga ki baadshaahi ka nasha bhi chadhega। pahle baap ka nasha, phir be baadshaahi ka nasha। ham jaante hain ham abhi baap ke saamne baithe hain। deh-abhimaan ab nikal raha hai। ham aatmaayen is shareer ke saath chakra lagaate, part bajaate-bajaate ab hamaara baap bhi sammukh baitha hai। baap ke saath khushi hoti hi hai varse ki। bachche jab bade hote hain to buddhi mein aata hai ham barrister ka, engineer ka, baadshaah ka bachcha hoon। main baadshaahi ka maalik hoon। yahaan tum jaante ho baap se hamko svarga ka varsa milta hai। baap ko dekhne se bachchon ko sthaai khushi honi chaahiye, isko hi roohrihaan kaha jaata hai। jo supreme baap hai sabka, woh baith aatmaon se baat karte hain। aatma is shareer dvaara sunti hai। yeh ek hi baar aisa hota hai ki baap ko yaad karte-karte jab woh aate hain aur nazar milaate hain to 21 janmon ke liye varsa de dete hain। yeh tum bachchon ko yaad rehna chaahiye। bachche jo hain woh bhool jaate hain, bhoolna nahin chaahiye। baba ki nazar ke saamne hone se hi samajhte hain ham baba ke saath baithe hain। baba ko dekhne se khushi ka paara chadhta hai aur baap baith nai-nai points samjhaate hain। baap se bachchon ka poora lav ho jaae। aatma apni dil poori kar de kyonki bichhudi hui hai। anek prakaar ke duhkh dekhe hain। ab sammukh baithe hain to dekhkar harshit hone chaahiye। baap ke sammukh hone se harshit hote ho va baap se door hone se bhi itna harshitapna rehta hai? vivek kehta hai baahar to bahut baaten sunte hain to buddhi aur taraph chali jaati hai। yeh jo madhuban mein bachche baithe hain, sammukh sunte hain। baba pyaar se kashish karte hain। dekho, tumhaara kitna meetha, kitna pyaara baba hai। tumko svarga mein jaane ke laayak bana rahe hain। bachche svarga ke maalik the। ab drama anusaar sab kuchh ganva diya hai। raajya ganvaana aur paana yeh to badi baat nahin। tum hi is baat ko jaante ho। duniya mein karodon aatmaayen hain, parantu koton mein koi mujhe pahchaanta hai। main kya hoon aur kaisa hoon, main jo hoon, jaisa hoon mere dvaara kya milta hai? yeh samajhte hue bhi wonder hai jo maaya bhula deti hai। aise nahin ki sammukh vaalon ko maaya bhulaati nahin hai। sammukh vaalon ko bhi maaya bhulaati hai। shivbaaba mein bhi poora lav hona chaahiye। lav kaise badhe jo baba se ham oonch varsa leven? baap kahenge khidmat (seva) karo। baap bachchon ki khidmat karte hain। bachche jaante hain, baba doordesh se aaya hai। nishchaybuddhi bachchon ko kabhi dagmag nahin hona chaahiye। moonjhana nahin chaahiye, parantu maaya bahut jabardasta hai। baba to shrangaar rahe hain। manushya ko devta banaate hain। yeh school hai hi devta banne ka। pavitra duniya ka maalik banne ke liye yeh mehnat hai। baba sirf kehte hain mujhe yaad karo। manushya jab marte hain to unko kehte hain raam ko yaad karo। parantu raam ko jaante hi nahin to yaad se koi phaayda hi nahin। tumko to baap ki poori pahchaan hai। tum aate hi ho shivbaaba ke paas। woh to niraakaar hai, creator hai। create kaise karenge? prajaapita brahma ko bhi creator kehte hain, brahma dvaara manushya srishti paida hoti hai, isliye prajaapita brahma kaha jaata hai। tum ab brahman bane ho। tumhaari aatma ab achhi reeti jaanti hai ki ham shivbaaba ke potre, brahma ke bachche bane hain। tum bachche chaahte ho hamaare vikarma vinaash ho jaaen aur ham vijay maala mein najdeek piro jaaen, to baba ko bahut yaad karna pade। phir tum karmayogi bhi ho। gharbaar sambhaalte pavitra rehna hai, kamal phool samaan। yeh misaal koi sannyaasiyon se nahin lagta hai। woh grihastha vyavhaar mein rehte kamal phool samaan pavitra rah nahin sakte। na kisko kah sakte hain। jo jaisa hai, woh aisa hi banaayega। sannyaasi yeh kah nahin sakte ki kamal sam pavitra raho। agar kahen brahm ko yaad karo, woh bhi ho nahin sakta। kahenge tumne to gharbaar chhoda hai, ham kaise chhoden? tum hi ghar grihastha mein rah nahin sake to doosron ko kaise kah sakte। woh raajayog ki shiksha de na saken। abhi tum sabhi dharma vaalon ke raaz ko samajh gaye ho। har ek dharma ko phir apne samay par aana hai। kaliyug se phir satayug hona hai। satayug ke liye chaahiye aadi sanaatan devi-devta dharma aur koi dharma vaale manushya ko devta bana nahin sakte। unhon ko jaana hi mukti mein hai, sukh hai hi svarga mein। jab ham devi-devta banen tab doosre dharma vaale mukti mein jaayen। jab tak ham jeevanmukti dhaam svarga mein nahin gaye hain tab tak koi mukti mein ja nahin sakte। svarga aur narka ikattha rah nahin sakte। ham jeevanmukti ka varsa paayenge to jeevanbandh vaale rahne nahin chaahiye। tum jaante ho is samay hai sangam। tum hi kalpa ke sangam par baba se milte ho, doosre koi mil na saken। doosre samajhte hain yeh to kaliyug hai। ham abhi kaliyug mein nahin hain। baba se svarga ke liye phir se varsa pa rahe hain। ham jeete ji markar baap ke bane hain। jo adopt hote hain unhein donon jahaanon ka maaloom padta hai। phalaane ke the, ab phalaane ke bane hain। woh apne mitra sambandhi aadi sabko jaante hain, donon taraph ka maaloom rehta hai। tum bachche jaante ho is duniya se hamne langar utha liya hai। abhi ham ja rahe hain। isse hamaara koi tailuk nahin hai। yeh bhagwan apne bachchon se yaani parampita paramatma saaligraam bachchon se baat kar rahe hain। bhagwan ko aana hai, parantu jaante nahin hain। baap ko na jaanne kaaran moonjh padte hain। itni sahaj baat koi bhi nahin samajhte। yaad karte hain। tum jaante ho ham aatma shareer lekar part bajaati hain। ham paramdham se aati hain। vahaan parampita paramatma bhi rehte hain। manushya to na aatma ko, na paramatma ko jaante hain। kaise bhagwan aakar milega? kya karega। koi bhi nahin jaante hain। geeta mein saara wrong likh diya hai। naam hi badal diya hai। baap poochhte hain tum mujhe jaante ho na? krishna thode hi aise kahenge - tum mujhe jaante ho? unko to saari duniya jaanti hai। woh gyaan de na saken। to zaroor samjhaana chaahiye, bhagwan roop badalta hai parantu krishna nahin banta। woh manushya ke tan mein aata hai, krishna ke tan mein nahin aate hain। yeh hai brahma। woh hai hi krishna ki aatma। sirf thodi si baat mein bhoole hain। yeh hai krishna ke 84 ven janma ki aatma, jo phir aadi mein krishna banta hai। antim janma mein krishna pad paane ke liye purushaartha kar rahe hain। yeh kitni gupta baaten hain। jara si baat bhool gai hai, ismen badi tirkambaaji hai।

tum jaante ho ham krishna ke gharaane ke the। ab shivbaaba se phir raajya bhaagya le rahe hain। hamaari buddhi mein krishna baithta nahin hai। manushya to kah dete hain krishna bhagvaanuvaach। kuchh bhi siddha nahin hota hai। geeta mein dikhaaya hai paanch paandav jaakar bache। kalpa ki aayu laakhon varsha de di hai। itni sahaj baat bhi manushya nahin jaante hain। tum kitna ishaare se samajh sakte ho ki ham hi sooryavanshi gharaane ke the, ab sooryavanshi se shoodravanshi mein aaye hain। phir brahman se devta bante hain। varnon ko bhi buddhi mein rakhna padta hai। unhon ne varnon ko bhi aadha kar diya hai। choti brahman aur shivbaaba ko bhool gaye hain। baaki devta, kshatriy, vaishya, shoodra dikha diya hai। brahman to zaroor chaahiye na। brahma ki aulaad kahaan gai। yeh koi ki buddhi mein nahin baithta। tumko baap achhi reeti samjhaate hain, tumko buddhi mein achhi reeti dhaaran karna hai। jo knowledge baap ki buddhi mein hai woh tumhaare mein bhi rahni chaahiye। main tum aatmaon ko aap samaan banaata hoon। jo srishti chakra ki knowledge mere mein hai, woh tumhaari buddhi mein bhi hai। buddhivaan chaahiye। baba ke saath yog bhi ho aur ghadi-ghadi vichaar saagar manthan hota rahe। tum ab sammukh baithe ho। samajhte ho baba to bilkul sahaj samjhaate hain। kehte bhi hain aatma paramatma… satguru dalaal ke roop mein padhaate hain। dalaal athva sauda karaane vaale। baap in dvaara aakar apne saath sauda karaate hain। tum jaante ho dalaal ko yaad nahin karna hai। dalaal dvaara hamaari sagaai hoti hai shivbaaba se। tum sab beech vaale dalaal ho। kehte hain parampita paramatma se tumhaara kya sambandh hai? tum sagaai karaane ki yukti rachte ho। phir prajaapita ka naam bhi dete ho। varsa shivbaaba se milta hai। svarga ka rachayita hi woh hai। jeev aatmaon ki paramatma ke saath sagaai hoti hai। sagaai ki thi, varsa paaya tha phir se paate hain।

tum jaante ho hamaara kalpa-kalpa, kalpa ke sangamayug ka yahi dhandha hai, aur koi bhi aatmaon ki paramatma se sagaai nahin karaate hain। sagaai bhi unse karaate hain jo vishwa ka maalik banaate hain। yeh hai oonche te oonch roohaani sagaai। roohaani sagaai karna kalpa-kalpa baap se hi seekhte hain। kalpa-kalpa aisa hota hai। kalpa-kalpa manushya se devta zaroor bante hain। devta phir se manushya bante hain। manushya to manushya hi hain। parantu kyon likha hai - manushya se devta kiye..... kyonki devta dharma sthaapan karte hain। tum bhi jaante ho is sagaai se ham manushya se devta ban rahe hain। sab kehte hain Christ se 3 hajaar varsha pahle bhaarat heaven tha, parantu buddhi mein nahin aata hai। bhaarat pahle svarga tha, abhi bhi kitne mandir banaate hain। parantu sabki utarti kala hai। hamaari hai chadhti kala। chadhti kala mein ek second lagta hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kabhi bhi kisi baat mein moonjh kar nishchay mein oopar neeche nahin hona hai। gharbaar sambhaalte, karmayogi hokar rehna hai। vijay maala mein najdeek aane ke liye pavitra zaroor banna hai।

2) buddhivaan banne ke liye gyaan ka vichaar saagar manthan karna hai। sada khidmat (seva) mein tatpar rehna hai। aap samaan banaane ki seva karni hai।

vardaan:- baba shabd ki smriti se had ke merepan ko arpan karne vaale behad ke vairaagi bhav

kai bachche kehte hain mera yeh gun hai, meri shakti hai, yeh bhi galti hai, parmaatma den ko mera maanna yeh mahaapaap hai। kai bachche saadhaaran bhaasha mein bol dete hain mere is gun ko, meri buddhi ko use nahin kiya jaata, lekin meri kehna maana maila hona - yeh bhi thagi hai, isliye is had ke mere-pan ko arpan kar sada baba shabd yaad rahe, tab kahege behad ki vairaagi aatma।

slogan:- apni seva ko baap ke aage arpan kar do to seva ka phal aur bal praapta hota rahega।